Ma Kuht Luti ac Ma Kuht e fah Tiacna Muhlkuhnlah
Fin kom liye moul lom an ke inse pruhe, Nga luhlahlfongi muh kom e liye atac puhkantwen ma Leum El kol kom kac ke pacl upac.
Tamuhlwel sacohk wiyuck, nga tarilacna in oasr yuruwos. Pacl sahflah se ma kuht tuhkweni luhn pristut ke toeni luhlahp pa ke Eprel 2019 ah. Oasr na ma yohk sikyak tukun toeni luhlahp sahflah se lasr ah ke yac luo tari ah! Kuhtuh suwos wacnginlac mwet lowos liki facluh se inge. Wacngihnlac orekma luhn mwet puhkantwen; ma wo wacngihnlac nuh sin sahyac. Kuhtuh pac mwet uh wacngihnlac mislac kuh finsrak nuhke pacl fahsruh oasr yohroh. Insiuck som nuh sin kais sie suwos suc ma kweok ke ma inge uh. Nga pruhe ke pacl nuhkwewa tuh God Elan ahkkweye kom. Ke kom tahfwelah na in lwelah God Elan oasr ke moul lom an uh, Nga etuh lah El nuhnkuh ke ma wo nuhke ma sik nuh sum ke pacl fahsruh uh.
Inmahsrlon ma wacngihnlac ma kuht puhlakihn inge, oasr kuhtuh pac ma kuht sokwack. Kuhtuh sesr fokokoi luhlahlfongi lasr ke Pahpah tuhmasr Inkuhsrao ac Wen Nahtuhl, Jisus Kraist. Puhkantwen mwet liye sie mwe ngwetngwet sasuc ke moul se inge—finne in sie mwe ngwetngwet ma pahtpaht ah. Sahp kuhpahsr lom nuh sin mwet kom luhngse uh ac nuh sel Leum fokokoi. Nga finsrak tuh kom sokwack kuh fokoko se lom in lohngohl ac in eis fwackyuck lom sifacna. Ma upac uh wacna use pacl wowo nuh sesr in kapwack ma e tiac sikyak ke ma sahyac uh.
Nuhnkuh ke ma sikyak ke yac luo somlah ah. Fuhkah kapwack lom an? Meac kom lotwelah? Sahp kom ke fohlohklac nuhke yac 2019 ac muhta na kac! Tuhsruhk fin kom liye moul lom an ke inse pruhe, Nga luhlahlfongi muh kom e liye atac puhkantwen ma Leum El kol kom kac ke pacl upac, kahsrwekom in eklac ekihn sie mwet kampare—sie mwet pwacye luhn God.
Nga etuh lah oasr plwacn yohk ac wolacna Lal Leum nuh sesr—kais sie ac nuh sesr nohfohn. Ke luhngse ac mongfihsrwacsr, El fahk:
Kowos pa tuhlihk srihsrihk, ac kowos soenna kahlwem ke yohkiyacn mwe insewowo ma Pahpah El sruok in pahol sifacna … ac ahkolah nuh sum;
Ac kom tiac kuh in sruok ma nuhkwewa ingena; ne ohinge, oruh kom in pwacr, tuh nga e fah kol kom nuhke yen kom fahsr nuh we an.1
Tamuhlwel sacohk wiyuhk, nga fahkwack lah El pwen kuht met, ac ingena, el srwackna pwen kuht, ke kuht suk in lohngohl uh. El ke kuht in kapwack ac lotwelah, finne ke—sahp yohk nuhke—ma upac.
Ma upac el mwet in luti na wowo se. Meac ma kom lotwelah ke yac luo tari ah ma kom ke esamyac na ke pacl nuhkwewa. Top lom uh e tuhkuh arlac sun sum, tuhsruhk nga kuh in fahk mwe lutlut ahkosr ma kuht nohfohn lotwelah ac fah tiac muhlkuhnlah uh.
Mwe lutlut se met: Lohm ah pa Luhlahlfongi ac Alu uh muhtwacwacack we uh
Ke Leum el wacna muhta sensenkihn kuht ke ma upac ke lwen sahflah uh, El luti ohinge: Tu ke yen muhtahl, ac tiacna mukwilac.2 Acn muhtahl inge pa tempuhl luhn Leum ac acn in toeni luhn alu uh. Tuhsruhktuh kuh lasr in toeni ke acn inge upaclah, kuht lotwelah lah sie acn muhtahl emeet ke acn nuhkwewa fin facluh se inge uh pa lohm sesr—ahok, finne lohm sum.
