“E Mafai Ona Ou Auauna Atu Pe Afai E Le o A’u o se Tagata e Fiafia e Talatalanoa ma Fesootai ma Isi?,” Mo Le Malosi o le Autalavou, Mat. 2024.
Malosi e Auauna Atu Ai
E Mafai Ona Ou Auauna Atu Pe Afai E Le o A’u o se Tagata e Fiafia e Talatalanoa ma Fesootai ma Isi?
E mafai e le Faaola ona faamalosia i tatou e tusa lava pe faigata ona tatou aapa atu i tagata.
A o ou i ai i le aoga maualuga, sa ou manatu ou te le taua tele o se soo o Iesu Keriso ona sa ou tauivi e talanoa atu i tagata. Sa le na ona ou ma e talanoa—sa ou matuai matamuli lava! Sa ou matua matamuli lava sa faigata ona ou faia ni uo ma avea ma lo’u lava tagata moni i le i ai faatasi ma tagata matou te vasega i le aoga ma i le lotu.
Ona o lena mea, sa o’u alo ese mai ai lava i valaauga i Tamaitai Talavou ma lagona ai e leai so’u tulaga faaleagaga e pei o a’u uo o e sa sili atu ona i ai le gafatia e talanoa ma faia agafesootai nai lo a’u.
O lea ina ua ou faauu mai le aoga maualuga ma filifili ai e auauna atu i se misiona, sa o’u fefe!
Sa ou lagonaina e pei na finagalo le Atua ou te auauna atu, ae o lo’u manatu muamua lava o le, “Aisea e finagalo ai le Atua i se tasi e pei o a’u e auauna atu? E le mafai ona ou talanoa i tagata!”
Ae i lo’u fefe sa i ai, na ou filifili e faalagolago i le Atua ma auauna atu pea i se misiona.
Faalagolago i le Malosi o Keriso
A o o’u auauna atu, sa faigata lava i le taimi muamua, ae a o faaauau pea ona ou taumafai (ma tuuina atu lo’u tagata ia toilalo), sa ou iloa ai na faamalosia a’u e le Alii e fai le galuega na Ia poloaiina a’u e fai.
I le Tusi a Mamona na fetalai ai le Alii, “Ma afai e o mai tagata ia te a’u o le a ou faaali atu ia te i latou o latou vaivaiga. Ou te avatu i tagata ia vaivaiga, ina ia faalotomaualalalo ai i latou; ma ua lava lo’u alofa tunoa mo tagata uma o e e latou te faalotomaualalaloina i latou lava i o’u luma; aua afai latou te faalotomaualaloina i latou lava i o’u luma, ma faatuatua mai ia te a’u, ona ou faia lea o mea vaivai ia avea ma mea malolosi ia te i latou” (Eteru 12:27).
I la’u misiona, sa ou iloa ai e mafai e Iesu Keriso ona faia mea matagofie ma a’u e le ona o lo’u malosi ae ona o Lona malosi. Ma sa ou iloaina foi e le’i oo mai Lona malosi ia te a’u ona o a’u o se faifeautalai, ae o se mea foi sa tatau na mafai ona ou faalagolago i ai i le aoga maualuga.
O le mea matagofie e uiga ia Iesu Keriso, tatou te le manaomia ni tikeri po o ni talaaga otooto tetele o le olaga, e auauna atu ai i Lona malo ma avea ma ni soo malolosi! Afai tatou te lotomaualalalo ma faamaoni i o tatou manaoga e auauna atu, o le a avea (faaaogaina) i tatou e Iesu Keriso i o tatou tulaga lava lea tatou te i ai, i le mea o tatou i ai, ma tuuina mai ia i tatou le fesoasoani ma le malosi talafeagai e auauna atu ai ia te Ia.