Христийн шашны итгэл үнэмшил
Есүс Христийн Хожмын Үеийн Гэгээнтнүүдийн Сүмийн гишүүд Христийн шашинтнууд мөн үү?
Тийм ээ! Бид Есүс Христ бол Бурханы Хүү, дэлхийн Аврагч гэдэгт итгэдэг ба Түүнийг дагахыг хичээдэг. Христийн шашны олон урсгалын нэгэн адил бидний итгэл үнэмшлийн тодорхой зүйлс хөршүүдийнхээс арай өөр, өөрийн гэсэн онцлогтой. Гэхдээ бид бол Христийн болон Түүний сургаалын үнэнч дагалдагчид юм. Манай шашны өвөрмөц хийгээд сэтгэл татам хэсгүүд нь Есүсийн ба Түүний сайн мэдээний талаарх ойлголтоо гүнзгийрүүлэхэд тусалдаг.
Та нар Бурхан Тэргүүтний гурван гишүүнд итгэдэг үү?
Бурхан Тэргүүтэн бол Христийн олон шашинд Бурхан Эцэг, Есүс Христ, Ариун Сүнсийг тодорхойлоход ашигладаг нэр томьёо юм. Тэд гурвуулаа байдаг гэдэг бид итгэдэг ч, тэд нэг зорилготой, тусдаа биес гэдэгт бид итгэдэг. Тэдний зорилго бол бидэнд энэ амьдралд хийгээд үхлийн дараа жинхэнэ баяр баясгаланг олж авахад туслах юм.
Та нар Есүст итгэдэг үү?
Тийм ээ! Есүс бол бидний итгэлийн суурь, Бурханы Хүү, дэлхийн Аврагч мөн. Бид Түүний сайн мэдээг хүлээн зөвшөөрснөөр Бурхантай, хайртай хүмүүстэйгээ хамт мөнх амьдарна гэдэгт итгэдэг. Манай Сүмийн бүтэн нэр нь Есүс Христийн Хожмын Үеийн Гэгээнтнүүдийн Сүм ба үүгээрээ бид Есүс Христ амьдралд маань гол үүрэгтэйг илтгэдэг. Библи, Мормоны Ном хоёр Есүс Христийг гэрчилдэг ба бид хоёуланг нь эрхэмлэдэг.
Мормоны Ном дахь “Мөн бидний хүүхдүүд нүглээс ангижрахын тулд ямар сурвалжийг хайж болохыг мэдэж болохын тулд бид Христийн тухай ярьж, бид Христэд баясаж, бид Христийн талаар номлож, бид Христийн тухай бошиглож, мөн бид бошиглолуудынхаа дагуу бичдэг болой” (2 Нифай 25:26) хэмээх шүлэг бидний итгэл үнэмшлийг илэрхийлэхэд тусалдаг.
Биднийг нас барсны дараа юу болдог вэ?
Үхэл бол бидний хэнийх нь ч хувьд төгсгөл биш бөгөөд энэ амьдралдаа бий болгосон харилцаа үүний дараа ч үргэлжлэх боломжтой гэдэгт бид итгэдэг. Есүс Христийн бидний төлөөх золиослолын ачаар бид бүгдээрээ өвдөж зовдоггүй төгс бие махбодтойгоор амилуулагдаж, үүрд мөнх амьдрах болно. Түүний ач ивээл бидэнд зөв шударга амьдрах, буруу үйлдлээ наманчлах, Түүнтэй илүү адилхан болоход тусалдаг бөгөөд ингэснээр бид Бурхантай болон хайртай хүмүүстэйгээ үүрд мөнх амьдрах боломжтой болдог.
Амьдралын хэв маяг
Та нар яагаад өөрсдийгөө Мормончууд гэж дууддаггүй юм бэ?
“Мормончууд” гэдэг нэр томьёо нь Мормоны Ном хэмээх манай Сүмийн онцгой судрын номоос гаралтай хоч нэр юм. Бид энэ хочны санааг гаргаж ирээгүй ч олон хүн Сүмийг, гишүүдийг ярихдаа ийн ашигладаг. Өмнө нь бид энэ нэр томьёог хүлээн зөвшөөрч, бүр өөрсдөө хэрэглэж байсан бол одоо хүмүүсээс Сүмийг Есүс Христийн Хожмын Үеийн Гэгээнтнүүдийн Сүм гэж бүтэн нэрээр нь нэрлэхийг хүсдэг болсон.
Ийнхүү Сүмийн бүтэн нэрийг ашиглахыг онцолсон нь Их Эзэний бошиглогч Иосеф Смитэд өгсөн “Учир нь эцсийн өдрүүдэд миний сүм ийн, бүр Есүс Христийн Хожмын Үеийн Гэгээнтнүүдийн Сүм хэмээн нэрлэгдэх ёстой” (Сургаал ба Гэрээ 115:4) хэмээх зарлигийг дагахад бидэнд тусалдаг. Энэ нь бас Есүс бол манай шашны, итгэл үнэмшлийн гол цөм гэдгийг батлахад тусалдаг.
“Хожмын үеийн гэгээнтнүүд” бол бидэнтэй адил итгэл үнэмшилтэй гишүүд, найз нөхдөө нэрлэх тохирсон нэршил юм.
Есүс Христийн Хожмын Үеийн Гэгээнтнүүдийн Сүмийн нэг хэсэг байх нь ямархуу байдаг вэ?