Tamuhlwel, kom us pristut luhn God. Kuh luhn pristut tiac kuh in fahsrwelihk likina kuh luhn inkuhsrao.3 Kom ac sucu lom eis mwe akwuck luhn pristut. Ohinge, ke akwuck luhn pristut, kuht kuh in liye kuh luhn God.4 Kuh se inge oasr sum ac sucu lom an ke lihm sum ke kom liyacacng olwelah lom ma kom oraclah ah.5
Yac 185 tari ah, ke lwen se inge, Eprel 3, 1836, Elijah el fohlohkohnwack ki nuh ke pristut ac lwelah sucu lasr in siliyucklac nwe tohk ma pahtpaht. Pa oruh kom puhla wo in oraclah kuhfa luhn Leum ke lom sum. Ma inge ekuhllah fuhkah sucu lom uh in liye kom—pahpah tuhmwaclos, pahpah mahtuh, mukul tuhmwacl, wen, kuh tamuhlwel—ke kom oruh akwuck muhtahl se inge uh? Meac kom fah oruh in sruokyac na puhla muhtahl se inge ke sucu lom uh?
Sahp kom e puhla muh srwackna pohs ma kom enenuh in oruh in oruh lohm sum in sie lohm in luhlahlfongi na pwacye uh. Fin pa inge, nuhnak muhnahs oruh! Fin kom pahyuck, sramsram nuh sin muhtwacn kiom an oacna in muh el mwet ikuwuhl se lom ke orekma yohk srihpac se inge. Oasr kuhtuh ma kom enenuh in oruh ma yohk srihpac liki ma se inge. Inmahsrlon pacl se inge ac pacl se ma Leum El ac sifilpac tuhkuh uh, kuht enenuh in oruh lohm sesr in pwacye ac sef.6
Elah ac mukwikwi ma ac suli Nguhn e ahkyohkyelihk muhtahliyacn lohm sum an. Ma na pwacye se lah muhtahl e wacngihnlac fin oasr ma ke mukwikwi lom an kuh ke acna kom muhta kac an ma ahkkolukye Nguhn Muhtahl, tuh pacl se na ngwacn, inkuhsrao sifacna isacltahllah.7
Na oasr pacl kom nuhnkuh lah efuh Leum el ke kuht in oruh lohm sesr in pa muhtwacwacackiyacn lultut ke wosasuc ac moulkihn wosasuc uh? E tiac mwe ahkwekuht muhkwena, kahsrwekuhtlac, ke pandemic se inge. Tulokihnyuhk nuhke toeni ingena uh e apkuhran in tari. Tuhsruhktuh, oaru lom in oruh lohm sum in in pa muhtwacwacak nuhke lohm in luhlahlfongi enenuh in tiac tui. Ke luhlahlfongi ac muhtahl uh srihkweni ke facl koluk se inge, enenuh lom nuhke acn muhtahl e yohkwelihk. Nga kwacfe kom in tahfwelah in oruh lohm sum in acn muhtahl ac tiacna mukwilac”8 liki finsrak enenuh se.
Mwe lulut ahk 2: Kuht Enenuh Sie sin Sie
God El ke kuht in tuhkweni orekma ac kahsruh kais sie sin sie. Pa oruh El suhpwekuhtme nuh facluh nuhke sucu in orwekuhtweni nuhke wohrt ac stek. Pa oruh El siyuhk kuht in kuhlwacnsapuh kais sie sin sie ac kahsruh kais sie sin sie uh. Pa oruh el siyuhk kuht in moul ke facluh se inge tuh tiac ma luhn facluh se inge.9 Kuht kuh in orwaclah ma pohs kuht fin tuhkweni liki na ke kuht e muhkwena uh.10 Plwacn Lal God nuh ke engan el wacngihn sripac fin tuhlihk Nahtuhl elos muhta loes liki sie sin sie.
Mas upac se ingena inge arulacna upac oruh mwet nuhkwewa fin facluh se inge puhlakihn ke pacl se fanna. Ke kuhtuh mwet e kweok yohk liki kuhtuh, kuht nohfohn puhlakihn ma upac ke kain in ohiyac. Ke sripen ma se inge, ma upac se ma kuht nohfohn puhlakihn inge kahsrwe kuht in orwacni tuhlihk nahtuhl God tiac oacna met ah. Na oruh, nga siyuhk, yac ma upac se ma kuht nohfohn puhla inge oruh kom fototoyang nuh sin mwet tuhlan lom—nuh sin tamuhlwel wiyomac tahmtahel wiyom muhta siskom ac fin facluh nohfohn?
Ma inge nuhkwewa tuhkuh na ke masap muhtahl in luhngse God ac in luhngse mwet tuhlan lasr.11 Kuht oruh luhngse lasr in liyeyuhk ke kuhlwacnsap lasr.
