“Mwe luti ke Wosasuc Luhk uh”
(Doctrine and Covenants 42:12)
Akwuck ke wosasuc el mwe kol se nuhke orekma wowo in srihkeyuhk sukohsohk in sulaclah luhn mwet uh.
Ke toeni luhlahp ke Alu luhn Jisus Kraist luhn Mwet Luhlahlfongi ke Lwen Sahflah ke Ohktopa yac 1849 ah, Elder John Taylor ke U luhn Mwet Sap Singucul Luo ah tuh pahng in ikucslah muhtuhnfwacl luhn acn France nuhke lutiyacn wosasuc lal Jisus Kraist. Sie kunohkohn lal ah pa in ahkwoyelah puk luhn alu ma oreklac emeet ke muhtuhnfacl se inge. Elder Taylor ahkolah ac suhmuhslah artikuhl se ke yac 1851 ah in sang tohpohklah kihsensiyuck ma wacna muhta siyuhkyuhk sel ke Alu uh. Ac ke apkuhran in sun sahflahiyacn sihm lal ah, Elder Taylor el esamwack ke sie ma sikyak:
“Ke kuhtuh yac somlah ah, fin acn Nauvoo, sie mukul ma wi Legislature, el siyuhk sel Joseph Smith lah el kol fuhkah mwet puhkantwen, ac in oruh tiac fohs; fahk pacna ke pacl sac muh arlac upac nuh seltahl in oruh ke oacna sie acn. Pahpah Smith el topuk fahk lah arulacna fihsrwacsr in oruh ma se inge. ‘Fuhkah?’ mukul sac siyuhk; ‘nuh sesr arulacna upac.’ Pahpah Smith el fahk, ‘Nga lotweltahl akwuck pwacye, ac elos sifacna liyacltahlwacng.’”1
Nga pruhe tuh Nguhn Muhtahl e fah luti kuht ac pahtok kuht kais sie ke nga ahkuhtweyac yohk srihpaciyacn orekma luhn mwe luti ke wosasuc fohlohkihnyuckyak luhn Jisus Kraist.
Akwuck
Leum El ahkkahlwemye nuh sel Mwet Pahluh Joseph Smith lah “elders, pris,ac mwet luti ke alu se inge enenuh in luti akwuck ke wosasuc luhk, suc asr ke Pwacpuhl ac ke Puk luhn Mormon, suc pa inge fohnlah luhn wosasuc.”2 El fahk pac lah Mwet Luhahlfongi ke Lwen-sahflah enenuh in “lutiyuck yohk ke ma pwacye, akwuck, mwe luti, ke masap luhn wosasuc uh, ke ma nuhkwewa ma kuhpahsr nuhke tohkohsrahi luhn God, ma enenuh kom in kahlwem kac.”3
Fwackyucklac fototo ac kahlwem, akwuck ke wosasuc el mwe kolyuck se nuhke orekma wowo in srihkeyuck sukohsohk in sulaclah luhn mwet uh. Mwe luti ma itucklac liki mwe lutlut yohk ke alu uh ac sang kolyuck ac masap ke kuht fahsr nuh met ke innek pwacye.
Sie mwe srihkasrak, ma tulo emeet ke Ip yohk ke Luhlahlfongi fahkwack ma yohk ke mwe lutlut ke wosasuc fohlohkyak luhn Jisus Kraist: ma orwaclah sifac luhn God ke ip yohk ke luhlahlfongi se met, ma tuhkuh ke Puhtatlac lal Adam ac Eve ke ip yohk ke luhlahlfongi ahkluo, ac mwe insewowo ma utuckuc ke Iwaclah lal Jisus Kraist ke ip yohk ke luhlahlfongi ahktolu.4 Ac ip yohk ke luhlahlfongi ahkahkosr tahkuhnlah akwuck emeet ah—mwe kolyuck nuhke orekmakihnyen luhlahlfongi ke Jisus Kraist ac auliyak—ac akwuck emeet ke pristut ma oruh Iwaclah luhn Jisus Kraist in mokle moul lasr.5
Kahs in Lahlmwetmwet pa sie pac mwe srihkasrak ke ip yohk ke akwuck ke mwe kolyuck. Nuhnak muhnahs liye muhtwacwacackiyacn fohs ke section 89 ke Doctrine ac Covenants:
“Utuckuh in oruh mwe luti se ma oasr olwelah kac, oreklac nuh ke luhpan ma muhnahs ac muhnahs emeet ke mwet luhlahlfongi, suc pa ac kuh in pahngpahng mwet luhlahlfongi.
