Sabado sa Buntag nga Sesyon
Ang Kadaogan sa Paglaom
Mga Kinutlo
Ang gasa sa paglaom usa ka dili mapalit nga tuga gikan sa Dios. …
Samtang maglig-on kita sa atong pagtuo kang Jesukristo, makabaton kita og panglantaw nga makakita lapas sa atong mga kalisdanan ngadto sa mga panalangin ug mga saad sa kahangtoran. Sama sa kahayag kansang kasanag molambo, ang paglaom mohayag sa nagkangiob nga kalibotan, ug atong makita ang atong mahimayaon nga kaugmaon. …
Mga kaigsoonan, ang paglaom usa ka buhi nga gasa, usa ka gasa nga motubo samtang molambo ang atong pagtuo kang Jesukristo. … Tukoron nato kini nga butang—ang ebidensya sa atong pagtuo pinaagi sa pag-ampo, mga pakigsaad sa templo, pagtuman sa mga sugo, padayon nga pagbusog sa mga kasulatan ug sa mga pulong sa modernong mga propeta, pag-ambit sa sakramento, ug pagsimba matag semana kauban sa atong isigka-Santos.
Sa paglig-on sa atong paglaom sa panahon sa nagkadaghan nga kadaotan, gitudloan sa Ginoo ang Iyang propeta nga tisokan ang daghang dapit sa yuta og Iyang mga templo. …
Walay kasakit, walay mga sakit, walay dili makiangayon, walay pag-antos, walay mopakisdom sa atong paglaom kon kita motuo ug mohupot og hugot sa atong mga pakigsaad sa Dios sulod sa balay sa Ginoo. Balay kini sa kahayag, balay sa paglaom. …
Mga kaigsoonan, ang kalinaw nga inyong gitinguha tingali dili dayon moabot sigon sa inyong gitinguha, apan mosaad ko kaninyo nga kon mosalig kamo sa Ginoo, ang Iyang kalinaw moabot.
Unta atong maamumahan ang atong bililhong pagtuo, magpadayon uban sa hingpit nga kahayag sa paglaom. Mopamatuod ko nga ang atong paglaom mao ang atong Manluluwas nga si Jesukristo. Pinaagi Kaniya, ang atong tanan nga matarong nga pangandoy matuman. Siya ang Dios sa paglaom—kadaogan sa paglaom. Buhi Siya ug nahigugma Siya kaninyo.