Abaot Tempol Endaomen

Presen blong Yuwan we i kam long God

Russell M. Nelson i rimaenem yumi se “Evri aktiviti, evri lesen, evri samting we yumi stap mekem long Jos, i poen i go long Lod mo tabu haos blong Hem. Evri hadwok blong yumi blong stap talemaot gospel, blong mekem ol Sent oli kam stret moa, mo blong pemaot ol dedman, evri hadwok ia i lid i go long tabu tempol. Wanwan tempol i stanap olsem wan saen blong membasip blong yumi long Jos, olsem wan saen blong fet blong yumi long laef we bae i kam afta ded, mo olsem wan step i go long glori blong yumi we i no save finis mo famli blong yumi.(“Personal Preparation for Temple Blessings,” Ensign, May 2001, 32; Liahona, July 2001, 37).

Insaed long tempol nomo we yumi save mekem ol tabu kavenan we i gat tu promes blong wan laef we i no save finis insaed long kingdom blong God, “we i presen blong God we i moa bigwan long evri narafala presen blong hem” (Doktrin mo Ol Kavenan 14:7). Ol odinens mo ol kavenan blong tempol, oltaem oli bin wan pat blong gospel blong Jisas Kraes. Oli mekem tabu rilesensip ia i kam moa strong mo helpem yumi blong lukluk moa long Sevya, long Atonmen blong Hem, mo strong tingting blong yumi blong folem Hem.

Blong kasem tempol endaomen blong yuwan hem i wan eksperiens blong yuwan. Blong stap rere from, bae i mekem i gat moa mining long yu. Plante memba blong Jos oli kasem endaomen blong olgetawan bifo oli go long wan misin o oli mared. Ol narawan, olsem we i simpol, oli gat strong tingting blong muv i go fored long kavenan rod ia. Ol bisop mo ol branj presiden oli sud leftemap tingting mo kaonsel wetem ol adalt memba we oli wantem blong kasem endaomen blong olgeta. Hem i impoten blong save se endaomen blong yu hem i moa long wan narafala step nomo, hem i impoten pat long rod blong yu we i no save finis.

Wan endaomen hem i wan “presen.” Long topik ia, tempol endaomen hem i wan presen blong ol tabu blesing we i kam long God blong wanwan long yumi. Endaomen ia, oli kasem nomo long wei blong Hem mo insaed long tabu haos blong Hem. Sam long ol presen ia we yu kasem tru long endaomen blong tempol, i gat:

1. Moa save long saed blong ol stamba tingting mo ol tijing blong Lod.

2. Paoa blong mekem evri samting we God i wantem yu blong mekem.

3. Tabu daereksen mo proteksen taem yumi givim seves long Lod, ol famli blong yumi mo ol narawan.

4. Hop, kamfot mo pis we i kam antap.

5. Promes blesing blong naoia mo taem we i no save finis.

Ol memba blong Jos we oli gat 18 yia i go antap (we oli nomo stap long kolej o sekendri skul) oli save kasem endaomen blong olgeta sapos oli fetful mo oli rere from. From se ol tempol odinens mo ol kavenan oli tabu mo oli impoten kasem taem we i no save finis, Lod i putum sam standet blong olgeta we oli wantem kasem ol odinens ia. Ol memba oli mas andastanem tu strong mo tabu wok we bae oli akseptem, taem oli stap mekem ol kavenan ia wetem God.

Blong stap rere blong kasem endaomen blong yuwan, bae i tekem tu, ol tijing blog Jisas Kraes mo stap traehad blong kipim ol kavenan we yu bin mekem long taem yu baptaes. Yu stap riniu ol kavenan blong yu evri taem yu tekem mo kakae sakramen. Bae yu gat janis ia blong mit wetem bisop blong yu mo afta stek presiden blong yu blong wan tempol rekomen intaviu. Ol standet blong go insaed long haos blong Lod, bae oli tokbaot long taem blong intaviu ia. Bae oli askem yu blong serem testemoni blong yu abaot gospel blong Jisas Kraes, ol Aposol blong Hem we oli stap laef, mo Jos blong Hem we i bin kambak. Ol ansa blong yu bae oli talem stret se yu stap traehad blong obei olgeta komanmen blong God mo folem Jisas Kraes. Afta, bae stek presiden blong yu bae i save givim long yu wan tempol rekomen we bae i letem yu blong go insaed long tempol mo kasem endaomen blong yu.

Wan Bigfala Lukluk abaot Endaomen

Taem yu joenem Jos, yu kasem tu odinens—baptaes mo konfemesen. Semmak olsem, tempol endaomen, oli kasem long tu pat tu.

Long fas pat, long praevet mo blong yuwan, bae yu kasem wanem oli singaotem ol odinens blong mekem rere. Ol odinens ia oli tekem tu, ol spesel blesing saed blong tabu ples mo paoa we yu save kasem. Olsem pat blong ol odinens ia, bae oli givim raet long yu blong werem ol tabu tempol gamen mo instraksen long olsem wanem blong werem truaot long laef blong yu.

