Faamanuiaina i Lona Suafa
O le mafuaaga mo lo tatou mauaina o le perisitua ia mafai ai ona tatou faamanuiaina tagata mo le Alii, faia lea i Lona suafa.
O’u uso pele, o uo faaleauaunaga i le perisitua a le Atua, o se faamamaluga mo a’u le lauga atu ia te outou i lenei afiafi. Ou te matua faaaloalo ma faafetai atu ia te outou. Pe a ou talanoa ma outou ma faalogo i lo outou faatuatua maoae, o lo’u talitonuga o loo faatupulaia pea le mana o le perisitua i le lalolagi, faatasi ai ma korama sili ona malolosi ma e umia le perisitua sili ona faamaoni.
I nai o’u minute i lenei afiafi, o le a ou talanoa atu ia te outou o e mananao ia sili atu ona mataalia i la outou lava auaunaga faaleperisitua. Ua tou iloa e uiga i le poloaiga e tatau ona tou faalauteleina la outou valaauga e auauna atu.1 Ae atonu tou te mafaufau po o le a le uiga o le faalautele o tou valaauga ia te outou.
O le a ou amata i tiakono sili ona fou ona o i latou ia atonu e sili ona lagona le lē mautonu e uiga po o le a le faauigaga o le faalauteleina o o latou auaunaga faaleperisitua. O toeaina faatoa faauuina e ono mananao foi e faalogologo mai. Ma o se epikopo i ana vaiaso muamua o le auaunaga atonu e fiafia foi i ai.
E aoga mo a’u le toe tepa i tua i o’u aso o se tiakono. Maimau pe ana ta’u mai e se tasi ia te a’u i lena taimi mea o le a ou fautuaina atu nei. Semanu na mafai ona ou fesoasoani i valaauga uma o le perisitua lea na oo mai ia te a’u i lena taimi—e oo lava i tofiga ia na ou mauaina i nei aso.
Sa faauuina a’u o se tiakono i se paranesi matuai laitiiti lava lea sa na o a’u lava le tiakono ma lo’u uso o Ted le aoao. Sa na o matou lava le aiga i le paranesi. Sa feiloai le paranesi atoa i lo matou fale. O le taitai perisitua mo a’u ma lo’u uso o se tagata faatoa liliu mai lea na faatoa mauaina e ia foi le perisitua. Sa ou talitonu i lena taimi na pau lo’u tiute faaleperisitua o le tufaina o le faamanatuga i totonu o lo matou lava potu ‘ai.
Ina ua siitia ese lo matou aiga i Iuta, sa ou mauaina a’u lava i se uarota telē ma le toatele o tiakono. I la’u sauniga faamanatuga muamua iina, sa ou maitauina ai tiakono—o se autau, na foliga mai ai ia te a’u—o feminoiai ma le sa’o ao latou tufaina le faamanatuga e pei o se ‘au ua aoaoina.
Sa ou matua fefe lava o lea na ou vave alu ai i le falelotu i le Aso Sa na sosoo ai ina ia na’o a’u ai ma ia leai se tasi e mafai ona iloa mai a’u. Ou te manatua o le Uarota a Yalecrest i le Aai o Sate Leki, ma sa i ai se faatagata i le lotoa. Sa ou alu i tua atu o le faatagata ma matua tatalo ai mo se fesoasoani ia iloa ai le auala e aua ai ne’i toilalo ao ou tu i lo’u tulaga i le tufaina o le faamanatuga. Sa tali mai lena tatalo.
Ae ua ou iloa nei e i ai se isi auala sili atu e tatalo ai ma mafaufau ai ao tatou taumafai ia tuputupu ae i la tatou auaunaga o le perisitua. Ua oo ina ou iloaina le mafuaaga ua tuuina mai ai i tagata taitoatasi le perisitua. O le mafuaaga mo lo tatou mauaina o le perisitua ia mafai ai ona tatou faamanuiaina tagata mo le Alii, faia lea i Lona suafa.2
O le tele o tausaga talu ona avea a’u ma tiakono na ou aoaoina ai le uigamoni o lena mea. Mo se faataitaiga, i le avea ai ma se faitaulaga sili, sa tofia ai a’u e asiasi i se sauniga faamanatuga i le nofoaga autu mo tausiga. Sa talosagaina a’u e tufaina le faamanatuga. Nai lo le mafaufau e uiga i le faagasologa po o le sa’o o le auala e tufaina ai le faamanatuga, ae sa ou tilotilo i foliga o tagata matutua taitoatasi. Sa ou vaaia le toatele o i latou o fetagisi. O se tasi o tamaitai sa uuina le lima o lo’u ofu, tilotilo mai i luga, ma fai mai leotele, “Oi, faafetai, faafetai.”