Есүс Христийн Хожмын Үеийн Гэгээнтнүүдийн Сүмийн гишүүд бол таны найз нөхөд, хөршүүдтэй л адил хүмүүс юм. Бид ажиллаж, сурч, найз нөхөд, гэр бүлийнхэнтэйгээ цагийг өнгөрөөж, спортоор хичээллэж, олон төрлийн хоббиноосоо баяр хөөрийг мэдэрдэг.
Бид бусдын адил баяр баясгалан, сорилт бэрхшээлийг туулдаг боловч Есүс Христийн үлгэр жишээг дагахаар чадах бүхнээ хийх үед Бурхан бидэнд амьдралын сорилтуудыг даван туулах алсын хараа, хүч чадлыг нэмж өгдөг гэдэгт итгэдэг. Бидэнд түшиж тулах сүмийн хамт олон бас бий.
Бид Есүсийг болон Түүний сургаалыг амьдралынхаа эн тэргүүнд, төвд байлгахыг хичээдэг. Аврагч болон Түүний сургаалд итгэх итгэл үнэмшил маань бидний өдөр тутамдаа хэрхэн ярих, хувцаслах, үйлдэх шийдвэрт нөлөөлдөг. Жишээлбэл: бид Библид заасны дагуу Хүндэтгэлийн өдрийг ариунаар сахихын тулд ням гарагт ажил хийж, дэлгүүр хэсэхээс зайлсхийдэг. Манай шашин бол ням гарагт номлодог, өдөр бүр хамгийн сайнаараа мөрддөг шашин юм.
Та нар яагаад согтууруулах ундаа эсвэл кофе уудаггүй юм бэ?
Библид зарим цаг үед Бурхан бошиглогчдоороо дамжуулан тодорхой хоол хүнснээс татгалзах зааварчилгааг өгсөн байдаг (Леви 11-ийг үзнэ үү). Энэхүү загвар нь өнөө үед Мэргэн ухааны үг буюу тэнгэрлэгээр өдөөгдсөн эрүүл мэндийн зарчмууд болон үргэлжилж байгаа ба үүнийг бидний бие махбодын ба сүнслэг байдлын аль алиных нь төлөө бошиглогч Иосеф Смитэд өгсөн юм. Мэргэн ухааны үгэнд эрүүл хоол хүнс хэрэглэх, дасгал хөдөлгөөн хийх, харин кофе, цай, тамхи, архи, мансууруулах бодис хэрэглэхээс татгалзах тухай Бурханаас өгсөн зааварчилгаа багтдаг.
Бурханы бидэнд өгсөн хамгийн том хоёр бэлэг бол бидний бие махбод ба бидний чөлөөт сонголт юм. Мэргэн ухааны үгийг дагах нь бидэнд бие махбоддоо хүндэтгэлтэй байн, анхаарал тавьж, оюун ухаанаа цэвэр байлгахад тусалдаг ба ингэснээр бид Ариун Сүнсэнд илүү нээлттэй байж чадна. Энэ нь бидэнд чөлөөт хүсэл зоригийг маань сүйтгэж болзошгүй донтолтоос зайлсхийхэд тусалдаг.
Сүмийн цуглаан
Танай сүмийн цуглаан хэзээ болдог вэ?
Манай ням гаргийн цуглаанууд байршлаас хамаарч өөр өөр цагт эхэлдэг. Сүмийн олон гишүүнтэй газарт нэг байранд хэд хэдэн цуглаан өөр цагт явагдаж болно. Та өөрт ойр байрлах цуглааны байршил, эхлэх цагийг эндээс харж болно: Сүмийг хайж олох
Сүмийн цуглаан хэрхэн явагддаг вэ?
Ням гарагт дэлхий даяар явагддаг манай цуглаанууд бүгд хоёр цагийн турш нэг ижил хөтөлбөрийн дагуу зохион байгуулагддаг. Бидний ариун ёслолын цуглаан гэж нэрлэдэг цуглааны үеэр бүгд хамтдаа цуглардаг. Уг цуглааны хөтөлбөрт нээлт, хаалтын залбирал, цөөн хэдэн дуулал болон цуглааны гишүүдийн хуваалцах номлол багтдаг.
Ариун ёслолын цуглааны хамгийн чухал хэсэг нь ариун ёслолоос хүртэх ба энэ нь Христийн бусад шашны талх, дарснаас хүртэх ёслолтой төстэй юм. Ариун ёслолын үеэр бид Есүс Христийн бидний төлөө золиосолсон бие мөн цусыг нь бэлгэдсэн талхны хэлтэрхий, уснаас хүртсэнээр Түүнийг дурсан санаж, Түүнийг дагахаа дахин амладаг.
Хүмүүсийг ариун ёслолын цуглааны дараах хоёрдугаар цагт цөөн хүнтэй, харилцан ярилцлагад түлхүү төвлөрсөн хичээлд суухыг урьдаг. Насанд хүрэгчид, өсвөр насныхан, хүүхдүүдэд зориулсан төрөл бүрийн ангиуд байдаг ба үүгээр бид судраас мөн амьд бошиглогчдын үгсээс судалж, Есүс Христийг хэрхэн дагах талаар ярилцдаг.
Би сүмд очихдоо юу өмсөх хэрэгтэй вэ?
