Ol Tijing blong Profet Abaot Ol Tempol

Presiden Russell M. Nelson

“Eni taem we yu mekem eni samting we i helpem eniwan—long eni saed blong vel—tekem wan step i go fored blong stap mekem ol kavenan wetem God mo mekem baptaes mo tempol odinens we i nid long bihaf blong olgeta, yu stap help blong karem Isrel i kam tugeta. Hem i simpol nomo olsem.”

Hope of Israel, worldwide youth devotional, Jun 3, 2018

Presiden Thomas S. Monson

“Nao, ol yang fren blong mi we yufala i stap long ol yangfala taem blong yufala. Oltaem gat tempol long ol lukluk blong yufala. No mekem wan samting we bae i stopem yu blong go insaed long ol doa blong tempol mo tekpat long ol tabu mo blesing we oli no save finis. Mi talem tangkyu long yufala we i stap go finis oltaem long tempol blong mekem ol baptaes blong ol dedman, mo stap wekap long ol eli moning blong mekem se yufala i save stap tekpat long ol baptaes olsem bifo ol skul i stat. Mi no save tingting long wan wei we i moa gud blong statem wan dei.”

Tabu Tempol—Wan Saen blong Hop I Go long Wol, Epril 2011 jeneral konfrens

Elda David A. Bednar

“Mi invaetem ol yang pipol blong Jos blong lanem abaot mo eksperiensem Spirit blong Elaeja. Mi leftemap tingting blong yufala blong stadi, blong lukaotem ol bubu blong yufala, mo blong mekem yufala i rere blong mekem ol proksi baptaes insaed long haos blong Lod, blong olgeta ded famli blong yufala [luk long Doktrin mo Ol Kavenan 124:28–36]. Mo mi askem yufala blong helpem ol narafala pipol blong faenem ol famli histri blong olgeta. Taem yufala i mekem folem invitesen ia wetem fet, hat blong yufala bae i tanem i go long ol papa. Testemoni blong yu blong mo fasin blong jenisim laef i kam long Sevya i kam moa strong mo moa stret. Mo mi promesem yu se bae yu gat proteksen agensem paoa blong enemi we i stap kam bigwan moa. Taem yu tekpat long, mo lavem tabu wok ia, bae yu stap sef olsem wan yut mo truaot long laef blong yu.”

Hat blong Ol Pikinini Bae I Tanem, Oktoba 2011 jeneral konfrens

Elda Quentin L. Cook

“Namba blong ol tempol we i go antap mo teknoloji we i kam antap bigwan blong mekem i hapen ol tabu famli histri responsabiliti blong ol bubu blong yumi blong bifo, i mekem hemia i kam wan taem tedei we i gat moa blesing long ful histri. Mi glad long bigfala fasin blong stap fetful blong ol yut blong yumi blong stap mekem indeksing, mo faenem ol bubu blong olgeta blong bifo mo afta, mekem ol baptaes mo konfemesen wok insaed long tempol. Yufala i ol sevya long Hil Saeon we i stap long profesi.”

Luk Yuwan Insaed long Tempol, Epril 2016 jeneral konfrens

Elda Gary E. Stevenson

“Fas Presidensi i bin invaetem ‘ol adalt memba blong gat wan tempol rekomen we i laef i stap mo go long tempol moa’ olsem we taem mo situesen i letem mo leftemap tingting blong ol memba blong ‘givim seves long tempol be i no blong spendem tumas taem long ol aktiviti blong gat gud taem.’ Oli leftemap tingting blong ‘ol niu memba mo yut blong Jos we oli gat 12 yia i go antap, blong stap klin inaf blong help aot long bigfala wok ia blong stap givim seves olsem ol proksi blong ol baptaes mo konfemesen.’ [Fas Presidensi leta, 11 Maj, 2003.]”

Sacred Homes, Sacred Temples, Epril 2009 jeneral konfrens

Elda Richard G. Scott

“Yufala ol yang pipol, yufala i wantem wan stret wei blong karemaot paoa blong Setan long laef blong yufala? Draonem yuwan blong stap faenem ol bubu blong yu blong bifo, rere long ol nem blong olgeta from ol tabu odinens we oli stap long tempol long bihaf blong olgeta, mo afta go long tempol blong stanap olsem proksi blong olgeta blong kasem ol odinens long baptaes, mo presen blong Tabu Spirit. Taem yu kam bigwan, bae yu save tekpat blong kasem ol narafala odinens tu. Mi no save tingbaot wan proteksen we i moa strong blong protektem laef blong yu aot long paoa blong enemi.”

The Joy of Redeeming the Dead, Oktoba 2012 jeneral konfrens

Presiden Russell M. Nelson

“Blong stap werem tempol gamen hem i wan simbol we i gat dip mo impoten mining. Hem i soem wan komitmen we i gogohed. Olsem we Sevya i soem nid blong stanap strong kasem en, yumi fetful blong werem gamen olsem pat blong stanap strong wetem klos blong faet blong God. Long wei ia, yumi soem fet blong yumi long Hem, mo long ol kavenan blong Hem we oli no save finis wetem yumi.”

Personal Preparation for Temple Blessings, Epril 2001 jeneral konfrens

Presiden Russell M. Nelson

“Sapos yu wantem tumas blong save moa abaot tempol klos blong taem bifo, faenemaot yuwan insaed long OlTesteman. OlTesteman hem i fulap wetem refrens blong spesel klos blong tempol.”

Teachings of Russell M. Nelson, 372

Presiden Boed K. Peka

“Blong konek wetem ol odinens ia, insaed long tempol bae yu kasem raet ia blong werem gamen, mo kasem ol naesfala promes blesing we i konek wetem. Hem i impoten blong yu lisin gud taem ol odinens ia oli stap givim aot, mo yu traem blong tingbaot ol promes blesing mo ol kondisen we ol promes blesing ia we bae oli kam blong hapen .”

Kam long Tempol

Tabu Tempol Klos

“Klos blong tempol blong Jos Ia blong Jisas Kraes blong Ol Lata-dei Sent, we oli singaotem klos blong tabu prishud, oli werem nomo insaed long Ol Lata-dei Sent tempol, mo oli putum gud i stap blong ol hae sakramen blong fet. Waet hem i simbol blong klin fasin. I no gat wan we oli mekem se i spesel folem posisen blong man. Yu no save luksave eni samting i defren long wan lida blong Jos we Senia, mo wan memba we i niu nomo, taem oli dresap long semmak fasin. Ol man mo woman oli werem semmak klos. Ol simpol klos ia i joenem tugeta ol simbol blong relijin wetem ol praktis mo prinsipol blong bifo we oli stap insaed long buk blong Eksodas.”

