“Ol Smol Drop blong Fet,” Fren, Maj 2024, ol pej 30–31.
Ol Smol Drop blong Fet
Jekob i gat wan problem—!oltaem hem i stap wantem slip nomo!
Stori ia i tekem ples long Brasil.
“Jacob, ?yu yu save ansa?” Mrs. Lelis i askem.
Jacob i openem ae blong hem mo leftemap hed blong hem aot long tebol. evri klasmet blong hem oli stap lukluk long hem. Papa blong hem tu i stap lukluk long hem. Jiks blong hem i filim i wom. !Hem i silip bakegen long klas!
“Mi sore, Misis. Lelis,” i talem. “?Yu save talem kwestin ia bakegen plis?”
“Yes. Be plis, stop blong stap slip long klas.”
Hem i skwisim hem i go daon long jes blong hem. “Yes, tija.”
Jacob i kam long niufala skul blong hem long sam wik ia nomo we i jes pas. Hem i laekem blong lanem samting, mo ol klasmet blong hem oli naes. Be i gat wan problem—!oltaem hem i stap wantem slip nomo! Niufala skul blong hem i stap longwe, so, hem i mas wekap eli blong stap long ples ia stret taem.
Fastaem, hem i isi blong stap lisin gud long taem blong klas. Be i kam had mo had tumas. Samtaem Jacob i taet tumas mo slip i kam tumas long hem.
Long nekis dei, prinsipol blong skul i askem Jacob mo papa mo mama blong hem blong mit wetem hem. Hem i smael mo welkamem olgeta insaed long ofis blong hem.
“Mi glad se yufala i kam,” hem i talem. “Jacob i wan gudfala studen. Be tija blong hem i se hem i no gat intres long ol klas blong hem. Samtaem tingting blong hem i no stap long klas, mo hem i luk olsem se i stap taet tumas. ?Hem i Oraet nomo?”
Mama blong hem i saksakem hed blong hem blong agri. “Jacob i wok had blong save kam long skul long ples ia, be from i stap longwe long haos blong mifala. Hem i nidim blong wekap eli evri dei. Mekem se hem i stap filim silip long taem blong ol eli moning klas blong hem.”
“O, ?hemia nomo?” prinsipol i talem. “!Yu mas traem wan smol drop blong kofi! Putum sam smol drop blong strong kofi long drink blong hem evri moning. Bae hemia i mekem se hem i no stap filim silip i kam.”
Jacob i mekem nogud fes blong hem blong no agri. “Be famli blong mifala i no drink kofi, misis.”
Fes blong prinsipol i konfius. “Bae i had long yu blong lanem samting sapos yu stap filim silip i kam long yu. Yu mas tekem smoltaem mo tingting long hemia.”
Taem oli lego ofis blong prinsipol, ol tingting blong Jacob oli tantanem hem. Hem i wantem blong mekem moa gud long skul blong hem, be hem i wantem blong folem ol komanmen tu.
Long naet ia, famli blong hem oli rid abaot Tok blong Waes insaed long ol skripja.
Mo hem i taem blong Jacob blong rid, mo hem i ridim, “Mo evri sent we i tingbaot blong holemtaet mo mekem folem ol toktok ia, . . . bambae oli faenem waes tingting mo ol bigfala rij save. Mo bambae oli ron mo bae oli no save taet, mo bambae oli wokbaot mo bae ae i no save dak.”*
Afta, !hem i gat wan aedia!
Hem i stanap aot long jea blong hem. “!Bae mi yusum ol smol drop blong fet be i no blong putum smol drop blong kofi!”
“?Yu minim wanem?” papa blong hem i askem.
Jacob i smael. “Evri moning bifo yumi drink ti, yumi talem wan prea mo askem Papa long Heven blong blesem mi mekem se bae mi no filim silip i kam long mi long taem blong klas. Ol prea blong yumi bae oli olsem ol smol drop blong fet!”
Mama mo papa, tufala tu i smael. “!Hemia i wan gudfala tingting ia!” Papa i talem.
Long nekis moning, famli blong olgeta oli nildaon blong talem prea se Jacob bae i gat paoa blong stap wekap long taem blong klas. Oli mekem semmak samting long nekis dei. Mo nara dei afta. Evri naet, Jacob tu i traem blong go long slip eli. Mo evri moning, famli blong Jacob oli gat fet se Papa long Heven bae i helpem hem.
Sam dei i pas, ol smol drop blong fet blong olgeta i bin wok. !Jacob i save lisin gud mo stap wekap blong ful dei! God i bin ansarem ol prea blong olgeta. Mo Jacob i save se Hem i glad long hem blong stap folem Tok blong Waes.
“Rere blong klas, ?Jacob?” Mrs. Lelis i askem long wan moning taem hem i wokbaot i kam insaed long klasrum.
Jacob i saksakem hed blong hem blong agri wetem wan bigfala smael we i soem o tut blong hem. Hem i bin gat ol smol drop blong fet bifo skul. !Hem i bin rere from eni samting!
Ol pikja droing i kam long Raquel Martin