Dominggo sa Hapon nga Sesyon
Ang Ginoong Jesukristo Moanhi Pag-usab
Mga Kinutlo
Ang Ginoo nagpadali gayod sa Iyang buhat.
Nganong nagtukod kita og mga templo sa ingon nga gipaspason nga wala pa sukad mahitabo? Ngano? Tungod ang Ginoo nagsugo kanato sa pagbuhat sa ingon. Ang mga panalangin sa templo nagtabang sa pagpundok sa Israel sa duha ka habig sa tabil. Kini nga mga panalangin nagtabang usab sa pag-andam og usa ka katawhan nga motabang sa pag-andam sa kalibotan alang sa Ikaduhang Pag-anhi sa Ginoo! …
Ania ang akong saad nganha kaninyo: Ang matag sinsero nga tigpangita ni Jesukristo makakaplag Kaniya diha sa templo. …
Akong nakat-onan nga ang labing importante nga pangutana nga kinahanglang tubagon sa matag usa kanato mao kini: Kang kinsa o ngadto sa unsa nako ihatag ang akong kinabuhi?
Ang akong desisyon sa pagsunod ni Jesukristo mao ang labing importante nga desisyon nga akong nahimo. … Nakatabang usab kini kanako nga makalahutay sa mga unos sa kinabuhi. …
Ako moawhag kaninyo sa paggahin og panahon matag semana—alang sa tibuok ninyong kinabuhi—sa pagdugang sa inyong pagsabot sa Pag-ula ni Jesukristo. …
Gidala ni Jesukristo diha sa Iyang Kaugalingon ang inyong mga sala, inyong mga kasakit, inyong mga kaguol, ug inyong mga kahuyang. Dili kinahanglan nga kamo mag-inusara sa pagpas-an niini! …
Dili pa sayo kaayo o ulahi na kaayo nga kamo mahimong usa ka matinguhaon nga disipulo ni Jesukristo. …
Ang labing maayo moabot pa, akong minahal nga kaigsoonan, tungod kay ang Manluluwas moanhi pag-usab! Ang labing maayo moabot pa tungod kay ang Ginoo nagpadali sa Iyang buhat. Ang labing maayo moabot pa samtang kita hingpit nga motugyan sa atong mga kasingkasing ug sa atong mga kinabuhi ngadto ni Jesukristo.