“Aisea Ou Te Manaomia ai Iesu Keriso,” Mo Le Malosi o le Autalavou, Mat. 2024.
Malosiaga i Lou Sootaga ma Ia
Aisea Ou Te Manaomia ai Iesu Keriso
O le malamalama i la tatou sootaga ma le Faaola e taua.
The Master’s Touch, saunia e Kelsy ma Jesse Lightweave
“Aisea Ou Te Manaomia ai Iesu Keriso?” O se fesili taua tele e fesili ifo ai ia te oe lava—e lē o “tagata uma” tuufaatasi po o le “o i tatou” a lou aiga. Ae, o le mea moni, “O a’u.” O le a la’u tali i lena fesili?
O le tali na ou maua mo a’u lava ia na oo mai e ala i faatinoga patino o le faatuatua; taumafaiga i aso taitasi e ola i a’u feagaiga, e aofia ai la’u feagaiga o le papatisoga; ma le aoao e faalogo i le siufofoga o le Alii e ala i Lona Agaga. Ma o le mea e sili ona taua, e totonugalemu i la’u sootaga ma lo’u Faaola.
O Se Sootaga ma le Faaola
E mafai ona ou lisiina ma le mautinoa ni mafuaaga ou te manaomia ai o’u mātua po o a’u uo mamae. Sa ou faafailele ma fafaga e le aunoa na sootaga. O lo latou taua i lo’u olaga e iloagofie ma mausali e pei o le taimi ma taumafaiga ou te faataunuuina ia latalata atu ai ia i latou e ala i mea faigofie e pei o talanoaga masani, iloaina o i latou, ma faatagaina lo latou atamai amiotonu e uunaia ai lo’u olaga.
O la tatou sootaga ma Iesu Keriso e mafai ona mulimuli i se mamanu faapena. O le tatalo i aso uma i le Tama Faalelagi i le suafa o Iesu Keriso, o se vaega tatau. E faapena foi le iloa o le Faaola e ala i le suesue i tusitusiga paia, faitauina o upu a perofeta ma aposetolo, ma faalogo i le Agaga. Ou te faalolotoina lena sootaga a o ou faatagaina mea uma o loo o’u aoaoina e uunaia ai lo’u olaga ma lo’u tagata.
E le gata i lea, ia mafaufau i le ata o le faaolataga. O lena faalaniga, “ata o le faaolataga,” ua ta’u mai ai o oe ma a’u—o tagata uma—e manaomia le laveaiina ma o lena faaolataga o se vaega o le mamanu mo lenei olaga. Sa tatou manaomia le fesoasoani ma sa le mafai ona tatou laveaiina i tatou lava.
Ae na auina mai i tatou e le Atua i le lalolagi ma se folafolaga e faavavau o le a Ia saunia se Faaola, o Iesu Keriso, o lē o le a faatoilaloina faafitauli ia e vavaeeseina ai i tatou mai le afioaga o le Atua.1 Ma ua tatou osia se feagaiga ma le Atua, ua Ia folafola mai e faia mea uma Na te mafaia, e aunoa ma le aveesea o lo tatou malosi e filifili ai, ina ia fesoasoani ia i tatou e tausia a tatou folafolaga paia ia te Ia.2
Ata pue mai faaaloaloga a Tracy Y. Browning
Sa Manaomia Ona Ou Iloa sa Ia Malamalama
Sa papatisoina a’u ina ua 16 o’u tausaga ma nofo i le Aai o Niu Ioka. I le taimi muamua sa ou lagonaina e pei sa ou faaaluina le tele o taimi e tau faatonutonu ai lo’u mafaufau i le va o lo’u faatuatuaga fou ua i ai, i lona sootaga faalefeagaiga ma le Atua, ma a’u sootaga ma uo.
Sa ou popole i le leai o ni uo i le aoga e mafai ona ou fesootai i ai. Ae sa masani ona faia e a’u uo ni mea na ou iloaina sa leaga mo lo’u agaga ma sa le ogatusa ma le tauaveina i o’u luga o le suafa o Iesu Keriso. Sa ou iloa na finagalo Iesu Keriso ou te faia ni filifiliga sili atu.
O le mea ou te le’i iloa pe sa malamalama le Faaola i le feteenai o o’u lagona. O aso taitasi sa faatupulaia pea le faigata a o valaaulia a’u e faia ni mea sa ou iloa e le lelei. O nisi taimi ou te tauamiotonuina ai nei tulaga i le faapea e lē afaina, ae sa ou iloaina sa ou fetuutuunai ni mea e le tatau ona ou faia.
Sa manaomia ona ou iloa sa malamalama le Faaola i le tuuatoatasi ma le tausalaina sa ou lagonaina pe a ou mafaufau e tuu i lalo tulaga faatonuina o le talalelei ina ia mafai ai ona ou lagonaina se lagona o le auai faatasi ma a’u uo. Sa ou lagona le pei ua ou malemo. Sa ou manaomia le laveaiina. Sa ou manaomia Iesu Keriso.
