Finsrak ke Kraist
Kuht kena in kahsruh mwet nuhkwewa suc puhla muhkwelacna kuh puhla muh elos suhfal. Lwelah ngan sruhmuhn, ke sie ma, nuh sin elos suc lolacp ingena.
Tamuhlwel ac tahmtahel, ke Istuh se inge kuht lohacng nuh ke Sifilpac Moulyak wolacna luhn Leum ac Mwet Lahngo lasr, Jisus Kraist. Kuht esam solsol in luhngse Lal in “fahsru nu yuruk, kowos su orekma ac totola, tuh nga fah sot mongla nu suwos.
“Eis srenenu luk nu fowos ac lutlut sik, tuh nga fakpap ac inse pusisel; ac kowos fah konauk mongla.
“Tuh srenenu luk fisrasr, ac mwe utuk luk mulala.”1
Solsol luhn Mwet Lahngo in tuhkuh nuh Yohrohl pa sie solsol nuh sin mwet nuhkwewa in tiac tuhkuh muhkwena nuh Yohrohl tuhsruhk in oacyacpac in wi Alu Lal.
Ke fuhs se ma tuhkuh met liki suliyuck ke luhngse se inge, Jisus El luti lah ma se inge ac oreklac fuhkah ke kuht suk in fahsr Tohkohl. El fahk, “Wangin mukul [kuh muhtwacn] etu ke Wen, a Papa mukena; ac wangin pac mukul [kuh muhtwacn] etu ke Papa, a Wen mukena, ac elos su Wen el sulela in fahkulak nu se.”2
Jisus El kena kuht in etuh lah God El pa Pahpah Lucng suc luhngse.
Ke kuht etuh lah kuht luhngseyuck sin Pahpah tuhmasr Inkuhsrao ac fah kahsre kuht in etuh lah suc kuht uh ac in etuh lah kuht wi oasr ke sucu ma pahtpaht Lal.
Mayo Clinic fahk ke pacl sa somlah ah lah in puhlakihn muh kom wi pa sie ma na yohk srihpac. … Apkuhran na ip nuhkwewa ke moul lasr uh plwacniyucklac ke ma kuht wi uh. Rihpohrt se oacyacpac fahk muh “Kuht tiac kuh in sroaclihk yohk srihpaciyac in puhlakihn muh kom wi ma se liki kuhiyacn mahno ac nuhnak lasr”3—ac, nga ac tahfwelah, kuhiyacn nguhn lasr.
Ke ekuh se met liki kweok Lal ke imac Gethsemane ac misac Lal fin sahksin soko ah, Mwet Lahngo El ohsun nuh sin mwet tuhma lutlut Lal nuh ke Mongo in Ekuh Sahflah. El fahk nuh selos, “Ke kowos muta faclu kowos ac keok: tusruktu kowos in pulaik na! Nga kutangla faclu tari!”4 Met liki faht ah tihli ke lwen se tok ah, Jisus Kraist El tuh kweok ac tuh “misa [fin sahksin] ke ma koluk lasr.”5
Nga motko lah oacna fuhkah muhkwelacna luhn muhtwacn ac mukul luhlahlfongi suc fahsr Tohkohl elos puhlakihn fin acn Jerusalem ke faht ah tihli ac lohsr ac sahngweng uh raunweloslac ah.6
Oacna mwet tuhma lutlut ke pacl mahtuh omeet ah apkuhran nuh ke lusen yac [ luo tausin] 2,000 somlah, puhs suwos sahp ac oacyacpac puhlakihn muhkwelacna ke kuhtuh pacl uh. Nga puhlakihn muhkwelacna se inge ac ke na misac luhn muhtwacn sacohk se kiyuck, Barbara, ke lusen yac luo tahfuh somlah ah. Nga etuh ke kalmeyacn rauniyucklac sin sucu, kawuck, ac mwet sahyac tuh srwackna puhla muhkwelacna—ke srihpen luhngse luhn moul luhk tilac oasr yuruk.
