Konsiderá e Bondat i Grandesa di Dios
Mi ta invitá boso ta rekòrdá kada dia e grandesa di Tata Selestial i JesuCristu i kiko Nan a hasi pa boso.
Durante tempu, asta i spesialmente durante tempunan diísifl, profetanan a enkurashá nos pa kòrda e grandesa di Dios i konsiderá loke El a hasi pa nos komo individuonan, famia, i komo un pueblo.1 E kaminda aki ta wòrdu hañá den e skrituranan pero mas notabel den e Buki di Mormon. E pagina di título ta splika ku un di e propositonan di e Buki di Mormon ta “pa mustra na e restu di e kas di Israel kua kosnan grandi Señor a hasi pa nan tatanan.”2 E Buki di Mormon su konklushon ta inkluí Mormon su apelashon: “Ata/ki, mi ker a eksortá boso pa ora boso lo lesa e kosnan aki … ku boso por kòrda kon miserikordioso Señor tabata ku e yunan di hende, … i reflekshoná nan den boso kurason.”3
E konsistensia den apelashonnan di profetanan pa reflehá riba e bondat di Señor ta notabel.4 Nos Tata Selestial ke pa nos rekordá Su bondat i esun di Su Yu stimá, no pa Nan gratifikashon, pero pa e influensia ku e tipo di rekuerdo di Nan generosidat lo tin riba nos. Dor di konsiderá Nan bondat, nos perspektiva i entendimentu lo wòrdu engrandesé. Dor di reflehá riba Nan kompashon, nos ta bira mas humilde, deboto, i firme.
Un eksperiensia konmovedor ku un eks pashènt ta mustra kon generosidat i kompashon por transformá nos. Na 1987, mi a sera konisí ku Thomas Nielson, un hòmber remarkabel ku tabatin mester di un transplante di kurason. E tabatin 63 aña i tabata biba na Logan, Utah, na Merka. Despues di su servisio militar durante Di Dos Guerra Mundial, el a kasa ku Donna Wilkes den e Tèmpel di Logan Utah. El a bira un mètslá enérgiko i eksitoso. Den añanan despues e la disfrutá espesialmente di traha ku su ñetu mas grandi, Jonathan, durante fakansi di skol. Nan dos a desaroyá un konekshon spesial en parti pasobra Tom tabata mira hopi di e mes den Jonathan.
Warda riba un donante di kurason tabata frustrante pa Tom. E no tabata partikularmente un hende ku pasenshi. Semper e tabata por a fiha meta i logra nan pa medio di trabou duru i determinashon puru. Luchando ku fayo di kurason, ku su bida wantá, Tom tin biaha tabata puntra mi kiko mi tabata hasi pa hasi e proseso mas lihe. Ku grasia, e tabata sugerí kamindanan ku mi por a kana ku lo hasi posibel un donante di kurason p’e mas lihe.
Un dia felis pero tòg teribel, un donante ideal a bira disponibel pa Tom. E tamaño i e tipo di sanger tabata pas, i e donante tabata yòn, solamente 16 aña. E kurason donante tabata pertenese na Jonathan, Tom su kerido ñetu. Mas tempran e dia ei, Jonathan a wòrdu herida fatalmente ora e outo ku e tabata koriendo a wòrdu di dal pa un trein ku tabata pasando.
Ora mi a bishitá Tom i Donna den hospital, nan tabata kibrá. Tabata duru pa imaginá kiko nan tabata pasando aden, sabiendo ku Tom su bida por wòrdu ekstendé dor di usa kurason di su ñetu. Na prome instante, nan a ninga di konsiderá e kurason ofresí di e mayoronan tristu di Jonathan, nan yu muhe i nan suegro. Tom i Donna tabata sa, ku Jonathan su serebro tabata morto, i a bin komprondé ku nan orashonnan pa un kurason donante pa Tom no a kousa e aksidente di Jonathan. No, Jonathan su kurason tabata un regalo ku por a bendishoná Tom den su tempu di nesesidat. Nan a rekonosé ku algu bon por sali for di e tragedia i a disidi di sigui.
E prosedura di transplante a bai bon. Despues, Tom a bira un hòmber diferente. E kambio a bai mas ayá ku salú i hasta gratitut. E la konta mi ku e la reflehá kada mainta tokante Jonathan, riba su yu muhé i suegro, riba e regalu ku e la risibí, i riba kiko e regalu aki ta nifiká. I aunke hasta su bon humor i firmesa ainda tabata aparente, mi a opservá ku Tom tabata mas solemne, pensativo i mas bondadoso.
Tom a biba un 13 aña adishonal despues di e transplante, añanan ku lo e no tabatin. Su anunsio di morto a deklará ku e añanan aki a pèrmitié pa toka bida di su famia i otronan ku generosidat i amor. E tabata un benefaktor privá i un ehèmpel di optimismo i determinashon.
