Biba Fiel na e Fe

Pa Elder William R. Walker

Di e Setenta

Kada un di nos lo wórdu bendishoná masha tantu mes si nos ta konose e historianan di fe i sakrifisio ku a guia nos antepasado pa uni e Iglesia di Señor.

Mi ta stima historia di Iglesia. Meskos ku hopi di boso mi fe ta wὸrdu fortalesé ora mi ta siña di e dedikashon remarkabel di nos antepasadonan ken a aseptá e ebangelio i bibá berdaderdo na e fe.

Un luna pasá, 12,000 hubentut maraviyoso di e distrito di e Tempel di Gilbert Arizona a selebrá e kabamentu di konstrukshon di nan tempel nobo ku un presentashon insipirador, demostrando nan kompromiso pa biba rektamente. E tema di nan selebrashon tabata “Biba Fiel na e Fe.”

Meskos ku e hubentut fiel ei a hasi, kada Santunan di Delaster Dianan mester kompromete pa “biba fiel na e fe.”

E palabranan di e himno ta bisa, “Fiel na e fe ku nos mayornan a balorá” (“True to the Faith,” Hymns, no. 254).

Nos por añadi, “Fiel na e fe ku nos welonan a balorá.”

Mi ta puntra si kada un di e hubentut estusiastika di Arizona tabata konose nan mes historia di Iglesia—si nan tabata konose e historia kon nan famia a bira miembronan di e Iglesia. E ta un kos maraviyoso si kada Santu di e Delaster Dianan tabata konose e historia di konbershon di nan antepasado.

Sin importa si bo tin desendensia di pioneronan, e herensia di pionero Mormon di fe i sakrifisio ta boso herensia. E ta e herensia nobel di e Iglesia di JesuCristu di e Santunan di e Delaster Dianan.

Un di e kapitulonan mas maraviyoso di e historia di e Iglesia a tuma lugá ora Wilford Woodruff, un Apostol di e Señor, tabata siña e ebangelio restaurá di JesuCristu rὸnd Gran Bretaña den 1840—djis dies aña despues di e establesimientu di e Iglesia.

Wilword Woodruff i e otro Apostolnan tabata enfoká de nan trabou den areanan di Liverpool i Preston, ku konsiderabel eksito. Elder Woodruff, ken a bira despues Presidente di Iglesia, tabata hasi orashon konstantemente na Dios pa guie’le den e obra importante aki. Su orashonan a guia na e inspirashon pa bai na un kaminda diferente pa siña e ebangelio.

Presidente Monson a siña nos ku ora nos ta risibi e inspirashon for di shelu pa hasi algun kos—nos mester hasie’le awor mes—nos no ta prokrastina. Esei ta précis loke Wilford Woodruff a hasi. Ku direkshon kla for di e Spiritu pa “bai pa zuit,” Elder Woodruff a bai kasi inmediatamente i biaha na un parti di Inglatera konosí komo Herefordshire—kaminda tin kunuku den e zuit di Inglatera. Ainan el a topa ku un granjero prosperó yamá Jonh Benbow, unda el a hanja un bon bini “ku kurasonan kontentu i gratitut” (Wilford Woodruff, den Matthias F. Cowley, Wilford Woodruff: History of His Life and Labors as Recorded in His Daily Journals [1909], 117).

Un grupo di mas di 600 hende, ku tabata yamá nan mes E Rumanan Uní tabata “hasi orashon pa lus i berdat” (Wilford Woodruff, den Teachings of Presidents of the Church: Wilford Woodruff [2004], 91). E Señor a manda Wilford Woodruff komo un kontesta di nan orashon.

Siñansa di Elder Woodruff a produsi fruto hopi lihe, i hopi a wòrdu boutisá. Brigham Young i Williard Richards a uni ku ne den Herefordshire i e tres Apostolnan tabatin eksito remarkabel.

Den un pari luna só, nan a organisá 33 ramanan pa 541 miembronan ku a uni na e Iglesia. Nan trabou remarkabel a sigui; i ultimamente kasi tur e miembronan di e Rumanan Unido a wὸrdu boutisá den Iglesia di JesuCristu di e Santunan di e Delaster Dianan.

