“Noatia i le Faaola e ala i Feagaiga,” Mo le Malosi o le Autalavou, Fep. 2022.
Sau, Mulimuli Mai ia te A’u
Noatia i le Faaola e ala i Feagaiga
O le ulu atu i totonu ma le tausia o feagaiga paia e fusia ai i tatou i le Faaola.
I le savali muamua a Peresitene Russell M. Nelson i le avea ai ma Peresitene O Le Ekalesia a Iesu Keriso o le Au Paia o Aso e Gata Ai, sa ia faamamafa mai ai le taua o feagaiga paia o le talalelei. Sa ia saunoa:
“I tagata taitoatasi o le Ekalesia ou te faapea atu, tumau i le ala o le feagaiga. O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea.”1
Ua valaaulia i tatou taitoatasi e le Alii o Iesu Keriso ina ia “taumamafa i lana olataga, ma i le mana o lana togiola.”2 O folafolaga, faamanuiaga, ma le mana o feagaiga paia tatou te osia ma Ia e mafai ona suia ai o tatou loto, tuuina mai ai le taitaiga faaleagaga ma le puipuiga, ma mafai ai ona tatou maua le olioli tumau.
O A Feagaiga?
O se feagaiga o se maliega lea i le va o le Atua ma Ana fanau. E taua le manatua ua Ia faatuina tuutuuga ma aiaiga o feagaiga uma o le talalelei; e le o oe ma a‘u. Tatou te faaaogaina lo tatou faitalia e aoao ai e uiga, talia, ma faamamalu feagaiga ia na faavaeina e le Atua.
O le toatele o outou ua uma ona osia feagaiga ina ua papatisoina outou. Ma a o e alualu i luma i le talalelei a Iesu Keriso, o le a e osia nisi feagaiga. O feagaiga e sili ona paia ua na o totonu o se malumalu e maua ai—le maota o le Alii.
O mataupu faavae nei e fa o loo faamamafa mai ai nisi o folafolaga ma faamanuiaga e oo mai i le ulu atu ma le agavaa ma tausia ma le faamaoni feagaiga ma le Atua.
E Fesoasoani Feagaiga ia i Tatou ia Iloa Po o Ai Moni Lava i Tatou
Na osifeagaiga le Atua ma Ana fanau faamaoni talu mai le amataga o le lalolagi. Mo se faataitaiga, o Aperaamo o se perofeta maoae sa manao i le amiotonu ma usitai i poloaiga uma a le Atua—e aofia ai le poloaiga e osi atu se taulaga i lona atalii pele, o Isaako. Ona o le usiusitai mausali o Aperaamo, sa osia ai e le Atua se feagaiga ma ia ma folafola atu i ai faamanuiaga mamalu o se fanau toatele ma o le a faamanuiaina atunuu o le lalolagi e ala i ana “fanau.”3
Ua faamanuiaina atunuu uma i fanau a Aperaamo ona o ana “fanau” ua i ai le tiutetauave e faasoa atu le talalelei a Iesu Keriso ma valaaulia tagata uma ia maua e ala i le pule tatau o le perisitua ia sauniga o le faaolataga ma le faaeaga.4 Na faafouina mulimuli ane e le Alii lenei feagaiga ma le atalii o Aperaamo, o Isaako, ma le atalii o lona atalii, o Iakopo, ma le asō e ala mai ia i tatou o e ola ma auauna atu i le tisipenisione o aso e gata ai o le atoaga o taimi.
E faapefea ona fesootai nei folafolaga ma faamanuiaga ia te oe? A le o le gafa moni po o le vaetamaina, o oe o se suli moni i folafolaga a le Atua ia Aperaamo. E tatau ona e faamanuiaina atalii ma afafine o le Atua e ala i le molimau atu i le paia o Iesu Keriso, folafola atu le savali o Lana talalelei toefuataiina, ma valaaulia tagata uma ia maua feagaiga paia ma sauniga o le perisitua.
O i tatou o atalii ma afafine o le Atua ma “fanau” a Aperaamo. Na muai faauuina i tatou i le muai olaga ma fananau mai i le olaga faaletino ina ia faataunuuina le feagaiga ma folafolaga na faia e le Atua ia Aperaamo. O i tatou na, ma o le mafuaaga lena ua tatou i ai iinei—i le taimi nei ma aso uma lava.
O Feagaiga Tatou Te Latalata Atili Ai i le Faaola
O le a le mafai ona maua folafolaga ma faamanuiaga o feagaiga e aunoa ma lo tatou Faaola, o Iesu Keriso. Ua Ia valaaulia i tatou e vaai atu ia te Ia,5 o mai ia te Ia,6 aoao e uiga ia te Ia,7 ma noatia i tatou lava ia te Ia8 e ala i feagaiga ma sauniga o Lana talalelei toefuataiina.
O feagaiga ma sauniga o poloka faufale ia e mafai ai e i tatou ona fausia o tatou olaga i luga o le “papa o lo tatou Togiola”9 ma Lana Togiola. E afua ona o le faamaoni i le faamamaluina o feagaiga paia e faamausaliina ai le fusia o i tatou i le Faaola, ua avea ai o Ia ma punavai tupito o le taitaiga faaleagaga ma le malosi i o tatou olaga.
Ave Lana Amo i Ou Luga
Na fetalai mai le Alii, “Ia outou o mai ia te au, o outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaa’oa’o ia te au, aua o au lē agamalu ma le loto maulalo: ona maua lea e outou o le malologa mo outou agaga.
“Aua e avegofie la’u amo, o la’u avega foi e māmā ia.”10
O le amo o se pou laupapa, e masani lava ona faaaogaina i le va o ni povi se lua po o nisi manu lea e mafai ai ona la tosoina faatasi se avega. O se amo e tuu faatasi ai manu ina ia mafai ona latou o faatasi e faamaea se galuega.
O le ulu atu ma tausia feagaiga paia e faatasia ai ma noatia ai i tatou i le Alii. O lona uiga tatou te talitonu ia te Ia, faalagolago ia te Ia, ma toso la tatou avega faatasi ma Ia i le taimi o le malaga o le olaga. O a tatou taumafaiga silisili e le mafai ona faatusatusa i Ana taumafaiga. Ae a fusia i tatou ma faatasi ai ma le Faaola, e mafai ona tatou maua le faamamaina, gafatia, ma mana faaopoopo o Lana Togiola i o tatou olaga.
E Le o Tuua Na o Outou
O le isi folafolaga sili ma faamanuiaga o le fusia faatasi o i tatou lava i le Faaola e ala i feagaiga e faapea tatou te le o i ai, ma e le manaomia lava ona tuuatoatasi. E mafai ona tatou fetaomi atu i luma i o tatou olaga i aso taitasi faatasi ai ma le fesoasoani faalelagi. E ala i le Togiola a le Faaola ma a tatou feagaiga, tatou te maua ai le malosi e fai ai ma avea ai ma tagata e le mafai ona tatou faia ma faalagolago i ai na o lo tatou gafatia faatapulaa faaletino.
E le mafuatiaina le faamanuiaina o i tatou pe a noatia i tatou i le Alii e ala i feagaiga paia. Ma ou te molimau atu e moni lenei tautinoga a le Alii, “O lea, ia faaauau pea la outou malaga ma ia olioli o outou loto; aua faauta, ma tagai, ua Ou faatasi ma outou e oo lava i le iuga.”11