Mas upac COVID-19 se inge ahkkahlwemye ma puhlakihnyuck ke srenglah ac muhkwelacna se inge nuh sin mwet pucspucs. Tuhsruhk, finne kuht sun ma upac ke moul uh, oacna lututacng in Istuh se emet ah, kuht kuh in nguhtwaclihk nuh ke sie moul sasuc in Kraist ohiyac sasuc ac wolacna ac moul sasuc ke kuht foracng nuh sin Leum nuh ke finsrak ac in wi oasr kac.
Nga sifacna puhlakihn ngal luhn elos suc srihklac puhlakihngyacn wi lalos. Ke nga muhta liye pweng luhn facluh, nga liye mwet puhkantwen suc puhlakihn kain muhkuhlacna se inge. Nga muh, ke mwet pucs, ma inge sikyak ke srihpen elos tiac etuh tuh elos luhngseyuck sin Pahpah Inkuhsrao ac tuh kuh kwewa inmahsrlon sucu ma pahpah Lal. Luhlahlfongi lah God El luhngse kuht ac lah kuht tuhlihk Nahtuhl use mislac ac ahkkweyeyuck.
Ke srihpen kuht tuhlihk nguhn nuhtin God, mwet nuhkwewa tuhkuh ke muhtwacwacack, ohiyac, ac kasrpac muhtahl. Kais sie sesr “pa tuhlihk mukul kuh muhtwacn nguhn wolacna nuhtin pahpah ac ninac inkuhsrao.”7 Pa inge atacsr! Kuht pa inge napwacye!
Atacsr ke nguhn uh ahkyohkyeyuck ke kuht kahlwem ke ohiyac puhs lasr ke moul suhkawihl, weacng kain in mwet, facsin, kuh acn kuht tuhkuh we uh.
Ohiyac luhn nguhnnguhn ac facsin, luhngse, ac in wi uh kuh in moklweack finsrak ac luhngse nuh sin Jisus Kraist.
Nga sramsramkihn finsrak ke Kraist tiac ke nuhnak in mwel. Tuhsruhk, nga sramsramkihn finsrak se ma finsrakkihnyuck ma ac fah akihlenyuck. Kain in finsrak se inge yohk srihpac in kuhtanglah ma upac, ahkkweye kuh ac fokoko luhn nguhn, ac in etwacack lah kuht luhngseyuck sin Pahpah Ma Pahtpaht tuhmasr ac lah kuht tuhlihk Nahtuhl suc wi sucu Lal.
Ke kuht finsrak ke Kraist, kuht etwacack lah kuht enenuh in oraclah ac liyacacng wuhlweacng muhtahl, ma kuht luhngse emet ac mwemwei uh kuh in oreklac Kacl.
U luhn Mwet Sap Singucul Luo elos tuhkweni sramsram ke nguhn luhn pruhe ac kena kahlwem kac lah elos ac kahsruh fuhkah elos nuhkwewa suc puhlakihn muhkuhlacna kuh puhlakihn muh elos tiac wi. Kuht luhngse in kahsruh mwet nuhkwewa suc puhla ohinge. Lwelah ngan sramsram, ke sie ma, nuh sin elos suc ingena lolacp.
Tamuhlwel ac tahmtahel, puhs liki tahfuhn mwet mahtuh ke Alu uh misenge pa katinmas, mwet sahf, kuh soenna pahyuck. Kuhtuh motko ke pacl wowo lalos ac acn selos ke plwacn luhn God ac ke Alu uh. Kuht enenuh in kahlwem kac lah moul ma pahtpaht uh tiac kihsensiyuck se na lah mwet se pahyuck kuh lolacp, tuhsruhk tuh lah mwet sacn mwet fahsr tukun ac puhlaik in fahkwack kacn Jisus.8 Finsrak lalos nuhkwewa suc lolacp an oacna sie nuh sin mempucr nuhkwewa ke Alu fohlohkihnyuckyak—in kuh in eis luhng kuhlwacng luhn Kraist ke “ahkostwen nuh ke masap ac akwuck ke Wosasuc.”9
Lwelah nga oruh in nuhnkweyuck lah oasr ip yohk srihpac ma kuht enenuh in kahlwem kac.
