Si Lo Bo Ta Responsabel

Pa Elder Jorge F. Zeballos

Di e Setenta

Imagen

Laga nos sigui dilanti dor di siña nos deber, tumando desishonnan korekto, aktuando segun e desishonnan ei, i aseptando e boluntat di nos Tata.

Mi tabatin solamente 12 aña ora e mishoneronan a yega pa e promé biaha pa prediká den e siudat unda mi tabata biba den e nort di Chile. Un djadumingu, despues ku mi tabata asistiendo na un rama chikí pa seis luna, un mishonero a ofresémi e pan ora ku e tabata pasá e santa sena Mi a mir’é i ku bos ketu mi a bisi’é. “Mi no por.”

“Dikon no? El a kontestá.

Mi a bisi’é, “Pasobra mi no ta un miembro di Iglesia.”¹

E mishonero no por a kere esei. Su wowo tabata bria. Mi ta suponé ku el a pensa, “Pero e mucha aki ta asistí na kada reunion! Kon por ta ku e no ta un miembro di e Iglesia?”

E dia despues, e mishoneronan tabata na nos kas, nan a hasi tur loke nan por pa siña e henter e famia. Pero dor ku mi famia no tabata interesá, tabata mi asistensia semanal na Iglesia pa mas di seis luna ku a laga e mishoneronan sinti konfiansa pa sigui. Finalmente e momento grandi ku mi tabata warda a yega ora nan a invitá mi pa bira un miembro di e Iglesia di JesuCristu di e Santunan di Delaster Dianan. E mishoneronan a splika mi ku dor ku mi tabata menor di edat, lo mi mester pèrmit di mi mayornan. Mi a bai ku e misioneronan pa papia ku mi tata, pensando ku su kontesta amoroso lo ta “Yu, ora bo tin e edat legal, lo bo por tuma bo propio desishonnan.”

Miéntras ku e mishoneronan tabata papia kuné, mi a hasi orashon fervientemente pa su kurason wòrdu inspirá pa e duna e mishoneronan e pèrmit ku mi tabata ke. Su kontesta na e mishoneronan tabata lo siguiente: “Eldernan, den e seis luna ku a pasá, mi a mira mi yu Jorge lanta tempran kada Djadumingu, bisti su mihó pañanan, i kana bai iglesia. Solamente mi a mira un bon influensia di Iglesia den su bida.” E ora ei el a papia ku mi, el a sorprendé mi bisando, “Yu, si bo lo ta responsabel pa e desishon aki, e ora ei bo lo tin mi pèrmit pa bo wòrdu boutisá.” Ma bras’é, dun’é un sunchi, i gradisié pa loke el a hasi. E siguiente dia mi a wòrdu boutisá. Siman pasá tabata e aniversario number 47 di e momento importante ei den mi bida.

Kua responsabilidat nos tin komo miembro di e Iglesia di JesuCristu? Presidente Joseph Fielding Smith a ekspres’é di siguiente manera: Nos tin dos responsabilidatnan grandi aki… Promé, pa buska nos mes salbashon; I di dos, nos deber pa nos próhimo.”²

Esakinan, anto, ta e responsabilidatnan prinsipal ku nos Tata a asigná na nos: buska bo mes salbashon i esun di otronan, ku e komprenshon ku salbashon kier men pa alkansá e grado di gloria ku nos Tata a duna pa Su yunan obediente.³ E responsabilidatnan aki a wòrdu konfiá nan nos—i ku nos a aseptá boluntariamente—mester definí nos prioridatnan, nos deseonan, nos desishonnan, i nos kondukta diario.

Pa un hende ku a yega na komprondé esei, dor di e ekspiashon di JesuCristu, eksaltashon ta realmente den alkanse, faya pa logra esaki ta nifiká kondenashon. Asina, e opuesto di salbashon ta kondenashon, meskos ku e opuesto di éksito ta frakaso. Presidente Thomas S. Monson a siñá nos ku “hòmbernan no por ta kontentu ku mediokrasia un ora ku nan mira ku ekselensia ta den nan alkanse.”⁴ Kon, anto, nos por ta kontentu ku kualke kos menor ku eksaltashon si nos sa ku eksaltashon ta posibel?

