ພຣະຄຣິດເຈົ້າຄືນຊີບວັນນີ້
ນີ້ແມ່ນວັນອາທິດບຸນອິດສະເຕີ. ຂ້າພະເຈົ້າຂໍເປັນພະຍານດ້ວຍຄວາມຄາລະວະ ແລະ ຢ່າງໜັກແໜ້ນເຖິງພຣະຄິດ ທີ່ຊົງພຣະຊົນຢູ່—ພຣະອົງ ຜູ້ໄດ້“ສິ້ນພຣະຊົນ, ໄດ້ຖືກຝັງ, ແລະ ໄດ້ຟື້ນຄືນພຣະຊົນອີກ ໃນມື້ທີສາມ.”
ອ້າຍເອື້ອຍນ້ອງທັງຫລາຍ, ຕອນລູກຊາຍຂອງພວກເຮົາຍັງນ້ອຍ, ຂ້າພະເຈົ້າໄດ້ເລົ່າເລື່ອງໜຶ່ງໃຫ້ພວກເຂົາຟັງ ຕອນເຂົ້ານອນ ກ່ຽວກັບໝາລ່າສັດ ແລະ ໄດ້ຮ້ອງເພງສວດໃນຄໍ ຮ່ວມທັງເພງ “ພຣະຄຣິດເຈົ້າຄືນຊີບວັນນີ້.”1 ບາງເທື່ອຂ້າພະເຈົ້າກໍໄດ້ປ່ຽນເນື້ອເພງດ້ວຍຄຳອະທິຖານວ່າ: ບັດນີ້ ເຖິງເວລາຫລັບນອນແລ້ວ—ອາເລລູຢາ. ຕາມປົກກະຕິແລ້ວ ລູກຊາຍຂອງພວກເຮົາກໍຫລັບໄວ; ຫລື ຢ່າງໜ້ອຍ ພວກເຂົາຮູ້ວ່າ ຖ້າຂ້າພະເຈົ້າຄິດວ່າ ພວກເຂົາ ຫລັບໄວ, ຂ້າພະເຈົ້າຊິເຊົາຮ້ອງເພງ.
ຖ້ອຍຄຳ—ຢ່າງໜ້ອຍຖ້ອຍຄຳຂອງຂ້າພະເຈົ້າ—ບໍ່ສາມາດເວົ້າອອກມາໄດ້ ເຖິງຄວາມຮູ້ສຶກທີ່ຖ້ວມລົ້ນ ນັບຕັ້ງແຕ່ປະທານຣະໂຊ ເອັມ ແນວສັນ ໄດ້ຈັບມືຂ້າພະເຈົ້າ, ມີ ຊູແຊນທີ່ຮັກຂອງຂ້າພະເຈົ້າ ຢູ່ຄຽງຂ້າງ, ແລະ ໄດ້ມອບຕຳແໜ່ງນີ້ ຈາກພຣະຜູ້ເປັນເຈົ້າ ໃຫ້ຂ້າພະເຈົ້າ ຊຶ່ງໄດ້ເຮັດໃຫ້ຂ້າພະເຈົ້າຕົກຕະລຶງ ແລະ ນ້ຳຕາໄຫລຫລາຍເທື່ອ ໃນຫລາຍມື້ມານີ້.
ໃນວັນອິດສະເຕີມື້ນີ້, ຂ້າພະເຈົ້າຊື່ນຊົມ ທີ່ຈະຮ້ອງວ່າ, “ອາເລລູຢາ.” ເພງທີ່ກ່າວເຖິງຄວາມຮັກທີ່ໄຖ່ ຂອງພຣະຜູ້ຊ່ວຍໃຫ້ລອດ2 ສະເຫລີມສະຫລອງຄວາມປອງດອງແຫ່ງພັນທະສັນຍາ (ທີ່ເຊື່ອມຕໍ່ເຮົາໃສ່ກັບພຣະເຈົ້າ ແລະ ຕໍ່ກັນແລະກັນ) ແລະ ການຊົດໃຊ້ຂອງພຣະເຢຊູຄຣິດ (ທີ່ຊ່ວຍເຮົາໃຫ້ເຊົາເປັນມະນຸດທີ່ມີຈິດໃຈທຳມະດາ ແລະ ເຮັດຕາມການກະຕຸ້ນຂອງພຣະວິນຍານສັກສິດ3).
