Ko ha Fakaafe ʻi he Toe Tuʻú

Fai ʻe Palesiteni Russell M. Nelson

Toʻo mei he (vitiō) “Ko Hono Fakamolemoleʻi ʻo e Niʻihi Kehé: Ko ha Pōpoaki ʻo e Toe Tuʻú meia Palesiteni Lāsolo M. Nalesoni,” Gospel Library.

ʻI he Toe Tuʻu ko ʻení, kuó u fakakaukau ai ki he taha ʻo e ngaahi momeniti fakaʻosi ʻo e moʻui ʻa e Fakamoʻuí ʻi he māmaní. ʻI hono tutuki Ia ʻi he kolosi ʻi Kalevalé, naʻe folofola ʻaki ʻe he Huhuʻí ʻa e ngaahi leá ni: “ʻE Tamai, fakamolemole ʻa kinautolu; he ʻoku ʻikai te nau ʻilo ʻa ia ʻoku nau faí” (Luke 23:34).

ʻOku ʻikai faingofua ʻa e fakamolemolé. Ka ʻi he taimi ʻoku tau fili ai ke fakamolemolé, ʻoku tau tuku ke fakanonga mo fakamolū ʻe he ʻEikí hotau lotó. ʻOku lava heni ke tau vakai ki he niʻihi kehé, tautautefito kiate kinautolu kuo faihala mai kiate kitautolú, ko e fānau ʻa e ʻOtuá mo hotau kāingá.

ʻĪmisi ʻo ha ongo tautehina ʻokú na fāʻofua ʻi ha loki mohe

Siʻoku ngaahi kaungāmeʻa ʻofeina, ʻoku ou fakaafeʻi kimoutolu ke mou fakakaukau pea lotua pe ʻoku ʻi ai ha taha ʻoku totonu ke mou fakamolemoleʻi. ʻOku ʻikai ke u lava ʻo fakakaukau ki ha founga ʻe toe lelei ange ke fakalāngilangiʻi ai ʻa e ʻEiki ko Sīsū Kalaisí ʻi he Toe Tuʻu ko ʻení. ʻOku ou palōmesi atu ʻi hoʻo fakamolemolé, ʻe ʻomi ʻe he Pilinisi ʻo e Melinó ha nonga kiate koe.

Kuo toe tuʻu ʻa Sīsū Kalaisi. ʻOkú Ne ʻofa ʻiate koe. Pea koeʻuhí ko Ia, te ke lava ʻo aʻusia ʻa e fiefia mo e mana ʻo e fakamolemolé.

Ko e Fakalau ʻa e ʻAhó ke Aʻu ki he Toe Tuʻú

Fai ha ʻekitivitī ki he ʻaho takitaha ʻo aʻu ki he Toe Tuʻú ke tokoni atu ke ke fakakaukau kia Sīsū Kalaisi. Hili hoʻo fai ʻa e ʻekitivitī takitaha, valivali ha matalaʻiʻakau.

Sāpate Pāmé

Hivaʻi pe lau ʻa e fakalea ʻo e “Kuo Toe Tuʻu ʻa Sīsū” (peesi 18).

Mōnite

Fakahoko ha talanoa ʻokú ke saiʻia taha ai fekauʻaki mo Sīsū Kalaisi.

Tūsite

Lau ʻa e Sione 11:25.

Pulelulu

Tokoniʻi ha taha, ʻo hangē ko ia naʻe fai ʻe he Fakamoʻuí.

Tuʻapulelulu

Hivaʻi pe fanongo ki he “Ketisemaní” (Hymns—For Home and Church, fika 1009).

Falaite Leleí

Lau ʻa e pōpoaki Toe Tuʻu ʻi he peesi 2.