Regresá na Fe

Pa Rosemary M. Wixom

Presidente General di Primaria

Imagen

Kada un di nos por fortalesé nos fe den JesuCristu riba nos biahe individual i haña goso.

Presidente Monson, riba e Pasku mainta aki, nos ta asina gradesí pa skucha e stèm di nos profeta bibiente. Nos ta balorá bo palabranan, inkluso bo konseho: “Haña goso den e biahe” ¹ i “E futuro ta briante manera boso fe.” ²

E aña aki muchanan di Primaria ta kompartí e goso i e brio di nan fe den JesuCristu ora nan ta kanta e kantika “Mi sa ku Mi Salbador ta Stima Mi”. Nan ta kanta e bèrdat: “Mi sa ku E ta biba! … Mi kurason mi ta dun’é. ³ Meskos ku e muchanan di Primaria, kada un di nos por fortalesé nos fe den JesuCristu riba nos biahe individual i haña goso.

Poko tempu pasá den un reunion di djadumingu di Sosiedat di Sokoro mi a skucha un mama yòn ku a kompartí parti di su biahe pa kombershon. El a krese den Iglesia ku mayornan ku a siñ’é e evangelio. El a bai Primaria, Mujeres Jovenes, i seminario. E tabata gusta pa siña i deskubrí berdatnan. Su búskeda konstante tabata pa sa “di kon”. Elder Russell M. Nelson a bisa, “Señor por siña solamente un mente investigadó.” ⁴ I e muhé yòn aki tabata dispuesto pa siña.

Despues di skol sekundario el a bai universidat, a seya den tèmpel na un mishonero regresá, i tabata bendishoná ku yunan bunita.

Ku e spiritu di investigá, e mama aki a sigui hasi pregunta. Pero segun e preguntanan tabata mas difísil, asina e kontestanan tambe. I tin bia no tabatin kontesta---òf ningun kontesta ku tabata dun’é pas. Eventualmente ora e tabata buska pa haña kontesta, mas i mas pregunta tabata sali i el a kuminsá kuestioná algun di e fundamentunan di su fe.

Durante di e tempu konfuso aki, algun di esnan rònt di dje a bisa, “Djis lèn riba mi fe.” Pero el a pensa, “Mi no por. Boso no ta komprondé; boso no ta den mi sapatu.” El a splika, “Mi ke a keda amabel ku nan, si nan tambe tabata amabel ku mi.” I hopi tabata .

El a bisa, “Mi mayornan tabata komprondé i a laga mi ketu. Nan a skohe pa stima mi miéntras mi tabata purba pa sa pa mi mes.” E obispu di e mama yòn aki tambe a reuní hopi bia ku n’e i a bisé di su konfiansa den dje.

Miembronan di bario tampoko no a duda pa duna amor, i el a sintié inkluí. Su bario no tabata un lugá pa parse di ta perfekto; e pero un lugá pa apoyá otro.

“Tabata interesante,”e ta kòrda. “Durante di e tempu aki mi a sinti un konekshon real na mi welanan i ku a fayesé. Nan tabata sostené mi i urgi mi pa keda purba. Mi a sinti ku nan tabata bisando, ‘Konsentrá riba lokual bo sa.’’’

Apesar di hopi ku a sostené, el a bira ménos aktivo. El a bisa, “Mi no a separá mi mes for di Iglesia pa motibu di mal komportashon, apatia spiritual, wak esküs pa no biba e mandamentunan, òf buska un salida fásil. Mi a sinti ku mi tabatin mester di un kontesta ‘Kiko mi ta kere realmente?”

Durante di e tempu aki el a lesa un buki di e eskritonan di Mama Teresa, ku a eksperensiá sentimentunan similar. Den un karta di 1953, Mama Teresa a skibi: “Por fabor hasi orashon spesialmente pa mi, pa mi no ruina Su obra i ku Nos Señor por mustra Su mes---pasobra tin un skuridat teribel den mi, komo si fuera tur kos tabata morto. Ta asina aki mas o ménos for di e tempu ku mi a kuminsá ‘e obra.’ Pidi Nos Señor pa duna mi kurashi.”

Arsobispu Périer a respondé: “Dios ta guia bo, Mama stimá; bo no ta asina den skuridat manera bo ta pensa. Ta posibel ku e kaminda pa sigui no semper ta kla mes ora. Pidi pa lus; no disidí muchu lihé, skucha na loke otronan ke bisa, konsiderá nan motibunan. Semper lo bo haña algu pa yuda bo… .Guiá pa fe, orashon i a base di bon intenshon bo tin loke bo tin mester.” ⁵

Mi amiga a pensa ku si Mama Teresa por biba su religion sin tur e kontestanan i sin un sentimentu di klaridat den tur kos, kisas e tambe por. E por dal un paso simpel pa dilanti den fe--- i despues un otro. E por konsentrá riba e bèrdatnan ku el a kere i laga e bèrdatnan aki yena su mente i kurason.