ພ້ອມກັນ, ພັນທະສັນຍາຂອງເຮົາ ແລະ ການຊົດໃຊ້ຂອງພຣະຜູ້ຊ່ວຍໃຫ້ລອດ ເຮັດໃຫ້ເປັນໄປໄດ້ ແລະ ຍົກລະດັບຈິດໃຈ. ພ້ອມກັນ, ທັງສອງຊ່ວຍເຮົາໃຫ້ຍຶດໝັ້ນ ແລະ ປ່ອຍໄປ. ພ້ອມກັນ, ທັງສອງຫວານຊື່ນ, ຮັກສາ, ຊຳລະ, ໄຖ່ຖອນ.
ສາດສະດາ ໂຈເຊັບ ສະມິດ ໄດ້ກ່າວວ່າ: “ກັບບາງຄົນ ອາດເບິ່ງຄືວ່າ ມັນເປັນຄຳສອນທີ່ອາດຫານຫລາຍ ທີ່ພວກເຮົາກ່າວເຖິງ—ເປັນອຳນາດຊຶ່ງບັນທຶກໄວ້ ຫລື ຜູກມັດໄວ້ ຢູ່ໃນແຜ່ນດິນໂລກ ແລະ ຢູ່ໃນສະຫວັນ. ເຖິງຢ່າງໃດກໍຕາມ, ໃນທຸກຍຸກທຸກສະໄໝຂອງໂລກ, ເມື່ອໃດກໍຕາມທີ່ພຣະຜູ້ເປັນເຈົ້າໄດ້ມອບສະໄໝຂອງຖານະປະໂລຫິດ ໃຫ້ມະນຸດຄົນໃດ ໂດຍການເປີດເຜີຍໂດຍກົງ, ຫລື ຄົນກຸ່ມໃດກໍຕາມ, ອຳນາດນີ້ໄດ້ຖືກມອບໃຫ້ສະເໝີ.”4
ແລະ ໃນເວລານີ້ກໍຄືກັນ. ພັນທະສັນຍາ ແລະ ພິທີການທີ່ສັກສິດ, ຊຶ່ງບໍ່ມີໃຫ້ຢູ່ບ່ອນອື່ນ, ໄດ້ຮັບຢູ່ໃນບ້ານທີ່ສັກສິດ 159 ແຫ່ງຂອງພຣະຜູ້ເປັນເຈົ້າ ແລະ ໃນ 43 ປະເທດເທົ່ານັ້ນ. ພອນທີ່ສັນຍາໄວ້ ມາເຖິງເຮົາຜ່ານທາງຂໍກະແຈຂອງຖານະປະໂລຫິດ, ຄຳສອນ, ແລະ ສິດອຳນາດທີ່ຖືກຟື້ນຟູ, ຜ່ານທາງຜົນສະທ້ອນແຫ່ງສັດທາ, ການເຊື່ອຟັງຂອງເຮົາ, ແລະ ຄຳສັນຍາຂອງພຣະວິນຍານສັກສິດຂອງພຣະອົງ ໃນລຸ້ນລູກຫລານຂອງເຮົາ, ໃນການເວລາ ແລະ ໃນນິລັນດອນ.
ອ້າຍເອື້ອຍນ້ອງທີ່ຮັກແພງ, ໃນທຸກປະຊາຊາດ, ທຸກຕະກຸນ, ແລະ ທຸກພາສາ, ຕະຫລອດທົ່ວສາດສະໜາຈັກທີ່ຂະຫຍາຍກວ້າງທົ່ວໂລກຂອງເຮົາ,ຂໍຂອບໃຈສຳລັບສັດທາ, ຄວາມຫວັງ, ແລະ ຄວາມໃຈບຸນ ທີ່ດຳລົງຢູ່ຂອງທ່ານ ໃນທຸກບາດກ້າວ. ຂໍຂອບໃຈ ສຳລັບປະຈັກພະຍານ ແລະ ການກາຍເປັນປະສົບການ ຂອງການເຕົ້າໂຮມ ແຫ່ງພຣະກິດຕິຄຸນທີ່ສົມບູນ ຊຶ່ງຖືກຟື້ນຟູ.