Tabu Tempol Klos

Tabu Tempol Klos

“Plante long ol fetful Lata-dei Sent oli werem wan gamen andanit long klos blong olgeta we i gat wan bigfala mining long saed blong relijin. Oli mekem semmak olsem nomol klos,, be i gat tu pis mo plante taem oli singaotem olsem ‘tempol gamen.’ Ol adalt memba blong Jos oli werem ol tempol gamen, we oli bin mekem ol tabu promes blong stap fetful long ol komanmen blong God mo gospel blong Jisas Kraes, insaed long ol tempol blong Jos Ia blong Jisas Kraes blong Ol Lata-dei Sent. Long ol memba blong Jos, tempol gamen we oli werem andanit long ol nomol klos blong olgeta, mo ol klos we i gat saen long hem we oli werem long taem blong wosip insaed long tempol, i ripresentem tabu lukluk blong olgetawan abaot rilesensip blong olgeta wetem God mo komitmen blong olgeta blong laef long wan laef we i gud mo i gat ona.”

Tabu Tempol Klos

Presiden Godon B. Hinckley

“[I] gat wan gol afta long Laef bakegen long ded. Hem i blong kam olsem wan god long kingdom blong Papa. Bae yumi kasem tru long fasin blong stap obei long ol komanmen blong God. I stat taem yumi akseptem Hem olsem Papa blong yumi we I no save finis mo pikinini boe blong Hem olsem Ridima blong yumi we i stap laef. Blong kasem, yumi mas tekpat long ol defdefren odinens, wanwan i impoten mo i gat nid. Faswan long olgeta hem i baptaes fulwan andanit long wota, we sapos hemia i no bin hapen folem toktok blong Sevya, man bae no save go insaed long kingdom blong God. I mas gat we i bon folem spirit, presen we i Tabu Spirit i kam. Mo folfolem oda tru long ol yia we bae i kam, blong ol man, oli oden i go long prishud, folem wetem ol blesing blong tempol blong tugeta man mo woman we oli klin inaf blong go insaed. Olgeta tempol blesing ia i tekem tu, tugeta, ol wok blong wasing mo anoenting blong yumi blong mekem se yumi save klin long fes blong Lod. Oli putum i stap tu, , instraksen seves, we oli givim long yumi blong yumi folem afta long endaomen, mo ol blesing, we oli leftemap yumi blong laef folem ol prinsipol blong gospel. Hemia i kam tu wetem, ol siling odinens we oli silim long wol bae Hem i silim long heven, we i mekem i posibol blong famli i save stap tugeta foreva.”

Temples and Temple Work, Ensign, Febwari 1982

Presiden Spensa W. Kimbol

“Josef Smit i givim long olgeta twelef aposol ol ki, mo atoriti, mo paoa, we hem hemwan i gat mo hem i bin kasem long Lod. Hem i bin givim long olgeta evri endaomen, evri wasing, mo anoenting, mo i soem long olgeta ol siling odinens.”

Tangkyu Papa God Yu Givim Profet, Oktoba 1972 jeneral konfrens

Presiden Boed K. Peka

“Ol odinens blong wasing mo anoenting oli singaotem plante taem long tempol olsem ol inisitori odinens insaed long tempol. Bae hem i stret folem stamba tingting blong topik ia we i talem olgeta samting ia: Endaomen i kam wetem ol wasing mo ol anoenting—we hem i ol simbol blong fasin, be blong promesem stret, ol blesing we oli hapen naoia mo olgeta tu we bae oli hapen long fiuja.”

Stap Mekem Rere blong Go Insaed long Tabu Tempol

Elda James E. Talmage

“Long not saed blong eria blong baptaes, i gat bigfala spes we i stret blong ol rum blong jenis blong ol brata oli yusum, mo long saot oli ol rum we i stret blong jenis blong ol sista. I gat ol rum we oli mekem blong sam odinens blong anoenting oli tekem ples blong hem. Long ol seremoni ia, ol woman oli givhan long ol woman, mo ol man oli givhan long ol man.”

The House of the Lord [1976], 83

Elda Robert D. Hales

“Insaed long tempol, oli eksplenem plan blong fasin blong sevem man, mo mekem ol tabu kavenan. Ol kavenan ia, tugeta wetem ol tabu tempol gamen we man i stap werem, i givim paoa mo proteksen long wan we i endao agensem ol paoa blong enemi. Afta we oli kasem ol endaomen blong olgetawan, ol yang man o yang woman oli save go long tempol mo mekem ol odinens long bihaf blong olgeta we oli ded blong oli kasem ol blesing blong prishud we oli no bin gat janis blong kasem taem oli laef yet long wol.”

Ol Blesing blong Prishud, Oktoba 1995 jeneral konfrens

Presiden Russell M. Nelson

“Tempol i fulap long trutok. Ol trutok abaot plan blong Papa i stap long fored blong yumi we i klia mo i gat paoa. Ol toktok blong trutok abaot Papa blong yumi, Pikinini Boe blong Hem, mo rilesensip blong Tufala long yumi oli talemaot long ol kavenan mo odinens blong tempol. Tempol hem i wan haos blong revelesen, ples we sol blong yumi i kasem klin trutok, mo i givim laet long andastaning blong yumi[luk l long Doktrin mo Ol Kavenan 109:15]. Yumi lanem abaot aedentiti blong yumi we i no save finis, mo stamba tingting, mo ol naesfala promes blong Lod. Ol promes ia oli tru, from God blong yumi hem i wan God blong trutok mo Hem i no save giaman [luk long Ita 3:2]. Sapos ol brata mo sista blong yumi oli go long tempol blong lukaotem paoa mo andastaning, bae Lod Hemwan i tijim olgeta abaot ol trutok we oli moa impoten long olgeta long taem blong nid blong olgeta.”

Teachings of Russell M. Nelson, 373

Presiden Esra Taf Benson

“Ol selestial loa, we oli stap insaed long sam long ol odinens blong Jos Ia blong Jisas Kraes, oli stap tugeta wetem ol kavenan we yumi jusum blong mekem. Ol loa oli long saed blong spirit. From hemia, Papa blong yumi long Heven i bin odenem sam tabu haos we oli singaotem ol tempol, ples we insaed oli eksplenem fulwan ol loa ia. Ol loa ia i gat tu loa blong fasin blong stap obei mo sakrifaes, loa blong gospel, loa blong jastiti, mo loa blong konsekresen.”

