Nagapangamuyo Ako nga Gamiton Niya Kita
Ang magagmay nga mga pagpanikasog kon matipon makahimo sing dako nga epekto, nga nagapakadaku sang madamo nga indibidwal nga mga butang nga ginahimo naton bilang mga disipulo ni Jesucristo.
Ini nga biskwit nga himo sa ginmasa nga phyllo kag mga pistachio ginhatag sa pagpasalamat. Ginhimo ini sang Pamilya Kadado nga, sa pila ka dekada, nagapanag-iya sang tatlo ka panaderya sa Damascus, Syria. Sang paggiyera, isa ka barikada ang nagpugong nga makalab-ot sa ila bahin sang siyudad ang pagkaon kag mga suplay. Nagsugod nga magutman ang pamilya Kadado. Sa kasagsagan sining desperado nga sitwasyon, ang Latter-day Saint Charities [Organisasyon sa Pagbulig sang mga Santos sa Ulihing mga Adlaw] kag pila ka maisog nga nga empleyado sa Rahma Worldwide nagsugod sa pagserbe adlaw-adlaw sang mainit nga kalan-on, upod ang gatas para sa magagmay nga kabataan. Pagkatapos sang mabudlay nga tion, ang pamilya nagsugod liwat sang ila kabuhi—subong man sang ila panaderya—sa isa ka bag-o nga pungsod.
Sang sini lang, isa ka kahon sang mga biskwit ang nag-abot sa mga opisina sang Simbahan upod sang masunod nga mensahe: “Sa masobra duha ka bulan, nagakuha kami sang pagkaon sa kusina sang Rahma–Latter-day Saint [Charities]. Kon wala ini sigurado nga napatay [na] kami sa gutom. Pahilog batona ining … sampol halin sa amon panaderya bilang gamay nga tanda sang pagpasalamat. Ginpangamuyo ko sa Dios nga Labing Gamhanan nga pakamaayuhon kamo … sa tanan ninyo nga ginahimo.”1
Biskwit sang pagpasalamat kag handumanan. Para ini sa inyo. Sa tanan nga nagpangamuyo pagkatapos nga makita ang istorya sa balita, sa tanan nga nagboluntaryo kon diin mabudlay ang sitwasyon ukon sa mga maluluy-on nga nagdonar sang pondo sa tawhanon nga bulig (humanitarian fund) nga nagasalig nga makabulig ini, salamat.
Diosnon nga Responsibilidad sa Pagtatap sa mga Imol
Ang Simbahan ni Jesucristo yara sa idalom sang diosnon nga mandato nga tatapon ang mga imol.2 Isa ini sa mga haligi sang buluhaton para sa kaluwasan kag pangkahitaasan.3 Ang matuod sa panahon ni Alma pat-od nga matuod man sa aton karon: “Kag sa amo, sa ila mauswagon nga mga sirkumstansya, wala nila ginatabog ang bisan sin-o nga mga hublas, ukon inang mga ginagutom, ukon inang mga ginauhaw, ukon inang mga nagamasakit, ukon inang mga wala mapakaon; kag wala nila ginapahamtang ang ila mga tagipusuon sa mga manggad; gani nangin maalwan sila sa tanan, alangay nga tigulang kag lamharon, alangay nga ulipon kag hilway, alangay nga lalaki kag babayi, bisan sa gwa sang simbahan ukon sa sulod sang simbahan, nga wala sing ginapasulabi nga mga tawo nahanungod sa sadtong mga nagakinahanglan.”4
Ang Simbahan nagatuman sining responsibilidad sa nagkalainlain nga pamaagi, lakip na:
-
Ang ministering nga aton ginahimo paagi sa Relief Society, mga korum sang priesthood, kag mga klase.
-
Ang pagpuasa kag paggamit sang mga halad-puasa.
-
Ang mga uma sa welfare kag mga pabrika sang de-lata.
-
Ang mga sentro sa pag-abiabi sa mga imigrante.
-
Ang programa sa pagbulig sa mga napriso.
-
Ang mga panikasog sang Simbahan sa paghatag sang tawhanon nga bulig.
-
Kag ang JustServe app, kon sa diin nga may ari sini, nga nagapabagay sang mga nagaboluntaryo sa mga oportunidad sa pagserbisyo.