Та байгаагаараа ирэхэд л хангалттай. Хэрэв та бусдаас өөрийгөө ялгарах вий хэмээн санаа зовж байвал бид Бурханы өмнө бишрэл хүндэтгэлтэй байдлаа харуулахын тулд долоо хоногийн бусад өдрийнхөөс илүү сайхан хувцаслахыг зорьдог. Сүм дээр та эрэгтэйчүүд сорочкан цамц, зангиа харин эмэгтэйчүүд юбка эсвэл даашинз өмссөн байхыг голдуу харах болно.
Хүн бүр намайг зочин гэдгийг мэдэх болов уу?
Бараг цуглаан бүр дээр бид зочинтой байдаг учир шинэ хүмүүсийг харах нь бидний хувьд энгийн үзэгдэл юм. Том цуглаануудад хүмүүс таныг зочин гэдгийг ч анзаарахгүй өнгөрөх нь бий. Бусад тохиолдолд хүмүүс таныг анзаарч, мэндлэх болно. Аль ч тохиолдолд өөрийгөө танилцуулж, асуулт асуухдаа бүү эргэлзээрэй.
Би сүм дээр болдог зүйлсэд оролцох ёстой юу?
Үгүй. Цугларагсдад ариун ёслолын талх, усыг түгээх үед та зүгээр л царыг дараагийн хүн рүү дамжуулан, цуглааны үлдсэн хэсгийг баяр баясгалантайгаар өнгөрүүлж болно. Та хүмүүсийг хичээлийн үеэр багшийн асуултад хариулах зэргээр өөр бусад байдлаар сайн дураараа оролцож байгааг харах ба хэрэв та хариулахыг хүсэхгүй байвал оролцохгүй байж болно.
Сүм дээр надаас мөнгө хандивлахыг асуух уу?
Үгүй. Бид Библид бичигдсэн аравны нэгийн хуульд итгэдэг. Манай гишүүд аравны нэгийг өөрийн сонголтоор хувиараа төлдөг бөгөөд энэ нь ням гаргийн цуглааны нэг хэсэг биш юм. Цуглааны үеэр танаас хандив өргөх талаар асуухгүй.
Би хүүхдүүдээ авчирч болох уу?
Тийм ээ! Манай сүм бол гэр бүлд чиглэсэн сүм юм. Ариун ёслол буюу гол цуглааны үеэр хүүхдүүд эцэг эхтэйгээ хамт суудаг. Дараа нь насанд хүрэгчид Ням гаргийн ангид хамрагдах үеэр хүүхэд, өсвөр үеийнхэн өөрсдийн насанд тохирсон үйл ажиллагаануудад хамрагддаг. Хүүхэд, өсвөр үеийнхэнд зориулсан ангиудыг хоёр ба түүнээс дээш насанд хүрсэн хүн удирдан явуулдаг. Ээжүүдийн амралтын өрөө нь нярай хүүхэд хөхүүлэх болон тэдний бусад хэрэгцээнд зориулагдсан байдаг.
Над шиг хүнийг Сүм хүлээн авах болов уу?
Тэгэлгүй яах вэ! Бид бүгдээрээ Бурханы хүүхдүүд гэдэгт итгэдэг ба бидний зан чанар, өнгөрсөн амьдралаас үл хамааран Түүний үгийг дагахыг хичээснээр Түүний амласан адислалуудыг хүртэх боломжтой болдог. Сүм бол хүн бүрийн суралцаж, өсөж хөгжих газар юм. Та өөрийгөө Сүмд тохирохгүй гэсэн хэвшмэл ойлголттой байж магадгүй ч үнэн хэрэгтээ манай гишүүд өөр өөр амьдралтай, хүсэл сонирхолтой хүмүүс байдаг. Таныг Сүмд зочлон ирэхийг урьж байна. Магадгүй та ирээд хажууд тань хэн сууж байгааг хараад гайхах байх.
Эмэгтэйчүүд Сүмд удирдах алба хашдаг уу?
Тийм. Манай цуглаанд хүн бүр хувь нэмрээ оруулах боломжтой. Эмэгтэй, эрэгтэйчүүд удирдах албанд дуудагдаж, хороонд үйлчилж, хичээл заан, индэр дээрээс үг хэлж, залбирч, үйл ажиллагааг зохион байгуулж, удирдан чиглүүлдэг. Хүүхэд, өсвөр үеийнхэнд хүртэл ийм боломж бий.
Есүс арван хоёр төлөөлөгчөө дуудаж, Бурханаас тэдэнд санваарын эрх мэдлийн түлхүүрүүдийг хүртээхдээ тогтоосон тэрхүү загварыг дагаж, өнөөдөр зөвхөн эрэгтэйчүүд санваарын түлхүүрүүдийг атгадаг. Ийм учраас Сүм дэх тодорхой удирдах алба, үүргийг зөвхөн эрэгтэйчүүд гүйцэтгэдэг. Харин бусад чухал алба, үүргийг зөвхөн эмэгтэйчүүд хашиж, гүйцэтгэдэг. Эмэгтэйчүүд сүмийн цуглаануудад үйлчилж, удирдаж, гэрчилж, заадаг. Хэрэв та орон нутгийнхаа цуглаанд хувь нэмрээ оруулах хүсэлтэй бол үүнийг хийх боломж үргэлж нээлттэй.
Яагаад надад зохион байгуулалттай шашин хэрэгтэй вэ?
