Mo Le Malosi o le Autalavou
Manumalo faatasi ma le Faaola
Mati 2024

“Manumalo faatasi ma le Faaola,” Mo Le Malosi o le Autalavou, Fep. 2024.

Malosi e Saunia ma Avea Ai

Manumalo faatasi ma le Faaola

Saunia e David A. Edwards

O Mekasini a le Ekalesia

O loo fesoasoani le Faaola ia te oe e faataunuu ou manaoga amiotonu mo lou lumanai.

Ata
O Iesu Keriso o loo opoina se teineititi

“Saunia mo lou lumanai.” E foliga mai o le savali lena i tua atu o le tele o le olaga o se talavou—i le aoga, i le lotu, i le galuega, i le fale. Atonu e amata ona e mafaufau, “Ioe, ioe. Ua ou iloa lava.” Ioe, ua e silafia e oo mai lava le lumanai ma e tatau ona e saunia mo lena mea. Ma i le taele o lou loto, e te manao ia lelei lou lumanai.

Ua e i ai i se tulaga o le iloaina lelei o lou lava loto. Ua e aoaoina vaega e te manao moni lava i ai. E te manao e fai mea lelei ma anoa i lou olaga—ina ia e ausia ai se tulaga maoae i le lalolagi ma olaga o isi tagata, ia auauna atu i le Atua ma ou uso a tagata. Ua e agai atu i se tulaga o le silafia lelei e sao lenei mea ma o le a e maua ai le fiafia moni.

O lea la, o nisi nei o mea taua e ao ona e iloa a o e tuputupu ae ma saunia mo le lumanai:

  • E silafia foi e le Alii lou loto (tagai i le Mataupu Faavae ma Feagaiga 6:16). Ona o ou manaoga loloto ma faamaoni mo lou olaga e lelei ma amiotonu, o loo i ai Iesu Keriso iina faatasi ma oe e faamalosia oe a o e saunia.

  • E le o tau lava na o lou saunia e faia ni mea; ua avea oe ma sē ua silafia e le Tama Faalelagi ma le Faaola e mafai ona avea ai oe.

  • E mafai ona e fiafia i le taimi nei a o sauniuni foi mo le lumanai. O le taimi lenei i lou olaga e tulaga ese, ma o filifiliga lelei e te faia o loo saunia ai oe mo se lumanai lelei.

A o e mafaufau i mea o loo e sauniuni i ai, mafaufau foi pe o faapefea ona faamalosia oe e le Faaola i le aluga o le ala. Ma mafaufau i mea o loo Ia fesoasoani ia te oe ia avea ai.

O Le A Se Mea O loo E Sauniuni Atu i Ai?

O nisi nei o nai faataitaiga:

  • Isi aotauina

  • O feagaiga o le malumalu

  • Misiona

  • Faaipoipoga

  • Galuega ma matātā

  • Aiga ma le avea ma mātua

  • Avea ma soo i le olaga atoa

E Faapefea e le Tama Faalelagi ma Iesu Keriso ona Faamalosia Oe a o E Saunia?

O nisi nei o nai faataitaiga:

  1. La te auina atu ia te oe le Agaga Paia, lea e mafai ona:

    1. Faamafanafana ia te oe.

    2. Taiala oe.

    3. Musuia oe.

    4. Faamanatu atu ia te oe mea na e aoaoina.

    5. Tuu atu ia te oe le mautinoa.

    6. Aumai ia te oe le filemu.

    7. Faatoafilem ou popolega.

  2. Latou te musuia perofeta e aoao oe e ala i:

    1. Konafesi aoao.

    2. Mekasini a le Ekalesia.

    3. Faasalalauga faapitoa.

    4. Uepisaite a le Ekalesia ma ala o faasalalauga faaagafesootai.

    5. Mo Le Malosi o le Autalavou: O Se Taiala mo le Faia o Filifiliga.

  3. Latou te musuia isi e fesoasoani ma lagolagoina oe, e aofia ai:

    1. Matua.

    2. Uo.

    3. Taitai.

    4. Faiaoga.

O Ai O loo Fesoasoani Iesu Keriso ia te Oe ia Avea ai?

O loo fesoasoani Iesu Keriso ia te oe ia avea atili e pei o le ituaiga tagata e i ai o Ia—e pei lava o lou Tama Faalelagi.

E olioli i la’ua i laasaga laiti taitasi e te faia—o mau uma e te faitauina, o tofiga uma o le Ekalesia e te faataunuuina, o galuega faatino uma o le aoga e te galue malosi ai, o suega uma e te suesue agai i ai, o faataitaiga uma e te auai ai, o upu agalelei uma e te tautala ai, o faatinoga uma o auaunaga e te tuuina atu, ma le tele o isi mea.

Faatasi ai ma le malosi o le Faaola, o le a sili atu ona e saunia mo lou lumanai nai lo le mea e mafai ona e i ai e aunoa ma Ia. Ma o le a avea oe ma se tasi e sili atu.