“Janeelyn I Stop blong Prestem Fon,” Fren, Maj 2024, 36–37.
Janeelyn I Stop blong Prestem Fon
Hem i wantem tumas blong lukluk narafala vidio. Mo nekis haos. Mo nekis haos.
Stori i tekem ples long Malaesia.
Janeelyn i tajem fingga blong hem i go krosem skrin blong fon blong hem. Flas blong ol vidio i stap go. Hem i stop blong wajem wan, afta, hem i gohed blong prestem fon. Afta hem i stop long wan narafala vidio. Hemia i gat plante long ol rabis toktok, be i fani, mekem se hem i gohed blong stap wajem. Afta, hem gohed blong lukaotem sam moa.
“!Janeelyn! ?Yu wantem kam dro?” Yangfala sista blong Jojo i soem wan pis pepa.
Kwiktaem, Janeelyn i lukluk blong sot taem. “I no naoia.”
“Okei.” Jojo i mekem fes i nogud mo putumbak pepa daon.
Skrol. Skrol. Skrol. Ol vidio blong ol naesfala animol. Ol vidio blong ol popula pipol. Ol vidio blong ol pikinini oli stap danis. Mo sam vidio we Janeelyn i save se oli no gud blong wajem. OK, ating moa bitim smol we hem i save. Janeelyn i stat blong filim se hem i mas stop blong wajem olgeta.
Be ol pipol oli stap postem tu fulap long ol gudfala samting, hem i tingting. Hem i bin lanem ol niu wei blong dro long sam long ol vidio.
“Janeelyn,” Mama i singaot.
“?Hmm?” Janeelyn i no iven leftemap hed blong lukluk naoia.
“Bae yumi mekem raes we oli fraenem wetem ol mit kaekae blong solwota blong kaekae long naet ia,” Mama i talem. “?Bae yu save helpem mi blong mekem?”
Janeelyn i laekem tumas ol kaekae blong solwota we oli miksim wetem raes mo fraenem. Be hem i no wantem girap yet naoia.
“I oraet, bae mi jes stap putum ol plet long tebol?” hem i askem. “Mi save help blong wasem ol plet tu afta kakae.”
“I Stret,” Mama i talem. “Be yu nid blong mekem tebol long stret taem we bae mi talem long yu. Mo afta, hem i taem blong givim bak fon. ?Agri?”
“Agri,” Janeelyn i talem.
Janeelyn i gohed blong wajem ol vidio. Bakegen hem i filim se hem i no mas stap lukluk long olgeta. Be hem i wantem tumas blong luk nekis vidio. Mo nekis wan. Mo nekis wan. Skrol. Skrol. !I had blong stop!
Be yet, Janeelyn i putum fon daon. Okei, ating hem i save finisim wan las vidio nomo . . . .
No, Janeelyn i talem strong long hemwan. Tabu Spirit i givim insperesen long hem, mo hem i wantem lisin. Han blong hem i stap long semmak ples yet kolosap long fon. !Hemia wan bigfala temtesen wantaem ia! Janeelyn i sarem ae blong hem strong.
Dia Papa long Heven, hem prea kwaet. Mi stap traem had blong lisin long Tabu Spirit, be mi nidim help. Mi wantem blong stop blong stap wajem ol vidio ia, be no sua olsem wanem blong mekem. Long nem blong Jisas Kraes, amen.
Stret afta long taem ia, Mama i singaotem hem blong go putum ol plet long tebol. Janeelyn i jiam mo stanap mo smael. Hemia i wan wei blong helpem hem blong kamaot long fon.
Janeelyn i putum ol plet long tebol. “Mama, Mi bin lukluk sam nogud samting long fon,” hem i talemaot hariap.
Mama i leftemap hed blong hem long ples blong kuk mo lukluk long hem. “?Ol wanem kaen samting?”
“Olsem ol rabis toktok mo ol nogud vidio.” Janeelyn leftemap tufala solda mo fes i soem se hem i no glad. “Be evriwan i no nogud.”
“?Wanem nao yu mekem taem yu luk ol rabis samting?” Mama i askem.
Janeelyn i stap kwaet blong sot taem. Hem i putum wanwan kap long evri ples.
“Mi gohed blong stap wajem,” hem i talem. “Mi no save from wanem. Be Tabu Spirit i talem long mi blong stop, so mi talem wan prea blong kasem help.”
Mama i putum wan trei blong raes we oli fraenem wetem ol kaekae blong solwota long tebol. “Samtaem i had tumas blong mekem ol samting, iven taem yumi save se oli nogud,” hem i talem. “Mo taem i hapen olsem, nambawan samting we yumi save mekem i blong prea.”
Janeelyn i mekem wan bigfala smael. “So, mi mekem stret samting.”
“Yes yu bin mekem gud.” Mama i pasem ol spun long Janeelyn blong putum long tebol. “Mo i no evri samting long intanet i nogud. Hem i save helpem yumi blong konek wetem ol fren mo serem ol aedia. Be i save kam had blong stap longwe long evri samting we oli nogud tu. Stat naoia i go, sapos yu wajem ol vidio, bae yumitu wajem nomo tugeta. Long wei ia, papa mo mi save help long taem we yu luk wan samting we i no stret blong lukluk.”
Janeelyn i saksakem hed blong agri. Nekis taem hem i wajem vidio wetem mama mo papa. Be afta long hemia, i gat plante ol samting blong mekem blong gat gudtaem we hem i save mekem we i no bildim fon.
“?Bae yu save talem long evri wan se taem blong kakae?” Mama i askem.
“!Yep! Afta kakae, bae mi go dro wetem Jojo!”
Pikja i kam long Mitch Miller