Ma se met, ma sihmlac ac mwet pahluh ke lwen-sahflah elos ahkkweyelah tuh elos nuhkwewa suc oaru in liyacacng wuhlweacng ke wosasuc uh ac fah eis pacl wo in kaksak. Prestuhn Russell M. Nelson el luti lah ke inkacnek ac pacl luhn Leum sifacna, wacngihn mwe insewowo ac fah sruokyucki liki Mwet Luhlahlfongi oaru Lal. Leum El fah nuhnuhnkuh ac ahkinsewowoye kais sie mwet in fal nuh ke kena luhn insiacl ac oacyacpac ke orekma [lal].10
Ahkluo, pacl se ac ohiyac se ma mwe insewowo luhn moul ma pahtpaht ituckyang soana ahkkahlwemyeyuck, tuh uliyuck nuh sesr.11 Prestuhn Dallin H. Oaks el ahkuhtweyac lah kuhtuh ohiyac ma sikyak ”ke moul suhkawihl uh ac fah ahkpwacyeyucklac ke lusen Yac Tausin Se, suc pa pacl in ahkpwacyeyelah ma nuhkwewa ma tiacna ahksahfyeyucklac ke plwacn wolacna luhn engan nuh sin tuhlihk wowo nuhkwewa nuhtin Pahpah tuhmasr.”12
Tiac kalmac pa mwe insewowo nuhkwewa ac kohtlah nuh ke lusen Yac Tausin Se; kuhtuh eisyuck tari ac kuhtuh pac sahyac ac fah fahfahlac na in eisyuck ne ke na sun lwen sacn.13
Ahktolu, ke kuht tuhpan Leum, ma inge ahkkahlwemye fahfahlac na in ahkostwen ac kapkapwack in nguhn nuh Sel. In tuhpan Leum tiac kalmac pa kuht muhta alsruhngwesr. Kom tiac enenuh in puhlakihn muh kom oasr ke acn in muhta tuhpan se.
Tuhpan Leum kalmac pa kuht orekma. Nga etwaclah ke yac inge tuh finsrak ke Kraist yohkwelihk ke kuht kuhlwacnsapuh mwet sahyac. In kuhlwacnsap oacna Jisus El tuh kuhlwacnsap ah, kuht ahkyohkye finsrak lasr Kacl.
Kapkapwack ma sie mwet kuh in oraclah ingena ke elos tuhpan Leum ac olweacng Lal pa sie ip yohk srihpac muhtahl ke plwacn Lal nuh sin kais sie sesr. Ma kom oraclah in sang kahsruh ingena in kahsruh muhsaheack Alu uh fin facluh ac oracni Israel arulacna enenweyuck. Wacngihn kuhpahsr luhn macruht kuh lolacp lom nuh ke kuh in kuhlwacnsap lom. Leum El kaksakihn elos suc Kuhlwacnsuhpwacl ac tuhpanuhl ke muhtweng ac oaru.14
Ahkahkosr, God El use moul ma pahtpaht nuh sin tuhlihk nuhkwewa Nahtuhl.. Elos nuhkwewa suc eis mwe sang se luhn Mwet Lahngo ke auliyak ac in moulkihn masap Lal ac fah eis moul ma pahtpaht, finne elos tiacna oraclah nohfohn ohiyac ac suwohswohs ke moul suhkawihl. Elos suc auliyak fah puhlakihn ahkolah luhn Leum in nuhnakmuhnahs oacna ke El ahkkweye: “Ahok, ac mwet Luhk fin kwacna auliyak Nga fah nuhnak muhnahs nuh selos ke ma koluk lalos ma sang lainyuc.”15
Ke ma kahlwem sahflah uh, kuhiyacn mwet se, kena, ac pacl wo luhn mwet se ke ohiyac luhn sukohsohk in sulaclah ac sule, weacng wo fal nuh ke mwe insewowo ma pahtpaht, pa ma suc Leum muhkwena pa kuh in nuhnuhnkuh.