A Vision and a Hope for the Youth of Zion, Brigham Young University devotional, Epril 12, 1977

Presiden Boed K. Peka

“I gat ol memba blong Jos we oli mekem laef blong olgetawan i klin inaf oli save tekempat long ol odinens blong pemaot man we oli moa hae we oli bin soemaot long man long wol ia. Long ples ia yumi save wasem mo anoentem mo kasem instraksen mo endao mo sil. Mo taem yumi kasem ol blesing ia blong yumiwan, yumi save mekem wok blong olgeta we oli ded mo oli no bin gat semmak janis olsem yumi.”

Come to the Temple, Ensign, Oktoba 2007

Elda Robert D. Hales

“Filing blong yumi blong wantem gobak long Papa long Heven i kam moa strong taem yumi, blong ademap blong stap tekem sakramen, stap klin inaf blong kasem wan tempol rekomen. Mo, olsem olgeta we oli holem ol tempol rekomen, yumi mekem i hapen laef evri dei folem paten blong fasin blong blong Kraes. Hemia i gat fasin blong stap obei, stap mekem ol sakrifaes blong kipim ol komanmen, lavem wan narawan, stap klin long tingting mo aksen, givim yumiwan blong bildim kingdom blong God. Tru long Atonmen blong Sevya, mo taem yumi folem ol simpol wei ia blong stap fetful, yumi kasem ‘paoa we i kam antap’ blong fesem ol jalenj blong laef. Yumi nidim tabu paoa ia tedei bitim bifo. Hem i paoa we yumi kasem nomo tru long ol tempol odinens.”

Kambak long Yumiwan: Sakramen, Tempol, mo Sakrifaes long Seves, Epril 2012 jeneral konfrens

Elda James E. Talmage

“Tempol endaomen, oli stap mekem long ol tempol tedei, i kam wetem ol instraksen we i tokbaot impoten mo oda blong ol pas dispensesen. Wok ia blong instraksen we i gat wan stori blong ol impoten samting we oli hapen long taem blong kriesen, kondisen blong fas papa mo mama blong yumi long Garen blong Iden, fasin blong tufala blong no obei mo risal blong hem oli sakemaot tufala long hapi ples ia, kondisen blong tufala long wol blong tudak mo wari, we i mekem tufala i mas wok mo swet blong laef, plan blong fasin ia blong pemaot man, we long hem fasin blong pemaot fasin blong brekem loa i hapen.

The House of the Lord [1976], 84

Elda James E. Talmage

“Ol odinens blong endaomen oli kam wetem sam wok we wanwan man mo woman i mas mekem, olsem kavenan blong tempol i tekem ol promes blong folem stret loa blong klin fasin mo jastiti, blong gat bigfala lav, blong gat gud hat, blong save akseptem tingting blong man nating yu no agri wetem mo gat gud tingting, mo stap klin evriwan; blong givim talen mo nara samting blong serem trutok mo leftemap famli blong man; blong holemtaet strong tingting long wok blong trutok; mo blong lukaotem, long evri wei, blong givhan long bigfala wok blong stap mekem rere, blong mekem se wol ia bae i rere blong risivim King blong hem—we i Lod Jisas Kraes. Taem man i mekem wanwan kavenan mo wok folem wanwan long olgeta, wan promes blesing i kamaot long olgeta, we i hapen taem man i stap fetful blong wokbaot folem ol kondisen ia.”

The House of the Lord, 100

Presiden Thomas S. Monson

“Ol brata mo sista blong mi, bigfala tes blong laef ia hem i fasin blong stap obei. ‘Bae yumi testem olgeta long wei ia,’ Lod i talem, ‘blong luk sapos bae oli mekem evri samting we Lod, God blong olgeta bae i givim oda long olgeta.’ Sevya i talem se, ‘Evriwan we i wantem blong gat wan blesing long han blong hem, i mas obei long loa ia we blesing ia i folem, mo ol kondisen blong loa ia, olsem we oli bin stap stat long bifo long stat blong wol ia.’ I no gat wan moa gud eksampol blong fasin blong obei we i stap bitim hemia blong Sevya blong yumi. From Hem, Pol i lukluk gud: ‘Nomata Hem i pikinini blong God, yet Hem i lanem obei long fasin ia blong obei long God, tru long ol samting we oli mekem Hem i harem nogud long bodi blong Hem; mo from we Hem bin i stret gud evriwan, Hem i kam man blong raet blong fasin blong sevem man blong evriwan we bae oli obei long Hem, blong taem we i no save finis.’”

Obedience Brings Blessings, Epril 2013 jeneral konfrens.

Presiden Godon B. Hinckley

“Mi givim testemoni blong mi long yu se hapines blong Ol Lata-Dei Sent, pis blong Ol Lata-Dei Sent, progres blong Ol Lata-Dei Sent, laen blong Ol Lata-Dei Sent, mo fasin blong sevem man we i no save finis mo fasin blong ol pipol ia oli kam taem oli wokbaot folem fasin blong stap obei long ol kaonsel blong prishud blong God.”

If Ye Be Willing and Obedient, Oktoba 1971 jeneral konfrens

Presiden Jemes E. Faost

“Fasin blong stap obei i lid i go long tru fridom. Moa yumi obei long trutok we i kamaot, moa yumi kam fri. Semmak olsem oda i givim laef mo i mekem wol ia i naes taem hem mi bin tudak mo no gat samting, hemia i semmak samting i hapen long yumi. Fasin blong obei i helpem yumi blong gro i kasem mak we Papa we i stap long heven i wantem blong yumi, blong kam ol man blong selestial kingdom we oli klin inaf blong go stap wetem Hem.”

Obedience: The Path to Freedom, Epril 1999 jeneral konfrens

Elda Jeffrey R. Holland

“Fasin blong stap obei hem i no fas loa blong heven nomo. Fasin blong stap obei hem i fas loa blong evri samting. Evri samting we mi save we oli impoten oli nidim fas komitmen blong obei toktok mo tingting blong Lod. Hem i fas kavenan we yumi mekem insaed long tempol.”

