Ариун сүм гэж юу вэ?
Ариун сүм бол ариун хийгээд нандин газар юм. Бид ариун сүмийг Их Эзэн Есүс Христийн өргөө гэж үздэг. Эдгээр нь ням гаргийн шүтэн бишрэх үйлчлэл болон бусад үйл ажиллагаа явагддаг орон нутгийн сүмийн олон мянган барилгаас ялгаатай. Ариун сүмүүд нь Бурханы хамгийн ариун ажилд онцгойлон адислагдсан юм.
Ариун сүмүүд бэлгэдлээр дүүрэн байдаг. Жишээ нь: ариун сүмд орж буй хүмүүс Бурханы өмнө цэвэр ариун, тэгш байдлыг бэлгэдсэн энгийн цагаан хувцсыг өмсдөг. Ариун сүм бол Есүс Христийн дагалдагчид Түүнтэй илүү ойр дотно харилцаатай болох ариун бөгөөд амар амгалан хоргодох газар юм.
Хамгийн чухал нь, ариун сүм бол бид Бурхантай ариун нандин гэрээнүүдийг хийдэг газар мөн.
Гэрээ гэж юу вэ?
Бид гэрээнүүдээр дамжуулан Бурхантай харилцах харилцаагаа хүчирхэгжүүлж, Түүнээс онцгой адислалуудыг хүлээн авч чадна. Гэрээ бол Бурхан, Түүний хүүхдүүд хоорондын ариун нандин амлалт юм. Бурхан гэрээний нөхцөлийг өгөөд, дараа нь үүнийг хүлээн авах сонголтыг бидэнд өгдөг.
Баптисмыг жишээ болгон авч үзье.
Бид баптисм хүртэх үедээ Бурханд үйлчилж, зарлигуудыг нь сахин, Есүс Христийн нэрийг өөрсөд дээрээ авах болно гэсэн амлалтыг Түүнд өгдөг. Биднийг ийн үйлдэх үед Бурхан нүглүүдийг маань өршөөн, Ариун Сүнсээрээ адисалж, бидэнд Өөрийнхөө дэргэд үүрдийн амьдралыг өгөхөө амладаг.
Бид ням гараг бүр сүм дээр ариун ёслолоос хүртэх үедээ, мөн шүтлэг хэмээн нэрлэгддэг ёслолоос хүртэх үедээ баптисмаар хийсэн гэрээгээ шинэчилдэг. Энэхүү ариун ёслол нь Есүс нас барахынхаа өмнө төлөөлөгчдөдөө танилцуулсан Сүүлчийн зоог хэмээх ариун ёслолын загвараар хийгддэг.
Есүс Христийн Хожмын Үеийн Гэгээнтнүүдийн Сүмийн насанд хүрсэн гишүүд баптисм хүртсэний дараа ариун сүмд Бурхантай нэмэлт гэрээнүүдийг хийж болно. Эдгээр гэрээ хийгээд амлалтууд нь тэдний Түүнтэй харилцах харилцааг хүчирхэгжүүлж, илүү агуу адислалуудыг авчирдаг.
Ариун сүмд бид гэрээнүүд байгуулдаг
Хишиг хүртэх
Хишиг гэдэг үг нь “бэлэг” гэсэн утгатай. Ариун сүмийн хишиг хүртэх үед насанд хүрсэн Сүмийн гишүүд Бурханы зарлигуудыг дуулгавартай дагах, цаг зав, авьяас чадвараа Их Эзэний ажилд зориулах амлалт зэрэг ариун гэрээнүүдийг хийдэг. Хариуд нь гишүүд Бурханы төлөвлөгөөний тухай илүү агуу мэдлэг, Христийн үлгэр жишээг дагах илүү их хүч мөн Бурхантай үүрд хамт амьдрах боломж зэрэг адислалуудыг хүлээн авдаг.
Лацдан холболт
Есүс Христийн сайн мэдээнээс ирэх нэгэн агуу баяр баясал бол гэр бүлийн харилцаа нь энэ мөнх бус амьдралын дараа ч үргэлжлэх боломжтой хэмээх амлалт юм. Ариун сүмд гэр бүлүүд мөнхөд хамтдаа лацдан холбогддог
Гэрлэлтийн лацдан холбох ёслолын үеэр эхнэр, нөхөр хоёр тахилын ширээний өмнө сөгдөн сууж хоорондоо болон Бурхантай гэрээнүүд байгуулдаг. Тэд бие биеэ бүрэн дүүрнээр хүндэтгэн хайрлах мөн Есүсийн сургаал хийгээд үлгэр жишээг дагах амлалтыг өгдөг. Хариуд нь тэд гэрлэлт, гэр бүл нь мөнхөд үргэлжлэх амлалтыг хүлээн авдаг.
Нас барсан өвөг дээдсийнхээ өмнөөс хийх ажил
Өөрсдийнх нь хянах боломжгүй нөхцөл байдлын улмаас мөнхийн адислалуудыг Өөрийн хүүхдүүдээс үл харамлах төгс шударга, ач ивээлээр дүүрэн Бурханд бид итгэдэг.
Бид ариун сүмд нас барахаасаа өмнө ёслолуудыг хүлээн авах боломжгүй байсан өвөг дээдсийнхээ өмнөөс баптисм, хувийн хишиг болон лацдан холболтын ёслолуудыг гүйцэтгэдэг. Энэ ажилд амьд байгаа хүн нас барсан хүний өмнөөс төлөөлөн гүйцэтгэдэг.
Эдгээр ариун зан үйлийг зөвхөн ариун сүмд гүйцэтгэдэг. Бид өвөг дээдсийнхээ төлөө хайраар үйлдсэн уг ажлыг хүлээн авах эсвэл авахгүй байх нь тэдний сонголт гэдэгт итгэдэг.