Ol Odinens blong Tempol mo Rod blong Kavenan
“Tempol i stap long medel blong mekem fet mo paoa blong yu long saed blong spirit i kam strong moa, from se Sevya mo doktrin blong Hem oli stap long hat blong tempol. Evri samting we oli tijim insaed long tempol, tru long instraksen mo tru long Spirit, i mekem andastaning blong yumi abaot Jisas Kraes i kam antap moa. Ol Impoten odinens blong Hem oli fasem yumi wetem Hem tru long ol tabu prishud kavenan. Afta, taem yumi stap kipim ol kavenan blong yumi, Hem i kavremap yumi wetem paoa blong Hem we i save hilim mo givim moa strong paoa long yumi.” (Presiden Russell M. Nelson, “Tempol mo Fandesen blong Yu long Saed blong Spirit,” Jeneral Konfrens, Oktoba 2021)
Blong stap rere from ol odinens mo blong stap kipim ol kavenan, i wan impoten pat blong komitmen blong yu blong folem Jisas Kraes. Mo tu, i helpem yu blong rere blong wan dei gobak mo stap wetem Hem mo Papa blong yumi long Heven. Yu save mekem i plante samting blong mekem sua se yu rere. Blong stap stadi long gospel blong Jisas Kraes, i mas tekem tu, fasin blong stap laef folem ol tijing ia long laef blong yu. Blong stap kipim ol kavenan we yu bin mekem finis, hem i ki blong stap rere fulwan from tempol.
Jisas i bin tijim, “Yufala i go insaed long stret get, mo get ia we i smol, mo rod ia we i no isi i lidim man i go long laef, mo i gat smol namba nomo we oli faenem” (Matiu 7:14). Get ia we yumi go tru long hem i baptaes mo rod we yumi folem i gospel blong Hem. Baptaes i fas odinens blong gospel mo wan step we i nid blong stap folem long rod blong kavenan i go bak long God.
Mo tu, i gat ol narafala odinens we i save lidim long rod ia. Hemia i tekem tu, Tabu Spirit, konfemesen, oden i go long Melkesedek Prishud (blong ol man), stap kasem tempol endaomen, mo blong sil insaed long tempol. Ol tabu prishud odinens ia i lidim yumi blong kasem ol bigfala blesing we Papa blong yumi long Heven i givim long ol pikinini blong Hem—glad ia blong laef wetem Hem mo famli blong yumi afta laef long wol ia.
Bae yu save filim se yu no sua o iven wari taem yu stap rere from tempol. Bifo fas visit blong yu, hem i oraet blong gat tingting se wanem nao i ol tempol seremoni. Sam samting bae i niu long yu, be plante long ol samting we i hapen insaed long tempol, i mas mekem yu filim se yu bin save, from evriwan oli stap medel blong gospel blong Jisas Kraes.
Yu no nid blong save o tingbaot evri samting taem yu go insaed long tempol. Ol wokman long tempol oli stap long ples ia oltaem blong helpem yu. Ol volontia ia oli gat lav mo oli kaen. Olgeta i stap ia blong helpem yu filim welkam mo kamfot insaed long haos blong Lod.
From se yu bin kasem baptaes, yu save sam samting finis abaot ol odinens mo kavenan. Yu save se oli gat ol saen mo mining long saed blong spirit. Eksampol, yu bin lanem abaot baptaes we i saen blong kam klin aot long sin mo bon bakegen. Yu dresap long waet mo go insaed long wota. Wan man we i holem prishud i leftemap han blong hem mo talem ol toktok blong odinens ia. Yu bin go andanit (draonem yu insaed) long wota mo girap olsem wan niufala man o woman. Yu bin kam klin mo rere blong stap laef olsem wan fetful disaepol blong Jisas Kraes. Afta we yu kasem baptaes, yu kasem presen ia we i Tabu Spirit taem oli putum han antap long hed blong yu.
Taem yu kasem baptaes, yumi mekem wan kavenan wetem God. Yu bin promes se yu wantem blong tekem long yuwan, nem blong Jisas Kraes, blong oltaem tingbaot Hem, blong obei ol komanmen blong Hem, mo givim seves long Hem kasem en. Olsem wan memba blong Jos Ia blong Hem, yu mekem i kam niu bakegen baptaes kavenan blong yu mo evri narafala kavenan olsem wan saen, taem yu tekem sakramen.