Elda Jeffrey R. Holland Visits Philippines, Shares Message on Love, Newsroom.ChurchofJesusChrist.org

Elda L. Tom Perry

“Faswan, yumi nidim blong obei ol loa blong Lod. Hemia i wan long ol fas lesen we oli tijim long Adam mo Iv: fasin blong stap obei i tekem i kam fet. Hem i tekem i kam ol blesing blong heven. Fasin blong no obei i tekem i kam harem nogud mo bigfala wari. Folem loa blong fasin blong stap obei i go wetem nid ia blong givim long yumiwan long seves i go long Papa blong yumi long Heven tru long ol pikinini blong hem. Blong sakrifaesem wanem we yumi gat blong helpem ol brata mo sista blong yumi hem i impoten tes ia blong gospel ia. Wan long ol stamba tingting blong eksperiens blong laef blong wol ia i blong luk sapos bae yumi folem kaonsel blong Sevya blong ‘fastaem yumi mas lukaot gud blong obei long God we i King blong yumi, mo blong folem ol stret fasin blong Hem. Nao biaen hem i save givim olgeta samting ya tu long yumi’ [Matiu 6:33].”

Behold, the Lord Hath Shown unto Me Great and Marvelous Things, Oktoba 1992 jeneral konfrens

Elda Josef B. Witlin

“Mifala evriwan i wantem blong yufala i kam antap gud long laef ia, mo blong kwalifae from ol naesfala presen blong God—laef we i no save finis long selestial kingdom. Blong kasem ol gol blong yu long laef long wol ia, mo pruvum yuwan se yu klin inaf from ol blesing blong Hem we oli no save finis, lanem blong obei. I no gat wan narafala wei. Fasin blong stap obei i tekem i kam moa paoa long laef blong yumi.”

Live in Obedience, Epril 1994 jeneral konfrens

Presiden Russell M. Nelson

“Komanmen blong sakrifaes oli stap askem yumi yet blong mekem, be i no blong mekem blad blong ol animol i ron. Mak blong sakrifaes blong yumi we i moa hae i blong mekem yumiwan i moa tabu. Hemia yumi mekem tru long fasin blong stap obei blong yumi long ol komanmen blong God. Olsem ia nao, ol loa blong fasin blong stap obei mo sakrifaes i had tumas blong seperetem from tufala joen tugeta. Tingting long ol komanmen blong obei long Tok blong Waes, blong kipim Sabat dei i tabu, blong pem wan ones taeting. Taem yumi folem gud olgeta ia wetem ol narafala komanmen, naesfala samting i save hapen long yumi. !Yumi kam ol man blong gat moa kontrol long yumiwan! !Yumi kam ol disaepol! !Yumi kam moa tabu—olsem Lod blong yumi”

Lessons from Eve, Oktoba 1987 jeneral konfrens

Presiden Harol B. Lee

“Welfea plan blong yumi tedei i save stap olsem ‘tul’ ia blong luk hamas jos ia i rere blong folem plan ia, blong mekem se, glad ia we yumi luksave taem yumi faenemaot se wan grup blong pipol long Amerika, we oli bin rekodem insaed long skripja blong bifo we yumi singaotem Buk blong Momon, evriwan long olgeta i bin jenisim laef i kam long Lod, ‘i no gat ol rijman mo puaman, o slef mo man we i fri, be olgeta evriwan i bin … tekem pat long presen blong heven’ mo i no save gat wan pipol we i moa hapi long medel blong evri pipol’ (4 Nifae 1:3, 16) taem olgeta oli laef folem loa blong sakrifaes mo konsekresen.”

Teach the Gospel of Salvation, Oktoba 1972 jeneral konfrens

Presiden M. Russell Ballard

“Plante taem, fas samting we ol pipol oli tingting long hem taem oli harem ‘loa blong Moses’ hem i sakrifaes blong animol. Samtaem neja blong blad blong sakrifaes i mekem sam oli fraet mo mekem samfala blong askem, ‘?Olsem wanem nao wan aktiviti olsem i pat wetem gospel blong lav?’ Yumi save andastanem moa gud ansa blong kwestin ia taem yumi andastanem tu stamba tingting blong loa blong sakrifaes. Ol stamba tingting ia oli aplae long Adam, Abraham, Moses, mo long ol Aposol long Niu Testeman, mo oli aplae long yumi tedei tu taem yumi akseptem mo laef folem loa blong sakrifaes. Tufala stamba tingting ia i blong testem mo pruvum yumi, mo blong helpem yumi blong kam long Kraes.”

The Law of Sacrifice, Liahona, Maj 2002

Elda L. Tom Perry

?“I no wan sapraes samting stat long stat, we Hem i wantem blong kipim strong plan blong Hem long tingting blong ol pikinini blong hem long wol ia? Aot long ol loa we Hem i givim long Adam mo Iv, loa blong sakrifaes i stap blong rimaenem olgeta long bigfala taem we bae tekem ples long stret taem i no longtaem. Stat long taem ia kasem taem we Sevya i bin kam long wol, eni taem we prishud i stap, man i mekem sakrifaes blong rimaenem hem long taem we Pikinini blong Man bae i kam long wol ia blong mekem bigfala sakrifaes from evriwan long yumi.”

Sacrament of the Lord’s Supper, Epril 1996 jeneral konfrens

Elda Nil A. Makswel

“[T]ru, sakrifaes blong yuwan i neva blong yu putum animol long olta. Be, !hem i blong gat fasin blong wantem putum animol insaed long yumi, i go antap long olta, mo letem blong faea i kakae animol ia! Hemia nao ‘sakrifaes i go long Lod … wan hat we i fulap wetem sore mo wan spirit we i wantem blong sakem sin,’ (Doktrin mi Kavenan 59:8), wanem blong mekem faswan i blong karem kros, semtaem ‘sakem ol sin blong [yumi]’ blong mekem se yumi ‘save God’ (Alma 22:18) blong difendem yumiwan taem yumi akseptem Hem fulwan.”

Deny Yourselves of All Ungodliness, Epril 1995 jeneral konfrens

Presiden Russell M. Nelson

“Olsem wan memba long Jos, yu mo mi i patisipet long ‘wei’ blong Lod. Wantaem long evri manis, yumi lego kakae mo prea, mo kontribiut blong givim wan ofring wetem glad hat blong mekem i posibol blong ol bisop oli yusum mane blong givim help. Hemia i pat blong loa blong gospel. Wanwan long yumi i save helpem ol pua man mo olgeta we oli stap long nid, naoia, mo weaples we oli stap. Mo yumi, tu, bae yumi kasem blesing blong proteksen long apostasi taem yumi mekem olsem.”