Ining tanan mga pamaagi, nga gin-organisar paagi sa priesthood, sa diin ang ang magagmay nga mga pagpanikasog kon matipon makahimo sing dako nga epekto, nga nagapakadaku sang madamo nga indibidwal nga mga butang nga ginahimo naton bilang mga disipulo ni Jesucristo.
Ang mga Propeta May Pagkatinugyanan sa Bilog nga Kalibutan
Ang mga propeta may responsibilidad para mag-alagad sa bilog nga kalibutan, indi lamang sa mga miyembro sang Simbahan. Makasugid ako halin sa akon eksperiyensya kon ano kapersonal kag kadebotado sang Unang Pangulohan sa pagtuman sinang responsibilidad. Samtang nagadako ang mga panginahanglan, ang Unang Pangulohan nagmando sa aton nga dugangan ang aton pagpanikasog sa pagdab-ot sa isa ka talalupangdon nga paagi. Interesado sila sa pinakadalagko nga mga hitabo karon kag sa pinakagagmay nga mga detalye.
Sining karon lang, gindala namon sa ila ang mga protective medical gowns nga gintahi sang Beehive Clothing para gamiton sa mga ospital sa tion sang pandemya. Bilang isa ka doktor sa medisina, si Pangulong Nelson interesado gid kaayo. Indi niya luyag nga makita lang ini. Luyag niya ini tilawan nga suksukon—tan-awon ang mga pako kag ang kalabaon kag kon paano ini ihigot sa likod. Sang ulihi iya kami ginhambalan, nga puno sing emosyon, “Kon makigkita kamo sa mga tawo sa inyo mga katungdanan, pasalamati sila sa ila pagpuasa, sa ila mga halad, kag sa ila pagminister sa ngalan sang Ginuo.”
Report sa Pagtatap sa Katawhan
Sa direksyon ni Pangulong Nelson, ginapahibalo ko sa inyo kon paano Ang Simbahan ni Jesucristo sa Ulihing mga Adlaw nagaresponde sa mga bagyo, mga linog, mga pagdalangdalang sang mga bakwit—kag bisan sa pandemya—salamat sa kaayo sang mga Santos sa Ulihing mga Adlaw kag sa madamo nga kaabyanan. Samtang ang masobra 1,500 ka proyekto para sa COVID-19 amo ang ginatuonan sing labi sang bulig sang Simbahan sang nagligad nga 18 ka bulan, ang Simbahan nagresponde man sa 933 ka mga kalamidad kag mga krisis sang mga bakwit sa 108 ka mga pungsod. Pero ang estadistika wala nagasugid sang tanan nga nagakalatabo. Tugoti ako nga ipaambit ang apat ka malip-ot nga mga halimbawa agud ipakita ang pinakagamay nga mga ginahimo sa karon.
Bulig sa Tion sang COVID sa South Africa
Ang disesais-anyos nga si Dieke Mphuti sang Welkom, South Africa, nadulaan sang mga ginikanan tinuig na ang nagligad, nga nagbilin sa iya sa pag-atipan sang iya tatlo ka manghod nga isahanon. Mabudlay pirme ang magpangita sang pagkaon, apang halos nangin imposible pa gid dala sang kakulang sang suplay bangud sa COVID kag mga pagkuwarentina. Masami sila ginagutom, nagamantiner lamang sa kaalwan sang mga kaingod.
Sa isa ka mainit nga adlaw sang Agosto 2020, si Dieke nasorpresa sang may nanuktok sa iya pwertahan. Ginbuksan niya ini kag nakita ang duha ka estranghero—ang isa representante sang Simbahan halin sa area office sang Johannesburg kag ang isa opisyal halin sa Department of Social Development sang South Africa.
Ang duha ka organisasyon nag-updanay sa paghatag sang pagkaon sa labing nagakinahanglan nga mga panimalay. Nakabatyag sing kaumpawan si Dieke samtang ginatulok niya ang nagatangkas nga ginaling nga mais kag iban pa nga mga panguna nga pagkaon nga ginpamakal gamit ang pondo sang tawhanon nga bulig sang Simbahan. Magabulig ini sa iya nga masustentohan ang iya pamilya sa pila ka semana tubtob ang bulig sang gobyerno magaabot sa iya.
