Gikan sa Unang Kapangulohan

Pagmabination

Ni Presidente Dallin H. Oaks

Unang Magtatambag sa Unang Kapangulohan

Gikuha gikan sa “Mga Ginikanan ug mga Bata,” Liahona, Nob. 2018, 61–67.

a boy and a girl reading together

Nakaila ko og usa ka batan-ong lalaki kinsa usa ka bakwit. Usa ka grupo sa laing mga batan-on misungog kaniya tungod kay lahi siya. Misungog sila kaniya sa pagsulti og lahi nga pinulongan. Dili makapahimuot sa Langitnong Amahan kon kita dili mabination o dili maayo sa uban. Dili maayo ang pagdaogdaog sa laing tawo, ang pagkonsabo batok kanila, o ang pagsalikway kanila.

Minahal nga mga bata, ang atong kalibotan nagkinahanglan sa inyong kabuotan ug gugma. Pagmabination ngadto sa usag usa. Si Jesus mitudlo kanato sa pagtratar sa uban sama sa atong gusto nga pagtratar. Samtang maningkamot kita og maayo nga mahimong mabination, mas maduol kita ngadto Kaniya.

Kon kamo dili mabination ngadto ni bisan kinsa—sa tinagsa man o uban sa usa ka grupo—pagdesisyon na karon nga mag-usab. Awhaga usab ang uban nga mag-usab.

Ako mopamatuod ni Jesukristo, atong Manluluwas, kinsa mitudlo kanato sa paghigugma sa usag usa sama nga Siya nahigugma kanato. Ako nag-ampo nga unta ato kanang buhaton.

Bakwit: Usa ka tawo kinsa gikinahanglan nga mobiya sa ilang panimalay ug mobalhin ngadto sa laing dapit aron mahimong luwas.

“Ang atong kalibutan nagkinahanglan sa inyong kabuotan ug gugma. Pagmabination ngadto sa usag usa.”

Presidente Dallin H. Oaks

Unsaon nga Makahimo og Bag-ong Higala

Friend Magazine, Global 2021/06 Jun

Unsaon ninyo sa pagpakita og kamabination ngadto sa usa ka tawo nga bag-ong kaila? Unsa kaha kon gikan sila sa laing nasod? Alang sa matag lakang, pagsulat og inyong kaugalingon nga ideya.

1. Mopahiyom ug mangumosta.

   • “Komosta! Unsay imong ngalan?”

   • “Malipayon ko nga ania ka sa among klase.”

   • ________________________________

2. Hunahunaa kon unsa kaha ang ilang gibati:

   • Naulaw tungod kay wala pa silay mga higala o lahi nga pinulongan ang ilang gisulti.

   • Naguol tungod kay gimingaw sila sa ilang panimalay.

   • Nabalaka tungod kay ____________________.

3. Dapita sila.

   • “Gusto ka ba makigdula kanamo?”

   • “Magtapad ta og lingkod.”

   • ____________________________

4. Magmabination ug magmatinabangon.

   • “Ganahan ba ka modungan og paniudto kanako?”

   • “Mao kini atong sunod nga buhaton.”

   • _______________________________

5. Pagkat-on kanila.

   • “Unsa ang imong paborito nga dula?”

   • “Unsaon nimo kana pagsulti sa imong pinulongan?”

   • _________________________________

6. Kon makakita kamo nga gitratar sila sa dili mabination nga paagi:

   • Pagpadayag og suporta alang kanila.

   • Pakig-istorya kanila o pakigdula kanila.

   • ____________________________

Friend Magazine, Global 2021/06 Jun

Mga paghulagway pinaagi ni Abby Carter