Permití mi kompartí kuater prinsipio ku lo yuda nos kumpli nos deseo pa ta responsabel na nos Tata na shelu igual ku kontestá na su ekspektativa pa nos bira manera E ta.

1. Siña nos Deber

Si nos ke hasi e boluntat di Dios, si nos ke ta responsabel na Dje, nos mester kuminsá dor di siña, komprondé, aseptá, i biba di akuerdo ku Su boluntat pa nos. E Señor a bisa, “P’esei laga kada hòmber siña su deber, i pa aktua den e ofisio den kua el a wòrdu yamá, ku tur diligensia.”⁵ Pa tin e deseo di hasi loke ta korekto no ta sufisiente si nos no ta sigurá pa komprendé loke nos Tata ta spera for di nos I loke e kier pa nos hasi.

Den e historia di Alicia den e pais di maravia, Alicia no sa kua kaminda e mester bai, anto e ta puntra e pushi Cheshire, “Lo bo bisami, por fabor, kua kaminda mi mester tuma for di aki?”

E pushi a kontesta, “esei ta dependé den gran parti unda bo ke yega.”

Alicia a bisa, “No ta importá mi unda.”

“E ora ei e no ta importá kua kaminda bo lo bai,” e pushi a bisa.⁶

Sin embargo, nos sa ku e kaminda ku ta hiba na e “palu, ku su fruta ta deseabel pa hasi un [hende] felis”⁷—“e kaminda ku ta hiba na bida—ta smal, e ta tuma esfuerso pa biaha den e kaminda, i “un tiki di hende so ta hañ’é.”⁸

Nefi ta siña nos ku e “palabranan di Cristu lo bisa boso tur loke boso tin ku hasi.”⁹ Anto e ta añadí ku “e Spiritu Santu… lo mustra boso tur loke boso tin ku hasi.”¹⁰ Asina, e fuentenan ku ta laga nos siña nos deber ta e palabranan di Cristu ku nos lo risibí dor di profetanan antiguo i moderno I e revelashon personal ku nos risibí pa medio di e Spiritu Santu.

2. Tumando e Desishon

Sea ku nos a siña tokante di e Restourashon di e evangelio, un mandamentu partikular, e debernan asosiá ku servisio den un yamamentu, òf e kombenionan ku nos ta hasi den e tèmpel, e desishon ta di nos sin importá ku nos ta aktua den e konosementu nobo ei. Kada hende ta skohe libremente pa su mes pa drenta den un kombenio sagrado manera boutismo òf e ordenansanan di e tèmpelnan. Dor ku huramentu tabata un parti normal di bida religioso di hende den antigwedat, e lei antiguo a deklará ku “boso no mester hura den mi nòmber gañando.”¹¹ Tὸg, den e meridiano di tempu, e Salbador a siñá un manera mas haltu di warda nos kompromisonan ora El a bisa kusikermen si i no kermen no.¹² Un palabra di un hende mester ta sufisiente pa establesé su verasidat i kompromiso na un otro hende i ainda mas importante ora e otro hende ta nos Tata den Shelu. Honrando un kompromiso ta bira e manifestashon di e verasidat i honestidat di nos palabra.

3. Aktuando segun esei.

Despues di siña nos deber i tuma e desishonnan ku ta asosiá ku e siñansa eiiI komprenshon, nos mester aktua segun esei.