Meskos ku Tom, kada un di nos a risibí regalonan ku nos no por a haña di nos mes, regalunan di nos Tata Selestial i Su Yu Stimá, inkluyendo redenshon pa medio di e sakrifisio ekspiatorio di JesuCristu.5 Nos a risibí bida den e mundu aki; nos lo risibí bida despues di aki, i salbashon eterno i eksaltashon—si nos skohe—tur pa motibu di Tata Selestial i JesuCristu.
Kada biaha ku nos usa, benefisiá di dje, òf hasta pensa riba e regalonan aki, nos mester konsiderá e sakrifisio, generosidat, i kompashon di e donantenan. Reverensia pa e donantenan ta hasi nos mas ku solamente agradesido. Reflekshoná riba Nan regalonan por i mester tranformá nos.
Un transformashon remarkabel tabata di Alma Yòn. Miéntras Alma tabata “kana ta rebeldiá kontra Dios,”6 un angel a aparesé. Ku “un bos di trueno,”7 e angel a reprimí Alma dor ku e ta persiguí e Iglesia i “alehando e kurasonnan di e pueblo.”8 E angel a konkluí ku un atmonishon: “Bai, i kòrda e koutiverio di bo tatanan …; i kòrda e kosnan grandi ku [Dios] a hasi pa nan.”9 Di tur e posibel atmonestashon, esei ta loke e angel a enfatisá.
Alma a arepentí i a kòrda. Mas despues el a kompartí e angel su atmonishon ku su yu Helaman. Alma a konsehá, “Mi lo ke pa bo hasi manera ami a hasi, rekordando e koutiverio di nos tatanan; pasobra nan tabata den sklabitut, i ningun por a libra nan eksepto ku tabata e Dios di Abraham, … Isaac, i … Jacob; i sigur el a liberá nan for di nan aflikshonnan.”10 Alma a bisa simplemente, “Mi ta pone mi konfiansa den dje.”11 Alma a kompronde ku rekòrdando libertat for di sklabitut i apoyo durante “tribulashon i problema di tur tipo,” nos lo bin na konose Dios i e siguransa di Su promesanan.12
Poko di nos tin un eksperiensia asina dramatiko manera esun di Alma, pero asina mes nos transformashon por ta igualmente profundo. E Salbador a komprometé ora El a bisa:
“Un kurason nobo tambe lo mi duna bo, i e espiritu nobo lo mi pone den bo; i lo mi kita e kurason di piedra -…- i lo mi duna bo un kurason di karni.
“I lo mi pone mi spiritu den bo.-…
“… I boso lo ta mi pueblo, i lo mi ta boso Dios.”13
E Salbador resusitá a bisa e Nefitanan kon e transformashon ta kuminsa. El a identifiká un parti esensial den Tata Selestial su plan ora El a bisa:
“I Mi Tata a manda Mi pa Mi por wòrdu elevá riba e krus; i despues ku Mi a wòrdu elevá riba krus, ku Mi por atraé tur hende na mi. …
“I pa e motibu aki Mi a wòrdu elevá; p’esei, di akuerdo ku e poder di e Tata Ami lo atraé tur hende na mi.”14
Kiko mester pasa pa bo por wòrdu atraé na e Salbador? Konsiderá e entrega di JesuCristo na e boluntat di su Tata, Su viktoria riba morto, i tuma riba Dje e boso pikánan i erornan, su resepshon di e poder di e Tata pa intersedé pa boso i Su redenshon final pa boso.15 E kosnan aki no ta sufisiente pa atraé boso na Dje? Nan ta pa ami. JesuCristu “ta pará ku brasanan habrí, sperando i deseoso pa kura, pordoná, fortalesé, limpia, enduresé, purifiká, i sanktifiká [boso i ami].”16
E kosnan aki mester duna nos un kurason nobo i animá nos pa skohe pa sigui Tata Selestial i JesuCristu. Sinembargo hasta kurasonnan nobo por ta “inkliná pa dual, … suheto na bandoná e Dios ku [nos] stima.”17 Pa lucha kontra di e tendensia aki, nos mester reflekshoná kada dia riba nos regalonan ku nos a risibí i kiko nan ta nifiká. Rei Benjamin a konsehá, “Lo mi ke pa boso kòrda, i semper retene den bo rekuerdo, e grandesa di Dios … i su bondat i longanimidat pa ku boso.”18 Si nos hasi asina, nosta kalifiká pa bendishonnan selestial remarkabel.