“Liye, pwacyena, ohinge Leum El fahk nuh suwos: Ke mwacta ac lwemlwem suc oasr ac tuhfah sikyak lun insiacn mwet pwacpa suhlallacl ke lwen sahflah an, Nga sensenkihn nuh sum tari, ac sulkackihn inge nuh suwos, in usot nuh suwos kas in lahlmwetmwet se inge ke fwackyuck.”6
Mwe ahkuhtweyac ma tuhkuh tukun kahs in ikucslah ma sang mwe kolyuck nuhke kwewana woiyacn mahno ac nguhn ac fahkwack ke mwe insewowo ma tuhkuh ke kampare liyacacng akwuck uh.
Luti, kahlwem, ac moulkihn akwuck ke alu uh ahkfokokoye luhlahlfongi lasr ke Mwet Lahngo lasr, ahkyohkyelihk kuhiyacsr nuh Sel, ac suli in pohs mwe insewowo ac mwe sang ke nguhn nuhke moul lasr uh. Akwuck ke ohiyac wo kahsrwe kuht pac in liye pal liki kena lasr ke el use nuh sesr in liye ma pwacye ma pahtpaht ke kuht fahsr ke kain in ma sikyak nuh sesr, ma upac, sulaclah, ac ma kuht puhlakihn ke moul lasr fin facluh se inge.
Mwe srihkasrak ingena ke Luti Akwuck Pwacye
Mwe fahk se ma oreklac sel Mwet Pahluh Joseph Smith ke lutiyacn akwuck pwacye sahp pa sie mwe lutlut lal ma kwacna lutiyuck ingena. Ac kuht konwacack srihkasrak fokoko ke atac se inge ahkuhtweyac ke mwe fahkwack luhn mwet kuhlwacnsap luhn Leum misenge uh.
Ip Yohk ke Akwuck luhn Wacngihn-Lusrohngtwen
Prestuhn Dallin H. Oaks el sramsram ke toeni luhlahp ke yac 1998 ke kunohkohn luhn Aaronic Pristut ma kuhpahsr nuhke ahkoeyac ac kihtakatlah luhn kuhfa luhn Leum. El ahkuhtweyac mwe luti nuhke wacnighn-lusrohngtwen ac fahk lah sie mwet ma sruok Aaronic Pristut enenuh in tiac ke oacna sie ma ke ngwetngwet lal kuh elah lal in lusrong oacna sie mempuhr ke Alu uh liki alu lal ac ahksasucyeyacn olwelah lal. Prestuhn Oaks el oacyacpac fahk lah ip yohk ke akwuck nuhke los, nwacsnwacs, muhtahl, ac ahkfuhlwact.
Prestuhn Oaks el tiacna sang nuh sin mukul fuhsr uh sie tahk loeloes ah ke ma elos in oruh ac tiac oruh. El ahkuhtweyac ip yohk se inge ac nuhnkuh mukul fuhsr inge ac ninac ac pahpah tuhmwaclos ac mwet luti lalos in kuh ac in orekmakihn nuhnuhnkuh lalos sifacna in ukwe mwe kolyuhk uh.