Ora el a reflekshoná bèk, el a bisa, “Mi testimonio a bira hopi suak. No a keda kasi nada. Tur loke a keda tabata JesuCristu.” El a sigui, “Pero E no ta bandoná bo ora bo tin pregunta. Ora un persona ta purba di warda e mandamentunan, e porta ta hanchu habrí. Orashon i estudio di skritura ta bira inkreiblemente importante.”

Su promé paso pa rekonstruí su fe tabata pa kuminsá ku bèrdatnan básiko di evangelio. El a kumpra un buki di kantika di Primaria i a kuminsá lesa e palabranan di e kantikanan. Nan tabata un tesoro p’e. El a hasi orashon ku e meta pa tin fe pa kita e peso pisá ku e tabata sinti.

El a siña ku ora haña un deklarashon ku poné duda, e por “warda, wak henter e plachi, i hasi e evangelio personal.” El a bisa, “ Lo mi a puntra, ‘Esaki ta e kaminda pa mi i mi famia?’ Tin biaha lo mi a puntra mi mes, ‘Kiko mi ke pa mi yunan?’ Mi a realisá ku mi tabata ke pa nan kasa den tèmpel. Esei ta e ora ku kerementu a bini bèk na mi kurason.”’

Elder Jeffrey R. Holland a bisa, “Humildat, fe, i e influensia di e Spiritu Santu [lo] ta semper elementonan di tur búskeda pa bèrdat.” ⁶

Ounke e tabatin preguntanan tokante kon e Buki di Mormon a sali na kla, e no por a ninga e bèrdatnan ku e tabata sa den e Buki di Mormon. El a konsentrá riba studiamentu di e Tèstamènt Nobo pa komprondé e Salbador mihó. “Pero eventualmente,” el a bisa, “Mi a haña mi mes bèk den e Buki di Mormon pasobra mi a gusta loke mi a sinti ora mi a lesa tokante di JesuCristu i Su Ekspiashon.

El a konkluí, “Bo mester tin bo propio eksperensianan spiritual ku e bèrdatnan den e buki aki,” i e tabata hañando nan. El a splika,”Mi a lesa den Mosia i a sinti mi kompletu mesora. ‘Kere den Dios; kere ku e ta, i ku el a krea tur kos… kere ku e tin tur sabiduria, i tur poder, tantu na shelu komo na tera; kere ku hende no por komprondé tur loke Señor por komprondé.’⁷”

Den e temporada aki un yamamentu a bin pa sirbi komo pianista di Primaria. “E tabata safe” el a bisa. “Mi ke tabatin mi yunan den Primaria, i awor mi por tabata huntu ku nan. I mi no tabata kla pa duna lès ainda.” Segun el a sirbi, el a sigui sinti for di esnan rònt di dje e invitashon “Bini, nos ke bo sin importá na kua nivel bo ta, nos lo traha ku bo einan. Duna nos tur ku bo tin pa ofresé.”

Tokando e kantikanan di Primaria, el a pensa hopi bia den su mes: “Aki tin bèrdat ku mi stima. Ainda mi por duna mi testimonio. Lo mi djis bisa e kosnan mi sa i ta konfia. Por ta no ta un ofrenda di konosementu, pero e lo ta mi ofrenda. Loke mi ta konsentrá pa ekspandé den mi. Ta bunita pa bai bèk na e esensia di e evangelio i sinti klaridat.”

Riba e djadumingu mainta aki, ora mi tabata skucha e hermana yòn aki kompartí e historia di su biahe, mi a kòrda ku ta riba e baranka di nos Redentor nos tur tin ku edifiká nos fundeshi.⁸ Mi a kòrda tambe di e konseho di Elder Jeffrey R. Holland: “Tene duru na loke boso sa kaba i para fuerte te ora mas konosementu bini.” ⁹

Durante su lès, mi a haña sa mas fervientemente ku kontesta na nos preguntanan sinsero ta bini ora nos buska honestamente i ora nos biba e mandamentunan. Mi a kòrda ku nos fe por alkansá mas leu ku e límitenan di lógika aktual.

I, o, kuantu deseo mi tin di ta manera esnan ku a rondoná e mama yòn aki, ku a stima i sostené. Manera Presidente Dieter F. Uchtdorf a bisa: “Nos tur ta peregrino ku ta buska Dios su lus ora nos ta biaha riba e kaminda di disipulado. Nos no ta kondená otro pa e kantidat di lus ku nan por tin òf no tin; mas bien, nos ta kuida i animá tur lus te ora e bira kla,briante, i bèrdadero. ¹⁰

Ora e muchanan di Primaria ta kanta “Orashon di un mucha,” nan ta puntra “Tata Selestial, di bèrdat bo tei? I bo ta skucha i kontestá orashon di tur mucha?” ¹¹

Nos tambe por puntra, “Tata Selestial ta realmente ei?” solamente pa alegrá---meskos ku mi amiga a hasi---ora e kontestanan a bini den siguransa ketu i simpel. Mi ta testifiká ku e siguransanan simpel ei ta bini ora su boluntat bira di nos. Mi ta testifiká ku bèrdat ta na mundu awe i Su evangelio ta hañá den e iglesia di JesuCristu di e Santunan di e Delaster dianan. Den e nòmber di JesuCristu, amèn.