Long seken pat, bae yu kasem evri narafala endaomen blong yu long wan grup. Hemia i tekem ples long wan rum blong instraksen wetem ol narafalawan we oli stap go long tempol. Sam long ol endaomen oli soem tru long wan vidio mo sam tru long ol wokman blong tempol. Long taem blong odinens, ol samting we oli hapen, oli pat blong plan ia blong fasin blong sevem man. Hemia i tekem tu Kriesen, Foldaon blong Adam mo Iv, Atonmen blong Jisas Kraes, Apostasi, mo Restoresen. Bae yu lanem moa tu abaot rod ia we evri pipol i save gobak long Lod.

Long taem blong endaomen, oli stap invaetem yu blong mekem ol tru kavenan wetem God. Ol kavenan ia oli:

• Loa blong Fasin blong Stap Obei, we i tekem tu, taem yumi stap traehad blong obei long ol komanmen blong God.

• Loa blong sakrifaes, we i minim blong mekem evri samting we yumi save mekem blong sapotem wok blong Lod mo sakem sin wetem wan hat we i gat sore mo wan spirit we i wantem sakem sin.

• Loa blong Gospel, we i loa we i hae moa we Hem i bin tijim taem Hem i bin stap long wol ia.

• Loa blong jastiti, we i minim blong no gat seks rilesensip, be nomo wetem hem we yumi maredem folem loa, mo folem loa blong God.

• Loa blong konsekresen, we i minim, blong dediketem o givim fulwan, taem, ol talen, mo evri samting we Lod i blesem yumi wetem, blong bildimap Jos Ia blong Jisas Kraes long wol ia.

Evri kavenan wetem God oli hapen speseli blong stap fasem tugeta. Taem yu kipim ol kavenan blong yu mo sakem sin from samting we yu mekem i no stret, rilesensip blong yu wetem Hem bae i kam moa strong mo bae Hem i blesem yu moa. Rilesensip blong yu wetem Sevya tu bae i kam moa kolosap mo bae i gat moa mining. Olgeta we oli kipim ol kavenan blong olgeta oli gat bigfala akses long paoa blong God mo long lav, pis, kamfot mo glad we i no save finis. God i promesem olgeta we oli kipim ol kavenan blong olgeta bae oli gat janis blong save gobak mo stap wetem Hem blong oltaem.

Presiden Nelson i eksplenem se blong “Stap mekem wan kavenan wetem God bae i jenisim rilesensip blong yumi wetem Hem blong oltaem. Hem i blesem yumi wetem ekstra lav mo sore. Oli afektem huia yumi, mo olsem wanem God bae i helpem yumi blong kam huia yumi save kam.” From lav blong God we i nogat en long olgeta we oli mekem kavenan wetem Hem, “Hem bambae i lavem olgeta. Bambae Hem i gohed blong wok wetem olgeta mo givim olgeta janis blong jenis. Bambae Hem i fogivim olgeta taem oli sakem sin. Mo sapos oli lus, bambae Hem i helpem olgeta blong faenem rod blong olgeta i kambak long Hem.” (“Kavenan Ia We I No Gat En,” Liahona, Oktoba 2022).

Long en blong endaomen, olgeta we oli tekempat, oli gobak long ples blong Lod tru long wan saen taem oli go insaed long selestial rum. Long ples ia yu save tekem taem blong tingting hevi, prea, ridim ol skripja, o serem tingting blong yu kwaet wetem famli o ol fren blong yu. Hem i wan ples blong pis, hem i ples we yu save faenem kamfot mo tabu daereksen.

Olgeta we oli tekempat long endaomen seremoni, oli leftemap tingting blong olgeta blong lisin gud long wanem we oli bin tijim. Long eksperiens blong yu, bae i gat moa mining taem go wetem filing ia blong wantem blong lanem samting tru long Tabu Spirit. No wari blong stap tingbaot o andastanem evri samting long fas taem we yu go. Olgeta we oli wok insaed long tempol bae oli stap oltaem blong helpem yu. Hem i no wan tes, be hem i wan janis blong filim se yu stap kolosap long Papa long Heven mo Jisas Kraes. Lukluk nomo long glad ia blong stap insaed long haos blong Lod mo ol filing mo tingting we i kam long saed blong spirit we yu stap kasem.

Kam Kolosap long Lod

Tempol endaomen hem i wan step we i nid blong hapen blong sevem yu mo blong gobak long Papa long Heven. Hem i wan taem blong kam kolosap long Jisas Kraes—blong save gud Hem moa mo folem ol eksampol blong Hem. I tru, evri promes blesing blong endaomen i dipen long hamas yumi stap fetful.

Afta we yu kasem endaomen blong yuwan, gobak long tempol oltaem olsem we yu save mekem. Taem yu mekem olsem, yu save tekempat long ol odinens blong mekem rere mo ol endaomen odinens blong ol bubu blong yu blong bifo mo ol narawan we oli ded finis. Wetem ol narafala odinens we oli mekem insaed long tempol, olgeta we oli ded oli save long seves we yu bin givim mo save jusum blong oli akseptem o no akseptem wanem we yu bin blong olgeta.

Taem yu tekempat bakegen, i letem yu blong yu save harem bakegen ol blesing, ol instraksen, mo ol kavenan ia bakegen. Taem yu stap go long tempol, bae yu luksave plante wei we endaomen i go wetem plan ia blong fasin blong sevem man, mo i stap blesem laef blong yu. Wanem yu lanem mo filim bae i kam moa klia mo bae i kam moa impoten long yu long ol taem we i stap kam. Taem yu stap visitim, bae yu filim lav blong God mo bae i rimaenem yu long wanem i impoten moa.