E Alofa le Atua i Ana Fanau
Ou te fia faasoa atu ni auala faapitoa se tolu ua faaalia ai e lo tatou Tama Faalelagi Lona alofa mo i tatou, o Ana fanau.
Uso e ma tuafafine, ou te olioli faatasi ma outou i le talalelei a Iesu Keriso. Ou te momoli atu alofaaga mai le au paia malolosi i le atu Filipaina ma faapea atu, mo i latou, Mabuhay!
I lenei taeao o le Eseta, ou te molimau atu i le Keriso soifua, na toetu o Ia mai le oti ma o Lona alofa mo i tatou ma mo lo tatou Tama o i le Lagi e mamā ma faavavau. I le asō, ou te manao e taulai atu i le alofa o le Tama Faalelagi ma Iesu Keriso mo tagata uma, lea e faaalia mai e ala i le Togiola a Iesu Keriso. “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi” (Ioane 3:16).
Ina ua fesiligia le perofeta o Nifae e se agelu e uiga i lona malamalama i le Atua, na tali Nifae, “Ua ou iloa e alofa o ia i ana fanau” (tagai i le 1 Nifae 11:16–17).
O se fuaiupu mai le Tusi a Mamona: O Se Tasi Molimau ia Iesu Keriso ua faamatalaina mai ai ma le malosi le alofa atoatoa o le Faaola: “Ma o le lalolagi, ona o lo latou amioletonu, o le a faamasino ia te ia o se meanoa; o le [a] … latou sasa ai ia te ia, … ma latou taia o ia, … latou te tuufeanu ia te ia, ae tuu atu e ia i ai, ona o lona agalelei alofa ma lona tali-tiga i le fanauga a tagata” (1 Nifae 19:9). O le alofa aoao o le Faaola o le malosiaga faaosofia lea e i tua atu o mea uma Na te faia. Ua tatou iloa o le alofa lava lea e tasi ua i ai o lo tatou Tama o i le Lagi mo i tatou, ona sa aoao mai ma le lotomaulalo e le Faaola faapea o Ia ma le Tama e “tasi lava” (tagai i le Ioane 10:30; 17:20–23).
E faapefea la ona tatou taui atu ma faaalia lo tatou agaga faafetai mo lo La’ua alofa aoao? Na aoao mai i tatou e le Faaola i lenei valaaulia faigofie e aofia ai tagata uma: “Afai tou te alolofa mai ia te au, tausi a’u poloaiga” (Ioane 14:15).
Na aoao mai Peresitene Dallin H. Oaks, “O le alofa aoao ma le atoatoa o le Atua o loo faaalia i faamanuiaga uma o Lana fuafuaga o le talalelei, e aofia ai le mea moni faapea o loo faapolopoloina Ana faamanuiaga silisili mo i latou o e usiusitai i Ana tulafono.”1
Ou te fia faasoa atu ni auala faapitoa se tolu ua faaalia ai e lo tatou Tama Faalelagi Lona alofa mo i tatou, o Ana fanau.
Muamua, o Sootaga faatasi ma le Atua ma Le Aiga ua Faaalia ai Lona Alofa
O tatou sootaga sili ona taua e i ai lea i le Tama ma le Alo ma ō tatou lava aiga, aua o tatou faiā ma i latou e faavavau. O le fuafuaga sili o le fiafia o se faaaliaga matagofie lea o le alofa o le Atua mo i tatou. Faatasi ai ma mata e taulai atu i le fuafuaga a le Atua, ua tatou filifili ai ma le loto i ai e aveese mai i totonu o i tatou mea ia e lagolagoina manaoga manatu faapito ae suia na mea i faavae ia e fausia ai sootaga e faavavau. I se isi itu, e mafai ona ta’ua lenei mea o le “eliga faaleagaga.” I le faatinoina o lo tatou eliga faaleagaga, e tatau ona tatou muai saili le Atua ma valaau atu ia te Ia (tagai i le Ieremia 29:12–13).
O le sailia o Ia ma valaau atu ia te Ia o le a amata ai le faagasologa ma saunia ai le avanoa e fausia ma faamalolosia ai a tatou sootaga e faavavau. E faalautele ai la tatou vaaiga faaleagaga ma fesoasoani ia i tatou e taulai atu i le suia o mea e mafai ona tatou pulea, nai lo o popolega e le mafai ona tatou pulea. O le suesueina o le soifuaga ma le auaunaga a lo tatou Faaola, o Iesu Keriso, o le a mafai ai ona tatou vaai atu i isi popolega i se vaaiga e faavavau.
