“O Le Eseesega Lelei e Mafai ona Faia e le Alofa Tunoa o Keriso” Mo Le Malosi o le Autalavou, Mat. 2024.
Malosi e Faatoilalo Ai Agasala
O Le Eseesega Lelei e Mafai ona Faia e le Alofa Tunoa o Keriso
Pe a tatou malamalama e le tau saili ia maua le alofa tunoa o le Faaola ma o loo avanoa pea, e mafai ona tutupu mea ofoofogia i o tatou olaga.
Ata na tusia e Jarom Vogeln
A o o’u auauna atu o se epikopo, o se tulaga ofoofogia le vaaia o le mapusaga e lagonaina e tagata talavou a o matou feiloai e ta’uta’u mai se agasala, o se vaega o lo latou salamo. Ae, sa faigofie ona ou iloaina se mamanu faifai pea: o le a ta’uta’u mai e tagata talavou, lagona le fiafia, ona—e ui lava i o latou faamoemoega sili—e toe foi foi i le faia o le mea sese. Ona latou ta’uta’u mai lea, lagona le fiafia, ma toe fo’i foi e faia le mea sese. A mavae le faa-tolu pe faa-fa ona i ai i lena taamilosaga, e masani lava ona latou lagona ai le musu.
Sa ou faafetai ona sa aoaoina nei talavou, o Iesu Keriso, e ala i Lana Togiola, ua ofoina mai ai ia i latou se avanoa e salamo ai ma toe amata. Peitai, sa ou popole atonu sa le lava lo latou malamalama e uiga i se isi faamanuiaga ua ofoina mai e le Faaola: O Lona alofa tunoa—o le mana gafatia1, fesoasoani faalelagi, ma le “faaeega o le malosi lea tatou te tuputupu a’e ai mai tagata sese ma faatapulaaina ua tatou i ai nei, i tagata faaeaina.”2
Sa ou filimaoti e aoao atu ma le manino atili, e pei ona aoao Peresitene Russell M. Nelson, e faapea “o le salamo … o se faagasologa”3 lea e masani ona alu ai le taimi ma taumafaiga faifai pea.4 Sa ou manao i tagata o la’u uarota ia iloa e faafetaui i tatou e le Atua i le mea o tatou i ai ma ofo mai le alofa tunoa e fesoasoani ai ia i tatou i le faagasologa atoa o le faaatoatoaina, e tusa lava po o le a le umi.
O Le Auala e Fesoasoani ai le Malamalama i le AlofaTunoa ia te Oe
I ni nai tausaga ua mavae, sa faaalia ai e se suesuega o le silia ma le 600 talavou matutua i le Iunivesite o Polika Iaga e faapea, o i latou na iloa ma malamalama i le alofa tunoa na lipotia mai tulaga maualalo o le atuatuvale, popole, maasiasi, ma le naunau lava ia atoatoa.5 O se suesuega tulitatao na faaalia ai o se talitonuga i le alofa tunoa sa fesootai i tulaga maualuluga atu o le lotofaafetai, faatauaina o le tagata lava ia, o [lona] uiga i le olaga, faamalieina i le olaga, ma le talitonu o le a lelei mea uma.6
I se isi faaupuga, e lagona e tagata le faaitiitia o le maasiasi ma sili atu le faatauaina o le tagata lava ia pe a latou malamalama o loo avanoa le alofa tunoa iinei ma le taimi nei—ae le seiloga ua uma ni taumafaiga ia maua, po o le tulaga e tatau ai. Pe a tatou iloa e fesoasoani mai le Atua ia i tatou e tusa lava po o a mea ua tatou faia po o le a foi le tele o taimi tatou te lagona ai ua tatou tuuina o Ia i lalo, tatou te lagona le musuia e taumafai pea.7
“Ua Ou Tuu i Lalo le Tama Faalelagi”
Talu ai nei sa manu’a ai se faifeautalai a’o i ai i se gaoioiga o taaloga i le latou aso sauniuni, ma sa auina atu i le fale e saili faasiligamalosi ai. Sa ia te ia ni sini maualuluga mo le mauaina o le fesoasoani faaletino sa ia manaomia ona toe foi atu lea i lana misiona. Peitai, o le tele naua o taimi e lei faatulagaina na tuu ai na o ia na vave ona oo atu ai i se tulaga o le toe foi atu i mausa tuai.
Sa i ai o ia i se tulaga o le faia o le agasala lea sa ia manatu sa ia salamo ai ma tuua a o lei alu lana misiona. Sa lotovaivai ma lē fiafia o ia i le leai o sona lava loto pulea. O le tele o lona faanoanoa na oo i ai, o le tele foi lea o lona saili atu o se toomaga i na mausa leaga. O se taamilosaga agai i lalo lea sa foliga mai sa leai se taunuuga lelei vave mo ia.
“Ou te lagona e pei ua ou tuuina i lalo le Tama Faalelagi,” na ta’u atu ai e le alii talavou i lona taitai perisitua. “Sa ou salamo muamua i lenei mea, ma sa faamagalo a’u e le Atua. Sa ou folafola atu ou te le toe faia lava, ae o lenei ua ou toe i ai foi iinei e pei lava ou te le’i salamo muamua. Ou te le agavaa i le faamagaloga po o le fesoasoani a le Atua. E le o le taimi nei. Leai lava.”
Sa fai mai lona taitai perisitua, “E te le fiafia la ua e iloa o le alofa tunoa o se meaalofa? E te tau le taumafai ia mauaina pe i ai se tulaga e tatau ai (ona mauaina). Tau lava o lou filifili e maua e ala i le naunau e taumafai pea ma aua le fiu.8 Ona faasoa atu lea e le taitai o upu nei a Elder Neil L. Andersen o le Korama a Aposetolo e Toasefululua: “Atonu tatou te toe se’e i tua i nisi taimi, ae ia tatou vave foi atu ma le lotomaualalo i o tatou tulivae ma toe ui atu i le itu sa’o.”9
Sa toe liliu atu le taulealea i le lagi, ma sa i ai iina le Faaola e fesoasoani. E le gata ina sa faamaloloina le manu’a o le alii talavou, ae sa faapena foi lona loto. E tasi le sini laitiiti i le taimi, ma faatasi ai ma le alofa tunoa na ala mai ia Iesu Keriso, sa amata ona ia alualu i luma. E le’i umi ae toe foi atu o ia i lana misiona ua tumu i le lotofaafetai, taua o le tagata lava ia, o se lagona o le uiga, faamalieina i le olaga, ma le talitonu o le a lelei mea uma. O le eseesega lena e mafai ona faia e le alofa tunoa o Keriso.