El ahkuhtweyac: “Nga fah tiac ip srihsihkiyac masap uh, tuh ma sikyak ke kain in ward ac pracns fin facluh nohfohn ke alu uh arulacna sienna tuh sie masap ma arulacna fal nuhke acn se kuh in arulacna suhfal nuhke siena acn. Tuh, nga e fahk sie ip yohk ma fal nuhke mwe lutlut ke alu uh. Fin nohfohn na kahlwem ke akwuck se inge ac orekma fal nuhkac, e srihklac enenweyacn masap uh. Fin masap kuh kahs in kahsruh enenweyuhk nuh sin kais sie mwet, mwet kol lalos sifacna kuh in sang nuh seltahl, fal nuhke mwe lutlut ac akwuck ma kuhpahsr nuhkac uh.”7
Ip yohk ke Akwuck ke Sahpuht ke sie Akucl
Ke toeni luhlahp ke Eprel 2015 ah, Prestuhn Russell M. Nelson el luti kuht lah “lwen Sahpuht el lwen engan se.”8 El ahkuhtweyac pac lah el fuhkah kahlwemwack ke ip yohk se ke liyacacng lwen Sahpuht:
“Kuht e fuhkah oruh in muhtahl lwen Sahpuht uh? Ke nga srack fuhsr ah, nga lutlut ke orekma luhn mwet sahyac ma oraclah tahkuhnlah ma elos in oruh ac ma in tiac oruh ke Sahpuht. Tok kuhtuh fah nga etwacack ke ma suhmuhslah ah lah ma nga oruh ah ac elah luhk ke lwen Sahpuht ma ke akucl se inmahsrlok ac Pahpah tuhmasr Inkuhsrao. Ke nga eis mwe kahlwem se inge, nga tilac enenuh sie tahk nuhke ma ngacn oruh ac tiac oruh. Ke nga enenuh in sulaclah lah ma se inge fal nuhke Sahpuht kuh tiac, nga siyuck na nuh sihk sifacna, ‘Akucl fuhkah nga ke sang nuh sel God uh?’ Kihsensiyuck soko inge oruh sulaclah luhk ke Sahpuht kahlwem na upac.”9
Kihsensiyuhk fihsrwacsr tuh fokoko se lal Prestuhn Nelson inge ahkuhtweyac sie ip yohk ma fuhluhngyac tahfuh luo nuhkwewa ke kalmeacn Sahpuht ac meac kuht enenuh in oruh in ahkfuhlwactye Sahpuht. Kihsensiyuhk lal ahkfototoyelah mwe kolyuck ac masap ma e kuh in ahkinsewowoye kuht nohfohn ke kain in ma muh muhta sikyak nuh sesr uh.
Mwe luti ke Luhngse in Lwelah God Elan Kuhtanglah
Mahlwem ohnkohsr tari ah ke toeni luhlahp ah, Prestuhn Nelson el ahkuhtweyac ke engan lal ke el konwacack kalmac sasuc ke kahs se inge Israel. El fahk nuh sesr lah nguhn lal pihrihkyuck ke el lotwelah lah “ine se inge Israel luhmweyuck nuh sin sie mwet ma insese in lwelah God Elan kuhtanglah moul lal.”10 Prestuhn Nelson el fahk ke kuhtuh ma yohk sripac ma tuhkuh ke ma se el konwacack inge.
Sramsram lal ke insese in lwelah God elan kuhtanglah mwe srihkasrak na wowo se in luti mwe lutlut pwacye kuht in muh kuh in sifacna liyekuhtyang. Ac oacna ke el oruh ke sramsram se lal inge ke oruh in pwacr lwen Sahpuht, Prestuhn Nelson el siyuck kihsensiyuck ma sang kolyuck ac masap nuh sesr kais sie.
Yac kom insese in lwelah tuh God Elan kuhtanglah moul lom? Yac kom insese in lwelah tuh God Elan pa yohk srihpac emeet in moul lom uh?
El oacyacpac fahk:
“Nuhnkuh lah fuhkah tuh kena lom uh kuh in ahkinsewowoye kom. Fin kom tiac pahyuck ac suk tahfweyom ne tok ma pahtpaht, kena lom in ekihn “mwet Israel” ac kahsrwe kom in sulaclah lah suc kom ac wi ac lah kom ac welah fuhkah.
Fin kom pahyuck nuh sin sie suc kuhnahoslah olwelah lal, kena lom in lwelah God Elan kuhtanglah moul lom ac oruh olwelah lom yurin God in tu na kuh tiac mukwilac. Leum El ac fah unwelah kweok luhn insiowos. Inkuhsrao ac fah ikacklah ke kom ac suk lah kom ac fahsr nuh meet fuhkah. Kom tiac enenuh in suk kuh nuhnkuh.
Fin oasr siyuck elyah lom ke wosasuc kuh Alu uh, ke kom lwelah God Elan kuhtanglah, ac fah kolyuck kom in sokwack ac kahlwem ke ma pwacye, ma kawihl pwacye suc ma ac kol moul lom ac kahsrwe kom in tu na kuh ke inkacnek in olwelah.
“Ke kom sun mwe sruhf—finne mwe sruhf tuhkuh sun kom ke pacl na kom tohtohlah kuh puhla muh kom muhkahimtacl kuh mwet uh tiac kahlwem sum—nuhnkuh ke puhlaik ma ac oasr sum ke kom sulaclah in lwelah God Elan kuhtanglah moul lom ac ke kom pahng nuh Sel in ahkkweye kom.
