“‘Oku ou fie fanongo ki he leʻo ‘o e ʻEikí ‘i heʻeku mo‘uí. Te u ʻiloʻi fēfē nai ʻoku ou fanongo kiate Iá?Ki Hono Fakamālohia ʻo e Toʻu Tupú Fēpueli 2021, 29.
ʻAi Hangatonu
Te u ʻiloʻi fēfē nai ‘oku ou fanongo ki he leʻo ‘o e ʻEikí ‘i heʻeku mo‘uí?
Kuo fakaafeʻi kitautolu ʻe Palesiteni Lāsolo M. Nalesoni ke tau “faʻa fakakaukau moʻoni” ki he founga ‘oku tau fanongo ai kia Sīsū Kalaisí pea “fakahoko ‘a e ngaahi meʻa te ke faʻa fanongo lahi ange mo lelei ange ai kiate Iá” (“‘How Do You #HearHim?’ A Special Invitation,” Feb. 26, 2020, blog.ChurchofJesusChrist.org).
‘E lava ke tau fanongo kiate Ia ‘i he folofolá mo e lea ʻa e kau palōfitá. Ka ʻoku ʻikai ko e fanongó pē pe ko hono lau ʻa e ngaahi lea ko iá ʻoku mahuʻingá. Na‘e folofola ʻa e ʻEikí ‘o fakafou mai ʻi he Palōfita ko Siosefa Sāmitá:
“Ko hoku le‘ó ʻoku lea ‘aki [ʻa e ngaahi folofolá ni] kiate kimoutolú; he ‘oku ʻoatu ia ‘i hoku Laumālié kiate kimoutolu … ;
“Ko ia, te mou lava ʻo fakamoʻoniʻi kuo mou fanongo ki hoku leʻó, mo ʻiloʻi ʻa ʻeku ngaahi leá” (Tokāteline mo e Ngaahi Fuakava 18:35–36).
‘Ikai ngata aí, ko e feinga ke fanongo kiate Iá ʻoku ʻikai ko ha meʻa ia ʻoku tau fakahoko ʻi ha taimi nounou. Kuo pehē ʻe Palesiteni Nalesoni, “‘oku fie maʻu ha ngāue ʻiloʻi pau mo hokohoko” (“Fanongo Kiate Ia,” konifelenisi lahi ‘Epeleli 2020 [Ensign pe Liahona, Mē 2020, 89]).
‘I hoʻo ako, lotu, moihū, ngāue, mo talangofua ki he ngaahi fekau ‘a e ʻEikí, te Ne tāpuaki‘i koe ʻaki Hono Laumālié pea te ke liliu ʻo fakafou ʻi he Fakalelei ‘a Sīsū Kalaisí. Pea te ke lava leva ‘o ʻilo kuó ke fanongo ki Hono le‘ó.