Na faamanuia e le Alii la’u auaunaga na tuuina atu i Lona suafa. O lena aso sa ou tatalo ai mo se vavega e oo mai nai lo le tatalo mo le lelei na ou faia ai la’u vaega. Sa ou tatalo ia lagona e tagata le alofa o le Alii e ala i la’u auaunaga alofa. Sa ou aoaoina o lenei mea o le ki lea i le auauna atu ma faamanuiaina ai isi i Lona suafa.
Sa ou faalogo i se aafiaga talu ai nei lea na faamanatu maia ia te a’u sea alofa. Ina ua taofia sauniga uma a le Ekalesia ona o le faama’i oti o le KOVITI-19, na taliaina e se uso o auaunaga se tofiga mai lona peresitene o le korama a toeaina ina ia faamanuia ma tufaina atu le faamanatuga i se tuafafine na ia auauna atu i ai. Ina ua ia valaau atu ia te ia e ofo atu e avatu le faamanatuga, sa ia taliaina ma le musuā, ita i le aveesea mai o ia mai lona lava fale i sea taimi lamatia ma talitonu foi o le a vave ona toe foi mea i le tulaga masani.
Ina ua ia taunuu i lona fale i lena taeao o le Aso Sa, sa i ai sana talosaga. Mata e mafai ona latou savavali i le fale na sosoo ai ma fai le faamanatuga ma lona tuaoi e 87 tausaga le matua? Faatasi ai ma le faatagana a le epikopo, sa ia ioeina.
Mo le tele, ma le tele o vaiaso, ma faatasi ai ma le fevavaai faaagafesootai ma le faaeteete faatasi ai ma isi fuataga o le saogalemu, sa faatasitasi ai lena vaega toalaiti o le Au Paia i Aso Sa taitasi mo se auaunaga faafaamanatuga faigofie. Sa na o ni nai fasi falaoa ua vaevae ma ipu vai—ae na tele loimata na maligi mo le agalelei o se Atua alofa.
I le taimi, o le uso o auaunaga, lona aiga, ma le tuafafine sa ia auauna atu i ai sa mafai ona toe foi mai i le lotu. Peitai o le tina ua oti lana tane e 87 tausaga, le tuaoi, ona o le tele o lapataiga, sa nofo ai pea i le fale. Na manatua e le uso o auaunaga—faapea o lona valaauga sa mo lona tuaoi ae le o lenei tuafafine matua—e oo mai i lenei aso e sau ai pea ma le filemu i lona fale i Aso Sa taitasi, o tusitusiga paia ma sina fasi falaoa i le lima e faatautaia ai le faamanatuga o le Talisuaga a le Alii.
O lana auaunaga faaleperisitua, e pei o la’u [auaunaga] i lena aso i le nofoaga autu o le tausiga, na tuuina atu ma le alofa. O le mea moni, na fesili talu ai nei le uso o auaunaga i lana epikopo pe i ai nisi i le uarota e mafai ona ia tausia. O lona manaoga e faalautele lana auaunaga faaleperisitua ua tuputupu ae ao ia auauna atu ai i le suafa o le Alii ma i se auala na toetoe lava a na o ia lava na silafia. Ou te le iloa pe sa tatalo le uso o auaunaga, e pei ona ou faia, mo i latou na ia auauna atu i ai ia iloa le alofa o le Alii, ae ona o lana auaunaga sa faia i le suafa o le Alii, sa tutusa taunuuga.
O lea lava taunuuga matagofie na oo mai ina ua ou tatalo i ai ae ou te lei tuuina atu se faamanuiaga faaleperisitua i se tasi o loo gasegase pe i se taimi o le manaoga. Na faatasi ona tupu i le falema’i ina ua uunaia a’u e fomai lē onosa’i—sa sili atu nai lo le uunaia o a’u—na faatonuina a’u—ia vave aluese mai lo latou auala ina ia mafai ona faia le latou galuega, nai lo le tuuina mai te a’u o se avanoa e tuu atu ai le faamanuiaga faaleperisitua. Sa ou nofo, ma sa ou faia le famanuiaga. Ma o lena teineitiiti lea sa ou faia le faamanuiaga i lena aso, lea na manatu foma’i o le a oti, na ola. Ou te faafetai i lenei taimi i lena aso, ou te le’i faatagaina o’u lagona e faalavelave ae na lagona na finagalo le Alii ia maua e lena teineitiiti se faamanuiaga. Ma sa ou iloa le faamanuiaga: sa ou faamanuiaina o ia ina ia faamaloloina. Ma sa faamanuiaina o ia.