Ang istorya ni Dieke isa sa linibo sinang kasubong nga eksperiyensya nga nagkalatabo sa bilog nga kalibutan sa tion sang pandemya sa COVID salamat sa inyo ginkonsagrar nga mga kontribusyon.
Bulig sa mga Afghan sa Ramstein
Nakita naton tanan sa mga larawan sa balita sining karon lang—ang linibo nga mga bakwit nga ginapanguha halin sa Afghanistan. Madamo ang nag-alabot sa mga base-pangkahanginan (air base) ukon temporaryo nga mga lokasyon sa Qatar, sa Estados Unidos, Germany, kag Espanya antes magdiresto sa ila katapusan nga destinasyon. Ang ila mga panginahanglan insigida, kag ang Simbahan nagresponde paagi sa mga suplay kag mga nagaboluntaryo. Sa Ramstein Air Force Base sa Germany, ang Simbahan naghatag sang dako nga donasyon sang mga diaper, gatas para sa lapsag, pagkaon, kag mga sapatos.
Natalupangdan sang pila ka mga sister sa Relief Society nga madamo sa mga babayi nga Afghan ang nagagamit sang mga kamesita sang ila mga bana agud tabonan ang ila mga ulo tungod ang ila tradisyunal nga mga takdong nalalas sa pagkinagula sa airport sang Kabul. Sa buhat sang pagpakig-abyan nga nagtabok sang ano man nga dulunan sang relihiyon ukon kultura, ang mga sister sang Ramstein First Ward nagtipon agud magtahi sang tradisyunal nga mga panapton sang Muslim para sa Afghan nga mga babayi. Si Sister Bethani Halls nagsiling, “Amon nabatian nga ang mga babayi nagakinahanglan sang mga panapton para sa pagpangamuyo, kag nagapanahi kami agud mangin [komportable]sila sa pagpangamuyo.”5
Bulig sa Linog sa Haiti
Ining madason nga ehemplo nagapakita nga indi mo kinahanglan nga mangin manggaranon ukon tigulang agud mangin instrumento para sa kaayohan. Ang dise-otso ka tuig nga si Marie“Djadjou” Jacques taga Cavaillon Branch sa Haiti. Sang nag-igo ang makahalalit nga linog malapit sa iya banwa sang Agosto, ang balay sang iya pamilya isa sa napulo ka libo nga mga bilding nga nagkalarumpag. Daw halos imposible hunahunaon ang kawalay paglaum sang mawad-an sang puluy-an. Apang imbes nga magpadala sa sinang kawalay paglaum, si Djadjou—makadalayaw—nga nagtinguha pa nga magbulig sa iban nga nahalitan.
Associated Press
Nakakita sia sang kaingod nga tigulang nga ginabudlayan kag nagsugod sa pagtatap sa iya. Nagbulig sia sa iban sa pagpanghawan sang mga nagkalarumpag. Walay sapayan sang iya kalapyo, nag-upod sia sa iban nga mga miyembro sang Simbahan sa pagpanagtag sang pagkaon kag mga hygiene kit sa iban. Ang istorya ni Djadjou isa lang sa madamo nga mabaskog nga ehemplo sang pagserbisyo nga ginhimo sang pareho mga lamharon kag bataon nga mga hamtong sa ila pagpaninguha nga sundon ang halimbawa ni Jesucristo.
Bulig sa Baha sa mga Aleman
Pila lang ka semana antes sang linog, isa pa ka grupo sang bataon nga mga hamtong ang nagahatag sang pareho nga serbisyo sa tabok sang Atlantika. Ang mga baha nga naghapay sang nakatundan nga Europa sang Hulyo amo ang pinakagrabe sa sulod sang mga dekada.
