“Ua Ou Atuatuvale! O le a Nei le Mea o le a Fai?,” Mo Le Malosi o le Autalavou, Mat. 2024.
Malosi i Taimi o le Atuatuvale
Ua Ou Atuatuvale! O le a Nei le Mea o le a Fai?
O nisi nei o manatu e fesoasoani ia te oe e pa’i atu ai i le mana faamalolo o le atuatuvale o le Faaola.
Ata na tusia e Uran Duo
Atuatuvale. Popolevale. Mafatia. Uunaiga mamafa. Faafitauli. Popole.
Po o le a lava le mea e te ta’ua ai, o nei tulaga o se vaega o le olaga faaletino talu ona tuua e Atamu ma Eva le Faatoaga. E leai se fuafaatatau mo se “olaga e saoloto mai le atuatuvale.” O le mea moni, o se olaga faapena o le a faatoilaloina ai le faamoemoega! (Tagai i le 2 Nifae 2:11–12.)
Talu ai e le mafai ona tatou aveesea atoa le atuatuvale, e tatau ona tatou taulai atu ai i le auala tatou te taulimaina ai. O le tele o mafuaaga o le atuatuvale e mafai ona vaevaeina i ni vaega se lua:
-
O mea e mafai ona e puleaina.
-
O mea e lē mafai ona e puleaina.
1. O Mea e Mafai Ona E Puleaina
Mo le tele o tausaga, e toatele tagata o isi faatuatuaga sa latou maua le mafanafana i le taulotoina o le vaega ua lauiloa o le “Tatalo mo le Filemu”: “Le Atua e, auina mai ia te a’u le toafimalie e talia ai mea e le mafai ona ou suia, le lototele e suia ai mea ou te mafaia, ma le poto e iloa ai le eseesega.”1
Na tuuina atu e le Perofeta o Iosefa Samita lea lava lapataiga e tasi i le Au Paia anamua, i le taulimaina o o latou luitau e tele: “O lea, le au uso pele e, ia tatou faia ai ma le fiafia mea uma ua i ai i lo tatou mana; ona mafai lea ona tatou tutu, ma le mautinoa atoatoa, e vaai i le faaolataga a le Atua, ma lona aao e faaali mai” (Mataupu Faavae ma Feagaiga 123:17; faaopoopo le faamamafa).
I se isi faaupuga: Fai mea uma e te mafaia, ona tuu atu lea i le Atua e Na te taulimaina mai iina. Taulai atu i mea e mafai ona e puleaina, e pei:
O au oe lava filifiliga
Ona o le Togiola a Keriso ua tatou “saoloto ai e faavavau i le iloa o le lelei mai le leaga; e fai mo i [tatou] lava ae lē faamalosia” (2 Nifae 2:26). E tatau ona tatou “auai ma le naunautai” i le faia o mea lelei (Mataupu Faavae ma Feagaiga 58:27).
O ou uiga faaalia
Na tusia e le tusi solo Amerika o Maya Angelou, “O le mea e tatau ona e faia pe a e le fiafia i se mea o le suia lea o lena mea. Afai e le mafai ona e suia, sui le ala e te mafaufau ai i ai.”2 Vaavaai mo vaega lelei i tagata ma tulaga. Liliu feau i taaloga. O le lofituina i le alofa o le tagata ia te ia lava, ma le mafaufau i le tele o lou inoino i se tulaga o le a le faaleleia ai lena tulaga.
O lau tali i mea e le mafai ona e puleaina
E le mafai ona e taofia afā, ae e mafai ona e tuuina atu le taimi, tupe, po o galuega e fesoasoani ai ia i latou e aafia ai. E le mafai ona e taofia se uo mai le tuua o le Ekalesia, ae e mafai ona e alofa pea ia i latou ma faia se faataitaiga lelei. E le mafai ona e taofia pe afai e fai mai e se tasi ni tala uigā ia te oe, ae e mafai ona e filifili pe faapefea ona tali atu i ai.
Ma i nei mea uma, manatua le mea e tasi e mafai ona e faia i taimi uma: tatalo. Ole atu i le Atua e fai mea e le mafai ona e faia—ia suia mea e le mafai ona e suia. Po o le a lava le taunuuga, e mafai e le Faaola ona fesoasoani ia te oe ia lagona le filemu.
2. O Mea e Le Mafai Ona E Puleaina
O le vaega aupito faigofie lenei e talanoaina ona e faigofie le auala e taulimaina ai:
Afai e le mafai ona e puleaina, aua le popole i ai.
Nai lo lena, faaaoga le faatuatua ia Iesu Keriso ma taulai atu i mea e mafai ona e puleaina. Taumafai e ’aua nei faatagaina le popole e manumalo ia te oe.
Ioe, e faigofie lava ona fai atu nai lo le faatinoina. (E te le moomoo maimau pe ana i ai sau ki o le “popole” lea e mafai ona e faaolaina ma tapē?)
Ae o le taliaina o se faafitauli e le oo i ai lou malosi, o le laasaga muamua lea e ’aua ai ne’i faapopoleina ai oe. Ona tuu atu lea o lou faatuatua ia Iesu Keriso.
O mea e le mafai ona tatou puleaina e masani lava ona pau i lalo o se tasi o vaega e lua:
Faailoilo po o Tulaga Faalenatura
Oge, lamala, mala faalenatura. Faama’i oti. O nisi o tapulaa faaletino ma tulaga o le soifua maloloina. O amioga faaletagata e mafai ona aafia ai nei mea, ma e masani lava ona i ai laasaga e mafai ona tatou faia ina ia saunia ai mo nei vaega pe faaitiitia ai lo latou aafiaga. Ae e le mafai ona tatou puleaina latou i lea aso ma lea aso.
O filifiliga a isi tagata
Auala e amio ai tagata i luga o le initoneti. Pe tumau pe le tumau foi au uo i le Ekalesia. O mea e fai mai ai tagata i ou tua. O faaiuga e faia e faamasinoga ma malo. O vaega e faasasalauina i luga o le televise. O tau o oloa. E mafai ona e tuuina atu lou manatu, ae i le iuga, o filifiliga uma e faia e tagata e ese mai ia te oe lava e le mafai ona e puleaina.