Ol odinens blong tempol oli folem semmak fasin ia. Bae yu werem waet klos, bae oli tijim yu abaot plan ia blong God, mo tekempat long ol seremoni we i tabu mo oli soem saen. Mo tu, bae oli givim ol promes blesing long yu taem yu mekem kavenan blong folem ol tijing mo eksampol blong Jisas Kraes.
Tingbaot se evri samting insaed long tempol i poenem yumi i go long Sevya mo Papa blong yumi long Heven. Evri samting i nid blong stap blong leftemap tingting mo givim insperesen.
Ol Klin Han mo wan Hat we I Klin Evriwan
Long buk blong Ol Sam, oli askem yumi, “Hu bambae i go antap long hil ia blong Lod? o hu bae i stanap long ples we i tabu? Hem we i gat ol klin han, mo hat we i klin evriwan” (Ol Sam 24:3–4). Hil ia blong Lod i tempol blong Hem. I gat tu kwaliti we oli tokbaot blong go insaed long tempol—“ol klin han, mo wan klin hat.
Blong stap tokbaot mesej ia, Elda David A.Bednar i tijim: “Ol han i kam klin tru long proses blong tekemaot man we i folem fasin blong wol mo blong winim sin mo ol rabis fasin long laef blong yumi tru long Atonmen blong Sevya. Ol hat oli kam klin evriwan taem yumi kasem paoa blong Hem blong mekem gud mo kam moa gud. Evri tingting blong hat blong yumi we i klin inaf mo ol gudfala wok, olsem we oli nid blong stap, bae i neva mekem ol klin han mo hat we i klin evriwan. Hem i from Atonmen blong Jisas Kraes nao we i givim tugeta samting ia, paoa blong kam klin aot long sin mo pemaot man we i stap helpem yumi blong winim sin, mo wan paoa blong mekem man i kam tabu mo i kam strong moa we i helpem yumi blong kam gud moa bitim we bae yumi save mekem sapos yumi stap dipen nomo long paoa blong yumiwan. Atonmen ia we i no gat en, hem i blong tugeta man we i mekem sin, mo i blong sent ia we i stap insaed long wanwan long yumi” (“Clean Hands and a Pure Heart,” Ensign o Liahona, Nov. 2007,82).
Taem yu stap rere from tempol, bae yu mit wetem bisop blong yu. Mo tu, bae yu mit tu wetem stek presiden sapos yu stap kasem endaomen o siling blong yu. Bae tufala i mekem wan tempol rekomen intaviu. Bae yu save serem ol tingting mo filing blong yu wetem olgeta, mo bae tufala i givim ol kaonsel we i kam tru long insperesen. Taem yu stap ansarem ol kwestin blong olgeta, bae yu filing save tu long yuwan se yu gat “ol klin han mo wan hat we i klin evriwan.” Long ol narafala toktok, yu stap soem se yu klin inaf mo wantem blong go insaed long tempol, tekempat long ol tabu odinens, mo kipim olgeta kavenan blong yu.
Ol Tabu Kavenan Oli Blong Yuwan mo Oli Gat Paoa
Taem yu progres long solem rod blong kavenan i go long tempol, bae yu stat blong glad moa long ol blesing blong ol tabu kavenan long laef blong yu. Hemia samfala samting blong tingting long hem abaot hamas ol kavenan oli impoten:
1. Ol Kavenan i mekem rilesensip blong yu mo Papa long Heven mo Jisas Kraes i kam strong moa.
Wan kavenan, oltaem, oli talem mining blong hem olsem wan tabu promes we i stap bitwin God mo ol pikinini blong Hem. From se mining ia i stret, hem i no fulwan. Wan kavenan i moa bitim wan kontrak. Hem i wan komitmen blong yuwan we i gat mining mo i mekem rilesensip blong yumi i kam moa kam moa strong wetem God. Ol kavenan oli wan tabu promes we i joenem God mo ol pikinini blong Hem. Oli mekem spirit blong yumi i kam niu, jenisim ol hat blong yumi, mo helpem yumi kam wan wetem Hem. Taem yu stap fetful long ol kavenan blong yu, fasin blong yu blong stap fetful Papa long Heven mo Jisas Kraes bae i kam antap moa. Ol filing blong yu blong talem tangkyu bae i kam antap. Paoa blong yu blong lavem mo givim seves long ol narawan bae i gro. Mo ol promes blesing blong tempol bae oli kam long laef blong yu.
