Magpalapit kay Cristo kag Magdala sang Upod
Ang pinakamaayo nga paagi agud mapauswag ninyo ang kalibutan amo ang ihanda ang kalibutan para kay Cristo paagi sa paghagad sang tanan nga magsunod sa Iya.
Nakabaton ako sini lang sang sulat halin sa isa ka mausisaon nga lamharon nga babayi. Iya ginsulat: “Indi ako makapadayon. … Indi ako sigurado kon sin-o ako, pero nabatyagan ko nga ari ako diri para sa dako nga katuyoan.”
Nakaagi na bala kamo sinang balatyagon, nga nagahunahuna kon kilala kamo sang Amay nga Langitnon kag kon kinahanglan Niya kamo? Pinalangga kong mga lamharon, kag sa tanan, nagasaksi ako nga ang sabat sini amo nga huo! Ang Ginuo may plano para sa inyo. Ginhanda Niya kamo para sa sini nga tion, subong gid, agud mangin kusog kag puwersa para sa kaayohan sa Iya gamhanan nga buluhaton. Kinahanglan namon kamo! Indi ini mangin amo sini kadako kon wala kamo!
Sa idalom sang sagrado nga mga sirkumstansya, ang aton pinalangga nga propeta nga si Pangulong Russell M. Nelson, nagpahanumdum sa akon sing duha ka simple nga kamatuoran nga amo ang pundasyon sang inyo dako kag mahimayaon nga buluhaton.
Samtang nagapungko ako sa sopa upod sang akon bana, ang aton propeta nagbutong sang iya pulungkoan, lapit kaayo sa amon, kag nagtulok sa akon sa iya nagadulot nga asul nga mga mata. Indi ako sigurado kon ginkulbaan ako ukon nagdulog ang akon korason sang gintawag niya ako nga mag-alagad bilang Pangkabilogan nga Pangulo sang Young Women. May pamangkot sia nga nagatudok pa gihapon sa akon tagipusuon, “Bonnie, ano ang pinakaimportante nga dapat mahibal-an sang [mga lamharon]?”
Naminsar ako sing makadali kag nagsiling, “Kinahanglan nila nga mabal-an kon sin-o sila.”
“HUO!” siling niya, “kag kinahanglan nila mabal-an ang ila katuyoan.”
Ang Aton Diosnon nga Pagkatawo
Ginpakaali kamo, pinalangga nga anak sang Amay nga Langitnon. Palangga gid Niya kamo sa bagay nga ginpadala Niya ang Iya Anak nga si Jesucristo agud magbayad sang inyo kag akon mga sala.1 Walay kapaslawan ang gugma sang Manluluwas sa aton—bisan pa kon mapaslawan kita! Wala sing makapahamulag sa aton sa gugma sang Dios.2 Ang pagdumdum sining gugma makabulig sa inyo nga pakigbatoann ang pagkagumon sang kalibutan nga nagatilaw nga paluyahon ang inyo pagsalig sa inyo diosnon nga pagkatawo kag bulagon kamo sa inyo potensyal.
Sa isa ka FSY nga komperensya, nakilala ko ang duha ka lamharon nga babayi nga ginabudlayan. Pareho sila nga nagsiling nga ginabasa nila ang ila patriarchal blessing agud masalapoan liwat ang gugma kag giya sang Ginuo sa ila sa personal. Pangitaa ang inyo patriarchal blessing, basi ginayab-ukan na ini, kag tun-i ini pirme. Kon wala pa kamo sini, magkuha na—gilayon. Indi pagpadugayi nga mahibal-an kon ano ang luyag ipahibalo sang Ginuo sa inyo subong parte sa kon sin-o kamo.
Ang Aton Walay Katapusan nga Katuyoan
Ang ika-duha nga kamatuoran nga ginhambal ni Pangulong Nelson sa amon sina nga adlaw amo ang hibaluon ang aton katuyoan. Ini ang aton dako kag dungganon nga responsibilidad.
Madamo na nga tinuig ang nagligad, ang akon anak nga si Tanner lima lamang ka tuig sang primero sia naghampang sang soccer. Nalipay gid sia!
Pag-abot namon sa hampang, nakita namon nga ang iya grupo nagagamit sang regular nga soccer goal—indi ang pangbata nga goal kundi ang dako kaayo nga net nga tama ka dako para sa lima ka tuig nga kabataan.