In the Lord’s Own Way, Epril 1986 jeneral konfrens

Presiden Esra Taf Benson

“Yumi kavenan blong laef folem loa blong gospel. Loa blong gospel i karem evri loa, prinsipol, mo ol odinens we i mekem i posibol blong yumi kam olsem wan god. Yumi agri blong eksasaesem fet long Jisas Kraes mo sakem sin wetem wan tru hat, wan hat we i brokbrok mo wan spirit we i wantem sakem sin. Taem yumi folem ol odinens blong baptaes mo konfemesen, mo gohed long fet mo prea, paoa blong atonmen blong Sevya i kavremap ol sin blong yumi, mo yumi kam klin aot long evri fasin blong sin. Loa blong gospel i moa bitim blong andastanem plan blong fasin blong sevem man. Hem i gat blong blong stap tekpat long ol odinens mo ol siling paoa we i las paoa we wan man we i bin sil blong laef we i no save finis i kasem. ‘Bon bakegen,’ Profet Josef Smit i talem , ‘i kam tru long spirit blong God tru long ol odinens.’”

Teachings of Ezra Taft Benson, 337

Presiden John Taylor

“Be hem i impoten blong Adam i mas obei, folem, mo kipim loa blong gospel, mo tu i kam wan samting we jeneresen blong hem, we bae oli kasem semmak fasin blong kam olsem wan god mo ol blesing, oli mas kipim mo folem semmak loa.”

The Gospel Kingdom, 279

Presiden Wilford W. Woodruff

“Evriwan we oli folem ol prinsipol blong gospel blong Kraes bae ol prinsipol ia oli sevem olgeta. Hem we i folem wan loa, loa ia bae i sevem hem. Eni man we i laef folem loa blong gospel bae i sevem hem mo hem bae i kam olsem wan god, mo kasem glori long hem.”

The Discourses of Wilford Woodruff, 22

Elda Bruce R. McConkie

“Long las lukluk, gospel blong God oli bin raetem, i no long ol ded leta we i stap insaed long ol rekod blong skripja, be insaed long laef blong ol Sent. Oli no raetem wetem pen long pepa we man i mekem, be wetem ol fasin mo ol wok insaed long buk blong laef blong wanwan man we oli biliv mo obei. Oli raetem long mit mo bun mo evri pat blong bodi blong olgeta we oli laef folem wan loa blong selestial kingdom, we i loa blong gospel. Hem i stap ia blong ol nara man oli ridim, faswan, olgeta we, from oli luk gudfala wok blong ol Sent, oli leftemap nem blong Papa blong yumi long Heven (luk long Matiu 5:16) mo laswan blong Bigfala Jaj we long hem, laef blong evri man i wan open buk.”

Our Gospel Came Not Unto You in Word Only…, Oktoba 1968 jeneral konfrens

Presiden Russell M. Nelson

“Wei we Sevya i laef long hem i gud. Wei blong Hem i tekem tu jastiti bifo mared mo fetfulnes we i fulwan insaed long mared. Wei blong Lod hem i wan tabu wei blong yumi eksperiensem hapines we i stap. Wei blong Hem i givim kamfot long ol sol blong yumi, mo pis we i save stap longtaem long ol hom blong yumi. Mo bes wan long evriwan hem i, wei blong Hem i lidim yumi go hom long Hem mo Papa blong yumi long Heven, long laef we i no save finis mo blong kam olsem wan god. Hemia i stamba tingting blong wok blong God mo glori blong hem.”

Decisions for Eternity, Oktoba 2013 jeneral konfrens

Presiden Dallin H. Oaks

“Paoa ia blong krietem laef long wol ia, i paoa we i moa hae we God i bin givim long ol pikinini blong Hem. I stap insaed long fas komanmen blong God i go long Adam mo Iv (luk long Jenisis1:28), be ol nara impoten komanmen oli givim blong blokem fasin blong misyusum hemia (luk long Eksodas 20:14; 1 Tesalonaeka 4:3). Oli tokbaot moa wea ples long loa blong jastiti, oli eksplenem tru long andastaning blong yumi stamba tingting blong ol paoa blong krietem laef blong mekem plan blong God i hapen.Aotsaed long ol rilesensip blong mared bitwin wan man mo wan woman, evri yus blong paoa blong krietem laef, we i kasem wan mak o wan nara mak, i wan bigfala sin agensem hae tabu fasin blong ol man mo woman oli kam olsem wan god.”

No Other Gods, Oktoba 2013 jeneral konfrens

Elda David A. Bednar

“Mi promes se fasin blong stap obei long loa blong jastiti bae i mekem hapines blong yumi long laef long wol ia bae bigwan, mo mekem i posibol progres blong yumi i go long laef we i no save finis. Jastiti mo klin fasin, tufala i stap yet naoia, mo tufala i bin stap finis, mo bae tufala i stap oltaem olsem ol ‘samting ia we oli lavem moa mo we i gudgudfala bitim evri samting’ (Moronae 9:9).”

We Believe in Being Chaste, Epril 2013 jeneral konfrens

Elda Neil L. Andersen

“I gat plante singgel adalt insaed long Jos we oli stap longtaem bitim ol yia blong wan singgel adalt. Taem oli stap faenem laef blong olgeta blong tedei we i defren long hemia we oli stap tingting long hem, olgeta oli kipim loa blong jastiti. Hem i save kam wan tes blong fet blong olgeta. Mi talemaot bigfala respek blong mi mo lukluk wetem lav long ol disaepol ia blong Kraes.”

Trial of Your Faith, Oktoba 2012 jeneral konfrens

Famli: Wan Ofisol Toktok I Go long Wol

“Fasfala komanmen we God i bin givim long Adam mo Iv hem i blong save kam hasban mo waef, mo tu olsem wan papa mo mama. Mifala i stap talemaot se komanmen blong God long ol pikinini blong Hem blong kam plante mo fulumap wol ia, i stap yet naoia. Mifala i stap gohed yet blong talemaot se God i givim komanmen ia se tabu paoa blong mekem pikinini i mas tekem ples nomo bitwin man mo woman we tufala i bin mared folem loa olsem hasban mo waef. Mifala i stap talemaot naoia se fasin we oli mekem laef long wol ia, hem i kam long God. Mifala i stap talemaot trutok ia se laef hem i tabu mo hem i impoten insaed long plan ia blong God we i no save finis.”

