ពិធីបុណ្យជ្រមុជទឹក និងពិធីបញ្ជាក់គឺចាំបាច់
មាត្រាទីបួននៃ មាត្រានៃសេចក្តីជំនឿ ចែងថា ពិធីបរិសុទ្ធដំបូងនៃដំណឹងល្អនៃព្រះយេស៊ូវគ្រីស្ទគឺ « បុណ្យជ្រមុជទឹក ដោយការពន្លិចសម្រាប់ការផ្ដាច់បាប » និង « ការដាក់ដៃលើសម្រាប់អំណោយទានជាព្រះវិញ្ញាណបរិសុទ្ធ » ។ ព្រះយេស៊ូវបានបង្រៀនថា ពិធីបុណ្យជ្រមុជទឹក និងពិធីបញ្ជាក់គឺចាំបាច់សម្រាប់មនុស្សទាំងអស់ដែលចង់ធ្វើតាមទ្រង់ ហើយត្រឡប់ទៅឯព្រះវរបិតាសួគ៌របស់យើងវិញបន្ទាប់ពីជីវិតនេះ ។ ដូច្នេះហើយ ពិធីបុណ្យជ្រមុជទឹក គឺជាច្រកទៅកាន់ផ្លូវនៃសេចក្តីសញ្ញា ដែលនាំទៅរកការទទួលពរជ័យទាំងអស់ ដែលព្រះវរបិតាសួគ៌របស់យើងសព្វព្រះទ័យប្រទានឲ្យយើង ។ វាក៏ជាច្រកផ្លូវដើម្បីបាន « ល្អឥតខ្ចោះនៅក្នុងព្រះគ្រីស្ទ » ( មរ៉ូណៃ ១០, ៣២, ៣៣ ) នៅពេលយើងទទួលយកដំណឹងល្អរបស់ទ្រង់ទាំងស្រុង ។
នៅពេលចាប់ផ្ដើមការងារបម្រើរបស់ទ្រង់ ព្រះយេស៊ូវបានយាងពីស្រុកកាលីឡេទៅទន្លេយ័រដាន់ ក្នុងស្រុកយូដា ។ យ៉ូហានបាទីស្ទ នៅទីនោះ ហើយបង្រៀនមនុស្សឲ្យប្រែចិត្ត ហើយទទួលបុណ្យជ្រមុជទឹក ។ ព្រះយេស៊ូវបានបង្គាប់ឲ្យ យ៉ូហានធ្វើពិធីបុណ្យជ្រមុជទឹកឲ្យទ្រង់ ប៉ុន្តែ យ៉ូហាន មានចិត្តស្ទាក់ស្ទើរដោយសារលោកដឹងថា ព្រះយេស៊ូវគ្មានបាបទេ ។ ព្រះអង្គសង្រ្គោះបានពន្យល់ថា ទ្រង់ត្រូវទទួលបុណ្យជ្រមុជទឹកដើម្បី « សម្រេចតាមគ្រប់ទាំងសេចក្តីសុចរិត » ( ម៉ាថាយ ៣:១៥ ) ហើយត្រូវគោរពប្រតិបត្តិតាមព្រះបញ្ញត្តិនៃព្រះវរបិតាសួគ៌របស់យើងផង ។ ដូច្នេះ ព្រះយេស៊ូវគ្រីស្ទបានធ្វើជាគំរូសម្រាប់យើងទាំងអស់គ្នា នៅពេលទ្រង់យាងចូលក្នុងទឹក ហើយយ៉ូហានបានធ្វើបុណ្យជ្រមុជទឹកឲ្យទ្រង់ ( សូមមើល នីហ្វៃទី២ ៣១:៥ ) ។យ៉ូហាន ក៏បានទទួលសាក្សីផ្ទាល់ខ្លួនអំពីបទពិសោធន៍ដ៏ពិសិដ្ឋនោះផងដែរ ៖
« កាលព្រះយេស៊ូវបានទទួលបុណ្យជ្រមុជហើយ នោះទ្រង់យាងឡើងពីទឹកភ្លាម ស្រាប់តែមេឃក៏របើកឡើង ឲ្យទ្រង់ឃើញព្រះវិញ្ញាណនៃព្រះ យាងចុះមកដូចជាសត្វព្រាបស ក៏សណ្ឋិតលើទ្រង់ ៖