Sa tupu i le tele o taimi a o ou tuuina atu se faamanuiaga i se tasi sa lata ona oti, ma ni tagata o le aiga o siomiaina le moega, faamoemoe mo se faamanuiaga o le faamalologa. Tusa lava pe na’o sina ou taimi na i ai, ou te tatalo lava pea ia iloa po o a faamanuiaga ua teuina e le Alii e mafai ona ou tuuina atu i Lona suafa. Ma sa ou aioi atu ia iloa po o le a Sona finagalo i le auala e faamanuia ai lena tagata ae le o le mea ou te manao ai po o tagata o tutu latalata mai. O lo’u aafiaga e faapea e tusa lava pe le o le faamanuiaga lea e mananao ai isi mo i latou lava po o e pele ia i latou, e pai atu le Agaga i loto ia maua le taliaina ma le toafimalie nai lo le lē fiafia.
E oo mai lena lava musumusuga e tasi pe a anapopogi ma tatalo peteriaka mo le taitaiga e tuuina atu ai le faamanuiaga e finagalo i ai le Alii mo se tagata. Ma le isi, ua ou faalogo o faia faamanuiaga ia e faateia ai a’u ma faateia ai foi le tagata o mauaina le faamanuiaga. E manino lava, o le faamanuiaga na mai le Alii—o lapataiga uma o i ai faapea foi ma folafolaga o faasoaina mai i Lona suafa. O le tatalo ma le anapogi a le peteriaka na tauia e le Alii.
I le avea ai ma se epikopo, sa ou aoaoina a’o faia ni faatalanoaga o le agavaa ina ia tatalo mo le Alii e tuu mai ia ou lagona le mea na Ia finagalo ai mo le tagata, tausia soo se musumusuga o le a Ia saunia e le ufiufiina e la’u lava faamasinoga. E faigata lena mea pe a fai e finagalo le Alii, i le alofa, e faamanuia se tasi ma se aoaiga. E alu ai se taumafaiga ia iloa ai po o le a le finagalo o le Alii mai mea e te manao i ai faapea foi le isi tagata.
Ou te talitonu e mafai ona tatou faalautele la tatou auaunaga faaleperisitua i le aluga o le olaga atoa ma masalo i tua atu. O le a faalagolago i lo tatou filiga i le taumafai ia iloa le finagalo o le Alii ma a tatou taumafaiga ia lagona Lona siufofoga ina ia mafai ona sili atu lo tatou iloa o mea e finagalo i ai o Ia mo le tagata o loo tatou auauna atu i ai mo Ia. O lena faalautelega o le a oo mai i ni laa laiti. Atonu e telegese mai, ae o le a oo mai lava. Ua folafola ma e le Alii lenei mea ia i tatou:
“Aua ai se faamaoni i le maua o nei perisitua e lua ua ou tautala atu ai, ma le faalauteleina o lo latou valaaulia, ua faapaiaina e le Agaga i le faafouina o o latou tino.
“E avea i latou ma atalii o Mose ma Arona ma fanau a Aperaamo ma le ekalesia atoa ma le malo, ma le au filifilia a le Atua.
“O lenei foi o i latou uma o e e talia lenei perisitua ua latou talia aʼu, ua fetalai mai ai le Alii.”3
O la’u molimau e faapea o ki o le perisitua na toefuatai mai i le Perofeta o Iosefa Samita. Na faaali mai auauna a le Alii mai le lagi e toefuatai le perisitua mo mea maoae o le a tutupu lea na faaalia mai ma o loo taatia mai i o tatou luma. O le a faapotopotoina Isaraelu. O le a saunia le nuu o le Alii mo Lona Afio Mai Faalua faamamaluina. O le a faaauau pea le Toefuataiga. O le a faaalia atili mai e le Alii Lona finagalo i Ana perofeta faapea ma Ana auauna.
Atona e te lagonaina le faatauvaa e faatusa i suiga maoae o mea o le a faia e le Alii. Afai e te faia, ou te valaaulia oe ina ia ole atu ma le agaga tatalo i le auala e silasila mai ai le Alii ia te oe. Na te silafia patino oe, na Ia faaeeina atu le perisitua i ou luga, ma o lou tulai ae ma le faalauteleina o le perisitua e taua ia te Ia ona Na te alofa ia te oe ma e Na te talitonuina oe ina ia faamanuiaina tagata Na te alofa i ai i Lona suafa.
Ou te faamanuia atu nei outou ina ia lagona Lona alofa ma Lona faatuatuaga i le suafa o le Alii o Iesu Keriso, amene.