Matutum nga Pagpangita nga Nagbunga
Ginaagda ko kita tanan nga dalayon nga patubuon ang aton pagtuo kay Cristo, nga padayon nga nagabag-o sang mga kabuhi sang tanan nga nagapangita sa Iya.
Sumugod sang 1846, linibo ka pionero nga mga lalaki, babayi, kag kabataan ang nagkadto pa-weste sa Sion. Ang ila dako nga pagtuo nagpukaw sang ila wala tupong nga kaisog. Para sa iban, atong pagbiyahe wala gid natapos kay napatay sila antes makalab-ot didto. Ang iban, nga nag-agi sa dalagko nga mga kabudlayan, nagsulong nga may pagtuo.
Tungod sa ila, pila ka henerasyon pagkatapos, naagom sang akon pamilya ang mga bugay sang matuod nga ebanghelyo ni Jesucristo.
Pareho sang isa ka pamatan-on nga hinambitan ko karon, 14 ako sang nagsugod ang akon mga pamangkot parte sa akon relihiyon kag pagtuluohan. Nagasimba ako sa isa ka sekta nga malapit sa akon balay, pero gusto ko magtambong sa lainlain nga mga simbahan.
Isa ka hapon, nakita ko ang duha ka bataon nga lalaki nga nagaamerikana kag puti nga kamisedentro nga nagsulod sa balay sang akon kaingod. Ining bataon nga mga lalaki dawsa—kapinasahi.
Dason nga adlaw, nagkitaay kami sang akon kaingod, nga si Leonor Lopez, kag ginpamangkot sia parte sadtong duha ka lalaki. Nagpaathag si Leonor nga mga misyonero sila sang Ang Simbahan ni Jesucristo sang mga Santos sa Ulihing mga Adlaw. Malipayon niya ako nga ginsugiran nga ang iya pamilya ginbunyagan sa Simbahan sang nagligad nga tuig. Bangud nakita nga interesado ako, gin-agda ako ni Leonor nga makigkita sa mga misyonero kag magtuon parte sa Simbahan.
Pagligad sang duha adlaw, nag-upod ako sa pamilya Lopez sa pagpakigkita sa mga misyonero. Ginpakilala nila ang ila mga kaugalingon nga si Elder John Messerly halin sa Ogden, Utah kag Elder Christopher Osorio halin sa Walnut Creek, California. Indi ko gid sila malimtan.
Tungod 14 lang ako, nagpamilit si Elder Messerly nga makadto kami sa tupad balay sa akon puluy-an agud mahibal-an ni nanay nga ginatudloan nila ako. Didto, malulo niya nga ginpaathag nga nagkadto sila agud magpaambit sang mensahe parte kay Jesucristo kag nangayo sang permiso nga tudloan ako. Nagsugot si nanay kag nag-upod pa gani sa amon samtang ginatudloan nila ako.
Una nga ginpangabay sang mga misyonero si Leonor nga maghatag sang pangamuyo. Natandog gid ako sing tuman tungod kay ang iya pangamuyo indi sulit-sulit nga ginsaulo nga mga pulong kundi pagpautwas halin sa iya tagipusuon. Nabatyagan ko nga nagapakighambal gid sia sa iya Amay nga Langitnon.
Ang mga misyonero dayon nagtudlo sa amon parte kay Jesucristo. Ginpakita nila ang Iya litrato nga nagtatak gid sa akon tungod litrato ini sang nabanhaw, buhi nga Cristo.
Nagpadayon sila sa pagtudlo sa amon kon paano gintukod ni Jesus ang Iya Simbahan sang dumaan nga panahon, nga Sia ang pangulo upod ang dose ka Apostoles. Gintudloan nila kami parte sa Apostasiya—kon paano ginkuha sa duta ang kamatuoran kag awtoridad ni Cristo pagkatapos nga napatay ang Iya mga Apostoles.
Ginsugiran nila kami parte sa 14 anyos nga bata nga ginhingadlan Joseph Smith nga sa una nga bahin sang 1800s, nagtambong sa nagkalainlain nga simbahan sa pagpangita sang kamatuoran. Sa pagligad sang panahon, si Joseph mas ginligban na gid. Pagkatapos nga mabasa sa Biblia nga sarang kita “magpangayo sa Dios”1 sang kaalam, si Joseph, nag-akto sa pagtuo, nagkadto sa kakahoyan agud magpangamuyo kag mamangkot kon diin sia nga simbahan dapat magbuylog.
Ginbasa sang isa sang mga misyonero ang pagsaysay ni Joseph sang natabo samtang nagapangamuyo sia:
“Nakakita ako sang haligi sang kasanag sa ibabaw mismo sang akon ulo, nga masobra pa sa kasanag sang adlaw, nga amat-amat nga nagpanaog tubtob nga nagsilak ini sa akon.
“… Sang nagsilak sa akon ang kasanag nakakita ako sang duha ka mga Persona, nga ang kasanag kag himaya imposible nga ilaragway, nga nagatindog sa ibabaw nakon sa kahawaan. Ang isa sa ila nagahambal sa akon, nga ginatawag ang akon ngalan kag nagsiling, nga nagatudlo sa isa—Ini ang Akon Hinigugma nga Anak. Pamatii Sia!”2
Sa tion sinang leksyon, ang Espiritu nagpamatuod sa akon sang pila ka kamatuoran.
