Na iSolisoli Totoka Cecere ni Luvena

Niu a wilika tiko na iVola i Momani ena vuku ni dua na lesoni ni Lako Mai, Mo Muri Au ena vulaikatakata sa oti, a lauti au na itukutuku nei Alama ni gauna sa kila kece kina na nona ivalavala ca, ni “sa sega na ka me vakatauvatani vata rawa na kena ca kei na kena bibi na [nona] momosi.” ¹ Au vakatusa, ni vosa o ya na kena ca e toboka na noqu vakanananu baleta talega niu a valuta tiko ena macawa o ya e dua na vatu ni ivi ka vitu na milimita na kena levu. Se bera vakadua me dua a sotava na “veika lelevu” ena gauna ni veika “lalai ka rawarawa” ni na “dau rawa.” ²

A lauti au talega na vosa nei Alama baleta na vosa na totoka, ena vakadewa vaka-Vavalagi ni iVola i Momani e sa dau vakayagataki ga me vakamacalataka kina na totoka cecere se ka talei sega ni vakatauvatani rawa. Me ivakaraitaki, nona nanuma lesu o Josefa Simici na agilosi o Moronai e daramaka tu na icurucuru balavu e “vakasakiti sara na kena vulavula,” “na kena vulavula sa uasivita na veika vulavula kecega [o koya] sa raica oti e vuravura.” ³ Ia na vakasakiti e rawa ni vakayagataki talega me vakaraitaka e dua na ka e vakaitamera na kena vakasisila. Koya gona, o Alama kei na ivolavosa cecere era semata na mosi vakasakiti me “vakararawataki,” “kuretaki,” ka “cukiraki” ki na “rarawa cecere duadua.” ⁴

Na ivakatakilakila nei Alama e vakaraitaka na dina matata ni so na gauna na taucoko ni yalo luvuci mosimosi ni ivalavala ca yadua eda cakava ena vakilai. E gadreva na lewa dodonu, na Kalou Vakaikoya ena sega ni veisautaka. ⁵ Ni gauna sa vakananuma “kece” kina na nona ivalavala ca—vakabibi vei ira kece sa vakarusai nodra vakabauta—na nona mosi e sega ni vosota rawa, kei na vakasama ni na duri e mata ni Kalou ka vakasinaiti e na “rere sega ni vakamacalataki rawa.” A vinakata o koya me “yali yani vakadua na yaloqu kei na yagoqu.” ⁶

Ia, na veika kece sa tekivu me veisau vei Alama ena gauna saraga, a kaya kina, ni sa “nanuma rawa na ka oqo” na parofisai ni na “lako mai e dua ka yacana ko Jisu Karisito … me mai sorovaka na ivalavala ca ni vuravura,” ka sa “tagi e [yalona]: Oi kemuni Jisu, na Luve ni Kalou, ni yalololoma vei au.” Ena dua na vakasama kei na vakamamasu o ya, a vakasinaiti o Alama ena “kena totoka” ni marau me sivia sara na [nona] momosi.” ⁷

E dodonu meda kua ni guilecava ni na inaki dina ni veivutuni me da taura na vei rarawa eso ka veisautaka ki na reki dina. Eda vakavinavinakataka na “taudonu ni nona vinaka,” ⁸ na gauna ga eda lako ki vei Karisito—vakaraitaka na noda vakabauti Koya kei na veisau dina ni yaloda—na icolacola bibi ni noda ivalavala ca ena tekivu me toso mai na dakuda ki Vua. Oqo e rawa baleta ni o Koya e sega nona ivalavala ca e vakararawataki na “rarawa tawayalani ka tawa vakamacalataki rawa” ni vei ivalavala ca yadua ni vurevure taucoko ka bulia o Koya, vei ira kece na Nona veibuli—a dua na veivakararawataki levu, ni tuturu na dra mai na vei qara ni lalai ni yagona. ⁹ Mai na veika a vakaroti keda kina na iVakabula, kei na ka e sotava, ena noda ivolanikalou, ni da sega ni kila na “kena ca” ni noda “vakararawataki” kevaka eda sega ni veivutuni. Ia ena lomasoli sega ni vakasamataki rawa e vakamatatataka o Koya “Koi, Au na Kalou, au sa vakararawataki oti ena veika oqo ena vukudra kece, me ra kakua kina ni sotava na rarawa kevaka era sa veivutuni” ¹⁰ —na veivutuni ka vakatarai keda meda “tovolea” na “marau cecekia” a tovolea o Alama. ¹¹ Ena vunau walega oqo na, au sa qoroya na “Loloma i Jisu.” ¹² Ia, e veivakurabuitaki, ni o Karisito e se solia tikoga vakalevu.

