Un Herensia di Speransa di Gran Balor
Pa Presidente Henry B. Eyring
Promé Konsehero den e Promé Presidensia
Ora boso skohe pa hasi òf warda un kombenio ku Dios, boso ta skohe si boso ta bai laga un herensia di speransa pa esunnan ku lo por sigui boso ehèmpel.
Mi rumannan stimá, algun di boso a wòrdu invitá na e reunion aki pa mishoneronan di E Iglesia di JesuCristu di e Santunan di e Delaster dianan. E mishoneronan aki lo por a invitá boso kaba pa skohe pa hasi kombenio ku Dios dor di wòrdu boutisá.
Otronan bou di boso ta skuchando pasobra boso a aseptá e invitashon di un mayor, òf kisas un mucha, a ekstendé ku e speransa ku boso lo skohe pa pone e kombenionan ku bosa a hasi kaba ku Dios atrobe den e sentro di boso bida. Algun di boso ku ta skuchando a skohe kaba pa regresá na e Salbador i ta sintiendo awe e goso di Su bon biní na boso.
Ken ku boso ta i unda ku boso por ta, boso tin den boso mannan e felisidat di mas hende ku boso por imaginá awor aki. Tur dia i tur ora boso por skohe pa hasi òf warda un kombenio ku Dios.
Unda ku boso ta riba e kaminda pa heredá e don di bida eterno, boso tin den boso mannan e oportunidat pa mustra hopi hende e kaminda pa felisidat mas grandi. Ora boso skohe si boso ke hasi òf warda un kombenio ku Dios, boso ta skohe si boso lo laga un herensia di speransa pa esunnan ku lo por sigui boso ehèmpel.
Boso i ami a wòrdu bendishoná ku e promesa di tal herensia. Mi debe mayoria di mi felisidat den bida na un hòmber ku nunka mi no a konosé den bida mortal. E tabata un huérfano ku a bira un di mi bisa tawelanan. El a laga un herensia di gran balor pa mi. Pèrmití mi konta boso algu di e parti ku e tabatin den kreamentu di un herensia pa mi.
Su nòmber tabata Heinrich Eyring. El a nase den un famia riku. Su tata tabatin un propiedat grandi den Coburg, den lokual awor aki ta Alemania. Su mama tabata Kondesa Charlotte Von Blomberg. Su tata tabata e kuidadó di e teranan pa e Rei di Prussia.
Heinrich tabata Charlotte i Edward su promé yu hòmber. Charlotte a muri na e edat di 31 aña, despues di nasementu di su di tres yu. Edward a muri pronto despues, despues di a pèrdè tur su propiedat i rikesa den un invershon ku a frakasá. E tabatin solamente 40 aña di edat. El a laga tres mucha huérfano.
Heinrich, mi bisatawela, a pèrdè tur dos su mayornan i un gran herensia mundano. El a registrá den su historia ku el a sinti ku su mihó speransa pa un bon futuro tabata pa bai Amérika. Ounke ku e no tabatin ni famia ni amigu aya, e tabatin un sintimentu di speransa tokante baimentu Amérika. Promé el a bai Suidat di New York. Despues el a muda ku su ruman muhé mas yòn pa St. Louis, Missouri.
Na St. Louis, un di su koleganan di trabou tabata un Santu di Delaster dia. Di dje el a haña un kopia di un pamfleta skibí pa Elder Parley P. Pratt. El a les’é i despues a studia kada palabra ku e por a haña tokante di e Santunan di Delaster dia. El a hasi orashon pa sa si enbèrdat tabatin angelnan ku a aparesé na hende, si tabatin un profeta bibu, i si el a haña un religion berdadero i revelá pa Dios.
Despues di dos luna di estudio i orashon kuidadoso, Heinrich tabatin un soño den kua a wòrdu bisá na dje pa e wòrdu boutisá. Un hòmber ken su nòmber i saserdosio mi ta honra, Elder William Brown, tabata bai hasi e ordenansa. Heinrich a wòrdu boutisá den un pisina di áwaseru riba 11 di mart, 1855 pa 7:30 di mainta.
Mi ta kere ku Heinrich Eyring tabata sa e tempu ei ku lokual mi ta siñando boso awe ta bèrdat. E tabata sa ku e felisidat di bida eterno ta bini pa medio di relashon familiar ku ta sigui pa semper. Hasta ora tabata resien ku el a haña Señor su plan di felisidat, e tabata sa ku su speransa pa goso eterno tabata dependé di e liber albedrio di otronan pa sigui su ehèmpel. Su speransa di felisidat eterno tabata dependé di hende ku no a nase ainda.
