“Laga E Kas Aki Wòrdu Konstruí Den Mi Nòmber”
E konvenionan risibí i ordenansanan hasí den tèmpelnan ta esensial pa e sanktifikashon di nos kurason i pa e eksaltashon final di Dios Su yunan.
Den e Arboleda Sagrado 200 aña pasá, e hoben José Smith a wak i papia ku Dios, e Tata Eterno i Su Yu, JesuCristu. For di Nan, José a siña tokante e berdadero naturalesa di e Deidat i di revelashon kontinuo ora e vishon selestial a marka e komienso di e “dispensashon di e plenitut di tempu” den e delaster dianan.1
Aproksimadamente tres aña despues, komo kontesta na orashon ku fervor durante e anochi di 21 di sèptèmber, 1823, José su kamber a yena ku lus te ora “tabata mas kla ku di dia.”2 Un personahe a aparesé banda di su kama, a yama e mucha hòmber na su nòmber i a deklará ku “e tabata un mensahero mandá for di presensia di Dios … i ku su nòmber tabata Moroni.”3 E la instruí José tokante e benida di e Buki di Mormon.
I e ora ei Moroni a sita for di e buki di Malakías den e Tèstamènt Bieu, ku un tiki variashon den e idioma usá den e vershon di King James:
“Ata’ki, mi ta revelá na bo e Saserdosio, pa medio di e man di Elias e profeta, promé ku e benida di e dia grandi i teribel di Señor. …
“I e lo planta den e kurasonnan di e yunan e promesa hasí na e tatanan, i e kurasonnan di e yunan lo bira na nan tatanan. Si lo no tabata asina, hinter e mundu lo a wòrdu destruí na su benida.”4
Mas importante, Moroni su instrukshon na José Smith tokante Elías su mishon a inisiá e obra di tèmpel i historia familiar den e delaster dianan i tabata un elemento klave den restourá “tur kos, di kua Dios a papia dor di e boka di Su profetanan santu for di dia mundu a kuminsá.”5
Ta mi orashon pa e ayudo di e Spiritu Santu mientras nos ta siña huntu tokante e konvenionan, ordenansanan, i bendishonnan ku ta disponibel pa nos den e tèmpelnan di E Iglesia di Jesucristo di e Santunan di Último dianan.
E Regreso di Elías
Mi ta kuminsa dor di hasi e pregunta fundamental: Dikon e regreso di Elías tabata importante?
“Nos ta siña for di revelashonnan moderno ku Elías tabatin e poder di seyamentu di e Saserdosio di Melkisedek“6 i tabata e delaster profeta ku tabatin esaki promé ku e tempu di JesuCristu.”7
E profeta José Smith a splika, “E spiritu, poder, i yamamentu di Elías ta, ku bo tin poder di tin e yabi di e …plenitut di e Saserdosio Melkisedek … ; i pa … optené … e ordenansanan pertenesiente na e reino di Dios, asta na bira e kurasonnan di e tatanan na nan yunan, i e kurasonnan di e yunan na nan tatanan, asta [di] esnan ku ta den shelu.”8
E outoridat sagrado di seyamentu ta nesesario pa asina “loke bo uni na tera lo wòrdu uní den shelu: i loke ku bo lòs na tera lo wòrdu di lòs den shelu.”9
José a sigui klarifika: “Kon Dios lo bin na reskate di e generashon aki? E lo manda Elías e profeta. … Elías lo revelá e kombenionan ku ta seya e kurasonnan di e tatanan na e yunan, i e yunan na e tatanan.“10
Elías a aparesé ku Moises den e seru di transfigurashon i konferí e outoridat aki riba Pedro, Santiago i Juan.11 Elias a aparesé ku Moises i Elía riba 3 di Aprel 1836, na e Tèmpel di Kirtland i konferi e mesun yabinan di saserdosio riba José Smith i Oliverio Cowdery.12
E restourashon di e outoridat di seyamentu dor di Elías na 1836 tabata nesesario pa prepará e mundu pa e di dos benida di e Salbador i inisiá e oumento grandi i interes mundial den e investigashon di historia familiar.
Kambio, Bira bèk, i Purifiká Kurasonnan
E palabra kurason ta wòrdu usá mas ku mil biaha den e bujinan kanóniko. E palabra simpel pero signifikante aki hopi biaha ta deskribí e sentimentu interno di un individuo. Nos kurason—e konteo total di nos deseonan, afekshon, intenshon, motibu, i aktitut—ta definí ken nos ta i determiná kiko nos lo bira. I e esensia di e obra di Señor ta kambia, bira bèk, i purifiká kurasonnan pa medio di e konvenionan di evangelio i ordenansanan di saserdosio.
