Ae Faapefea La’u Misiona?

Saunia e Amoako Afran-Okese

A o ou sauni mo se misiona, sa avea se gasegase faafuasei ma le maaleale o se tofotofoga o le faatuatua.

faifeautalai

Ata na tusia e Emily Call

Talu mai lava lo‘u laitiiti, sa ou manao e auauna atu i se misiona. Ae i lo‘u tausaga lona lua o le aoga maualuga, sa amata ona ou lagonaina le pepē o o’u vae, tulivae, ma o‘u lima. I totonu o ni vaiaso, sa le mafai ona ou savali, tamoe, pe a‘e i faasitepu.

Sa ou amata ona inu vai, ma le manatu o le a vave ona foia ai le faafitauli ina ia mafai ona ou toe foi i le aoga ma sauni mo la‘u misiona. Ae nai lo o lena, sa faaauau pea ona faasolosolo leaga lo’u tulaga. E lei umi ae le mafai ona ou faia na o a‘u se mea—sa le mafai ona ou seluina lo‘u lauulu pe tu foi i luga e piki i luga se faatonutonu TV.

Sa ou mauaina le tele o faamanuiaga faaleperisitua, ae sa lei tuua lava e le faama’i a’u. Sa taofia a‘u i se falemai i Accra lea sa galulue ai foma‘i poto masani ia te a‘u, ae sa le mafai ona latou iloa po o le a le ma’i. Sa amata ona ou mafaufau o le a ou le toe savali lava, e ono faapena foi le auauna atu i se misiona.

A o ou i ai i le falemai, sa o mai le peresitene o le misiona ma lona faletua e asiasi mai ia te a‘u ma lo‘u tina. Sa ia fesili mai ia te au pe ou te fia auauna atu i se misiona. Sa ou fai atu ia te ia sa ou manao i ai, ae ou te lei ma‘i. Sa ia fai mai, “Aua e te popole, o le a e auauna atu i se misiona.”

O le aso na sosoo ma le aso na matou taunuu ai i le fale mai le falemai, sa ma saofafai ma lo‘u tina ina ua ou faalogoina se leo o ta’u mai ia te a‘u ou te tu i luga ma savali. Sa ou fefe i o’u pa‘u, ae sa ou iloa e tatau ona ou taumafai. Sa ou tu lava a‘u ia i luga. Sa faifaimalie lava, na mafai ona ou faia la‘u la‘a muamua, lea na atili ai ona ou to’a. Sa faaauau pea ona ou faia ni la‘a faaopoopo. E ui lava ina sa ou tetete i le taimi muamua, ae sa ou iloaina ona o lo‘u faatuatua ia Iesu Keriso ma faamanuiaga faaleperisitua sa ou mauaina, o le a mafai ai ona ou auauna atu i se misiona i le taimi nei.

Sa ou toe foi i le aoga, ma i le taimi lava ina ua uma, sa ou auina atu au pepa mo le misiona. Sa ou maua lo‘u valaauga i ni nai masina mulimuli ane e auauna atu i le Misiona a Nigeria Lagos. O le auauna atu i le Alii ma le aoaoina o Ana fanau e uiga i le talalelei toefuataiina na ou maua ai le olioli tele. E ui e lei faamaloloina tagata uma e pei ona faamaloloina au, ou te iloa o le a faamanuiaina e le Alii soo se tasi, e tusa ai ma Lona finagalo, pe a tatou faatuatua ia te Ia.

E alala le tusitala i Ghana.