Famli: Wan Ofisol Toktok I Go long Wol

Blong Ol Yut Oli Kam Strong

“Taem yu klin gud long saed blong seks, yu stap rere yuwan blong mekem mo kipim ol tabu kavenan insaed long tempol. Yu stap mekem yuwan i rere blong bildimap wan strong mared mo blong tekem ol pikinini oli kam long wol ia olsem pat blong wan famli we i gat lav mo i no save finis. Yu stap protektem yuwan long damej blong spirit mo filing we i kam taem wan i gat seks aotsaed long mared. Yu stap protektem yu tu long ol rabis sik. Blong stap klin long saed blong seks, i helpem yu blong yu gat tras long yuwan, mo yu hapi tru, mo yu kam antap long paoa blong yu blong mekem ol gudfala desisen naoia mo long fiuja. Standet blong Lod long saed blong fasin blong stap klin long saed blong seks i klia mo i no jenis. No mas gat rilesensip i gat seks bifo long mared, mo taem yu mared finis, yu mas fetful fulwan long man, o woman blong yu afta long mared. No tekpat long eni storian, o eni media we i stap wekemap ol filing blong yu long saed blong seks. No tekpat long eni kaen ponografi.”

Blong Ol Yut Oli Kam Strong: Stap Klin long Fasin blong Seks

Presiden Esra Taf Benson

“Yumi kavenan blong laef folem loa blong konsekresen. Loa ia i we yumi givim fulwan taem blong yumi, talen blong yumi, paoa blong yumi, propeti blong yumi, mo mane blong bildimap kingdom blong God long wol ia mo statem Saeon. Sapos wan man i no folem ol loa blong obei, sakrifaes, gospel, mo jastiti, hem i no save folem loa blong konsekresen, we i loa blong selestial kingdom. “From se sapos yufala i wantem se mi givim yufala wan ples long selestial wol, yufala i mas mekem yufalawan i rere taem yufala i mekem olgeta samting we mi bin komandem yufala mo askem yufala blong mas mekem. (D&C 78:7).”

Teachings of Ezra Taft Benson, 121

Presiden Spensa W. Kimbol

“[Y]umi konsekretem taem blong yumi, talen mo ol samting we ol lida blong yumi oli askem mo olsem we ol kwaet toktok blong Spirit i talem. Long Jos, semmak tu olsem Welfea sistem, yumi save givim tingting long evri talen, evri filing blong wantem we i stret, evri tingting we i blong pusum yu Nomata se wan volontia, papa, hom tija, bisop, o neba, nomata wan visiting tija, mama, hom meka, o fren—i gat plante janis blong givim evri samting we yumi gat. Mo taem yumi givim, yumi faenem se ‘sakrifaes i tekem i kam ol blesing blong heven!’ (Hym, no. [27]) Mo long en, yumi lanem se hem i no sakrifaes nating.”

Becoming the Pure in Heart, Epril 1978 jeneral konfrens

Elda D. Todd Christofferson

“Laef blong yumi long wol ia i wan diuti blong givim taem mo ol joes we Krieta i givim raet from blong helpem narafala man. Toktok ia stiwodsip o diuti i mekem yumi tingbaot loa blong Lod, we i loa blong konsekresen (luk long, blong eksampol, Doktrin mo Ol Kavenan 42:32, 53), we i gat wan wok long saed blong ekonomi be, i moa long hemia, hem i wan selestial loa we yumi yusum long laef ia mo naoia (luk long Doktrin mo Ol Kavenan 105:5). Blong konsekretem samting i blong setem apat o dediketem wan samting blong i kam tabu, i blong yusum long ol tabu stamba tingting, Tru sakses long laef ia i kam taem yumi konsekretem (givim evri samting long) laef blong yumi—hemia olsem taem mo joes blong yumi—blong mekem ol stamba tingting blong God (luk long Jon 17:1, 4; Doktrin mo Ol Kavenan 19:19). Long wei ia, yumi letem Hem blong i leftemap yumi i go long hae ples we i hae bitim evriwan.”

Reflections on a Consecrated Life, Oktoba 2010 jeneral konfrens

Elda Nil A. Makswel

“Yumi traem blong tingting nomo long konsekresen olsem fasin blong sarenda, taem tabu paoa blong God i daerektem, ol samting blong yumi long wol ia. Be stamba tingting blong konsekresen i blong givim yumiwan bakegen i go long God. Hat, sol, mo tingting oli ol ki toktok we Kraes hem i yusum blong tokbaot fas komanmen, we i stap semmak, i no blong sot taem nomo, be blong oltaem (luk long Matiu. 22:37). Sapos yumi kipim, bae ol fasin blong yumi blong wok bae, i jenis fulwan, bae oli konsekretem blong welfea blong ol sol blong yumi we i no save finis (luk long 2 Nifae. 32:9).”

Consecrate thy Performance, Epril 2002 jeneral konfrens

Presiden Henry B. Eyring

“Papa blong yumi long Heven i harem ol prea blong ol pikinini blong Hem raon long wol. Ol krae ia oli kasem Hem stat long taem we hem i putum man mo woman i kam long wol ia.

From se Lod i harem ol krae blong olgeta mo i filim bigfala sore blong yu long olgeta, Hem i bin, long stat, soem ol wei blong ol disaepol blong Hem blong oli help. Hem i bin invaetem ol pikinini blong Hem blong givim evri taem, samting, mo laef blong olgetawan blong joen wetem Hem blong givhan long ol narawan. Wei blong Hem blong stap help samtaem oli singaotem stap laef folem loa blong konsekresen.

Opportunities to Do Good, Epril 2011 jeneral konfrens

Elda David A. Bednar

“Konsekresen i konek wetem mo i bil antap long sakrifaes. Toktok ia konsekretem i minim blong developem mo ‘dediketem wan tabu stamba tingting.’ Sakrifaes i wanem we yumi bae yumi oferem, sarenda blong mekem/givim, givim bak o lego. Konsekresen, long narasaed, i blong developem fulwan mo dediketem from wan tabu stamba tingting. … Taem yumi laef folem loa blong konsekresen, yumi wiling blong no givim nomo eni samting mo evri samting we yumi gat from gospel ia—be, yumi promes tu blong developem mo givim yumi fulwan—taem blong yumi, talen blong yumi, mo evri samting we yumi gat long paoa blong yumi—blong bildim kingdom blong God long wol ia. Promes blong yumi hem i: bae mi givim long mi mo evri samting we bae mi save kam, mo bae mi laef folem gospel blong Jisas Kraes. Prinsipol blong sakrifaes i wan smol loa blong rere long yumi from prinsipol blong konsekresen. Konsekresen i kavremap sakrifaes mo plante moa. … Tru konsekresen i leftemap wok blong jareti mo krietem wan strong filing blong wantem givim seves. Long ol lata dei ia, Lod bae i nidim moa long yumi olsem ol pikinini blong kavenan bitim mane, samting we yumi wantem, mo taem. Yumi nid blong konsekretem ol sol blong yumi fulwan i go long Lod.”