Reflehando riba Dios su grandesa i miserikòrdia ta yuda nos bira mas reseptivo spiritualmente. A kambio, oumento di sensitividat spiritual ta pèrmití nos pa sa di e bèrdat di tur kos pa medio di e poder di e Spiritu Santu.19 Esaki ta inklui e testimonio di e verasidat di e Buki di Mormon, sabiendo ku Jesus ta e Cristu, nos Salbador personal i Redentor, i akseptá ku Su evangelio a wòrdu restourá den e último dianan aki.20
Ora nos kòrda e grandesa di nos Tata Selestial i JesuCristu i kiko nan a hasi pa nos, nos lo no tuma Nan komo algu ligero, manera Tom no a tuma ligero e kurason di Jonathan. Den un manera alegre i reverente, Tom a kòrda kada dia e tragedia ku a trese un bida ekstendé p’e. Den e ánimo di sa ku nos por wòrdu salbá i eksaltá, nos mester kòrda ku salbashon i eksaltashon a bin dor di un preis haltu.21 Nos por ta reverentemente alegre ora nos realisá ku sin JesuCristu, nos lo ta pèrdí, pero ku n’E, nos por risibí e don di mas grandi ku Tata Selestial por duna.22 En berdat, e reverensia aki ta pèrmití nos pa disfrutá “di bida eterna den e mundu aki” i eventualmente risibí “bida eterno … hasta gloria inmortal” den e mundu sigiuiente.23
Ora nos konsiderá e grandesa di nos Tata Selestial i JesuCristu, nos konfiansa den Nan ta oumentá. Nos orashonnan ta kambia pasobra nos sa ku Dios ta nos Tata i nos ta Su yunan. Nos no ta buska pa kambia Su boluntat pero pa aliñá nos boluntat na esun di Dje i sigurá pa nos mes bendishonnan ku E ke duna nos, kondishoná na nos pa pidi pa nan.24 Nos ta anhelá pa ta mas mansu, mas puru, mas stret, mas manera Cristu.25 E kambionan aki ta kualifiká nos pa bendishonnan selestial adishonal.
Dor di rekonosé ku kada kos bon ta bini di JesuCristu, nos lo komuniká nos fé mas efektivamente ku otronan.26 Nos lo tin e kurashi ora nos wòrdu konfrontá ku tareanan i sirkumstansianan ku ta parse imposibel.27 Nos lo fortalesé nos resolushon pa warda e konvenionan ku nos a hasi pa sigui e Salbador28 Nos lo wòrdu yená ku e amor di Dios, ke yuda esnan ku ta den nesesidat sin huzga, stima nos yunan i lantanan den rektitut, mantené un remishon di nos pikánan, i gosa semper .29 Esakinan ta frutanan remarkabel di rekòrdá Dios su grandesa i miserikòrdia.
Den kontraste Señor a atvertí, “Den nada e hòmber mester ofendé Dios, òf kontra ningun su ira lo ta mas sendé, ku esnan ku no konfesá Su man den tur kos.”30 Mi no ta kere ku Dios ta wòrdu insultá si nos lubid’E. Mas bien, mi ta kere E ta profundamente desapuntá. E sa ku nos a alehá nos mes for di e oportunidat di ta mas serka di Dje dor di kòrda E i Su bondat. E ora ei nos ta pèrdè e oportinidat di Dje pa bini mas serka di nos i e bendishonnan spesífiko ku El a primintí nos31
Mi ta invitá boso ta rekòrdá kada dia e grandesa di Tata Selestial i Jesucristo i kiko Nan a hasi pa boso. Laga boso konsiderashonnan di Su bondat uni boso kurason ku a dual mas firme na Nan.32 Skrudiñá Nan kompashon, i boso lo wòrdu bendishoná ku oumento di sensitividat spiritual i bira mas manera Cristu. Kontemplando Nan empatia lo yuda bo “wanta fielmente te na final,” te ora “bo wòrdu risibí den shelu” pa “biba ku Dios den un estado di felisidat sin fin.”33
Nos Tata Selestial refiriendo na Su Yu Stimá, a bisa, Skuch’E!”34 Ora bo ta aktua riba e palabranan ei i skuch’E, kòrda, alegremente i reverente, ku e Salbador su amor ta restourá loke abo no por restourá, E stima pa kura e heridanan ku abo no por kura, E stima drecha loke ta kibrá ku no por drecha mas,35 E ta kompensá pa kada kos malu hasí ku bo:31 i E stima pa drecha permanentemente kurasonnan kibrá.38
Miéntras mi ta reflehá riba e regalunan di nos Tata Selestial i di Jesucristo, mi a bin na konosé Nan amor infinito i Nan kompashon inkomprendibel pa tur Tata Selestial su yunan.36 E konosementu aki a kambia mi, i e lo kambia bo tambe. Den e nòmber di JesuCristu, amèn.