“Wan Storian wetem Will abaot Stap Helpem Ol Rifuji,” Fren, Maj 2024, 40–41.
Wan Storian wetem Will abaot Stap Helpem Ol Rifuji
Will i blong Pesilvenia, YSA. Mifala i askem hem abaot wan projek we hem i bin mekem blong helpem ol narafala man.
Talem long mifala abaot yuwan.
Mi gat 11 yia. Mi laekem blong plei, futbol mo lakros ( wan gem olsem hanbol be oli yusum ol stik blong hem we i gat net blong holem balong), mekem ol kuki, swim long solwota, ski long sno mo ron long rola sket. Mo tu, mi plei piano mo vaeolin. Fevret kala blong mi hem i nevi blu, mo fevret kaekae blong mi hem i eg (skrambol eg, eg we oli fraenem, mo eg we oli bolem i strong gud—!Mi laekem evri wan ia!). Taem mi groap, mi wantem kam wan dokta olsem papa blong mi.
?Wanem nao i givim aedia long yu blong help?
Mi harem se i gat plante famli long wan nara kantri oli stap ronwe blong faenem ples we i sef blong oli stap long hem. Sam long olgeta oli stap muv i kam long wan eria we i kolosap long mifala. Stret taem mi tingting, “?Olsem wanem nao mi save helpem olgeta?”
Mi talem wan prea blong save olsem wanem mi save help. Afta, mama blong mi i kasem wan imel we i kam long stek Rilif Sosaeti. Oli stap askem ol pipol blong mekem donesen long ol samting blong givim long ol famli we oli ol rifuji. Mi save se hemia ansa blong prea blong mi.
?Olsem wanem nao yu help?
Mi laekem blong mekem ol kuki (samting we mi spesel long hem i kuki) so, mi disaed blong salem ol kuki blong kasem mane blong givim long ol famli ia. Mi mekem ol notis blong kuki blong pasem mo ron long rola sket blong mi raon long ol neba blong givim long olgeta. Dog blong mi Coco, i kam tu.
Plante long ol neba blong mi oli glad tumas blong pem ol kuki blong mi. Wetem mane we mi kasem, mi pem ol sospen mo ol fraepan blong oli givim olsem donesen.
?Olsem wanem nao yu bin filim?
mi filim blong save se ol famli ia bae oli save gat ol sospen mo ol fraepan blong kuk long hem. Mi save pikjarem long maen blong filing blong kamfot ia we i stap kam taem yu kukum wan kaekae blong hom ples blong yu long wan niufala kantri, bae i olsem wanem.
Mi bin lanem long Praemeri se “Taem we yufala i stap wok blong ol narafala man, yufala i stap mekem wok blong God blong yufala nomo” (Mosaea 2:17). Mi filim lav blong Papa long Heven long mi mo blong ol pipol we oli stap i kam long eria blong mi.
?Wanem advaes bae yu givim long wan we i wantem blong help?
Lukaotem ol wei blong givim seves long ol wod o stek blong yu. Yu save helpem tu wan lokol selta long eria blong yu. !I gat ol wei blong help long evri ples!
Pikja droing i kam long Dave Williams