Un poderoso ehèmpel di e determinashon firme pa kumpli Su kompromiso ku Su tata ta bini for di e eksperiensha di e Salbador ora un hòmber paralítiko a wòrdu tresé. Ora Jesus a mira nan fe, el a bisa e hòmber paralítiko, Yu, bo pika ta wòrdu pordoná.”¹³ Nos sa ku e Ekspiashon di JesuCristu ta esensial pa risibí pordon di nos pika, pero durante e episodio di e sanashon di e hòmber paralítiko, e evento grandi ainda no a tuma lugá. Getsemane ainda no a pasa. Tὸg, Jesus no a bendishoná e hòmber paralítiko ku e abilidat pa para i kana so, pero E tambe a dun’é pordon pa su pikanan, dunando asina un señal sigur ku E no lo frakasá, ku E lo kumpli e kompromiso El a hasi na Su Tata, i ku den Getsemane i riba e krus E lo hasi loke El a primintí pa hasi.

E kaminda ku nos a skohe pa kana ta smal. Riba kaminda lo tin desafionan ku lo rekerí nos fe den JesuCristu i nos mihó esfuerso pa keda riba e kaminda i sigui dilanti. Nos mester arepentí i ta obediente i tin pasenshi, ounke nos no ta komprendé tur e sirkunstansia ku ta rondoná nos. Nos mester pordoná otro i biba segun loke nos a siña I ku e desishonnan ku nos a hasi.

4. Ku Disposishon Aseptá e Boluntat di e Tata.

Disípulado no ta rekerí nos solamente pa siña nos deber, tuma e desishonnan korekto, i aktua segun esei, pero tambe esensial ta nos desaroyo di e disposishon i e abilidat di aseptá e boluntat di Dios, ounke e no ta meskos ku e deseonan hustu o preferenshanan.

Mi ta inspirá dor di i ta atmirá e aktitut di e leproso ku a bini na Señor, “rogando, i hinkando rudia na Dje, i el a bis’É, Si bo ke, bo por hasimi limpi.”¹⁴ E leproso no a demanda nada, ounke su deseo tabata hustu; e tabata solamente dispuesto pa aseptá e boluntat di Señor.

Algun aña pasá un pareha fiel stimá ku ta amigunan di mi a wòrdu bendishoná ku e yegada di un yu ku nan a deseá pa hopi tempu i nan a hasi orashon pa hopi tempu. E kas ei tabata yen di goso miéntras nos amigunan i nan yu muhé, ku tabata nan úniko yu na e momento ei, tabata kontentu ku e kompania di e yegada di e mucha hòmber chikí. Un dia, sinembargo, un kos inesperá a pasa: e mucha hòmber chikí, ku tabatin banda di tres aña, direpente a bai den koma. Mes ora ku mi a haña sa di e situashon, mi a yama mi amigu pa ekspresá nos apoyo den tempu difísil ei. Pero su kontesta tabata un lès pa mi. El a bisa, “si e ta e boluntat di e Tata pa tum’é serka Dje, e ora ei e nos ta bon ku esei.” Palabranan di mi amigu no tabatin niun tiki di grado di kehamentu, rebelion, òf malkontentu. E tabata al kontrario, tur loke mi por a sinti den su palabranan tabata gratitut na Dios pa pèrmití nan pa disfrutá nan yu hòmber chikí pa un tempu kòrtiku, i tambe nan disposishon total pa aseptá e boluntat di e Tata pa nan. Algun dianan despues, e mucha chikí ei a wòrdu tumá den su manshon Selestial.

Laga nos sigui dilanti dor di siña nos deber, tumando desishonnan korekto, aktuando segun e desishonnan ei, i aseptando e boluntat di nos Tata.

Kon gradisí i kontentu mi ta pa e desishon ku mi tata a laga mi tuma 47 aña pasa. Ku tempu, mi a komprondé ku e kondishon ku el a duna mi—pa ta responsabel pa e desishon—kier men pa ta responsabel na mi Tata Selestial i buska mi mes salbashon esun di mi próhimo, i dor di esei pa bira mas komo mi Tata ta spera i kier pa mi bira. Den e nòmber di JesuCristu, amèn.