Una, ang Dios nagapamati sa sinsero nga mga pangamuyo sang tanan Niya nga mga anak, kag ang tanan makabaton sang sabat—indi lang ang pila.
Ika-duha, Ang Dios nga Amay, si Jesucristo, kag ang Balaan nga Espiritu tatlo ka lainlain nga mga persona, nga nagaisa sa Ila katuyuan “nga ipahanabo ang pagkawala’y kamatayon kag wala’y katapusan nga kabuhi sang tawo.”3
Ika-tatlo, gintuga kita sa dagway sang Dios. Ang aton Amay nga Langitnon kag Iya Anak, nga si Jesucristo, may mga lawas nga unod kag mga tul-an pareho sa aton, pero nahimaya Sila kag nahimpit, kag ang Balaan nga Espiritu isa ka persona nga espiritu.4
Ika-apat, paagi kay Joseph Smith, ginpanumbalik ni Jesucristo ang Iya ebanghelyo kag matuod nga Simbahan sa duta. Ang awtoridad sang priesthood nga ginhatag sa mga Apostoles ni Cristo 2,000 katuig ang nagligad, amo gihapon ang priesthood nga ginhatag kay Joseph Smith kag Oliver Cowdery ni Pedro, Santiago, kag Juan.5
Katapusan, nakatuon kami parte sa isa pa ka testamento ni Jesucristo: Ang Libro ni Mormon. Ginsulat sang dumaan nga mga propeta, nagasugid ini parte sa katawhan nga nagkabuhi sa mga Amerika antes, durante, kag pagkatapos nabun-ag si Jesus. Halin sa sini natun-an namon kon paano nila ginkilala, ginhigugma, kag ginsimba si Cristo, nga nagpakita sa ila bilang ang nabanhaw nga Manluluwas.
Natandog gid ako sang Espiritu pagkahibalo ko sang ginsiling sang Manluluwas sa ila: “Yari karon, ako si Jesucristo nga ang mga manalagna nagsaksi nga magaabot sa kalibutan.”6
Ang mga misyonero naghatag sa amon sang kaugalinon namon nga kopya sang Libro ni Mormon. Ginbasa namon kag ginbaton ang pangagda nga makita sa katapusan sang Libro ni Mormon nga nagasiling:
“Kag kon inyo mabaton ining mga butang, ginalaygayan ko kamo nga mamangkot kamo sa Dios, ang Wala’y Katapusan nga Amay, sa ngalan ni Cristo, kon ining mga butang indi matuod; kag kon kamo mamangkot sa isa ka bunayag nga tagipusuon, sa matuod-tuod nga tinutuyo, nga may pagtuo kay Cristo, ipakita niya ang kamatuoran sini sa inyo, paagi sa gahum sang Balaan nga Espiritu.
“Kag paagi sa gahum sang Balaan nga Espiritu mahimo ninyo nga mahibal-an ang kamatuoran sang tanan nga mga butang.”7
Malapit na 45 anyos halin sang ako kag ang akon iloy una nga nakahibalo sang kalipay kag gahum sang pag-agom sang pagtuo kay Cristo. Bangod ato sa ila pagtuo kay Cristo nga ang pamilya Lopez nagpaambit sang ila bag-o nga pagtuluohan sa akon. Bangod ato sa ila pagtuo kay Cristo nga ining duha ka misyonero nagbiya sa ila mga puluy-an sa Estados Unidos agud pangitaon ako kag ang akon iloy. Pagtuo ato sang tanan sining mahal nga kaabyanan nga nagtanom sang gamay nga liso sang pagtuo sa amon nga karon nagtubo na nga mabakod nga kahoy sang wala katapusan nga mga bugay.
Durante sining makalilipay nga mga tinuig, naeksperiyensyahan namon nga, pareho sang ginpahayag ni Pangulong Russell M. Nelson: “Ang tanan nga maayo sa kabuhi—ang tagsa ka posible nga bugay nga may wala katapusan nga kahulugan—nagasugod sa pagtuo. Ang pagtugot sa Dios nga magpangibabaw sa aton mga kabuhi nagasugod sa pagtuo nga luyag Sia nga maggiya sa aton. Ang matuodtuod nga paghinulsol nagasugod sa pagtuo nga si Jesucristo may gahum nga magtinlo, mag-ayo, kag magpabakod sa aton.8
Ginaagda ko kita tanan nga dalayon nga patubuon ang aton pagtuo kay Cristo, nga nagbag-o sang kabuhi namon sang akon mahal nga iloy kag padayon nga nagabag-o sang kabuhi sang tanan nga nagapangita sa Iya. Nakahibalo ako nga si Joseph Smith amo ang Propeta sang Pagpanumbalik, nga si Pangulong Nelson amo ang aton propeta sa karon, nga si Jesus amo ang buhi nga Cristo kag aton Manunubos, kag ang Amay nga Langitnon buhi kag nagasabat sang mga pangamuyo sang tanan Niya nga mga anak. Nagapamatuod ako sining mga kamatuoran sa sagrado nga ngalan ni Jesucristo, amen.