« នោះមានឮសំឡេងចេញពីមេឃថា នោះជាកូនស្ងួនភ្ងារបស់យើង ជាទីពេញចិត្តយើងណាស់ » ( ម៉ាថាយ ៣:១៦–១៧ ) ។
ក្រោយមក អ្នកគ្រប់គ្រងសាសន៍យូដាម្នាក់ឈ្មោះនីកូដេមបានមកឯព្រះយេស៊ូវនៅពេលយប់ ។ ការទទួលស្គាល់ថាព្រះយេស៊ូវគឺជា « គ្រូមកពីព្រះពិត » ( យ៉ូហាន ៣:២ ) ហើយលោកចង់រៀនបន្ថែមទៀត ។ ព្រះយេស៊ូវបានបង្រៀនគាត់ថា ទាំងពិធីបុណ្យជ្រមុជទឹក និងការទទួលព្រះវិញ្ញាណបរិសុទ្ធតាមរយៈពិធីបញ្ជាក់គឺចាំបាច់សម្រាប់សេចក្ដីសង្គ្រោះ ៖
« ព្រះយេស៊ូវមានព្រះបន្ទូលឆ្លើយថា ប្រាកដមែន ខ្ញុំប្រាប់អ្នកជាប្រាកដថា បើមិនបានកើតអំពីទឹក ហើយអំពីព្រះវិញ្ញាណ នោះគ្មានអ្នកណាអាចនឹងចូលទៅក្នុងនគរព្រះបានទេ » ( យ៉ូហាន ៣:៥ ) ។
ការ កើតអំពីទឹក សំដៅទៅលើពិធីបុណ្យជ្រមុជទឹក ។ ការ កើតអំពីព្រះវិញ្ញាណ សំដៅទៅលើការទទួលអំណោយទាននៃព្រះវិញ្ញាណបរិសុទ្ធ ( ហៅបានផងដែរថា ព្រះវិញ្ញាណបរិសុទ្ធ ) តាមរយៈពិធីបញ្ជាក់ ។ ពិធីបរិសុទ្ធទាំងនេះគឺពិសិដ្ឋ ហើយយើងធ្វើសេចក្ដីសញ្ញាដ៏ឧឡារិក នៅពេលយើងទទួលវា ។ យើងសន្យាថា យើងមានឆន្ទៈលើកដាក់ព្រះនាមនៃព្រះយេស៊ូវគ្រីស្ទមកលើខ្លួនយើង ចងចាំទ្រង់ជានិច្ច ហើយគោរពតាមព្រះបញ្ញត្តិរបស់ព្រះ ។ នៅពេលយើងរក្សាការសន្យាទាំងនេះ យើងបង្ហាញពីសេចក្តីជំនឿរបស់យើងលើព្រះយេស៊ូវគ្រីស្ទ និងឆន្ទៈរបស់យើងដើម្បីធ្វើតាមទ្រង់ ។
បន្ទាប់ពីការរស់ឡើងវិញរបស់ទ្រង់ ព្រះអង្គសង្គ្រោះបានបង្រៀនម្តងទៀតអំពីសារៈសំខាន់នៃពិធីបុណ្យជ្រមុជទឹក ។ ទ្រង់បានចាត់ពួកសាវកឲ្យចេញទៅផ្សព្វផ្សាយដំណឹងល្អរបស់ទ្រង់ដល់មនុស្សទាំងអស់ ដោយមានបន្ទូលថា « អ្នកណាដែលជឿ ហើយទទួលបុណ្យជ្រមុជទឹក នោះនឹងបានសង្គ្រោះ តែអ្នកណាដែលមិនព្រមជឿ នោះនឹងត្រូវទោសវិញ » ( ម៉ាកុស ១៦:១៦ ) ។
