Disaepol i go long Disaepol

?Olsem wanem nao yu save stap olsem wan Disaepol blong Jisas Kraes? Hem i simpol bitim we yu stap tingting long hem. Jekem aot ol simpol eksampol ia we ol yut oli serem abaot ol disaepol long laef blong olgeta.

Pikja

yang man

Kyler C., 13 yia

Blong Guayas, Ecuador. Hem i laekem blong plei basketbol mo vaeolin.

Tu long ol fren blong mi blong jos, Arick mo Mike, tufala i bin tijim mi hamas i impoten blong stap olsem wan disaepol blong Jisas Kraes. Eksampol blong tufala i bin helpem mi blong gat moa filing ia blong wantem givim seves olsem wan misinari. Naoia mi glad tumas blong serem abaot Jisas Kraes long olgeta we oli stap long nid.

Ol fren blong mi tu oli ol gudfala eksampol blong Kraes long wei we oli toktok. Oli serem plante eksperiens wetem mi abaot blong stap folem Jisas Kraes, we i bin leftemap tingting blong mi blong go moa kolosap long Hem. Eksampol, fren blong mi i bin tijim mi se taem yumi gat wan kwestin, yumi save askem God. ?Mo olsem wanem nao bae yumi save se wetaem bae Hem i ansa? Bae yumi save long ol hat blong yumi. Hemia Spirit i stap talem se God i stap toktok long yumi mo se yumi stap jusum stret rod.

Pikja

yang woman mo yang man

Ayotunde Raphael A., 15 yia

Blong Oyo, Nigeria. Hem i laekem danis, ol spot, mo tij wetem ol misinari.

Fren blong mi Ewa (ful nem blong hem i Ewaoluwa) hem i wan eksampol blong wan disaepol blong Kraes long mi. Hem i bin mekem mi harem nogud wantaem, mo mi bin kros long hem. Afta hem i askem mi blong fogivim hem. Tru long wei ia, mi bin lanem blong gat fasin blong putum tingting i stap daon mo fasin blong fogiv aot long hem. Hem i putum tingting blong hem i stap daon taem hem i talem sore, mo mi fogivim hem.

Long mi, blong stap wan disaepol blong Jisas Kraes hem i blong kipim ol komanmen blong Papa long Heven, blong lavem God mo Pikinini blong Hem, Jisas Kraes, mo blong kea moa long ol narawan.

Pikja

yang man

Gabriel A., 12 yia

Blong Oyo, Nigeria. Hem i laekem blong plei futbol (soka).

Mi bin save wan boe long jos we i stap buli bifo long ol nara pikinini, be wan dei wetem sapraes hem i jenis. Mi disaed blong askem hem se, “?From wanem nao yu jenis?” Hem i talem long mi se hem i bin prea, ridim ol skripja blong hem, gat fet, mo wok had blong jenisim ol fasin blong hem. Hem i helpem mi from naoia taem mi wantem blong mekem wan desisen, long saed blong skul o long saed blong spirit, mi mas prea long God blong i lidim mi.

Fren blong mi bae i no stret gud evriwan, be fasin blong hem i tajem hat blong mi. Naoia mi stap ridim ol skripja bifo mi tekem eni step long laef blong mi. Eksampol blong fren blong mi i tekem mi kam moa kolosap long Kraes from eni taem mi mekem sin, mi save go bak long Lod tru long prea mo fasin blong sakem sin. Blong go long Lod i bin helpem mi blong putum long saed ol hevi samting blong mi.