“Tala ʻa e Talanoa ʻo e Toe Tuʻú,” Ko e Kaumeʻá, ʻEpeleli 2025, 24–25.

Tala ʻa e Talanoa ʻo e Toe Tuʻú

Fai ʻe Lucy Stevenson Ewell

Fakahoko ʻa e polokalama Toe Tuʻu ko ʻení mo ho fāmilí! Fili ʻa e kau laukongá ki he konga takitaha. Tānaki leva ʻa e ngaahi meʻa ko ʻení pe ngaahi meʻa tatau ke puke hake ki he konga takitaha ʻo e talanoá.

ʻI he uike kimuʻa pea pekia ʻa Sīsū Kalaisí, naʻá Ne hāʻele atu ki Selusalema ʻi ha ʻasi. Naʻe taʻataʻalo ʻaki ʻe he kakaí ha ngaahi lauʻi paame mo kaila, “Hōsana!” (Vakai, Maʻake 11:8–9.) ʻOku ʻuhinga ʻa e foʻi lea hōsaná ki he “fakahaofi kitautolu ʻi he taimí ni.”
Hili ha ngaahi ʻaho siʻi mei ai, naʻe foaki ʻe he Fakamoʻuí ʻa e sākalamēnití ki Heʻene Kau ʻAposetoló. Naʻá ne toʻo ʻa e mā ʻo tāpuakiʻi mo pakipaki ia. Naʻá ne paasi atu foki ha ipu ke nau inu mei ai. Naʻá Ne folofola, “Fai ʻeni ʻi he fakamanatu kiate au” (Luke 22:19).
Naʻe hāʻele ʻa Sīsū ki he Ngoue ʻi Ketisemaní. Naʻá Ne mamahi koeʻuhí ko ʻetau ngaahi angahalá mo e mamahí. Naʻá Ne lotu, “ʻE Tamai, kapau ko ho finangaló, ʻave ʻa e ipú ni ʻiate au: kae ʻoua naʻa fai hoku lotó, ka ko e finangalo ʻoʻoú.” (Luke 22:42).
Naʻe haʻu ʻa e kau sōtiá ke ʻave ʻa Sīsū. Naʻa nau “ʻai kiate ia ʻa e pulupulu kula ʻahoʻaho” mo ha “tatā ʻaki ʻa e ʻakau talatalá,” (Mātiu 27:28, 29). Naʻa nau manukiʻi mo fakamamahiʻi Ia.
Naʻa nau tuki ʻa e ʻū faʻo ʻi he ongo toʻukupu mo e toʻukupu kelekele ʻo e ʻEikí. Naʻe folofola ʻa e Fakamoʻuí ʻi he kolosí, “E Tamai, fakamolemole ʻa kinautolu; he ʻoku ʻikai te nau ʻilo ʻa ia ʻoku nau faí” (Luke 23:34).
Hili ʻa e pekia ʻa Sīsū Kalaisí, naʻe fakatokoto ʻe Hono kau muimuí Hono sinó ʻi ha fonualoto pea tekaʻi ha fuʻu maka lahi ʻi muʻa ʻi he matapaá (vakai, Maʻake 15:46). Naʻe siofi ʻe he kau leʻó ʻa e fonualotó ke fakapapauʻi naʻe ʻikai ke ueʻi ʻe ha taha ʻa e maká.
Hili ha ʻaho ʻe tolu, naʻe ʻomi ʻe he kau fafiné ha ngaahi sipaisi ke tokangaʻi ʻaki ʻa e sino ʻo Sīsuú. Naʻa nau sio kuo ueʻi ʻa e maká mei he fonualotó. Naʻe talaange ʻe ha ʻāngelo kiate kinautolu, “ʻOua naʻa [mou] manavahē” (Mātiu 28:5).
ʻOkú Ne moʻui! Naʻe ʻikai ha taha ʻi he fonualotó koeʻuhí he naʻe toetuʻu ʻa Sīsū Kalaisi. Naʻe pehē ʻe he ʻāngeló, “ʻOku ʻikai ʻi heni ia: he kuo toe tuʻu” (Mātiu 28:6). Koeʻuhí ko e Fakamoʻuí, te tau toe moʻui kotoa hili ʻetau maté.