Itok, Ļoor Eō

Meļeļe kōn Bwebwenato ko kōn Visōn eo M̧oktata an Josep Smith

Jān Matthew C. Godfrey

Department eo an Church History

Ta oktak eo ilo bwebwenato ko emen kōn Visōn eo M̧oktata an Josep Smith? Etke rej oktak? Im ta eo remaron̄ katakin kōj?

Kwonan̄in ke kar kajjieon̄ in jiron̄ juon armej kōn juon en̄jake ilo jetōb? Ta tipdik in meļeļe eo kwar kobaik? Ta tipdik in meļeļe eo kwar door wōt? Kwoj ļōmņak ke kwon kar ba bwebwenato ilo juon wāween eoktak eļan̄n̄e kwon kar ba n̄an juon m̧ōttam̧, ilo kweilo̧k in kwojkwoj eo, ak n̄an juon eo me ejjab membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata?

Kajjitōk kein reaorōk n̄e ļōmņak kōn ekōjkan an Josep Smith kar kōmeļeļeik visōn eo an Jemedwōj Ilan̄ im Jisōs Kraist ekar bōke ilo New York ilo 1820 eo. Josep ekar kwaļo̧k en̄jake in jejjo alen ko. Rainin ewōr ippād bwebwenato ko emen an Josep:

Juon bwebwenato make an Josep kar je iturinļo̧k jōm̧ar in 1832 eo. Josep ekar kōmeļeļeik bwe ekar etal n̄an wōjke ko n̄an jar kōnke ekar tarpok kōn men ko an jetōb. Ekar barāinwōt kōņaan bwe jerawiwi ko an ren jako.
1835 Jōnōļ eo an Josep. Juon rikwaļo̧k kar etan Robert Matthews ear itok n̄an Kirtland, Ohio. Ekar kōņaan kōnono n̄an Josep kōn men ko an kabun̄, kōn menin Josep ekar jiron̄ e kōn visōn eo an. Warren Parrish, eo ekar kōjparok jōnōļ eo an Josep, ekar je ta eo Josep ekar ba.
Juon bwebwenato an Kabun̄ me Josep ekar jino ilo 1838 eo. Eaar kōnono kōn Vision eo M̧oktata āinwōt m̧ōttan wāween eo Kabun̄ ekar jepļaaktok. Bwebwenato in ej jeje ilo Bōōr Eo Eļap Wōņāān.
Juon letta Josep ear jeiki ilo 1842 eo. Juon rijeje etan John Wentworth ear kajjitōk ippen Josep n̄an kemeļeļeik wāwein an kar waļok Kabun̄ eo an Jisōs Kraist im Armej ro Rekwojarjar ilo Raan Ko Āliktata. Josep ear uwaake ilo juon letta im kar likit meļeļe ko kake Vision eo M̧oktata.

Kajjojo bwebwenato kar kōm̧m̧an ilo juon iien oktak n̄an juon jarlepju eoktak. Ear wōr an Josep kōtōpar ko n̄an kajojo iaer. Ak eļan̄n̄e jej riiti kajojo iaer ippen doon, jej bōk juon pija eo elikioļo̧k im allikar kōn ta eo eo Josep ear ioone Ibwiļōn Wōjke ko Rekwojarjar.

Ta eo Eoktak?

Men kein aolep rekkar waļok ewōr aer jet oktak ko kaki kajojo. Ilo bwebwenato eo ilo 1832 eo, Josep ej pedped wōt ioon ikdeelel eo an n̄an jeorļo̧k bōd jān jerawiwi ko an. Ear jab kalikare ilo an kenono n̄an jeļā ewi wōt kabun̄ eo ekar m̧ool. Ej kōnono kōn wāween an “Irooj” kar walo̧kļo̧k n̄an e—ekar jab kile Jemādwōj Ilan̄ im Jisōs Kraist kajjojoļo̧k.

Bwebwenato eo ilo 1835 eo n̄an 1838 eo ej kōnono kōn juon kajoor nana ekar kajjieon̄ bōbrae Josep jān jar. Ta eo ear waļok ilo 1835 ej kwaļok bwe ruo jetōb ko rekkar loļo̧k, im bareinwōt ruo angel ro. Ta ko rekkar bōk jikier ilo 1838 im 1842 rej bareinwōt ba kōn jetōb kein ruo, juon eo im ej lukkun kalikkar bwe ej Jisōs Kraist. Men kein ruo rekkar bōk jikier rej kalikar an Josep pukot kabun̄ eo em̧ool.