Komo parti di herensia di speransa di nos famia, el a laga un historia pa su desendientenan.
Den e historia ei mi por sinti su amor pa esunnan di nos ku lo siguié. Den su palabranan mi ta sinti speransa ku su desendientenan lo por skohe pa siguié riba e kaminda di regreso na nos kas selestial. E tabata sa ku lo no bai ta un skohensia grandi pa hasi asina pero hopi skohensianan chikitu. Mi ta sita for di su historia:
“For di e tempu ku mi a tende Elder Andrus papia pa promé biaha … semper mi a bishitá e reunion di e Santunan di e Delaster dia i e tempunan ku mi a keda sin bishita e reunion tabata hopi eksepshonal, siendo na mes momentu mi deber di hasi asina.
“Mi ta menshoná esaki den mi diario pa mi yunan por sigui mi ehèmpel i nunka neglishá e deber importante aki [pa reuní] ku e Santunan.”1
Heinrich tabata sa ku den reunionnan sakramental nos por renobá nos promesa pa semper kòrda e Salbador i tin Su Spiritu huntu ku nos.
Tabata e Spiritu ei ku a sostené riba e mishon na kua el a wòrdu yamá solamente algun luna despues di a aseptá e kombenio di boutismo. El a laga komo su herensia su ehèmpel di keda fiel na su mishon pa seis aña na lokual e tempu aya tabata yama e Teritorionan Indjan. Pa risibí su relevo di su mishon, el a kana for di Oklahoma pa Salt Lake City, un distansia di aproksimadamente 1,100 mia (1,770 kilometer).
Pronto despues de esei el a wòrdu yamá pa e profeta di Dios pa muda pa zùit Utah. For di einan el a aseptá un otro yamamentu pa sirbi un mishon den su pais natal Alemania. Despues el a aseptá un invitashon di un Apòstel di Señor JesuCristu pa yuda edifiká kolonianan Santu di Delaster dia den nort Mexico. For di ei el a wòrdu yamá pa Suidat di Mexico komo un mishonero di tempu kompletu. El a honra e yamamentunan aki. E ta derá den un sementerio chikitu na Colonia Juárez, Chihuahua, Mexico.
Mi ta resitá e hechonan aki no pa demandá grandesa p’e òf pa lokual el a hasi òf pa su desendientenan. Mi ta resitá nan ku honrá e pa e ehèmpel di fe i speransa ku e tabatin den su kurason miéntras e tabata sirbi den kada un di nan.
El a aseptá e yamamentunan ei pa motibu di su fe ku e Cristu resusitá i nos Tata Selestial a aparesé na Joseph Smith den un arboleda den e estado di New York. El a aseptá nan pasobra e tabatin fe ku e yabinan di saserdosio den e Salbador su Iglesia a wòrdu restourá ku e poder pa seya famianan pa semper, si nan tabatin sufisiente fe pa warda nan kombenionan.
Meskos ku mi antepasado, Heinrich Eyring, boso lo por ta e promé den boso famia pa guia e kaminda pa bida eterno riba e kaminda di kombenionan sagrado hasí i wardá ku diligensia i fe. Kada kombenio ta trese debernan i promesanan ku n’e. Pa nos tur, meskos ku nan tabata pa Heinrich, e debernan ei tin biaha ta simpel pero hopi biaha nan ta difísil. Pero kòrda, e debernan tin biaha mester ta difísil pasobra nan propósito ta pa hiba nos riba e kaminda pa biba pa semper ku Tata Selestial i Su Yu Stimá, JesuCristu komo famia.
Boso ta kòrda e palabranan for di e buki di Abraham:
Dios a mustra Abraham ku tabatin unu entre nos ku tabata manera Dios, i El a bisa esunnan ku tabata ku n’e ku nan lo bai abou i tuma di e materialnan i traha un tera kaminda nos por biba;
I nan lo proba nos, pa mira si nos lo por hasi tur kos ku e Señor nos Dios lo manda nos;
I si nos lo por a warda nos promé estado mas lo wòrdu duná aserka; i nan ku no warda nan promé estado lo no haña gloria den e mes un reino ku esunnan ku a warda nan promé estado; i esunnan ku warda nan di dos estado lo haña gloria poné aserka riba nan kabesnan pa semper den eternidat.2
Wardamentu di nos di dos estado ta dependé di nos hasimentu di kombenionan ku Dios i kumpli ku nos debernan fielmente ku nan ta pidi di nos. Ta nesesario pa tin fe den JesuCristu komo nos Salbador pa warda e kombenionan nos bida largu.