Олон хүн зохион байгуулалттай шашинд таагүй ханддаг ба бие даан сайхан амьдарч, сүнслэг зүйлсийг мэдрэхийг илүүд үздэг. Үнэндээ бидэнд аль, аль нь хэрэгтэй.
Долоо хоног бүр олж авдаг сүнслэг туршлага, бусдад хандсан үйлчлэл нь Бурхантай харилцах харилцааны үндэс суурь болдог. Гэвч баптисм, Есүс Христийн тогтоосон ариун ёслолыг хүртэх зэрэг зарим Бурханы зарлигуудыг гүйцэлдүүлэхэд санваарын эрх мэдэл шаардагддаг. Есүс Христийн Хожмын Үеийн Гэгээнтнүүдийн Сүм тэдгээр зарлигийг гүйцэлдүүлэхэд шаардлагатай бүтэц, санваарын эрх мэдэлтэй. Энэ нь бас таныг илүү сайн хүн болохын төлөө хөдөлмөрлөж, бие даан Бурханы үгийг судлаад олж мэдэж чадахааргүй ойлголтуудыг авахуйц хайр, дэмжлэгээр дүүрэн орчинтой. Зохион байгуулалттай шашны өөр нэг давуу тал бол үйлчлэх боломжийг урамшуулж, сурталчилдаг явдал юм.
Ерөнхий чуулган гэж юу вэ?
Ерөнхий чуулган бол дэлхий даяарх итгэгчдийн цугларалт юм. Жилд хоёр удаа, бямба, ням гарагт бид Их Эзэний бошиглогчид, төлөөлөгчид, Есүс Христийн Хожмын Үеийн Гэгээнтнүүдийн Сүмийн бусад удирдагч Бурханы өнөө үед хандсан захиаснуудыг хуваалцахыг сонсож өнгөрүүлдэг. АНУ-ын Юта мужийн Солт Лэйк Ситид олон мянган хүн биечлэн оролцохоос гадна сая сая хүн онлайнаар, эсвэл дараа нь бие даан захиаснуудыг судалдаг.
Ерөнхий чуулганы талаар илүү ихийг мэдэж аваарай.
Ерөнхий чуулганы өмнөх захиаснуудыг үзэж эсвэл уншаарай.
Сүмийн түүх
Есүс Христийн Хожмын Үеийн Гэгээнтнүүдийн Сүм хэрхэн үүссэн бэ?
1820 онд Иосеф Смит хэмээх 14 настай хүү бодгалийнхаа сайн сайхны талаар санаа зовж, аль сүмд элсэн орохоо мэдэхгүй эргэлзэж байлаа. Тэр нэг өдөр Библийг судалж байгаад Иаков 1:5-ыг уншжээ.
“Харин та нарын хэн нэг нь мэргэн ухаанаар дутвал, бүх хүнд өгөөмрөөр, буруушаалгүй өгөгч Бурханаас гуйг. Тэгээд түүнд өгөгдөх болно.”
Энэ судар Иосефт хүчтэй нөлөө үзүүлж, түүнийг нам гүм ойн төглийг олж, амьдралдаа анх удаа чангаар залбирахад хөтөлсөн. Бурхан Эцэг, Түүний Хүү Есүс Христ хоёр тэр өдөр Иосеф Смитэд үзэгдэж, нүгэл нь уучлагдсан ба судалсан сүмүүдийнхээ алинд нь ч нэгдэх ёсгүйг хэлсэн.
Иосеф Есүс Христийн удирдлага доор Түүний Сүмийг дэлхий дээр сэргээх Бурханы бошиглогчоор сонгогдсон юм. Есүс Христийн Хожмын Үеийн Гэгээнтнүүдийн Сүм 1830 онд албан ёсоор зохион байгуулагдсан билээ.
Өнөө үеийн бошиглогч, төлөөлөгчдийн хэлсэн үгийг би хаанаас олж унших вэ?
Ерөнхий чуулган дээр бошиглогч, төлөөлөгч, Сүмийн удирдагчдын хэлсэн үгийг Ерөнхий чуулганы архиваас үзэх боломжтой. Та Church Newsroom-д зочилсноор Ерөнхий чуулганаас гадна тухайлбал ариун сүмийг онцгойлон адислах ёслол эсвэл шашин хоорондын арга хэмжээний үеэр Сүмийн удирдагчид юу гэж хэлснийг дор бүр нь мэдэж авах боломжтой. Та ChurchofJesusChrist.org дээрх хайлтын функцийг ашиглан ерөнхий чуулганы үгс, сэтгүүлийн нийтлэлүүд, бусад эх сурвалжийг сэдвээр нь хайж болно.
Сүмийн удирдагчдыг хэрхэн сонгодог вэ?
Сүмийн ерөнхийлөгч буюу бошиглогч нас барахад хамгийн ахмад төлөөлөгч (насаар биш, үйлчилсэн хугацаагаар) шинэ бошиглогч болдог. Арван хоёр төлөөлөгчийн чуулгад орон тоо гарах үед бошиглогч Бурханаас өгсөн сүнслэг удирдамжаар дамжуулан үйлчлэх шинэ хүнийг сонгодог.
