“Ngaahi Founga ʻe 5 ke Makehe ai ʻa e Sākalamēnití,” Ko e Kaumeʻá, ʻEpeleli 2025, 38–39.
Ngaahi Founga ʻe 5 ke Makehe ai ʻa e Sākalamēnití
Te tau lava ʻo maʻu ʻa e sākalamēnití ʻi he uike kotoa pē ʻi he lotú.
Ko ha taimi makehe ʻeni ke manatuʻi ai ʻa Sīsū Kalaisi mo e ngaahi fuakava naʻa tau fai ʻi he papitaisó.
Ko ha founga ʻeni ʻe nima te ke lava ai ʻo teuteu ki he sākalamēnití.
-
Teuteu ki he lotú! Teuteuʻi ho vala ki he Sāpaté ʻi he pō kimuʻa ʻi he lotú. ʻE lava ke tokoni ʻeni ke ʻoua naʻá ke ongoʻi fakavavevave. Feinga ke ke ʻi ai taimi totonu ki he lotú koeʻuhí ke ke lava ʻo fanongo ki he hivá mo fakakaukau kia Sīsū Kalaisi. ʻI hoʻo teuteu ki he sākalamēnití, ʻokú ke mateuteu ai ke ongoʻi ʻEne ʻofá.
-
Fakakaukau ki ho uiké. Ko e hā naʻe hoko ʻi he uike kimuʻá? Naʻá ke fai ha faʻahinga meʻa angaʻofa? Naʻe ʻi ai nai ha ngaahi meʻa naʻá ke ongoʻi laukau ʻaki? ʻOku ʻi ai nai ha meʻa ʻe kehe hoʻo fakahoko iá ʻi he uike kahaʻú? Te ke lava ʻo fakakaukau ki he ngaahi meʻá ni ʻi hoʻo teuteu ki he lotú mo e lolotonga ʻo e sākalamēnití.
-
Fakakaukau ki ha meʻa ʻokú ke loto ke fai ʻi ha founga kehe. Sio ki ha fakatātā ʻo e Fakamoʻuí ʻi he Ko e Kaumeʻá. Tokanga taha kiate Ia pea manatuʻi te tau lava ʻo fakatomala pea toe feinga ʻi he taimi ʻoku tau fai ai ha fili ʻoku koví, koeʻuhí ko Ia. ʻOkú Ne ʻofa mo e Tamai Hēvaní ʻiate koe!
-
Lotu ki he Tamai Hēvaní. Ko e sākalamēnití ko ha taimi makehe ia ke fakakaukau ai ki he moʻui ʻa Sīsū Kalaisí mo ʻEne Fakaleleí. Fakaʻaongaʻi ʻa e taimi lōngonoa ko ʻení ke fai ai ha lotu makehe ki he Tamai Hēvaní. Fakahā kiate Ia ʻa e meʻa kotoa pē ʻoku ʻi ho ʻatamaí, pea te Ne lava ʻo foaki atu ʻa e melinó kiate koe (vakai, Filipai 4:6–7).
-
Lau ʻa e ongo lotu ki hono tāpuakiʻi ʻo e sākalamēnití. Ko e lotu tāpuakiʻi ʻo e maá mo e vaí ʻi he sākalamēnití ʻoku ʻi he Tokāteline mo e Ngaahi Fuakava 20:77, 79. Lau ʻa e ongo lotu ko ʻení kimuʻa pe ʻi he lolotonga ʻo e fakatahá. Kapau ʻokú ke fiemaʻu ha tokoni ke mahino, kole ki ha tokotaha lahi ke mo lau fakataha ia. Tokanga ki he ngaahi taimi kotoa pē ʻoku lave ai kia Sīsū Kalaisi ʻi he ongo lotú.
ʻŪ tā fakatātā ʻa Jarom Vogel