Ang hampang nangin seryoso kag importante kaayo sang nakita ko si Tanner nga nagpuwesto bilang goalie. Nakibot gid ako. Naintiendihan bala niya matuod ang iya katuyoan sa pagbantay sa may net dampi?
Naghuni ang pito, kag nalingaw gid kami sa hampang nga nalipatan na namon si Tanner. Gulpi lang isa sang mga kontra sa pihak nga grupo nagkuha sang bola kag gindribol ini sing madasig pakadto sa iya. Nagtan-aw ako sa direksyon ni Tanner agud sigurohon nga handa sia sa pagdepensa sang goal. May nakita ako nga wala ko ginpaabot.
Samtang nagapadayon ang hampang, si Tanner nalingaw sa paglusotlusot sang iya wala nga butkon sa mga buho-buho sang net. Amo man ang ginhimo niya sa iya tuo nga butkon. Dayon, ang iya wala nga tiil. Sang ulihi, ang iya tuo nga tiil. Nagumon na gid si Tanner sa net. Nalipatan na niya ang iya katuyoan kag kon ano ang ginsalig sa iya nga hilimuon.
Bisan nga wala magdugay ang karera ni Tanner sa soccer, ang leksyon nga nakuha ko sa iya sina nga adlaw indi gid madula. Tanan kita kon kaisa nagakalipat kon ngaa ari kita diri kag ginatutok ang aton mga enerhiya sa lain nga mga bagay. Isa sa pinakagamhanan nga armas ni Satanas amo ang lingawon kita sang maayo kag mas maayo nga mga kawsa nga, sa tinion sang pagkinahanglan, mahimo magbulag kag magpapalayo sa aton gikan sa pinakamaayo nga katuyoan—ang mismo katuyoan kon ngaa natawo kita sa sini nga kalibutan.3
Ang aton walay katapusan nga katuyoan amo ang magpalapit kay Cristo kag aktibo nga magbuylog sa Iya sa Iya dako nga buluhaton. Simple lang ini pareho sa paghimo sang gintudlo ni Pangulong Nelson: “Sa bisan ano nga tion nga may himuon kita nga makabulig sa bisan sin-o … nga maghimo kag magtipig sang ila mga kasugtanan upod sa Dios, nagabulig kita sa pagtipon sang Israel.”4 Kag kon himuon naton ang Iya buluhaton upod sa Iya, mas makilala kag mapalangga pa gid naton Sia.
Dalayon kita nga magatinguha nga magpalapit pa gid sa Manluluwas paagi sa pagtuo, hamili nga paghinulsol, kag pagtuman sang mga kasugoan. Kon ihugpong naton ang aton mga kaugalingon sa Iya paagi sa mga kasugtanan kag mga ordinansa, mapun-an ang aton mga kabuhi sang dugang nga pagsalig,5 proteksyon,6 kag dako kag dayon nga kalipay.7
Kon magpalapit kita sa Iya, makita naton ang iban paagi sa Iya mga mata.8 Magpalapit kay Cristo. Magpalapit na, pero mag-upod sang iban!9
Ang ebanghelyo ni Jesucristo indi nga basta lang manami; ini importante para sa tanan. “Wala na sing iban pa nga paagi ukon mga pahito nga sa sini [kita] mahimo nga maluwas, lamang sa kalalangan kag paagi kay Cristo.”10 Kinahanglan naton si Jesucristo! Kinahanglan sang kalibutan si Jesucristo.11
Tandai, ang pinakamaayo nga paagi agud mapauswag ninyo ang kalibutan amo ang ihanda ang kalibutan para kay Cristo paagi sa paghagad sang tanan sa pagsunod sa Iya.
May istorya sa Libro ni Mormon nga mabaskog nga nagasugid parte sa nabanhaw nga Manluluwas nga naghinguyang sang tion upod sa mga Nefinhon. Mahunahuna bala ninyo kon daw ano ina?
Sang si Cristo nag-anunsyo nga kinahanglan Sia magbalik sa Amay, “ang iya panulok ginpalibot niya liwat.”12 Pagkakita Niya sang mga luha sa mga mata sang mga tawo, nakahibalo Sia nga ginahandum sang ila mga tagipusuon nga magpabilin Sia.