Бидний “дуудлага” гэж нэрлэдэг Сүмийн бусад үүрэг буюу албанд бүсийн ба орон нутгийн түвшинд хэн үйлчлэхийг мөн л Бурханы сүнслэг удирдамжаар дамжуулан сонгодог. Жишээлбэл: цуглааныг удирддаг бишоп залбираад, хүлээн авсан мэдрэмжийнхээ дагуу тодорхой нэг эмэгтэйгээс эмэгтэйчүүдийн байгууллага буюу бидний нэрлэдгээр Халамжийн нийгэмлэгийг удирдахыг хүсэж болно. Харин эргүүлээд өнөөх эгч зөвлөх, нарийн бичиг, багш ба бусад үүргийг гүйцэтгэн туслах хүмүүсийн талаар чиглэл эрэлхийлэн залбирна.
Христийн шашны итгэл үнэмшил
Есүс Христийн Хожмын Үеийн Гэгээнтнүүдийн Сүмийн гишүүд Христийн шашинтнууд мөн үү?
Тийм ээ! Бид Есүс Христ бол Бурханы Хүү, дэлхийн Аврагч гэдэгт итгэдэг ба Түүнийг дагахыг хичээдэг. Христийн шашны олон урсгалын нэгэн адил бидний итгэл үнэмшлийн тодорхой зүйлс хөршүүдийнхээс арай өөр, өөрийн гэсэн онцлогтой. Гэхдээ бид бол Христийн болон Түүний сургаалын үнэнч дагалдагчид юм. Манай шашны өвөрмөц хийгээд сэтгэл татам хэсгүүд нь Есүсийн ба Түүний сайн мэдээний талаарх ойлголтоо гүнзгийрүүлэхэд тусалдаг.
Та нар Бурхан Тэргүүтний гурван гишүүнд итгэдэг үү?
Бурхан Тэргүүтэн бол Христийн олон шашинд Бурхан Эцэг, Есүс Христ, Ариун Сүнсийг тодорхойлоход ашигладаг нэр томьёо юм. Тэд гурвуулаа байдаг гэдэг бид итгэдэг ч, тэд нэг зорилготой, тусдаа биес гэдэгт бид итгэдэг. Тэдний зорилго бол бидэнд энэ амьдралд хийгээд үхлийн дараа жинхэнэ баяр баясгаланг олж авахад туслах юм.
Та нар Есүст итгэдэг үү?
Тийм ээ! Есүс бол бидний итгэлийн суурь, Бурханы Хүү, дэлхийн Аврагч мөн. Бид Түүний сайн мэдээг хүлээн зөвшөөрснөөр Бурхантай, хайртай хүмүүстэйгээ хамт мөнх амьдарна гэдэгт итгэдэг. Манай Сүмийн бүтэн нэр нь Есүс Христийн Хожмын Үеийн Гэгээнтнүүдийн Сүм ба үүгээрээ бид Есүс Христ амьдралд маань гол үүрэгтэйг илтгэдэг. Библи, Мормоны Ном хоёр Есүс Христийг гэрчилдэг ба бид хоёуланг нь эрхэмлэдэг.
Мормоны Ном дахь “Мөн бидний хүүхдүүд нүглээс ангижрахын тулд ямар сурвалжийг хайж болохыг мэдэж болохын тулд бид Христийн тухай ярьж, бид Христэд баясаж, бид Христийн талаар номлож, бид Христийн тухай бошиглож, мөн бид бошиглолуудынхаа дагуу бичдэг болой” (2 Нифай 25:26) хэмээх шүлэг бидний итгэл үнэмшлийг илэрхийлэхэд тусалдаг.
Биднийг нас барсны дараа юу болдог вэ?
Үхэл бол бидний хэнийх нь ч хувьд төгсгөл биш бөгөөд энэ амьдралдаа бий болгосон харилцаа үүний дараа ч үргэлжлэх боломжтой гэдэгт бид итгэдэг. Есүс Христийн бидний төлөөх золиослолын ачаар бид бүгдээрээ өвдөж зовдоггүй төгс бие махбодтойгоор амилуулагдаж, үүрд мөнх амьдрах болно. Түүний ач ивээл бидэнд зөв шударга амьдрах, буруу үйлдлээ наманчлах, Түүнтэй илүү адилхан болоход тусалдаг бөгөөд ингэснээр бид Бурхантай болон хайртай хүмүүстэйгээ үүрд мөнх амьдрах боломжтой болдог.
Ариун сүм ба гэрлэлт
Ариун сүм нь Сүмийн цуглааны энгийн байраас юугаараа ялгаатай вэ?
Бид ихэвчлэн сүмд буюу сүмийн байр, цуглааны байр, гадасны төв гэж бидний нэрлэдэг газруудад шүтэн биширдэг. Эдгээр барилгыг та ихэвчлэн үүднийх нь дэргэд байрлуулсан “Зочид тавтай морилно уу” мөн “Есүс Христийн Хожмын Үеийн Гэгээнтнүүдийн Сүм” гэсэн бичээсээр таньж болно. Тэдгээр барилгын дотор бид ням гаргийн цуглаан, ажлын өдрүүдэд өсвөр үеийнхний үйл ажиллагаа, олон нийтийн цугларалт, соёлын тоглолт, олон нийтийн дунд нээлттэй бусад арга хэмжээг зохион байгуулдаг.
