“Fasin blong stap olsem wan Disaepol: Wanem mo Olsem Wanem,” Blong Ol Yut Oli Kam Strong, Jenuware 2024.
Fasin blong stap olsem wan disaepol: Wanem mo Olsem Wanem
Blong save huia yu mo wanem yu yu save kam, i tekem tugeta wanem mo olsem wanem blong stap wan disaepol blong Jisas Kraes.
“Mi mi huia?”
Hem i wan kwestin we plante yangfala oli lukaotem ol ansa blong hem. Taem yu groap mo lan mo develop long wei blong yuwan, yu stap tingting abaot wanem nao i soem aot huia yu, wanem nao i givim aedentiti blong yu . Presiden Russell M. Nelson i givim sam gudgudfala gaed long kwestin ia:
“Yu yu huia? Faswan mo impoten samting, yu yu wan pikinini blong God, wan pikinini blong kavenan, mo wan disaepol blong Jisas Kraes. Taem yu holemtaet ol trutok ia, Papa blong yumi long Heven bae helpem yu blong kasem nambawan gol ia blong laef blong taem we i no save finis long tabu ples blong Hem” (“Choices for Eternity” [worldwide devotional for young adults, May 15, 2022], broadcasts.ChurchofjesusChrist.org).
Presiden Nelson i tijim se i no gat wan nara nem we i mas moa impoten long yu bitim olgeta trifala nem ia: (1) pikinini blong God, (2) pikinini blong kavenan, mo (3) disaepol blong Jisas Kraes.
Aedentiti blong wan Disaepol
Letem yumi toktok moa abaot namba tri ia, disaepol blong Jisas Kraes. ?Olsem wanem nao yu holemtaet aedentiti ia mo kam wan disaepol?
Blong folem Sevya mo stap olsem disaepol blong Hem, yu nidim blong lukluk moa long tugeta wanem yu mekem mo olsem wanem yu mekem.
Eksampol, Sevya i wantem yumi blong givim samting long ol nara man mo givim seves long olgeta, be Hem i invaetem yumi blong mekem wetem ful tingting mo glad hat be i no hat we i no glad blong mekem. Taem yumi wantem blong givim samting mo givim seves, yumi kasem ol bigfala presen blong stap wan tru disaepol. (Luk long 2 Korin 9:7; Moronae 7:8.)
Naoia, yumi lukluk long wanem nao ol disaepol oli mekem mo olsem wanem oli mekem.
Wanem wan Disaepol i Mekem
Hemia samfala samting aot long plante samting we wan disaepol blong Kraes i save mekem blong folem Sevya.
-
Eksasaesem fet long wei we ol disaepol oli eksasaesem fet.
-
Givim Seves long wei we ol disaepol oli givim seves.
-
Prea long wei we ol disaepol oli prea.
-
Stadi long wei we ol disaepol oli stadi.
-
Sakem sin long wei we ol disaepol oli sakem sin.
-
Tingting long wei we ol disaepol oli tingting.
-
Lavem God long wei we ol disaepol oli lavem God.
-
Lavem ol narafala man long wei we ol disaepol oli lavem ol narafala man.
-
Tij long wei we ol disaepol oli tij.
-
Stanap strong kasem en long wei we ol disaepol oli stanap strong kasem en.
Olsem wanem nao wan Disaepol I Mekem
Hemia sam long ol wei blong olsem wanem wan disaepol i save mekem ol samting ia. Plante long ol wei ia oli aplae long sam long olgeta samting ia. Sam long olgeta i save aplae long evriwan.
-
Wetem ol hat mo maen we i senta long Jisas Kraes.
-
Mekem wetem wan hat we i wantem blong mekem
-
Tingting we i stap daon
-
Wetem Lav
-
Wok had wetem ful paoa
-
Oltaem
-
Wetem ful hat we i no gat wan samting i holemtaet
-
Wetem Ful Hat
-
Wetem tru hat
-
I no gat tingting blong jajem narawan o lukluk man i defren
-
Fasin blong save wet longtaem
-
Wetem strong tingting
-
Strong paoa long tingting
-
Lukluk nomo long ol nid blong ol narafala man
-
Strong paoa long tingting insaed long ol skripja
-
No save muvmuv
-
Fulap long gudfala fasin
-
Fulap long hop
-
Wetem wan tingting we i wantem blong kam olsem Papa long Heven mo Jisas Kraes
-
No gat samting i stopem
Yu save kasem gudfala samting taem yu stap tingting abaot tugeta, wanem yu stap mekem blong folem Sevya mo olsem wanem yu yu stap mekem. Sapos yu filim se yu nid blong mekem sam jenis long eni wan long tufala kategori, hemia bae gud tumas. Hemi Spirit we i stap lidim yu blong kam wan moa gud disaepol.
Wan Aedentiti blong Holemtaet mo Kipim
Olsem Presiden Nelson i talem, blong stap wan Disaepol blong Jisas Kraes i wan impoten pat blong aedentiti blong yu. Taem yu holemtaet mo kipim aedentiti ia, Papa blong yu long Heven bae i helpem yu blong kam wan man we Hem i save se yu save kam olsem—man ia we yu, dip insaed long yu, yu wantem tumas blong kam olsem.