Namangkot Sia: “May mga masakiton bala dira sa inyo? Dalha sila diri. May mga lupog bala kamo, ukon bulag, … bungol, ukon mga may kon ano man nga sari sang ginaantos? Dalha sila diri kag paayuhon ko sila.”13
Tungod dako ang iya kaluoy, wala Sia nagbutang sang mga limitasyon kag nagpanawagan Sia sa tanan “nga may kon ano man nga sari sang ginaantos.” Nanamian ako nga wala sing ginapili ang pagbulong ni Jesucristo.
Nakahibalo man Sia sang aton pag-antos kag nagapanawag, Dalha diri ang nagakabalaka kag nasubuan, ang nakapoy, ang bugalon kag wala mahangpan, ang ginamingawan, ukon inang “may kon ano man nga sari sang ginaantos.”
Kag ang tanan “dulungan nga nagpalapit, … ; kag ginpaayo niya sila ang tagsa-tagsa. …
“… Alangay sila nga mga ginpaayo kag sila nga mga wala sing masakit, nagyaub sa iya tiilan, kag nagsimba sa iya.”14
Kada mabasahan ko ini, ginapamangkot ko ang akon kaugalingon: Sin-o ang dal-on ko kay Cristo? Sin-o ang imo dal-on?
Puwede bala nga tan-awon naton liwat ang palibot, pareho kay Jesus, agud sigurohon nga wala sing may nalaktawan kag ang tanan naagda nga kilalahon Sia?
Luyag ko magpaambit sang isa ka halimbawa nga magapakita kon ano ini ka simple. Ang akon 15 anyos nga abyan nga si Peyton may lalab-uton nga magbasa sing lima ka bersikulo sang balaan nga kasulatan sa pamahaw kada adlaw, pero wala niya ini ginhimo nga sia lang. Pagtulutan-aw niya liwat, gin-agda ni Peyton ang iya mga ginikanan kag mga utod, bisan ang iya utod nga lalaki nga lima ka tuig. Ining daw gamay lang nga buhat amo ang gintudlo ni Cristo sang nagpangagda Sia, “Dalha sila diri.”
Ining imbitasyon halin sa Ginuo nagapadayon tubtob subong. Mga lamharon nga babayi kag lalaki, sugdi ninyo subong, sa inyo mismo puluy-an. Magapangamuyo kag magapamangkot bala kamo sa Amay nga Langitnon kon paano ninyo suportahan ang inyo mga ginikanan samtang padayon sila nga nagapalapit kay Cristo? Kinahanglan nila kamo pareho nga kinahanglan ninyo sila.
Gani tan-awa liwat ang inyo mga utod, mga abyan, kag mga kasilingan. Sin-o ang inyo dal-on kay Cristo?
Ang aton Manluluwas nagpahayag, “Yari karon ako ang kapawa; nagpahamtang ako sang halimbawa para sa inyo.”15 Mabatyagan naton ang gugma kag paghidaet sang Manluluwas kon magbuylog kita sa Iya sa pagluwas sang pamilya sang Dios, kay nagpromisa Sia, “Sia nga nagasunod sa akon indi maglakat sa kadudulman, kundi may kapawa nga nagahatag sang kabuhi.”16
Daw ano ka mahimayaon nga tion nga magpakigbahin sa kawsa ni Cristo!
Huo, ari kamo diri para sa dako nga katuyoan. Nagabuylog ako kay Pangulong Nelson, nga nagsiling: “Kinahanglan kamo sang Ginuo agud bag-uhon ang kalibutan. Kon batunon ninyo kag sundon ang Iya pagbuot para sa inyo, marealisar ninyo nga nahimo ninyo ang imposible!”18
Maisog ako nga nagapamatuod nga ang Ginuo nakahibalo kon sin-o kamo kag palangga kamo Niya! Sing ulolupod, isulong naton ang Iya katuyoan tubtob sa sinang dako nga adlaw kon si Cristo Mismo magbalik sa sining duta kag magpanawag sa tagsa sa aton nga magpalapit “diri.” Malipayon kita nga magatililipon, kay kita ang mga nagpalapit kay Cristo, kag wala kita nagpalapit nga kita lang. Sa ngalan ni Jesucristo, amen.