Ариун сүм бол илүү тодорхой зорилготой оршдог. Эдгээр нь ариун нандин үйлчлэл, ёслол явуулахад онцгойлон зориулагдсан газар юм. Тэдгээрийг хаана баригдахыг Их Эзэн шийдэж, Түүний зорилгын тулд ариулан адисалдаг. Ариун сүм бол зарим ёслолыг гүйцэтгэхийг зөвшөөрсөн цорын ганц газар юм. Тэдгээр ариун нандин ёслол нь оролцогчдыг Есүс Христийн сургаал, үлгэр жишээг дагах амлалт өгөхөд урамшуулж, дэмждэг.
Ариун сүмд бид онцгой бишрэл хүндэтгэлтэй ханддаг ба та тэнд хүмүүсийг хамгийн сүүлийн үеийн киноны тухай ярих, утсаа ашиглах эсвэл өдөр тутмын бусад ажил хийхийг лав олж харахгүй. Харин оронд нь ариун нандин туршлагад өөрсдийгөө бэлтгэн хөдөлмөрлөсөн Есүс Христийн Хожмын Үеийн Гэгээнтнүүдийн Сүмийн гишүүдийг анхааралтайгаар ёслолуудад оролцож, Бурханаас хувийн илчлэлт эрэлхийлж буйг харна.
Ариун сүмийг тухайн газрын байгаль гадаргуу, соёл, хэрэгцээ шаардлагад нийцүүлэн барьдаг тул тус бүрдээ өөр өөрийн гэсэн онцлог төрхтэй байдаг. Гэхдээ ихэнхийг нь цагаан гантигаар барьж, тэнгэр өөд чиглэсэн оройтой байлгах нь бий. Та ариун сүм бүрийн гадна “Их Эзэнд ариуныг, Их Эзэний өргөө” гэсэн бичиг байхыг харж болно.
Би ариун сүмд орж болох уу?
Ариун сүмийг анх барих эсвэл их засварын ажил хийж дууссаны дараа олон нийтэд нээлттэй хаалганы өдөрлөг зохион байгуулдаг ба энэ үеэр хүмүүс доторхыг нь үзэж сонирхох боломжтой. Түүнчлэн олон ариун сүм бүх хүнд нээлттэй зочдыг хүлээж авах төв, хүлээлгийн хэсэг, гадаа талбайтай байдаг.
Барилгын ажил дууссаны дараа ариун сүмийг ариун нандин шүтлэг бишрэлд зориулан онцгойлон адисалдаг. Бидний ариун сүмд хийдэг ажил ариун нандин мөн чанартай учраас зөвхөн Есүс Христийн Хожмын Үеийн Гэгээнтнүүдийн Сүмийн уг туршлагад өөрсдийгөө бэлтгэсэн гишүүдэд ариун сүм нээлттэй. Та яг одоо ариун сүмд орох боломжгүй байж болох ч Бурханы бүх хүүхдийг Есүс Христийн сайн мэдээг илүү сайн сурч мэдэн, ариун сүмийн адислалуудыг бүрэн хүртэх боломжийг олгодог гэрээт харилцаанд орохыг урьдаг.
Ариун сүмд юу болдог вэ?
Ариун сүм нь ням гаргийн хүндэтгэлийн цуглаан явуулдаг сүмийн ердийн цуглааны барилгуудаас ялгаатай. Ариун сүм бол Бурханы хамгийн ариун нандин ажилд зориулагдсан бидний хувьд хамгийн ариун газар билээ. Манай ариун сүмүүдэд хийгддэг зүйлс нь бид Бурхантай мөн хайртай хүмүүстэйгээ үүрд мөнх амьдрах болно гэсэн амлалтын эргэн тойронд явагддаг.
Ариун сүмд бид Есүс Христийг дагахаа илүү бүрэн дүүрнээр амладаг. Бид Бурханд Түүний зарлигуудыг сахиж, өөрийгөө болон өөрт байгаа бүхнээ Түүнд зориулна гэсэн амлалтуудыг өгдөг. Эхнэр нөхрүүд, эцэг эх, хүүхдүүд хамтдаа нэгдэж, нэг нэгтэйгээ үүрд мөнхөд “лацдан холбогддог”. Мөн бид өвөг дээдсийнхээ төлөө ийм ажлыг хийж, хэрэв хүсээд сонговол дараагийн амьдралдаа эдгээр адислалыг хүлээн авах боломжийг тэдэнд олгодог.
Нас барагсдын төлөөх баптисм гэж юу вэ?
Тэнгэрийн хаант улсад орохын тулд баптисм хүртэх шаардлагатай хэмээн Есүс заасан (Иохан 3:5-ыг үзнэ үү). Тэгвэл баптисм хүртээгүй, Есүс Христийн тухай мэдээгүй нас барсан хүмүүс яах вэ?
Бурхан хүн бүрд, бүр нас барсныхаа дараа ч Түүний бүх адислалыг хүлээн авах арга замыг өгсөн нь талархууштай. Энэ амьдралдаа баптисм хүртэх боломжгүйгээр нас барсан хүмүүст зориулан ариун сүмд баптисмыг гүйцэтгэдэг. Төлөөлөгч Паул нас барагсдын төлөөх баптисмын талаар Библид (1 Коринт 15:29-ийг үзнэ үү) дурдсан ба Есүс Христийн Хожмын Үеийн Гэгээнтнүүдийн Сүмийн гишүүд өнөөдөр ч ариун сүмүүдэд ижил зан үйлийг үйлдсээр байна.