Pasobra Adam i Eva a kai, nos tin tentashonnan, pruebanan, i morto komo nos herensia universal. Sinembargo, nos Tata Selestial amoroso a duna nos e regalo di Su Yu Stimá, JesuCristu, komo nos Salbador. E regalo i bendishon grandi aki di e Ekspiashon di JesuCristu ta trese un herensia universal: e promesa di e Resurekshon i e posibilidat di bida eterno na tur ku ta nase.
E bendishon mas grandi di tur e bendishonnan di Dios, bida eterno, lo bini na nos solamente ora nos hasi kombenionan ofresé den e Iglesia berdadero di JesuCristu pa Su sirbidónan outorisá. Pa motibu di e Kaida, nos tur tin mester di e efektonan limpiadó di boutismo i ponementu di man riba kabes pa risibí e don di e Spiritu Santu. E ordenansanan aki mester wòrdu efektuá pa esunnan ku ta poseé e outoridat korekto di saserdosio. Despues, ku yudansa di e Spiritu di Cristu i e Spiritu Santu, nos por warda tur e kombenionan ku nos ta hasi ku Dios, spesialmente esunnan ofresé den Su tèmpelnan. Solamente di e manera ei, i ku e yudansa aki, tur hende por demandá su herensia legítimo komo un yu di Dios den un famia pa semper.
Na algun ku ta skuchando mi, esei por parse un soño kasi imposibel.
Boso a mira mayornan fiel den tristesa pa motibu di nan yunan ku a rechasá òf a skohe pa kibra nan kombenionan ku Dios. Pero e mayornan aki por haña konsuelo i speransa den eksperensianan di otro mayornan.
E yu hòmber di Alma i e yunan hòmber di Rei Mosiah a arepentí di nan rebeldia feros kontra di e kombenionan i mandamentunan di Dios. Alma esun hóben a mira su yu Corianton kambia di hasimentu di piká grave pa sirbishi kompletu. E Buki di Mormon ta registrá tambe e milager di e Lamanitanan pa pone un banda e tradishon di odia rektitut i kuminsá hasi kombenio pa muri pa mantené pas.
Un angel a wòrdu mandá na Alma i e yunan di Mosiah. E angel a bini pa motibu di e fe i orashonnan di nan tatanan i Dios su pueblo. For di e ehèmpelnan aki di poder di e Ekspiashon trahando den kurasonnan humano, boso por risibí kurashi i konsuelo.
E salbador a duna nos tur e fuente di speransa pa ora nos ta lucha pa yuda esunnan ku nos ta stima aseptá nan herensia eterno. El a hasi promesanan na nos ora nos ta sigui purba pa trese hende na Dje, hasta ora nan ta resistí Su invitashon pa hasi asina. Nan resistensia ta hasié tristu, pero E no ta stòp i nos tampoko no tin ku stòp. El a mustra ehèmpel perfekto pa nos ku Su amor persistente. El a bisa e kas di Israel ku E lo reuní nan hopi biaha meskos ku un galiña ta hunta su puitunan bou di su alanan. E lo a hunta e pueblo di e kas di Israel—inkluso esunnan ku a muri (na Amérika na e tempu di Su morto) i esunnan ku a biba na Yerúsalèm—meskos ku un galiña ta hunta su puitunan, pero nan no a lag’é.3
Nos por dependé riba e deseo infalibel di e Salbador pa trese tur e yunan spiritual di Tata Selestial di regreso na nan kas ku n’e. Tur mayor, abuelo, bisawelo fiel, ta kompartí e deseo aki. Tata Selestial i e Salbador ta nos ehèmpelnan perfekto di kiko nos por hasi i mester hasi. Nan nunka no ta forsa rektitut pasobra rektitut mester wòrdu skohé. Nan ta hasi rektitut rekonosibel pa nos, i Nan ta laga nos mira ku su frutanan ta delisioso.
Kada persona nasé na mundu ta risibí e Lus di Cristu, ku ta yuda nos mira i sinti kiko ta bon i kiko ta robes. Dios a manda siervonan mortal ku por, pa medio di e Spiritu Santu, yuda nos rekonosé kiko E lo tabata ke pa nos hasi i kiko E ke pa nos hasi i kiko E ta prohibí. Dios ta hasi atraktivo pa skohe e bon dor di laga nos sinti e efektonan di nos skohensianan. Si nos skohe e bon, nos lo haña felisidat—eventualmente. Ku nos skohe malu, lo bini tristesa i duele—eventualmente e efektonan aki ta sigur. Hopi biaha nan ta wòrdu tardá ku un propósito. Si e bendishonnan tabata inmediato, skohe e bon lo no edifiká fe. Ya ku tristesa tambe tin biaha ta tarda grandemente, ta tuma fe pa sinti e nesesidat pa buska pordon pa piká mas lihé enbes di despues ku nos sinti su efektonan tristu i doloroso.