Oli karemaot long wan toktok blong devosen blong BYU-Idaho, “Your Whole Souls as an Offering Unto Him,” David A. Bednar, Jenuware 5, 1999

Presiden Russell M. Nelson

“Ol brata mo ol sista, ol samting we yumi gat long wol ia mo ol ona blong wol ia oli no save stap blong oltaem. Be fasin blong kam wan blong yu olsem, waef, hasban, mo famli i save. Taem blong famli laef we i givim glad long sol blong ol man we oli stap wet from longtaem i wan samting ia nomo we i save stap blong oltaem. I nogat wan sakrifaes we i moa bigwan bitim hemia blong kasem ol blesing blong mared we i no save finis. Blong kwalifae, wan i nidim blong stap longwe long fasin blong sin mo ona long ol odinens blong tempol. Taem yumi mekem mo kipim ol tabu kavenan blong tempol, yumi soem pruf blong lav blong yumi long God, long kompanion blong yumi, mo tru wari blong yumi from ol famli blong yumi we oli ded finis —mo tu olgeta we oli no bon yet. Famli blong yumi i stamba blong bigfala wok blong yumi, mo glad long laef ia; mo bae i stap olsem ia blong taem we i no save finis, taem yumi save ‘kasem ol kingdom, ol ples blong prins i rul, … ol paoa, ol ples blong rul , … ples we yumi kam olsem wan god mo kasem glori long evri samting.’ Olgeta blesing ia we oli no gat praes oli save blong yumi sapos yumi putum ol haos blong yumi long oda naoia, mo fetful blong hang strong long gospel ia.

Set in Order Thy House, Oktoba 2001 jeneral konfrens

Presiden Dallin H. Oaks

“Stamba tingting blong Jos Ia blong Jisas Kraes blong Ol Lata-dei Sent i blong helpem evri pikinini blong God oli andastanem hamas oli save mekem, mo kasem hae ples we man i save kasem Jos ia i stap blong i givim rod, long ol boe mo gel blong God, wetem ol wei blong save go insaed long selestial kingdom mo kam olsem wan god insaed long selestial kingdom. Hemia i jos we famli i stamba blong plan blong doktrin mo ol praktis. Save blong yumi long saed blong fasin mo stamba tingting blong God, Papa we I No Save Finis i eksplenem ples we bae yumi go stap long hem, mo rilesensip blong yumi long famli blong Hem we i no save finis. Tabu fasin blong yumi i stat wetem papa mo mama long heven. Wanem yumi wantem tumas, i blong kam olsem Olgeta. Anda long plan ia blong Papa we i gat sore, evri samting ia i posibol tru long atonmen long Wan Pikinini ia Nomo we Papa blong Hem i Lavem Tumas, Lod blong yumi mo Sevya, Jisas Kraes. Olsem ol papa mo mama long wol ia, yumi patisipet long gospel plan ia taem yumi givim ol bodi blong mit mo bun long ol spirit pikinini blong God. Ful plan blong fasin blong sevem man i we wan famli i impoten.”

Apostasy and Restoration, Epril 1995 jeneral konfrens

Presiden Henry B. Eyring

“Evri samting we yumi mekem i mas gat selestial mared olsem stamba lukluk mo stamba tingting blong hem. Hemia i minim se yumi mas traehad blong sil wetem kompanion blong yumi blong oltaem insaed long tempol blong God. Yumi mas leftemap tingting blong ol narawan blong mekem mo kipim ol kavenan we i fasem wan hasban mo waef tugeta, wetem famli blong tufala, long laef ia mo long wol we i stap kam.”

Ol Famli we i No Save Finis, Epril 2016 jeneral konfrens

Presiden Boed K. Peka

“En blong evri aktiviti insaed long Jos i blong luk wan hasban mo waef blong hem mo ol pikinini blong tufala oli hapi long hom, oli kasem proteksen long ol prinsipol mo ol loa blong gospel, oli sil insaed long ol kavenan blong prishud we i no save finis.”

And a Little Child Shall Lead Them, Epril 2012 jeneral konfrens

Presiden Dieter F. Uchtdorf

“Mi glad bigwan se mi blong wan jos we i tekem se mared mo famli i impoten tumas. Ol memba blong Jos Ia blong Jisas Kraes blong Ol Lata-dei Sent, oli save gud olgeta truaot long wol from se oli gat ol gudfala mared mo famli we man i save faenem. Mi mi biliv se, hemia i from impoten trutok we Josef Smit i bin putumbak, se mared mo famli oli blong taem we i no save finis. Ol famli oli jes no stap blong mekem ol samting oli go smut nomo long wol ia, mo blong oli sakemaot olgeta afta we yumi kasem heven. Be, olgeta nao oli oda blong heven. Oli stap blong ripripitim wan selestial paten mo wan filing blong famli blong God we i no save finis.”

Blong Presem Olgeta we Oli Stap Sef, Epril 2016 jeneral konfrens

“Famli: Wan Ofisol Toktok I Go long Wol”

“Tabu plan blong God blong stap hapi, i mekem se fasin blong holem taet famli tugeta i save gohed afta long ded. Ol tabu odinens mo ol kavenan we oli stap insaed long ol tabu tempol oli mekem i posibol long wanwan man o woman i gobak long ples blong God mo blong ol famli oli save stap tugeta blong taem we i no save finis.”