Nos no ta konstruí of drenta tèmpelnan solamente pa por tin un eksperiensa individual of familiar memorabel. Mas bien, e konvenionan risibí i ordenansanan hasí den tèmpelnan ta esensial pa sanktifiká nos kurason i pa e eksaltashon mas haltu di Dios su yunan.
Plantando den e kurasonnan di e yunan e promesanan hasí na nan tatanan — hasta Abraham, Isaac, i Jakob—birando e kurasonnan di e yunan na nan propio tatanan, hasiendo investigashon di historia familiar, i hasiendo obra vikario den tèmpel ta obranan ku ta bendishoná individuonan na ambos banda di e velo. Ora nos ansiosamente envolví den e obra sagrado, nos ta obedesé e mandamentunan di amor i sirbi Dios i nos prohimo.13 I e tipo di servisio desinteresá ta yuda nos berdaderamente “Skuch’E!14 i bin na e Salbador.15
E kombenio i ordenansa di saserdosio di mas sagrado ta wòrdu risibí solamente den tèmpel—e Kas di e Señor. Tur kos ku ta wòrdu siñá i tur loke ta wòrdu hasí den e tèmpelnan ta enfatisá e divinidat di JesuCristu i Su ròl den e gran plan di felisidat di Tata Selestial.
Di Paden bai Pafó
Presidente Ezra Taft Benson a deskribí un patronchi importante ku e Redentor ta usa den trese “e imortalidat i bida eterno di hende.”16 E la bisa: “Señor ta traha di paden bin pafó. Mundu ta traha di pafó bai paden. Mundu lo saka hende for di miseria. Cristu ta saka miseria for di hende, i e ora ei nan mes lo saka nan mes for di miseria. E mundu lo moldia hende dor di kambia nan ambiente. Cristu ta kambia hende, ku e ora ei ta kambia nan ambiente. E mundu lo kambia komportashon humano, pero Cristu ta kambia e naturalesa humano.”17
Kombenionan i ordenansanan di saserdosio ta sentral den e proseso kontinuo di renasementu i transformashon spiritual, nan ta e métodonan den kua Señor ta obra ku kada un di nos di paden bai pafó. Konvenionan ku ta wòrdu honrá firmemente, kòrdá semper, i skibí “ku e Spiritu di e Dios bibiente … den e tablanan di karni di e kurason”18proveyendo propósito i e siguransa ku e bendishonnan den mortalidat i pa eternidat. Ordenansanan ku ta wòrdu risibí dignamente i rekòrdá kontinuamente ta habri e kanalnan di shelu pa medio di e poder di devoshon por flui den nos bida.
Nos no ta bin na e tèmpel pa skonde òf skapa di e maldatnan di e mundu. Mas bien, nos ta bin na e tèmpel pa konkistá e mundu for di e maldat. Ora nos ta invitá den nos bidanan e “poder di devoshon”19 dor di risibí e ordenansanan di saserdosio i hasi i warda konvenionan sagrado, nos ta wòrdu bendishoná ku forsa mas ayá ku esun di nos20 pa superá e tentashonnan i desafionan di mortalidat i pa hasi i bira bon.
E Fama di E Kas Aki Lo Plama
E promé tèmpel di e dispensashon aki a wòrdu konstruí na Kirtland, Ohio i dediká riba 27 di mart, 1836.
Den un revelashon na e Profeta José Smith un siman despues di e dedikashon, Señor a deklará:
“Laga e kurason di henter Mi pueblo tin goso, kende, ku nan poder, a traha e kas aki den mi nòmber. …
“Si e kurasonnan di miles i miles lo regosihá en grande komo konsekuensia di e bendishonnan ku lo wòrdu dramá, i e investidura ku kua mi siervonan lo wòrdu bistí den e kas aki.
“I e fama di e kas aki lo plama na teranan den eksterior; i esaki lo ta e komienso di e bendishonnan ku lo wòrdu dramá riba e kabesnan di mi pueblo.”21
Por fabor tuma nota di e frasenan, e kurasonnan di e miles i miles lo regosihá en grande, i e fama di e kas aki lo plama na teranan den eksterior. Esakinan tabata deklarashonnan maravioso na aprel 1836, ora e Iglesia tabata tin un man yen di miembronan i un tèmpel.
Awendia den 2020 ,nos tin 168 tèmpel operando. Kuarentinuebe tèmpel adishonal bou di konstrukshon òf ku a wòrdu anunsiá. Kasnan di Señor ta wòrdu konstruí den e “islanan di laman“22 i den paisnan i lugánan konsiderá previamente pa hopi komo ménos probabel pa un tèmpel.