Ahklimekohsr, luhlahlfongi lasr ke mwe ahkkweyeyuck inge tuhkuh ke luhlahlfongi lasr ke Jisus Kraist suc ke luhng kuhlwacng Lal ma nuhkwewa ma luhmweyuck nuh ke moul suhkawihl uh ac ahksuwohsyeyucklac..16 Mwe insewowo nuhkwewa kuh in sikyak nuh Sel, suc, ke Iwaclah Lal, som ye ma nuhkwewa17 ac tuh “kutangla faclu tari.”18 El “muhta ke lacpo lacyot luhn God, in eis sin Pahpah ke suwohs Lal ke pahkotwen Lal nuh sin tuhlihk nuhtin mwet … ; ohinge El iwaclah ip yohk luhn tuhlihk nuhtin mwet.”19 Ke sahflahiyac, “mwet luhlahlfongi ac fah sesseslah ke wolacna Lal, ac eis usru lalos”20 oacna ke “kut fah oayapa ipeis yurin Christ.”21
Kena lasr uh pa lah ip yohk inge in fah kahsruh mwet nuhkwewa in ahkyohkye finsrak ke Kraist ac puhlakihn lah elos wi.
Nimet muhlkuhnlah lah kom sie tuhlihk nuhtin God, Pahpah Ma Pahtpaht tuhmasr, inge ac ne tok ma pahtpaht. El luhngse kowos, ac Alu uh luhngse ac enenwekowos. Ahok, kuht enenwekowos! Kuht enenuh puhsrwaclos, talan, suhmaht, wolacna, ac suwohswohs lowos an.
Ke lusen yac puhs, kuht sramsramkihn “mwet fuhsr lolacp,” “mwet mahtuh lolacp,” ac “mwet mahtuh.” Kain in pahngpahng ingacn kuh in kahsruh ke ip luhn orekma kuhtuh pacl uh tuhsruhk kuh pac in ekuhllah ohiyac lah kuht liye fuhkah mwet sahyac.
Yac oasr inkacnek in kahingkihn ohiyac se inge ma kuh in srikuhtwelihk liki sie sin sie?
Prestuhn Nelson el siyuck tuh kuht in pahngon kuht sifacna muh mempucr ke Alu luhn Jisus Kraist luhn Mwet Luhlahlfongi ke Lwen-sahflah. Ma se ingacn apihnkuhtlac nohfohn, yac tiac?
Oasr kuh se ke wosasuc luhn Jisus Kraist in orekuhtweni nuh sie. Sahflahiyacn ma nuhkwewa, kuht oacna sie yohk liki na kuht siena. Oacna mempucr ke sucu luhn God, kuht tamuhlwel ac tahmtahel pwacye. Paul el fahk, “[God] El orala mutanfahl nukewa sin mwet sefanna, ac oru tuh elos in muta apunla fin faclu nufon.”22
Nuh suwos prestuhn luhn stek, pisap, ac u ac mwet kol tahmtahel an, nga siyuck suwos in motko ke mempucr nuhkwewa ke stek, ward, u, kuh un mwet lowos an oacna mempucr suc kuh in sang kahsruh ac eis kunohkohn ke pahng ac wi ke ohiyac puhs.
Mempucr nuhkwewa ke u, un mwet, ward, ac stek lasr an oasr mwe sang ac talan ma ituckyang sin God ma kuh in kahsruh muhsaheack tohkohsrahi Lal uh ingena.
Lwelah kuht in pahngon mempucr lasr suc lolacp an in eis kunohkohn, ahkkweye, ac luti. Nimet lohacng nuh ke nuhnak mahtuh ma kuhtuh pacl uh, tiac orek in oacyac tuhsruhk ac oruh elos puhlakihn muhkuhlacna ac lah elos tiacna wi kuh tiac kuh in eis kunohkohn.
Nga fahkwack loh luhk ke kapihn wik in Istuh se inge kacn Mwet Lahngo lasr ac ke finsrak ma pahtpaht ma El use nuh sihk nuh nuh selos nuhkwewa suc luhlahlfongi ke Inel. Ac nga fahkwack testimoni puhsisacl se inge ke ine muhtahl Lal, finne Jisus Kraist, amen.