Mi tatarabuela Hannah Mariah Harris tabata un di e prome ku a skucha Wilford Woodruff. El a bisa su kasa, Robert Harris Jr. ku el a skucha e palabra di Dios i ku e tabata tin e intenshon di wὸrdu boutisá. Robert no tabata kontentu di tende e reporte di su kasá. El a bise’le ku e lo bai ku n’e na e proximo sermon duná pa un mishonero Mormon, i ku e lo koreji e mishonero.

Sintá kasi den frente di e asamblea, ku e firme resolushon di no wὸrdu persuadi, i podise pa molestiá e predikador bishitante, Robert a wórdu inspirá lihe pa medio di Spiritu, meskos ku su kasá a sinti. E tabata sa ku e mensahe di e Restourashon tabata berdadero, i e i su kasá a wὸrdu boutisá.

Nan historia di fe i devoshon ta similar na milnan di otronan: ora nan ta tende e mensahe di ebangelio, nan tabata sa ku e tabata berdat!

Manera e skritura ta bisa, “Mi karnènan ta skucha mi stem, ami konose nan i nan ta siguimi” (Huan 10:27).

Despues di tende e stem di e Wardadó, nan ta kompremete kompletamente nan bida pa biba e ebangelio i sigui e direkshon di e profeta di Señor. Komo kontesta na e yamamentu pa “hunta den Sion,” nan a laga nan kas na Inglatera, i krusa e Atlantiko, i hunta ku e Santunan den Nauvoo, Illinois.

Nan a aseptá e ebangelio ku tur nan kurason. Mientras ku nan tabata establese den nan hogar nobo nan tabata ayuda ku e konstrukshon di e Tempel di Nauvoo dor di diesma nan trabou—kada dies dia trahando riba e konstrukshon di e tempel.

Pero nan a sigi dilanti! Nan a keda fiel na e fe.

Ora ku e Santunan a wὸrdu persegui i desalohá for di siudat di Nauvoo, Robert i Mariah a sinti hopi bendishoná pa risibi nan investidura den e tempel, un tiki prome ku nan a krusa e Riu Mississippi i bai west. Aunke nan no tabata sigur di loke e futuro lo trese, nan tabata sigur di nan fe i nan testimonio.

Ku su seis yunan, nan a sufri kanando pa medio di lodo ora ku nan a krusa Iowa den nan kaminda west. Nan a traha pa nan mes un refugio den e banda di e Riu Misuri den loke a bira konosí komo Winter Quarters.

E grupo di pioneronan ku kurashi tabata warda pa e direkshon apostoliko di kon i ki ora nan lo bai west. E plan di tur hende a wὸrdu alterá ora Brigham Young, e Presidente di e Quorum di Diesdos Apostolnan, a hasi un yamamentu na hombernan bira boluntario para sirbi den Ehersito di Merka den loke a bira konosí komo e Batayon Mormon.

Robert Harris Jr. tabata un di mas di 500 hombernan pionero ku a respondé na e yamamentu di Brigham Young. El a reklutá aunke esei kermen e lo laga detras su kasa embarasá i su seis yunan.

Dikon é i e otro hombernan lo a hasi e kos ei?

E kontesta por wὸrdu duna den e mes palabranan di mi tatarabuelo. Den un kartika ku e a skirbi na su kasá ora e batayon a stὸp pa un tempu kortiku bandi Santa Fe, el a skribi, “Mi fe ta asina fuerte manera semper [i ora mi ta pensa di e kosnan ku Brigham Young a bisa nos], mi ta kere’le kasi meskos komo si e tabata e Dios Grandi ku a bisa mi.”

En resumen, e tabata sa ku e tabata skuchando un profeta di Dios, meskos ku e otronan tambe tabata sá. Esei ta e motibu por lo cual nan a hasie’le. Nan tabata sa ku nan tabata wòrdu guiá pa medio di un profeta di Dios.