2. Ol Kavenan oli helpem yu blong lukluk nomo long ol samting we oli moa impoten.
Long laef blong yu, bae yu fesem ol joes we i nidim taem blong yu, paoa blong yu, mo ol risos blong yu. Plante long ol gudfala joes bae oli kompit wetem ol narafala joes we i blong sot taem nomo. ?Olsem wanem nao yu stap jusum samting?
Presiden Dallin H. Oaks i bin tijim: “I no from se wan samting i gud i no wan risen we i inaf blong mekem. … Sam samting oli moa gud bitim gud, mo olgeta samting ia nao oli mas kam fas samting blong pulum tingting blong yumi long laef blong yumi. … Sam wei blong yusum taem blong wanwan man mo woman mo famli,oli gud, mo ol narawan oli gud tumas. “Yumi mas lego sam gud samting blong mekem se yumi jusum ol narawan we oli gud moa o beswan, from se oli developem fet long Lod, Jisas Kraes, mo i mekem ol famli oli kam strong moa.” (“Good, Better, Best,” Ensign o Liahona, Nov. 2007, 104, 107).
Tru long ol kavenan, God i helpem yumi andastanem ol prinsipol, ol praktis, mo ol promes we Hem i save se oli stret long yumi. Yumi save kasem moa tingting mo mekem ol waes joes taem we faswan, yumi lukluk nomo long ol komitmen we yumi bin mekem wetem God.
3. Ol odinens blong tempol mo ol kavenan, oli blesem yu mo ol narawan.
Taem yu kasem endaomen blong yu o yu sil i go long hasban o waef blong yu o famli, bae yu lego tempol wetem ol promes we i kam long Lod we oli kam stret long yu. I no ol promes we oli mekem wetem sam profet blong bifo nomo, be ol promes we oli bin mekem long yu. Yu save lukaotem olgeta mo andastanem olgeta mo mining blong olgeta long laef blong yu.
Afta we yu kasem ol odinens blong yuwan, yu save gobak long tempol blong kasem ol odinens long bihaf blong ol narafala wan we oli bin ded. Yu gat wan spesel responsabiliti blong lukaotem ol bubu blong yu blong bifo mo mekemsua se oli kasem ol tempol odinens blong olgeta. Seves blong yu bae i blesem laef blong olgeta mo bae i rimaenem yu long ol promes mo ol blesing blong yuwan.
Traehad blong Tingbaot mo Gobak
Taem yu stap rere blong tekempat long ol tempol odinens, tingbaot se God i Papa blong yu we I No Save Finis mo Jisas Kraes i Ridima blong yu. Tufala i save gud yu. Tufala i lavem yu fulwan. Taem yu kipim ol kavenan blong yu, bae yu kasem blesing long laef ia mo long nekis laef.
?Yu save tingbaot wan taem we yu filim se yu kam moa kolosap long Papa long Heven mo Jisas Kraes? Ol filing ia bae oli gro insaed long tempol. Tempol i wan ples we i nogat ol samting we i save pulumaot tingting, ol wari mo ol rabis fasin blong laef blong mekem rong samting. Long tabu ples ia, oli rimaenem yu mo olgeta we yu lavem se yu stap long wol ia from wan stamba tingting we i moa bigwan. Bae yu faenem moa pis, kamfot, daereksen, mo hop.
Bae yu kam blong faenemaot tu se ol blesing blong tempol bae i kam insaed long hat blong yu mo leftemap sol blong yu. Gobak long tempol plante taem, sapos yu save mekem. Taem yu mekem hemia, bae yu andastanem moa abaot lav ia we God mo Jisas Kraes Tufala i gat long yu mo evri pipol. Iven afta we yu lego tempol, Tabu Spirit bae i gohed blong tijim yu. Bae hem i rimaenem yu long wanem we yu bin eksperiensem, wanem yu bin filim, mo olsem wanem yu save laef olsem we God i wantem.
Taem yu stap rere from tempol, tingbaot se God i wantem yu blong stap kolosap long Hem. Hem i givim tempol blong Hem olsem wan spesel ples blong save kam moa kolosap long Hem. Glad blong yu we i no save finis i glad blong Hem tu. Hem i givim ol blesing blong tempol long yumi blong lidim yumi i gobak long Hem. Askem help blong Hem taem yu stap rere mo serem wokbaot blong yu wetem Hem. Bae Hem i lidim yu. Bae Hem i givim insperesen long yu. Mo bae Hem i helpem yu folem rod ia.
