Mga Istorya sa Kasulatan
Ang Managsoong Babaye nga Rollins Miluwas sa Adlaw!
Si Jesukristo misulti ni Propeta Joseph Smith og daghang importanteng mga butang aron sa pagtabang kanato. Ang Simbahan mitukod og imprintahanan aron sa pag-imprinta sa mga pulong ni Jesus. Niana nga paagi ang mga tawo makabasa niini.
Usa ka adlaw, miabot ang usa ka grupo sa masuk-anon nga mga lalaki. Giguba nila ang imprintahanan. Gilabay nila ang mga pahina sa mga kasulatan sa gawas didto sa dalan.
Duha ka igsoong babaye nga ginganlan og Mary Elizabeth ug Caroline Rollins nakakita sa unsay nahitabo. Midagan sila ug gipundok ang mga pahina diha sa ilang mga bukton.
Mitago ang batang mga babaye sa usa ka kamaisan hangtod mibiya ang mga lalaki. Naluwas nila ang mga kasulatan! Kadto nga mga kasulatan sa wala madugay nahimong kabahin sa Doktrina ug mga Pakigsaad.
Mahimo akong mobasa sa mga kasulatan. Mahimo akong magmaisugon ug mobarog alang sa akong gituohan.
Mga paghulagway ni Apryl Stott