Үүнийг дараах байдлаар үйлддэг: Хожмын үеийн гэгээнтнүүд гэр бүлийн түүхээ судалж, баптисм хүртэлгүйгээр нас барсан гэр бүлийн гишүүдийнхээ нэрсийг олж мэддэг. Дараа нь тэд ариун сүмд өвөг дээдсийнхээ төлөө баптисм хүртдэг. Бусдад зориулсан энэхүү үйлчлэлийг хайраар санал болгодог ба үхлийн дараа амьдрал үргэлжилдэг тул нас барсан хүмүүс тэдгээр ёслолыг мэдэж, хүлээн авах эсэхээ сонгох боломжтой болдог.
Ариун сүмийн гэрлэлт гэж юу вэ?
Ариун сүмд эхнэр, нөхөр хоёр үүрд нэгддэг. Хосууд энэ амьдралдаа мөн үүрд мөнхөд нэгддэг тул энэхүү гэрлэх ёслолыг ариун сүмийн “лацдан холболт” гэж нэрлэдэг. Богино, энгийн ёслолын үеэр сүйт бүсгүй, сүйт залуу тахилын ширээн дээр гараа нийлүүлэн барьдаг. Тэд нэг нэгнээ бүрэн дүүрэн хүндэтгэж, хайрлаж, Есүсийн сургаал, үлгэр жишээг дагана гэдгээ амлаж, Бурхантай гэрээ хийдэг. Хариуд нь Бурхан тэдний гэрлэлт, гэр бүл дараагийн амьдралд үүрд мөнхөд үргэлжилнэ гэж амласан.
Ёслолын дараа ариун сүмд гэрлэсэн хосууд ихэвчлэн гэр бүл, найз нөхөд гээд олон хүнийг хамарсан хуримын хүлээн авалт эсвэл соёлын бусад уламжлалаар гэрлэлтээ тэмдэглэдэг. Өмнө нь ариун сүмээс гадуур иргэний гэрлэлт хийсэн хосууд (гэрлэснийхээ дараа Сүмд нэгдсэн хүмүүс гэх мэт) ариун сүмд лацдан холбогдож, адислалуудыг хүртэх боломжтой.
Та нар яагаад тусгай дотуур хувцас өмсдөг юм бэ?
Шашны бэлгэдлийн хувцас, гоёл чимэглэл хэрэглэх нь Есүс Христийн Хожмын Үеийн Гэгээнтнүүдийн Сүмийн гишүүд гэлтгүй дэлхий даяарх сүсэг бишрэлтэй олон хүний нийтлэг зан үйл юм. Бурхантай харилцах харилцаа, ариун сүмд Түүнд өгсөн амлалтууд, Есүс Христийг дагаж, Түүний зарлигуудыг сахих амлалтынхаа хувийн сануулга болгож насанд хүрсэн гишүүд ариун сүмийн өмсгөл өмсдөг. Ариун сүмийн өмсгөл нь нимгэн дотуур цамц ба шортой төстэй хоёр хэсгээс бүрддэг. Үүнийг өмсдөг гишүүдийн хувьд энэ нь ариун нандин юм.
Хожмын үеийн гэгээнтнүүд өөр шашны хүнтэй гэрлэж болох уу?
Тийм. Есүс Христийн Хожмын Үеийн Гэгээнтнүүдийн Сүмийн гишүүд хүссэн хүнтэйгээ гэрлэж болно. Гэсэн хэдий ч ариун сүмийн мөнхийн гэрлэлт нь зөвхөн Есүс Христийн Хожмын Үеийн Гэгээнтнүүдийн Сүмийн гишүүн, бие биедээ болон Бурханы өмнө мөнхийн амлалт өгөхөд өөрсдийгөө бэлтгэсэн эрэгтэй, эмэгтэй хүмүүст зориулагдсан. Тийм ч учраас олон ганц бие хожмын үеийн гэгээнтэн өөрсөдтэйгөө ижил итгэл үнэмшилтэй, ариун сүмд гэрлэх зорилготой хүмүүстэй болзохыг илүүд үздэг.
Номлогч
Номлогчид юу хийдэг вэ?
Номлогч бүрийн зорилго бол Есүс Христийн сайн мэдээг хуваалцах явдал юм. Илүү ихийг мэдэх хүсэлтэй хүмүүстэй уулзаж, тэдэнтэй харилцах, тэдэнд зааж, судраас хамтдаа суралцах, нийгэмд сайн дураараа үйлчлэх зэрэг ажлыг номлогчид хийдэг.
Номлол нь байршлаасаа хамаараад бага зэрэг ялгаатай байдаг. Жишээлбэл: зарим номлогч алхаж эсвэл дугуй унадаг бол зарим нь машин жолооддог. Зарим нь хөдөө орон нутагт, зарим нь томоохон хотуудад хуваарилагддаг. Зарим тохиолдолд номлогчид олон нийтийн мэдээллийн хэрэгслээр дамжуулан хүмүүстэй холбогдож ажилладаг бол заримдаа хаалга тогшиж эсвэл Сүмийн түүхэн дурсгалт газруудыг хүмүүст танилцуулдаг.
Бүх номлогчид нийтлэг байдаг нэг зүйл бол тэд бусдад Есүстэй хэрхэн харилцахыг зааж, үүнийг хөгжүүлэхэд туслахыг хүсдэг. Хэрэв танд итгэлтэй холбоотой асуулт байвал, хамт залбирах хүн хайж байгаа эсвэл хэн нэгэнтэй хамт сүмд явахыг хүсэж байгаа бол бидэнд мэдэгдээрэй! Номлогчид тантай ярилцахдаа баяртай байх болно!