Famli: Wan Ofisol Toktok I Go long Wol

Presiden Russell M. Nelson

“Evri man we oli kam long wol ia oli prodak blong jeneresen blong ol papa mo mama. Yumi gat wan samting we i stap finis insaed long yumi we i konektem yumi wetem ol bubu blong yumi. Filing ia i stap long ol hat blong yumi, nomata long yia blong yumi. Tingting long ol koneksen long saed blong spirit we oli fom taem wan yang woman i helpem bubu woman blong hem blong putum infomesen blong famli i go insaed long wan kompiuta o taem wan yang man i luk nem blong bigfala bubu man blong hem long rekod blong ol man we oli bin kaontem. Taem hat blong yumi i tanem i go long ol bubu blong yumi blong bifo, samting i jenis insaed long yumi. Yumi filim se yumi pat blong wan samting we i moa bigwan bitim yumiwan. Filing ia we i stap insaed long yumi blong konek wetem famli i kam blong hapen taem yumi joen wetem ol bubu long yumi blong bifo tru long ol tabu odinens blong tempol.”

Generations Linked in Love, Epril 2010 jeneral konfrens

Presiden Thomas S. Monson

“From wanem plante oli givim tumas samting blong mekem se oli save kasem ol blesing blong tempol? Olgeta we oli andastanem ol blesing ia we oli no save finis, we i kam long tempol, oli save se i no gat wan sakrifaes we i moa bigwan, o praes we i moa hevi, o hadtaem we i had tumas blong stopem wan blong kasem ol blesing ia. I neva gat plante mael blong travel, tumas samting we oli blokem rod blong winim, o tumas harem nogud blong stap strong kasem en. Olgeta oli andastanem se ol odinens blong sevem man we oli kasem insaed long tempol i letem yumi blong gobak long Papa blong yumi long Heven long wan famli rilesensip we i no save finis mo blong kasem endaomen wetem ol blesing mo paoa we i kam antap, oli gat praes long evri sakrifaes mo evri kamfot.”

Tabu Tempol—Wan Saen blong Hop I Go long Wol, Epril 2011 jeneral konfrens

Presiden Godon B. Hinckley

“Mi biliv se i no gat wan memba blong Jos we i bin kasem faenol samting we Jos ia i gat blong givim kasem taem hem i kasem ol tempol blesing blong hem insaed long haos blong Lod.”

Some Thoughts on Temples, Retention of Converts, and Missionary Service, Oktoba 1997 jeneral konfrens

Presiden Haward W. Hunter

“Long spirit ia, mi invaetem ol Lata-dei Sent blong lukluk i go long tempol blong Lod olsem wan bigfala simbol blong membasip blong yufala. Hem i dip tingting blong wantaem tumas insaed long hat blong mi blong gat evri memba blong Jos oli klin inaf blong go insaed long tempol. Bae Lod i laekem tumas mo bae i glad tumas sapos evri adalt we i memba blong jos bae oli klin inaf blong—mo holem—wan tempol rekomen we i laef i stap. Ol samting we yumi mas mekem mo no mekem blong stap klin from wan tempol rekomen oli ol samting we oli mekem sua se bae yumi hapi olsem wanwan mo olsem wan ol famli. (“Exceeding Great and Precious Promises,” Ensign, Nov 1994, 8). Atendem tempol evri taem olsem we yu save mekem. Kipim wan pikja blong wan tempol long hom blong yu blong mekem se ol pikinini blong yu oli save luk. Tijim olgeta abaot ol stamba tingting blong haos blong Lod. Mekem olgeta oli gat wan plan taem oli yang yet blong go long we mo blong stap klin inaf oltaem from blesing ia.

Exceeding Great and Precious Promises, Oktoba 1994 jeneral konfrens

Elda David A. Bednar

“Spirit blong Elaeja i tajem ol pipol insaed mo aotsaed long Jos. Olsem ol memba blong Jos blong Kraes we i bin kambak, yumi gat wan kavenan responsabiliti, blong lukaotem ol bubu blong yumi mo mekem i long olgeta ol odinens blong gospel blong sevem man. ‘Sapos i no gat yumi, oli no save kam stret gud evriwan’ (Hibru 11:40; luk tu long Teachings: Joseph Smith, 475). Mo semmak, sapos i no gat olgeta dedman blong yumi, bae yumi no save kam stret evriwan’ (Doktrin mo Ol Kavenan 128:15). From ol risen ia yumi mekem famli histri wok, bildim ol tempol, mo mekem ol defren odinens long bihaf blong olgeta. From ol risen ia Elaeja i bin kambak blong putumbak atoriti blong siling we i blong joenem samting long wol mo long heven. Yumi ol wokman blong Lod long wok blong fasin blong sevem man mo fasin blong kam olsem wan god, we bae i stopem “Hem [blong] kilim ful wol ia wetem wan strong nogud tok’ (Doktrin mo Ol kavenan 110:15) taem bae Hem i kambak bakegen. Hemia i diuti blong yumi mo bigfala blesing.”

Hat blong Ol Pikinini Bae I Tanem, Oktoba 2011 jeneral konfrens

Elda Quentin L. Cook

“Doktrin blong famli we i konek i go long famli histri mo tempol wok i klia. Lod long fas revelesen instraksen, Hem i stap tokbaot ‘baptaes blong ol ded man.’ Wok blong yumi we stap insaed long doktrin i blong wok from ol bubu long yumi. Hemia hem i from selestial oganaesesen blong heven we i lukluk moa long ol famli. Fas Presidensi i leftemap tingting blong ol memba, speseli ol yut mo yang singgel adalt blong tokbaot famli histri wok mo ol odinens blong ol famli nem blong olgetawan, o ol nem blong ol bubu blong ol memba blong wod mo stek blong olgeta. Yumi nidim blong konek tugeta wetem ol rus mo ol branj blong yumi. Ol tingting ia blong stap wetem olgeta long laef afta long laef ia i gud tumas.”

Ol Rus mo Branj, Epril 2014 jeneral konfrens

Presiden Boed K. Peka

“Nomata yu yu wanem sitisen o kala, nomata yu wan man o woman, nomata wanem wok, nomata edukesen blong yu, nomata jeneresen we yu laef long hem, laef i wan wokbaot we yumi evriwan bae i gobak hom, gobak long ples blong God long selestial kingdom. Ol odinens mo ol kavenan oli kam ol pepa blong yusum blong go insaed long ples blong Hem. Be blong stap klin inaf blong kasem olgeta hem i wan misin blong ful laef; blong kipim olgeta naoia kasem taem ia hem i wan jalenj. Taem yumi kasem olgeta kavenan mo odinens ia blong yumiwan mo blong ol famli blong yumi, yumi gat diuti ia blong mekem olgeta odinens ia blong ol ded man, we i blong ful famli blong yumi ol man.

Covenants, Ensign, Mei 1987