Eso na gauna na rarawa uasivi e sega ni vakavuna na ivalavala ca ia e yavutaki mai na caka cala, nodra valavala eso, se eso tale na ka o sega ni tarova rawa. Ena gauna vakaoqo, eda rawa ni tagi me vakataka na Daunisame ivalavala dodonu:

“Sa rarawa vakalevu na yaloqu e lomaqu: ka sa kani au na rerevaka na mate.

“… Ka sa luvuci au na domobula.

“… Meu vakatabana mada me vaka na ruve! niu na qai vuka yani, ka tiko vakacegu.” ¹³

Na vuku vakavuniwai, na ivakasala vuku, se iwali vakalawa e rawa ni vukea na vakamamadataki ni noda rarawa. Ia raica, na isolisoli vinaka kece—oka kina oqo—e lako mai vua na iVakabula. ¹⁴ Se cava ga na vu ni noda mosi ca duadua kei na kavoro ni yalo, na ivurevure levu duadua ni vakacegu e duadua tiko ga: o Jisu Karisito. O Koya duadua ga e tiko vua na kaukauwa kece kei na ilumu ni veivakabulai me rawa ni vakadonutaka na cakacala yadua, vakadonutaka na cala yadua, moicadonu na malumalumu yadua, vauca na mavoa, ka solia na kalougata sa maroroi tu. Me vakataki ira na ivakadinadina makawa, au sa vakadinadinataka ni “sa sega ni noda bete levu ko koya sa sega ni lomani keda rawa ni da sa malumalumu,” ¹⁵ ia sa Dauveivueti dauloloma sa lako sobu mai na Nona itikotiko vakatui mai lagi ka lako yani me “vakila na mosi kei na veivakararawataki kei na veivakatovolei kecega; … me rawa kina ni vakila … me vukei ira kina na nona tamata.” ¹⁶

Vei koya yadua nikua sa tiko vua na mosi e kaukauwa se duatani ka o vakila ni sega ni dua e kila vakavinaka sara, e rawa ni tiko e dua na nomu poidi. Ena sega beka e dua na lewe ni vuvale, itokani, se iliuliu ni matabete—se cava ga nodra kauwai se lomavinaka—e kila deivaki na ka o sotava tiko se tu vua na vosa me vukea nomu vakabulai. Ia mo kila oqo: e tiko e dua e kila vinaka tu na veika o sotava tiko, sa “kaukauwa cake ko koya vei ira na kai vuravura kecega,” ¹⁷ o koya sa “rawata me cakava na ka sa uasivi cake vakalevu sara ena ka kecega [ko] sa kerea se vakasama kina.” ¹⁸ Na ivakarau oqo ena vakaraitaki ena Nona sala kei na Nona ituvatuva, ia o Karisito sa tu vakarau ena veigauna kecega me vakabula na vei tiki kei na ituvaki ni nomu rarawa.