ອ້າຍເອື້ອຍນ້ອງທີ່ຮັກແພງ, ເຮົາເປັນຄອບຄົວດຽວກັນ. ເຮົາສາມາດ“ຜູກພັນເຂົ້າກັນເປັນອັນໜຶ່ງອັນດຽວກັນ ແລະ ໃນຄວາມຮັກ”5 ໃນທຸກສິ່ງ ແລະ ໃນທຸກບ່ອນ.6 ດັ່ງທີ່ອົງພຣະເຢຊູຄຣິດເຈົ້າເຊື້ອເຊີນເຮົາແຕ່ລະຄົນ, ບໍ່ວ່າເຮົາຈະຢູ່ໃສ, ສະພາການຂອງເຮົາຈະເປັນແນວໃດ, ຂໍໃຫ້ “ມາ ແລະ ເບິ່ງ.”7
ມື້ນີ້ ຂ້າພະເຈົ້າຂໍປະຕິຍານຕໍ່ພຣະຜູ້ຊ່ວຍໃຫ້ລອດ, ຕໍ່ຊູແຊນທີ່ຮັກຂອງຂ້າພະເຈົ້າ ແລະ ຄອບຄົວ, ຕໍ່ບັນດາອ້າຍນ້ອງຂອງຂ້າພະເຈົ້າ, ແລະ ຕໍ່ທ່ານທັງຫລາຍ, ອ້າຍເອື້ອຍນ້ອງຂອງຂ້າພະເຈົ້າ ດ້ວຍສຸດພະລັງແຫ່ງຈິດວິນຍານຂອງຂ້າພະເຈົ້າ,8 ບໍ່ວ່າຈະເປັນແນວໃດ ຫລື ຈະກາຍເປັນແນວໃດກໍຕາມ.
ທຸກສິ່ງທີ່ມີຄ່າຄວນ ແລະ ນິລັນດອນ ເຈາະຈົງຢູ່ທີ່ ຄວາມເປັນຈິງຂອງພຣະເຈົ້າ, ພຣະບິດານິລັນດອນຂອງເຮົາ ແລະ ພຣະບຸດຂອງພຣະອົງ, ພຣະເຢຊູຄຣິດ, ແລະ ການຊົດໃຊ້ຂອງພຣະອົງ, ຊຶ່ງເປັນພະຍານໂດຍພຣະວິນຍານບໍລິສຸດ.9 ນີ້ແມ່ນວັນອາທິດບຸນອິດສະເຕີ. ຂ້າພະເຈົ້າຂໍເປັນພະຍານດ້ວຍຄວາມຄາລະວະ ແລະ ຢ່າງໜັກແໜ້ນເຖິງພຣະຄິດ ທີ່ຊົງພຣະຊົນຢູ່—ພຣະອົງ ຜູ້ໄດ້“ສິ້ນພຣະຊົນ, ໄດ້ຖືກຝັງ, ແລະ ໄດ້ຟື້ນຄືນພຣະຊົນອີກ ໃນມື້ທີສາມ, ແລະ ໄດ້ສະເດັດຂຶ້ນໄປສະຫວັນ.”10 ພຣະອົງຄືອາລະຟາ ແລະ ໂອເມຄາ11—ໄດ້ຢູ່ກັບເຮົາໃນຕອນຕົ້ນ, ພຣະອົງຈະຢູ່ກັບເຮົາ ຈົນເຖິງທີ່ສຸດ.
ຂ້າພະເຈົ້າເປັນພະຍານເຖິງສາດສະດາຂອງຍຸກສຸດທ້າຍ, ນັບຈາກສາດສະດາໂຈເຊັບ ສະມິດ ເຖິງປະທານຣະໂຊ ເອັມ ແນວສັນ ທີ່ຮັກແພງຂອງເຮົາ, ຜູ້ທີ່ເຮົາໄດ້ສະໜັບສະໜູນ ດ້ວຍຄວາມປິຕິຍິນດີ. ດັ່ງທີ່ເດັກນ້ອຍປະຖົມໄວເຮົາໄດ້ຮ້ອງເພງວ່າ, “ຈົ່ງຕິດຕາມສາດະດາເທີ້ນ; ເພິ່ນຮູ້ເສັນທາງ.”12 ຂ້າພະເຈົ້າເປັນພະຍານວ່າ, ດັ່ງທີ່ມີທຳນາຍໄວ້ ຢູ່ໃນພຣະຄຳພີທີ່ສັກສິດ, ລວມທັງພຣະຄຳພີມໍມອນ: ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ, “ອານາຈັກຂອງພຣະຜູ້ເປັນເຈົ້າ ໄດ້ຖືກສະຖາປະນາຄືນໃໝ່ອີກ ຢູ່ເທິງແຜ່ນດິນໂລກ, ຕຽມສຳລັບການສະເດັດມາຄັ້ງທີສອງຂອງພຣະເມຊີອາ.13 ໃນພຣະນາມອັນບໍລິສຸດ ແລະ ສັກສິດຂອງພຣະເຢຊູຄຣິດ, ອາແມນ.