Бүх хүнийг номлолд явахыг шаарддаг уу?
Есүс Христийн Хожмын Үеийн Гэгээнтнүүдийн Сүмийн гишүүн бүрийг Есүс Христийн сайн мэдээг бусадтай хуваалцахыг урамшуулдаг. Зарим гишүүдийг бүрэн цагийн номлолд тодорхой хугацаагаар (ихэвчлэн 18 эсвэл 24 сар) үйлчлэхийг урьсан эсвэл тэд өөрсдөө сонгосон байдаг. Манай номлогчдын дийлэнхийг дөнгөж насанд хүрсэн эсвэл хорь гараад удаагүй ганц бие залуучууд эзэлдэг ба ахмад гишүүд, гэрлэсэн хосууд бас үйлчилдэг. Хүн бүрийн нөхцөл байдал өөр байдаг учир зарим нь долоо хоногт хэдэн цаг номлолд үйлчлэхээр сонгодог. Сүмийн олон гишүүн албан ёсны номлогчоор үйлчлээгүй ч өдөр тутмын үйлдлээрээ сайн мэдээг хуваалцдаг.
Номлогчдын талаар илүү ихийг мэдэж аваарай. Эсвэл танай бүсэд үйлчилж байгаа номлогчидтой уулзаарай.
Та нар яагаад хүмүүсийг ахлагч, эгч, ах гэх мэтээр дууддаг вэ?
Номлогчдыг овгийнх нь хамт ахлагч эсвэл эгч хэмээн дуудахыг та анзаарсан байх. Энэ бол хүндлэл, нэр төрийг илэрхийлэн бидний хэрэглэдэг цол юм. Үүний адилаар Есүс Христийн Хожмын Үеийн Гэгээнтнүүдийн Сүмийн гишүүд өдөр тутамдаа бие биеэ ноён эсвэл хатагтай гэхийн оронд Бурханы хүүхдүүд болохынхоо хувьд харилцаагаа хүндэтгэн ах, эгч гэж дууддаг.
Баптисм
Би баптисм хүртэх шаардлагатай юу?
Тийм. Тэнгэрийн хаант улсад орохын тулд баптисм хүртэх шаардлагатайг Есүс тодорхой хэлж, бид “ус болон сүнснээс төрөх” (Иохан 3:5) ёстой гэж заасан. Есүс хэдийгээр төгс байсан ч бидэнд үлгэр дуурайл үзүүлэхийн тулд баптисм хүртсэн.
Би өөр сүмд баптисм хүртчихсэн бол дахин баптисм хүртэх шаардлагатай юу?
Тийм. Өөр сүмд баптисм хүртсэн олон хүн Есүс Христийг хүлээн зөвшөөрч, дагахыг чин сэтгэлээсээ хүсэж, бат итгэлтэйгээр ийм алхам хийсэн.
Бидний мөнхийн авралд зайлшгүй шаардлагатай ариун нандин ёслолууд эсвэл зан үйлийн хувьд бид Есүс Христийн тогтоосон загварыг дагах хэрэгтэй гэдэгт бид итгэдэг. Энэ нь баптисмыг Бурханы өгсөн санваарын эрх мэдлээр, мөн Есүс хэрхэн баптисм хүртсэнтэй (усанд умбуулах замаар) ижил байдлаар гүйцэтгэх ёстой гэсэн үг юм.
Есүс Христийн Хожмын Үеийн Гэгээнтнүүдийн Сүмд баптисм хүртэж, дараа нь Есүсээс эрх мэдэл авсан хүнээр дамжуулан Ариун Сүнсний бэлгийг хүлээн авах нь Түүний Сүмийн гишүүн болох цорын ганц арга зам бөгөөд Аврагч Өөрөө үүнийг үлгэрлэн харуулсан билээ.
Би Есүс Христийн Хожмын Үеийн Гэгээнтнүүдийн Сүмд хэрхэн элсэх вэ?
Хүн бүрийг бидэнтэй хамт шүтэн бишрэхийг урьж, урамшуулдаг ч Сүмийн албан ёсны гишүүн болохын тулд Аврагчийн сайн мэдээний талаар суралцаж, баптисм хүртэн, Ариун Сүнсний бэлгийг хүлээн авах шаардлагатай.
Есүс Христийн Хожмын Үеийн Гэгээнтнүүдийн Сүмд элсэхийн тулд хийх эхний алхам бол Есүс Христийн тухай мөн Есүс Христийн Сүмд баптисм хүртсэнээр өгдөг үүрэг, амлалтын талаар илүү ихийг сурч мэдэх явдал юм.
Хүмүүс Есүс Христийн сайн мэдээгээр дамжуулан найдвар, баяр хөөр, амьдралын зорилгынхоо талаар илүү их ойлголттой болж адислагддаг. Аврагчийн Сүмийн гишүүн байснаар амьдрал тань хэрхэн адислагдаж болохыг олж мэдэхэд бэлэн болсон үедээ та номлогчдоос хичээл авч бидний итгэл үнэмшил хийгээд орон нутгийн цуглааны талаар мэдэх боломжтой.
Номлогчдын талаар илүү ихийг мэдэж аваарай. Эсвэл танай бүсэд үйлчилж байгаа номлогчидтой уулзаарай.