Ni ko sa vakatara Vua me cakava, o na raica ni sa sega ni ka wale na nomu rarawa. Ni da tukuni ira e vuqa na tamata qaqa cecere ena iVola Tabu kei na nodra rarawa, a kaya o Paula na iApositolo ni “Kalou … sa vakarautaka na veika vinaka cake baleti ira ena nodra rarawa, ni sega na rarawa era sa sega ni rawa mera uasivi sara.” ¹⁹ Eda raica, na lewa dina ni Kalou ka inaki ni noda bula e vuravura o ya meda bula marau, ²⁰ ia sa sega ni rawa meda tamata uasivi sara ena reki vakalou ke sega na veika me vakatovolei keda, eso na gauna ki na keda usutu. Me vaka sa tukuna o Paula, na iVakabula Vakai Koya a yaco me tawamudu na nona “vakarautaki [se vakataucokotaki] ena dauvosota.” ²¹ Mo taqomaki iko mai na vosavuni nei Setani ni kevaka o sa tamata vinaka cake, ena sega ni gadrevi mo vakatovolei.

Mo sa valuta talega na lasu veiwekani ni nomu rarawa e vakatura ni ko sa tu e tautuba ni wirini ni tamata digitaki ni Kalou, era sa vaka mera mua mai na dua na ituvaki ni veivakalougatataki ki na dua tale. Ia, mo raici iko me vakataki Joni na Daunivakatakila a raici iko vakaidina ena nona ivakatakila cecere ni iotioti ni gauna oqo. Ni a raica o Joni e “dua na isoqosoqo levu, e sega e dua na tamata e wilika rawa, mai na veivanua kece, kei na veimataqali, kei na veimatanitu, kei na duivosavosa, era sa tu ena mata ni tikotiko vakaturaga, kei na mata ni Lami, era vakaisulu ena isulu vulavula, … [sa] kaci ena domo levu, ka kaya, a Vu ni noda bula na Kalou.” ²²

Ni sa tarogi, “O cei beka ko ira oqo sa vakaisulu ena isulu vulavula? ka ra sa lako beka mai vei?” A ciqoma o Joni na kena isau, “O ira oqo era sa lako mai na veivakararawataki levu, ia era sa sava nodra isulu ka vakavulavulataka ena dra ni Lami.” ²³

Kemuni na taciqu kei na ganequ, ni nanuma tiko, na rarawa ena ivalavala dodonu ena vukea mo rawata na veika, ka sega ni kauti iko tani mai na, nona tamata digitaki na Kalou. Ka sa yaco nodra yalayala me nomu yalayala. A kaya kina o Joni “era na sega tale ni viakana, se viagunu tale; ena sega ni kati [iko] na siga, se duatani na katakata. Ni na vakani [iko] na Lami sa tiko ena loma ni itikotiko-vakaturaga, ka na tuberi [iko] ki nai vurevure ni waibula: ia ena tavoya kecega na Kalou na wai ni mata mai na mata[mu].” ²⁴

“Ia ena sega tale na ciba, se na rarawa, se na tagi, ka na sega tale na vutugu.” ²⁵

Au sa vakadinadinataka vei kemuni ena vinaka cecere i Jisu Karisito kei na nona Veisorovaki tawayalani, sa rawa vei keda meda drotaka na vei rarawa levu ka ganita na noda malumalumu ni bula ka uabaleta na rarawa sega ni veiganiti kei na noda kalouca vakayago. Ena ruku ni Nona veidusimaki, na nomu icavacava vakalou sa totoka ka tawavakatauvatani kei na reki sega ni vakamacalataki rawa—na reki sa kaukauwa ka talei vei iko, ni nomu “dravusa” e na vaka na rairai totoka “sa uasivia na veika kecega au sa raica oti e vuravura.” ²⁶ Mo rawa ni tovolea na marau oqo nikua ka vakasinaiti kina me tawamudu, kau sa sureti kemuni mo cakava na ka a cakava o Alama: me tikora na nomu vakasama ki na isolisoli totoka ni Luve ni Kalou sa vakatakilai mai na Nona kosipeli na ka oqo, na Nona Lotu dina ka bula tiko. Ena yacai Jisu Karisito, emeni.