Den e mesun kartika, el a eskspresá su sentimentu tiernu pa su kasá i su yunan i bisanan di su orashonan konstante pa su kasá i e yunan wὸrdu bendishoná.

Despues den e kartika el a duna e poderoso deklarashon: Nos no mester lubida e kosnan ku abo i ami a tende i [eksperimentá] den e Tempel di Señor.”

Huntu ku su promé testimonio ku “nos ta guiá pa medio di un Profeta di Dios”, i e admonishonan sagrado aki a bira manera skritura pa mi.

Diesocho luna despues di sali for di e batayon, Robert Harris a uni atrobe ku su kasá stimá Mariah. Nan a keda berdadero i fiel na e ebangelio restourá durante nan bida. Nan tabatin diesinku muchanan, diestres di nan ku a bibá te edat adulto. Mi abuela Fannye Walker, di Raymond, Alberta, Canada, tabata un di nan 136 nietunan.

Abuela Walker tabata orguyoso di e realidat ku su abuelo a sirbi den e Batayon Mormon, i e tabata ke pa tur su nietunan pa sa esei. Awor ku mi ta un abuelo, mi ta komprende dikon e ta importante pe. E tabata ke pa yunan bira nan kurason te nan tatanan. E tabata ke pa nan nietunan sa di nan herensia di rektitut—pasobra e tabata sa ku esei lo bendishoná nan bida.

Mientras mas konectá nos ta sinti ku nos antepasado rekto, mas probabel ku nos ta tuma desishonan sabí i hustu.

I esei ta berdat. Kada un di nos lo wórdu bendishoná masha tan tu mes si nos ta konose e historianan di fe i sakrifisio ku a guia nos antepasado pa uni e Iglesia di Señor.

For di e prome bia ku Robert i Mariah a tende Wilford Woodfruff siña i testifika di e Restourashon di evangelio, Robert i Mariah tabata sa ku e ebangelio tabata berdat

Tambe nan tabata sa ku sin tin kunes nan prueba of desafio ku nan lo topa, nan lo wὸrdu bendishoná pa keda fiel den e fe. E kasi ta perse ku nan a tende e palabranan di nos profeta diawe, ken a bisa, “No tin safrikisio ku ta basta grandi … pa risibi e bendishonan di e tempel” (Thomas S. Monson, “The Holy Temple—a Beacon to the World,” Ensign òf Liahona, Mei 2011, 92).

E moneda di dos libra di Reino Unido tin inskribí den su banda, “Pará riba Skoulder di Gigantenan.” Ora mi ta pensa di nos antepasado grandioso, mi ta sinti ku nos tur ta pará riba e skouldernan gigantenan.

Aunke e konseho a bini for di un kartika di Robert Harris, mi ta kere ku hopi di antepasado lo manda e mesun mensahe pa nan yunan i nietunan: nos no mester lubida e eksperiensianan ku nos tabatin den e tempel, i nos no mester lubida e promesanan i e bendishonan ku ta bini na kada un di nos den e tempel. Di dos, nos no mester lubida ku nos ta wórdu guia pa medio di un profeta di Dios.

Mi ta testifika ku nos ta wὸrdu guiá pa medio di un profeta di Dios. E Señor a restourá Su Iglesia den e delaster dianan pa medio di e Profeta Jose Smith, i nos no mester lubida ku nos a wὸrdu guiá un kadena ku no a wὸrdu kibra di profetanan di Dios for di Jose na Brigham i pa medio di kada Presidente di Iglesia ku a sigui te na nos profeta diawe—Thomas S. Monson. Mi ta konose’le, mi ta honre’le, mi ta stime’le. Mi ta testifika ku e ta e profeta di Señor riba tera awe.

E ta e deseo di mi kurason ku huntu ku mi yunan i nietunan, nos lo honra e legado di antepasadonan hustu—e pioneronan Mormon fiel ken tabata dispuesto di laga tur kos den altar di sakrifisio i defende nan Dios i nan fe. Mi ta hasi orashon para kada un di nos lo biba fiel na e fe ku nos mayornan a atesorá. Den e santu i sagrado nomber di JesuCristu, amen.