Tata Lehi tabata tristu pa algun di e skohensianan di algun di su yunan hòmber i nan famianan. E tabata un hòmber rekto i hopi bon—un profeta di Dios. El tèstifiká hopi biaha di nos Salbador, JesuCristu, na nan. E tabata un ehèmpel di obedensia i servisio ora Señor a yam’é pa bandoná tur poseshonnan mundano pa salba su famia for di destrukshon. Na e fin di su bida, ainda e tabata tèstifikando na su yunan. Manera e Salbador—i apesar di su poder pa distinguí nan kurasonnan i pa mira e futuro tristu i maravioso—Lehi a sigui yuda su famia pa trese nan na salbashon.
Awendia miónes di e desendientenan di Tata Lehi ta hustifikándo su speransa pa nan.
Kiko boso i ami por hasi pa siña di Lehi su ehèmpel? Nos por hasié pa medio di studia e skrituranan ku orashon i dor di opservashon.
Mi ta rekomendá pa boso tuma perspektiva den plaso kòrtiku i largu ora boso ta purba pa duna e herensia di speransa na boso famia. A korto plaso, lo bai tin problemanan i Satanas lo gruña. I tin kosnan pa warda ariba ku pasenshi, den fe, sabiendo ku Señor ta aktua den Su mes tempu i na Su mes manera.
Tin kosnan ku boso por hasi tempran, ora esunnan ku boso ta stima ta yòn. Kòrda orashon familiar diario, estudio di skritura, i kompartimentu di nos testimonio den reunion sakramental ta mas fásil i efektivo ora muchanan ta yòn. Muchanan yòn hopi biaha ta mas sensitivo pa e Spiritu ku nos ta realisá.
Ora nan ta mas grandi, nan lo rekordá e himnonan ku nan tabata kanta ku boso. Mas ku e músika nan lo kòrda e palabranan i skritura i testimonio. E Spiritu Santu por trese tur kos na nan memoria, pero e palabranan di skrituranan i himnonan lo permanesé pa mas tantu tempu. E rekuerdonan ei lo ehersé un influensia ku lo trese nan bèk ora nan dualu pa un tempu, posiblemente pa añanan, for di e kaminda di kas pa bida eterno.
Nos lo tin mester di e plaso largu ora esunnan ku nos ta stima sinti e influensia di e mundu i e nubia di duda ta parse di ta oprimí nan fe. Nos tin fe, speransa, i karidat pa guia nos i pa fortalesé nan.
Mi a mira esei komo un konsehero di dos profeta bibu di Dios. Nan ta personanan ku personalidatnan úniko. Sinembargo nan ta parse di ta kompartí un optimismo konsistente. Ora un hende trese un prekupashon dilanti tokante di algu den Iglesia, nan kontesta di mas frekuente ta “O, tur kos lo sali bon.” Generalmente nan sa mas di e problema ku e persona ku a trese e problema dilanti.
Tambe nan konosé e manera di Señor, i p’esei semper nan tin speransa tokante di Su reino. Nan sa ku E ta na kabes di Iglesia. E ta todopoderoso i E ta prekupá. Si boso laga E ta e lider di boso famia, kosnan lo sali bon.
Algun di Heinrich Eyring su desendientenan ta parse di a dualu. Pero hopi di su bisa-bisa nietunan ta bai tèmpelnan di Dios pa 6:00 di mainta pa hasi ordenansanan pa nan antepasadonan ku nan no a mira nunka. Nan ta bai pa motibu di e herensia di speransa ku el a laga. El a laga un herensia ku ta wòrdu demandá pa hopi di su desendientenan.
Despues di hasi tur kos ku nos por den fe, Señor lo hustifiká nos speransanan pa bendishonnan mas grandi pa nos famianan ku nos por imaginá. E ke lo mehor pa nan i pa nos, komo Su yunan.
Nos tur ta yunan di un Dios bibu. Jesus di Nazaret ta Su Yu Stimá i nos Salbador resusitá. Esaki ta Su Iglesia. Den dje tin e yabinan di e saserdosio, i p’esei famianan por ta pa semper. Esaki ta nos herensia di speransa di gran balor. Mi ta tèstifiká ku e ta bèrdat den e nòmber di JesuCristu, amèn.