O faalavefau e mafai ona taofia i tatou i nisi taimi mai le mauaina o le alofa o le Atua iā tatou sootaga ma gaoioiga faaleaiga. Sa maua e se tina, o le na lagonaina, na pulea e masini faaeletonika sootaga a lona aiga, se fofo. I luga o le laulau ‘ai ma i isi taimi faaleaiga, na o lona valaau atu ai lava faapea, “Tuuese telefoni; sei fai so tatou taimi faafesagai.” Na fai mai a ia o le mea masani lea mo lo latou aiga ma ua faamalosia ai la latou sootaga o se aiga pe a faia so latou taimi faafesagai moni. Ua latou olioli nei i a latou talanoaga fai faatasi o le Sau, Mulimuli Mai ia te A’u o se aiga.
Lua, Na Te Faaalia Lona Alofa i Ana Fanau e ala i le Valaauina o Perofeta
O lo tatou lalolagi i le taimi nei ua filogia i se “taua o upu ma vevesi o taofi” (Iosefa Samita—Talafaasolopito 1:10). Ua faamanatu mai e Paulo ia i tatou faapea “e … tele lava ituaiga leo i le lalolagi” (1 Korinito 14:10). O le fea o leo uma e alia’e ma le manino ma le anoa i luga ae o feeseeseaiga? O le siufofoga o perofeta, tagatavaai ma talifaaaliga a le Atua.
Ou te manatua manino lava, i le mavae ai o se taotoga i le 2018, ma le toe foi ai i le galuega, sa ou i ai i le nofoaga o paka o taavale i le laumua o le Ekalesia. Na faafuasei lava, ona ou logonaina atu le siufofoga o Peresitene Russell M. Nelson o valaau mai, “Taniela, Taniela.” Sa ou tamoe agai atu ia te ia, ma sa ia fesili mai po o a mai a’u.
Sa ou fai atu, “O loo ou faasolosolo manuia, Peresitene Nelson.”
Sa ia tuu mai ia te a’u se fautuaga ma se opo. Sa ou lagonaina moni le auaunaga patino o se perofeta i le “toatasi.”
Sa faimalaga Peresitene Nelson i le tele o atunuu o le lalolagi. I lo’u mafaufau, e le na o lona auauna atu i le faitau afe, ae o loo ia auauna atu i le faitau afe o “tagata taitoatasi.” I le faia ai o lena mea, na te faasoaina atu ai le alofa o le Atua mo Ana fanau uma.
Talu ai nei, na avea upu a Peresitene Nelson ma se punavai o le malosiaga ma musumusuga i tagata o le atu Filipaina. E pei foi o atunuu uma i le lalolagi, i le vaitaimi o le 2020 na matuā afaina ai le atu Filipaina i le faama’i oti o le KOVITI-19, faapea ai ma le pa o se maugamu, mafuie, afā fulifaō, ma lologa matautia.
Peitai, e pei o se poutu o le malamalama o loo susulu mai i ao pogisa o le fefe, tuuatoatasi, ma le leai o se faamoemoe na oo mai ai upu a le perofeta. Na aofia ai le valaau mo se anapogi ma tatalo a le lalolagi atoa faapea ai ma se fautuaga ia agai i luma e ui i le faama’i oti. Na Ia valaaulia i tatou ina ia fai o tatou fale ma malutaga patino o le faatuatua. Na Ia valaau atu i tagata o le Au Paia o Aso e Gata Ai i soo se nofoaga ina ia faaaloalo i fanau uma a le Atua ma tuu atu ia faamuamua le Atua i o tatou olaga.2
E pei foi o le vitio o le molimau faagaeetia talu ai nei a Peresitene Nelson e uiga i le mana o le loto faafetai, ma lana tatalo faaiu lea na oo atu i le salafa o le atu Filipaina.3 I le itumalo o Leyte, sa faaali ai le vitio i le taimi o se lotu soofaatasi, ma sa ta’ua foi i se vaega o se lauga a se faifeau. Ua matua faamanuiaina le atu Filipaina, faatasi ai ma le lalolagi atoa i le lagonaina o le alofa o le Atua e ala i upu a Lana perofeta filifilia.
Tolu, O Le Aoaiina e Mafai ona Avea o se Faaaliaga o le Alofa o le Atua mo Ana Fanau
O nisi taimi e faaalia ai e le Atua Lona alofa i le aoaiina o i tatou. O se auala lea e faamanatu mai ai ia i tatou e alofa o Ia ia i tatou ma e Na Te silafia o ai i tatou. O Lana faamanuiaga folafolaina o le filemu e avanoa ia i latou uma o e savavali ma le lototoa i le ala o feagaiga ma ua loto e talia se faasa’oga.