“Ke kena se lom emeet pa in lwelah God Elan kuhtanglah, in wi ekihn mwet luhn Israel, sulaclah puhs lom ac fah fihsrwacsrlah. Mwe elyah pucspucs lom ac fah eklac tilac elyah! Kom etuh lah kom e nahwuc in wo monum fuhkah. Kom ac etuh lah meac kom e liye ac riti, kom ac sislah pacl lom oyac, ac lah suc kom ac wi uh. Kom ac etuh lah meac kom ke ahksahfyelah. Kom etuh lah kain in mwet fuhkah se kom ke eklac nuh kac uh.”11
Lohacng kac lah puhkantwen sulaclah yohk sripac ac ma kom puhlakihn ke moul lom kuh in moklweyuhk ke ip yohk ke insese in lwelah God Elan kuhtanglahahkoyak ac pahyuck, kihsensiyuck ac elyah ke alu, mwe sruhf, nahweyuck, meac in liyeyuck ac ritiyuck, acn oyac kom ac sislah pacl lom we, lah suc kom e wi uh, ac pohs pac ma sahyac. Kihsensiyuhk lal Prestuhn Nelson inge ahkuhtweyac ip yohk na fihsrwacsr se ma use kolyuck ke ma nuhkwewa ke moul lasr ac oruh kuht in kuh in sifacna liyekuhtyang.
Wil na Srihsrihk se
Ke Joseph Smith el sruhuh ke Liberty Jail ah, el sihm lwacta nuh sin mwet kol ke alu uh in fahk ma elos in oruh ac ahkacsmakihnyaclos lah “sie oak na luhlahp el eis wo ke wil na srihsrihk se ke pacl luhn pahkah, ke “orekma fal nuhke eng ac noa ah.”12
“Helm” pa wil se kuh mwe kihfucsyuck ac kuhfa ma wi pac ma orekmakihnyuck in kihfucs oak luhlahp kuh oak srihsrihk soko. Ac “ohiyacn orekma ke eng ac noa” pa in kihl oak soko in tiac lwenglah ke pacl se ma pahkah uh.
Mwe luit ke wosasuc ma nuh sihk ac kom oacna ke wil se el ma nuhke oak soko uh. Akwuck pwacye uh oruh kuht in kuh in konwacack innek lasr ac in tu na suwohs, fokoko, ac tiac mukwilac pwacnwacng kuht in tiac tihkuclkuclyak ac puhtatyang nuhke pahkah ke lohsr ac fohs ke lwen sahflah uh.
Kuht ahkinsewowoyeyuck yohk ke toeni luhlahp se inge in lotwelah ke ip yohk ke akwuck ma pahtpaht sin mwet kuhlwacnsap luhn Leum. Ingena, ma kunacsr kais sie in liyekuhtyang sifacna oacna ke ma pwacye ma fahkyuckyak inge.13
Fahkwack luhlahlfongi
Prestuhn Ezra Taft Benson el luti, “Ke mahlwem ohnkohsr fahsruh uh, puk nuhke toeni sasuc nuhtum ke [Liahona] enenuh in wi masap ke orekma ac in wacna liyeyuck.”14
Ke kuhiyacn nguhnihk nohfohn, nga suli kuht nohfohn in lotwelah, moulkihn, ac luhngse ip yohk ke akwuck luhn suwohswohs. Ma pwacye luhn wosasuc uh muhkwena kuh in oruh kuht in “oruh ma nuhkwewa ma oasr ke kuh lom ke pwacr ac engan” in fahsr nuh meet ke inkacnek in olwelah ac in “liye molwelah luhn God, ac pahol in ahkkahlwemyeyuck.”15
Nga etuh lah mwe lutlut ac ip yohk ke akwuck ke wosasuc luhn Jisus Kraist pa ma yohk se nuhke moul lasr ac engan wacngihn sahflahiyac ke moul se inge ac ke moul se tok uh. Ac ke Sacnri in Istuh wolacna se inge, nga engan in fahkwack lah Mwet Lahngo lasr suc moul pa pwelucng ke ma pwacye nuhkwewa. Nga olwelah na pwacye ac fahkwack ke ine muhtahl Leum Jisus Kraist, amen.