Fin kom etuh oacna sie mwet ma muhkwena, kahsrwel—finne kom puhla muhkwena pac! Tiac enenuh in oasr srihpac se kuh sramsram se kuh orekma se kom in oruh. Pwacngaklac na nuh sel ac oruh luhngse lom an in liyeyuhk. Technology kuh in kahsrwe kom. Pandemic kuh tiac, kais sie tuhlihk sacohk nuhtin God enenuh in etuh lah el tiacna muhkwena!
Mwe lutlut ahktolu: Pristut Korohm lom El ma nuh ke ma Yohk Sahyacn na Miting se.
Ke pacl in pandemic se inge, Korohm miting ke sacnri uh tulokihyuhki ke puhluhn pacl se. Kuhtuh u inge ingena kuh in fahsrweni aliyei ke technology. Ne ohinge, orekma se ma Leum el sang nuh sin pristut korohm tiac ma nuhke miting muhkwena. Miting el ip srihsrihk se na ke ma korohm uh enenuh in oruh ac ma kuh in oruh.
Tamuhlwel wiyuck ke Aaronic Pristut ac u mahtuh an, ahkyohkyelihk ngwetngwet lom kac lah efuh oasr u. Leum El fuhkah ke kom in orekmakihn u srihsrihk lom in orwaclah orekma Lal—ingena? Eis fwackyuck, kuh kolyuck sin Leum. Ahkpuhsisaclye kom sifacna! Siyuck! Lohng! Fin pahng kom in kol, sramsram nuh sin prestuhnsi ac nuh sin mempuhr ke korohm. Lah wal in pristut fuhkah se kuh pahng fuhkah se lom an, lwelah God on asr ke kampare lom ke kom ekihn mempuhr ke korohm lom ac ke kuhlwacnsap lom. Puhlakihn ma inge ke engan ke suwohs kom e use ke kom oruh ma wo uh.12 Korohm uh kuh in ahkyohkyelihk fahsrweni luhn Israel ke acn inge kwewa ke mwet lihsrlihsr se inge.
Mwe lutlut ahkahkosr: Kuht lohng Jisus Kraist Wo ke kuht Mihs uh.
Ke Doctrine and Covenants, Mwet Lahngo El fahk lah Ma nuhkwewa fohs; tuh sahngweng fah puhtati fin mwet nuhkwewa.13 Ma se inge pwacye met liki mas upac se inge, ac e pwacye tohkoh. Fohs fin facluh fah kalweniyuck na in yohkwelihk. In kasruh,puhsral luhn Leum tiacna pa “sie puhsra ngihrngihr yohk puhsra, tuhsruhk … [pa] puhsra mihs ke ohi suwohs, oacna in muh oacna in mahmah se, ac ma inge [fakihsyac] finne nuh ke nguhna uh.”14 In lohng puhsra srihsrihk se inge, kom enenuh in mihs pac!15
Ke puhluhn pacl se, pandemic se fosyekuhnlah toeni ma muhta ahkpwacrye kuht uh. E tiac paht na kuht e kuh in sifilpac nwacklah pacl se inge ke okahrkahr ac fohs ke facluh se inge. Kuh kuht kuh in orekmakihn pacl lasr in lohng puhsrwen Leum ke El mahmahi mwe kolyuhk lal, ahkkweye, ac mislac lal. Pacl mislac el pacl muhtahl—pacl ma e kahsruh fwackyuhk in tuhkuh nuh yohrohsr sifacna ac use mislac.
Oruh in oasr pacl lom sifacna kom in muhkwena ac wi sucu lom. Sang Insiom nuh sin God ke pruhe lom. Is pacl lom in riti ma suhmuhslah ac alu nuh sel lun tempuhl.
Tamuhlwel sacohk wiyuck, puhkantwen ma Leum El ke kuht in lotwelah ke ma kuht puhlakihn ke pacl in elyah upac se inge. Ma na ahkosr ma nga tahkuhnlah inge. Nga sulikom in orwaclah ma lom sifacna, nuhnkwaclah in wo, ac sang nuh sin mwet ma kom luhngse in wi liye.
Pacl fahsruh uh el kahlwem nuh sin mwet lal God ma liyacacng masap lal.16 Leum Elac pahngon mwet in kuhlwacnsap lal suc ma fal in sruok pristut in ahkinsewowoye, ahkkweye, ac ahkfokokoye mwet ac in kahsruh ahkolah facluh ac mwet uh nuhke tuhkuh ahkluo Lal uh. Ma se inge pahtok kuht in oruh kuht in fal nuhke akwuck muhtahl ma kuht eis tari. Kuht kuh in oruh ma inge! Nga fahkwack, ke luhngse luhk nuh suwos, tamuhlwel sacohk wiyuck, ke ine muhtahl lal Jisus Kraist, amen.