Ina ua Faalolotoina La’u Sootaga ma Ia
Sa faalolotoina la’u sootaga ma Iesu Keriso ina ua ou iloaina mo a’u lava le mafuaaga na ou manaomia ai o Ia. O le taimi lea na amata ai ona ou se’e ese mai le tulaga o le na ona iloa e tatau ona ou ola i le talalelei, ae maua se malamalama i le pogai na ou manao ai e ola i le talalelei ma fesili atu mo se fesoasoani e faia ai. Sa na ona ou tootuli lava ma tuuina atu lo’u loto i le Atua, ma le faamoemoe e Na te popole mai ia te a’u ma lo’u faafitauli, o le ata o le faaolataga sa mamanuina e fesoasoani mai ia te a’u, e o’o lava i lo’u fiafia sa avea o se vaega o le fuafuaga.
Na aoao mai Peresitene Russell M. Nelson, “O le taimi lava e osia ai e oe ma a’u se feagaiga ma le Atua, o le a sili atu ona vavalalata lo tatou sootaga ma Ia nai lo le taimi a o lei faia a tatou feagaiga. … Ona o la tatou feagaiga ma le Atua, o le a lē faavaivai ai lava o Ia i Ana taumafaiga e fesoasoani ia i tatou, ma o le a tatou le faamuta lava Lona onosai alofa mutimutivale ia i tatou.”3
Sa ou talanoa i le Tama Faalelagi e uiga i lo’u ta’usalaina i o’u lagona, ma lo’u le iloa ai o le mea e fai e tausisia ai e le gata o o’u tulaga faatonuina a o a’u uo. Sa ou ta’u atu ia te Ia sa ou lagonaina le le fiafia ma sa ou manaomia moni lava Lana fesoasoani.
A o o’u tootuli sa amata ona ou maua le filemu. O lenei lagona toafilemu na fesoasoani ou te malamalama ai sa silafia e le Faaola o’u lagona ma e popole o Ia—e tele ma e moni lava.
A o faasolo ina ou matua ma maua se vaaiga sili atu, ua ou iloa o taimi uma lava ou te alu atu ai i le Atua ma aioi atu mo se fesoasoani po o se faamagaloga, e foliga mai i se tulaga faatusatusa - ua tuuina atu a’u i le Faatoaga o Ketesemane, le nofoaga na gatete ai lo tatou Faaola i le tiga ma amata ai ona mafatia i le tino ma le agaga mo mea sese ma agasala lea na vavaeeseina ai i tatou mai le Atua.4 O se faamanatu e malamalama o Ia i mea o loo feagai ma a’u—e sili atu nai lo se isi lava.
I le Lotomaualalo, Lo Tatou Faaola, saunia e Jay Bryant Ward
E Le o Tuuatoatasi
Ina ua ou tulai ane mai o’u tulivae, sa fesoasoani le Agaga ia te a’u e iloatino nisi o mea ma musuia a’u e fai isi mea. Muamua, sa ou manatua o se tasi o a’u uo o se Musolemi ma e le’i fesiligia lava e fetuutuunai ona tulaga faatonuina aua sa matou faaaloalogia lona faatuatuaga ma malamalama sa i ai ni mea patino na te le faia lava. Sa musuia a’u e faasoa atu lo’u faatuatuaga fou i a’u uo ina ia mafai foi e latou ona malamalama atili e uiga ia te a’u ma le mafuaaga na taua ai o’u tulaga faatonuina fou ia te a’u.
Sa ou amata i ni nai vaega laiti. Sa ou ta’u atu i se tasi o uo auala na ou i ai i a’u tauiviga. Sa agalelei ma faaaloalo o ia. Sa ia fesoasoani mai ia te a’u a o o’u talanoa atu i isi a’u uo. E le’i malamalama tagata uma, ae i le aluga o taimi, sa ou vaaia ai ua latou faia ni fuafuaga e mafai ona ou auai ai lea e lē solia ai a’u folafolaga i le Atua.
Ou te iloa e mafai ona tatou faaaogaina uma le malosi sili atu e tetee atu ai i faatosinaga faifai pea a le lalolagi. O le tausia o feagaiga e fesoasoani i lena mea, ma o Iesu Keriso o loo i le totonugalemu o a tatou feagaiga.5 O le mea lenei na ou iloaina mo a’u lava—aisea ou te manaomia ai Iesu Keriso.
O le toe foi atu i le aiga i le Atua, e lē o se mea e mafai ona ou faia na o a’u. Ma e tele laasaga laiti i aso taitasi ma aafiaga o aso uma lea e ao ia te a’u—ma i tatou uma—ona faia i lena malaga atu i le aiga. Ae e ma’eu le faamanuiaina o i tatou o ni tagata e osia feagaiga ma tausia feagaiga lea e faapea ai o le Atua “o le a le aivai lava i Ana taumafaiga e fesoasoani ia i tatou” seia tatou oo atu iina.