Pe a tatou iloa le aoaiga ma ua avea ma ni tagata e loto e taliaina, e avea ma se taotoga faaleagaga. O ai e mana’o i se taotoga? Ae mo i latou o e manaomiaina ma ua loto e taliaina, e mafai ona avea o se faaolatotoga. E aoa’i e le Alii e e alofa i ai o Ia. Ua ta’u mai e tusitusiga paia (tagai i le Eperu 12:5–11; Helamana 12:3; Mataupu Faavae ma Feagaiga 1:27; 95:1). O le aoaiga, po o le taotoga faaleagaga, o le a aumai ai se suiga manaomia i o tatou olaga. Uso e ma tuafafine, o le a tatou iloa ai, e faamamāina ma faapaiaina ai o tatou tagata i totonu.
O Iosefa Samita, le Perofeta o le Toefuataiga, sa aoaiina. Ina ua mavae le leiloloa o itulau e 116 o le Tusi a Mamona e Iosefa, na aoaiina ma faaalia le alofa o le Alii i le fetalai mai: “Sa le tatau ona sili atu lou fefe i tagata nai lo i le Atua. … Sa tatau lava ona e faamaoni. … Faauta, o oe o Iosefa, ma sa filifilia oe. … Ia manatua, ua alofa mutimutivale le Atua; o lea, salamo” (Mataupu Faavae ma Feagaiga 3:7–10).
I le 2016, a o auauna ai i se misiona i Little Rock, Arkansas, sa ou talosaga ia Brother Cava e tiliva se afīfī i lo’u tuafafine matua, lea sa nofo i se motu i Fiti. O lana tali mai sa le o se mea na ou mafaufauina. “Peresitene Wakolo,” sa ia mapuea, “ua maliu lou tuafafine ma na falelauasi i le 10 aso ua mavae.” Sa ou misi alofa ia te a’u lava ia ma sa lagona foi sina le fiafia ona sa le’i popole lo’u aiga e faailoa mai ia te a’u.
O le aso na sosoo ai, a o aoaoina e lo’u toalua ia faifeautalai, na tuia lo’u loto i le manatu lenei: “Taniela, o nei aafiaga uma e mo lou lelei ma le tuputupu a’e. Na e aoao atu ma faasoa atu lau molimau e uiga i le Togiola a Iesu Keriso, ia ola ai loa e tusa ai.” Sa faamanatu mai ia te a’u faapea “amuia le tagata ua aoaiina e le Atua: o le mea lea [e tatau ona] aua [nei o tatou] ta’ufaatauvaaina ai aoaiga a Le e ona le malosi uma lava” (Iopu 5:17). Sa avea ma se taotoga faaleagaga mo a’u, ma sa vave lona taunuuga.
Ao ou mafaufau i le aafiaga, sa valaauina a’u e tuu atu o’u manatu faaiu i le talanoaga. Faatasi ai ma isi mea, sa ou faasoa atua lesona na faatoa uma ona ou aoaoina: tasi, faatoa uma ona aoaiina a’u e le Agaga Paia ma sa ou fiafia i ai aua sa na o a’u na lagonaina; lua, ona o le taulaga ma le togiola a le Faaola, o le a ou le toe ta’ua o’u luitau o ni tofotofoga ma faigata ae o ni o’u aafiaga faaleaoaoga; ma le tolu, ona o Lona soifuaga e atoatoa ma e leai se agasala, o lea o le a ou le toe ta’ua ai o’u le atoatoa ma le leai o ni tomai o ni vaivaiga ae o ni o’u avanoa e tuputupu ae ai. O lenei aafiaga na fesoasoani ou te iloa ai e aoaiina i tatou e le Atua ona e alofa o Ia ia i tatou.
Ou te faaiu atu. E faaalia e lo tatou Tama Faavavau ma Lona Alo, o Iesu Keriso, lo La alolofa e ala i le faia ia mafai mo i tatou ona maua ni fesootaiga faavavau ma i La’ua ma tagata o o tatou aiga, e ala i le valaauina o perofeta o aso nei e aoao ma auauna mai ia i tatou, ma e ala i le aoaiina o i tatou ina ia fesoasoani tatou te aoao ma tuputupu a’e ai. “Ia faafetaia le Atua mo le meaalofa lē mafaatusalia o Lona Alo paia,”4 lo tatou Alii toetu, o le Keriso soifua. I le suafa o Iesu Keriso, amene.