Sang naghubas na ang tubig, isa ka tindero sa banwa malapit sa suba sang Ahrweiler, Germany, ang nag-usisa sang kahalitan kag tuman nga nahalawhaw. Ining mapainubuson nga tawo, isa ka debotado nga Katoliko, mahinay nga nagpangamuyo nga kuntani ang Dios magapadala sing tawo nga makabulig sa iya. Sa madason gid nga aga, si Pangulong Dan Hammon sang Germany Frankfurt Mission nag-abot sa dalan nga may dala nga grupo sang mga misyonero nga nagasuksok sang dalag nga Helping Hands nga tsaleko. Ang tubig naglab-ot sa 10 ka tapak (3 metros) sa dingding sang tindero, nga nagbilin sang madamol nga lutak. Ginpala sang mga boluntaryo ang lutak, ginkakas ang karpet kag mga dingding nga kahoy, kag ginpanumpok ang tanan sa dalan para mapanguha. Ang sobra kamalipayon nga tindero nag-obra upod sa ila sing inoras, nahalawhaw nga ang Ginuo nagpadala sang isa ka grupo sang Iya mga alagad sa pagsabat sang iya pangamuyo—kag sa sulod sang 24 ka oras!6
“Ti, nagapangamuyo ako na gamiton Niya kita”
Tuhoy sa tawhanon nga mga bulig sang Simbahan, si Elder Jeffrey R. Holland sadto nagsiling: “Ang mga pangamuyo ginasabat … sa masami … sang Dios paagi sa iban nga tawo. Ti, nagapangamuyo ako na gamiton Niya kita. Nagapangammuyo ako nga kita ang mangin sabat sa mga pangamuyo sang mga tawo.”7
Mga kauturan, paagi sa inyo pag-alagad, mga donasyon, oras, kag pagpalangga, nangin sabat kamo sa madamo kaayo nga pangamuyo. Pero madamo pa gid kaayo ang dapat nga himuon. Bilang mga miyembro sang Simbahan, napaidalom kita sa kasugtanan nga tatapon ang mga nagakinahanglan. Ang aton indibidwal nga paghimud-os indi pirme nagakinahanglan sang kwarta ukon malayo nga lugar8 pero nagakinahanglan gid ini sang paggiya sang Balaan nga Espiritu kag kabubut-on nga maghambal sa Ginuo: “Ari ako, ipadala ako.”9
Ang Tuig sang Kahamuot sang Ginuo
Ang Lucas 4 nagasulat nga si Jesus nagkadto sa Nasaret, sa diin sia nagdako, kag nagtindog sa sinagoga agud magbasa. Malapit yadto sa panugod sang Iya mortal nga pag-alagad, kag ginsambit Niya ang isa ka dinalan sa libro ni Isaias:
“Ang Espiritu sang Ginuo yari sa akon, tungod kay ginpili niya ako sa pagwali sang maayong balita sa mga imol; ginpadala niya ako [sa pag-ayo sang mga napaslawan,] sa pagpahibalo sang kahilwayan sa mga bihag, kag sa pag-ayo sang panulok sang mga bulag, sa paghilway sang mga ginapigos,
“[Sa pagbantala sang tuig nga nahamut-an sang Ginuo]. …
“… Ini nga dinalan sang kasulatan natuman karon nga adlaw samtang ginapamatian ninyo ang pagbasa sini.”10
Nagasaksi ako nga ang balaan nga mga kasulatan nagakatuman man sa aton kaugalingon nga panahon. Nagasaksi ako nga si Jesucristo nagkari sa pag-ayo sa mga napaslawan. Ang Iya ebanghelyo nagatuyo nga iuli ang panulukan sang mga bulag. Ang Iya Simbahan nagatuyo sa pagwali sang kaluwasan sa mga bihag, kag ang Iya mga disipulo sa bug-os nga kalibutan nagatinguha sa paghilway sa ila nga mga ginpigos.
Tugoti ako nga maghingapos paagi sa pagsulit sang ginpamangkot ni Jesus sa Iya Apostoles nga si Simon Pedro: “Ginahigugma mo bala ako?”11 Ang kahulugan sang ebanghelyo nagalakip sang kon paano naton sabton inang pamangkot sa aton kaugalingon kag “tatapon ang [Iya] karnero.”12 Nga may dako nga pagtahod kag gugma kay Jesucristo nga aton Manunudlo, ginaagda ko ang tagsa sa aton nga mangin kabahin sa Iya halangdon nga pag-alagad, kag “nagapangamuyo ako nga gamiton Niya kita.” Sa sagrado nga ngalan ni Jesucristo, amen.