Etke ej Lōn̄ Oktak ko?

Ewōr jejjo un ko kōn oktak ko ilo bwebwenato ko.

Paotok eo an Ememļo̧kjeņ eo

Jet iien jej ļōmņak kōn ememeļo̧k ko ad aolep iien rej pād wōt ilo ejja jekjek eo. Bōtaab ejjab āindein an ememļo̧kjeņ jerbal. Ej oktakļo̧k ad kememej men ko ilo ad rūttoļo̧k. Juon men eo ear waļok m̧oktaļo̧k emaron̄ oktakļo̧k meļeļein kōnke elōn̄ļo̧k men ko koj iooni ilo mour in. Kein kakememej ko relukun aurōk rej pād wōt, ak jet tibdikin meļeļe ko remaron̄ oktak. Ejjab meļeļein bwe ta ko jej kememeji rejjab m̧ool ak jejjōt, ak baj jet m̧ōttan ko remaron̄ lukkun alikkar ilo ien ko rej oktak.

Jibadbad ko Rooktak

Elōn̄ un ko rellōn̄ an Josep n̄an kwaļo̧k bwebwenato eo an. Ilo 1832 eo, ekar kōm̧m̧ane juon an bwebwenato make, kōn menin ekar pedped eļap wōt ioon ta kar meļeļe in Visōn eo M̧oktata n̄an e make. Ilo kar 1838 im 1842 eo, eaar kōnono kōn Vision eo M̧oktata ejja m̧ōttan wāween an Kabun̄ in kar walo̧ktok. Kōn menin ekar kōmejajaik ikdeelel eo an n̄an jeļā ewi wōt kabun̄ eo ekar m̧ool.

Jarlepju ko Rooktak

Robert Matthews im John Wentworth rekkar jab ro rej membōr in kabun̄ in. Josep ear aikuij in oktakļo̧k an kemeļeļeik er. Ekar ba kōn bwebwenato eo an 1838 eo n̄an ro uwaan Kabun̄ in. Emaron̄ kar ļōmņak ilo bwebwenato eo an ilo 1832 eo naaj kar riiti wōt jān ro m̧ōttan repaak im ro uwaan baam̧le eo.

Ta Eo Ejjab Oktak?

Ilo aolep bwebwenato ko emen, meļeļe ko reļļap tata rejjab oktak. Josep ear tarpok kake lo̧mo̧o̧r eo an im an laļin. Ear riit ilo Jemes 1:5–6 bwe emaron̄ bōk uwaak in jar ko an. E eaar etal n̄an buļōn wōjke ko im jar. Jetōb ko jān lan̄ rekkar waļo̧kļo̧k n̄an e. Rekkar ba kajjien kōn etan. Rekkar ba bwe kabun̄ ko ilo tōre eo rekkar jab katakin katak ko rejim̧we.

Ta eo Bwebwenato ko Rej Katakin Eō

Ij kōņaan riiti bwebwenato ko rooktak kōnke rej jipan̄ kōkōm̧anm̧anļo̧k aō meļeļe kōn Visōn eo M̧oktata. Imaron̄ in allikarļok aō loe etke Josep ear tarpok im kōņan jar. Ij maron̄ en̄jake an kajoorļo̧k Jetōb eo ilo aō riit kōn ta meļeļe in Visōn eo M̧oktata n̄an Josep ilo iien ko rooktak ilo mour eo an. Ilo kobaik, bwebwenato ko ejipan̄ eō jeļā bwe Josep ekar ba m̧ool eo. Ear loe Anij Jemed im Jisōs Kraist ilo Buļōn Wōjke ko Rekwojarjar. Menin ej kōkajoorļo̧k kejatdikdik eo ippa bwe imaron̄ bareinwōt bōk uwaak in jar ko aō.

Bwebwenato	Etke Josep eaar ba ear jar	Wōn Josep ekar ba raar waļokļo̧k
1832	N̄an jeorļo̧k jerawiwi ko an	Irooj
1835	N̄an lale wōn eo ejim̧we im wōn ebōd kōn men ko an kabun̄.	Ruo armej ro—eo jinoin, bar juon ālkin—im enjeļ ro
1838	N̄an jeļā ewi kabun̄ eo em̧ool im kar Kabun̄ eo an Kraist	Anij Jemed im Nejin Jisōs Kraist
1842	N̄an jeļā ewi kabun̄ eo em̧ool im kar Kabun̄ eo an Kraist	“Ruo armej ro raiboojoj”