E seremonia di investidura aktualmente ta presentá den 88 idioma i lo bira disponibel den idiomanan adishonal ora mas tèmpel wòrdu konstruí pa bendishoná mas yunan di Dios. Den e siguiente 15 añanan, e kantidat di idiomanan den kua ordenansanan di tèmpel lo ta disponibel probablemente lo dupliká.
E aña aki nos lo hasi inisio i kuminsa konstruí 18 tèmpel. Den kontraste, a tuma 150 aña pa konstruí e promé 18 tèmpelnan, for di e organisashon di e Iglesia na 1830 te na e dedikashon di e Tèmpel di Tokyo Hapon dor di Presidente Spencer-W. Kimball na 1980.
Konsiderando e obra di aselera konstrukshon di tèmpel ku a sosodé durante e tempu di bida di Presidente Russel-M. Nelson. Ora Presidente Nelson a nase riba 9 di sèptember 1924, e Iglesia tabatin seis tèmpel den operashon.
Ora e la wòrdu ordená un Apòstel na 7 di aprel 1984, 60 aña despues, 26 tèmpel tabata den operashon, un oumento di 20 tèmpel den 60 aña.
Ora Presidente Nelson a wòrdu sostené komo Presidente di e Iglesia, 159 tèmpel tabata den operashon, un oumento di 133 tèmpel den e 34 aña durante kua e la sirbi komo miembro di e Quorum di Diesdos.
For di tempu el a bira Presidente di e Iglesia dia 14 di yanüari 2018, Presidente Nelson a anunsiá 35 tèmpel nobo.
Nobentiseis porshento di e tèmpelnan eksistente a wòrdu dediká durante Presidente Nelson su bida; 84 porshento a wòrdu dediká for di tempu ku el a wòrdu ordená un Apòstel.
Semper Enfoká riba e Kosnan Ku Ta Mas Importante
Komo miembro di Señor Su Iglesia restourá, nos ta para tur asombrá pa wak kon e obra di Señor ta aselera den e delaster dianan. I mas tèmpel ta biniendo.
Brigham Young a profetisá, “Pa kumpli ku e obra aki lo no mester tin solamente un tèmpel pero miles di nan, i miles i miles di hòmber i muhé lo drenta den e tèmpelnan aki i ofisiá pa e hendenan ku a biba mes leu atras ku Señor lo revelá.”23
Ta di kompronde, e anunsio di kada tèmpel nobo ta un fuente di gran goso i un rason pa duna danki na Señor. Sinembargo, nos enfoke primario mester ta riba e konvenionan i ordenansanan ku ta kambia nos kurason i oumenta nos devoshon na e Salbador i no simplemente e lugá i e bunitesa di e edifisio.
E obligashonnan fundamental ta kai riba nos komo miembronan di Señor su Iglesia restourá i (1) pa “Skuch’E!”24 i tin nos propio kurason kambiá pa medio di konvenio i ordenansa, i (2) pa kumpli ku goso i responsabilidat divinamente apuntá pa ofresé bendishonnan di tèmpel na hinter e famia humano na ambos banda di e velo. Ku Señor Sy guia i ayuda, berdaderamente nos lo kumpli ku e debernan sagrado aki.
E Konstrukshon di Sion
E Profeta Jose Smith a deklará:
“E konstrukshon di Sion ta un kousa kua interesá e pueblo di Dios den tur époka; taun tema di kual profetanan, saserdotenan i reinan a biba ku ne ku un deleite pekuliar, nan a wak dilanti ku antisipashon gososo riba e dia den kua nos ta biba; i ensendí ku antisipashon selestial i gososo nan a kanta i skirbi i profetisá di esaki nos [ku] dia; pero nan a muri sin e bista; … ta na nos pa wak, partisipá den i yuda pa hiba dilanti e gloria di delaster dianan.”25
“E Saserdosio Selestial lo uní ku esun di mundu, pa logra e gran propósitonan; … un obra ku Dios i angelnan a kontemplá ku deleite pa generashonnan den pasado, ku ta sende e alamanan di e patriarkanan i profetanan antiguo; un obra ku ta destiná pa logra e destrukshon di e poder di skuridat, e renobashon di e mundu, e gloria di Dios, i e salbashon di e famia humano.”26
Mi ta testifiká solemnemente ku e Tata i e Yu a aparesé na José Smith, i Elías a restourá e outoridat di seyamentu. Kombenionan sagrado di tèmpel por fortalesé nos i purifiká nos kurason ora nos ta ”Skucha E!”27 i risibí e poder di denoshon den nos bida. I mi ta testifiká ku e obra di e delaster dianan lo destruí e poder di skuridat i logra e salbashon di e humanidat. Di e bèrdatnan aki ku goso mi ta testifiká den nòmber di JesuCristu, amèn.