នៅពេលព្រះអង្គសង្គ្រោះបានស្ដារសាសនាចក្ររបស់ទ្រង់ឡើងវិញតាមរយៈព្យាការី យ៉ូសែប ស្ម៊ីធ ទ្រង់បានបង្រៀនម្តងទៀតថា ពិធីបុណ្យជ្រមុជទឹកនៅតែត្រូវការជាចាំបាច់ ( គោលលទ្ធិ និងសេចក្តីសញ្ញា ២២:៤ ) ។ ទ្រង់ក៏បានបើកសម្តែងនូវពិធីបុណ្យជ្រមុជទឹកដ៏ត្រឹមត្រូវផងដែរ ។ ទ្រង់បានបញ្ជាក់យ៉ាងច្បាស់ថា ពិធីបុណ្យជ្រមុជទឹកត្រូវតែធ្វើឡើងដោយការពន្លិច និងដោយសិទ្ធិអំណាចបព្វជិតភាពត្រឹមត្រូវ ( គោលលទ្ធិ និងសេចក្តីសញ្ញា ២០:៧៣–៧៤ ) ។
ព្រះស្រឡាញ់បុត្រាបុត្រីទាំងអស់របស់ទ្រង់
មនុស្សគ្រប់រូបគឺជាបុត្ររបស់ព្រះ ។ មនុស្សទាំងអស់មានតម្លៃចំពោះទ្រង់ ។ ទ្រង់ស្គាល់ពួកគេ ហើយទ្រង់ស្រឡាញ់ពួកគេ ។ ទ្រង់បានប្រកាសថា « ដ្បិតមើលចុះ នេះហើយជាកិច្ចការរបស់យើង និងសិរីល្អរបស់យើង—គឺដើម្បីនាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ( ម៉ូសេ ១:៣៩ ) ។ ទ្រង់បានប្រទានផ្លូវមួយសម្រាប់បុត្រាបុត្រីរបស់ទ្រង់គ្រប់រូបដើម្បីត្រឡប់មកទ្រង់វិញបន្ទាប់ពីជីវិតនេះ ។ ផ្លូវនោះគឺជាដំណឹងល្អរបស់ព្រះយេស៊ូវគ្រីស្ទ ។
មនុស្សជាច្រើនមានឱកាសទទួលយកដំណឹងល្អ ហើយទទួលបុណ្យជ្រមុជទឹកក្នុងជីវិតនេះ ។ ចុះតើមនុស្សដែលបានទទួលមរណភាពទៅ ដោយមិនបានទទួលពិធីបុណ្យជ្រមុជទឹក ឬមិនបានដឹងអំពីព្រះយេស៊ូវនោះវិញ ? តើពួកគេអាចត្រូវបានសង្គ្រោះតាមរបៀបណា ? ព្រះមិនបានបំភ្លេចពួកគេនោះទេ !
សេចក្តីស្លាប់មិនមែនជាទីបញ្ចប់នៃជីវិតទេ ប៉ុន្តែជាជំហានមួយក្នុងដំណើររបស់យើងដើម្បីត្រឡប់ទៅរកព្រះវិញ ។ ពេលយើងស្លាប់ វិញ្ញាណរបស់យើងចាកចេញពីរូបកាយរបស់យើងជាបណ្ដោះអាសន្ន ។ យើងចូលទៅក្នុងពិភពវិញ្ញាណ ហើយចូលរួមជាមួយសមាជិកគ្រួសារ និងអ្នកផ្សេងទៀតដែលបានទទួលមរណភាពផងដែរ ។ នៅទីនោះ យើងរៀបចំខ្លួនសម្រាប់ថ្ងៃដ៏អស្ចារ្យនោះ នៅពេលយើងរស់ឡើងវិញ ហើយវិញ្ញាណរបស់យើងនឹងត្រូវបានរួបរួមជាមួយនឹងរូបកាយដ៏ល្អឥតខ្ចោះវិញ ។ ពេលនោះយើងនឹងរួចផុតពីជំងឺ ការឈឺ និងពិការភាព និងភាពទន់ខ្សោយទាំងអស់ដែលយើងកំពុងតែស៊ូទ្រាំនាពេលឥឡូវនេះ ។ នៅក្នុងពិភពវិញ្ញាណ អស់អ្នកដែលបានស្លាប់ដោយគ្មានឱកាសរៀនអំពីដំណឹងល្អនៅក្នុងជីវិតនេះ ត្រូវបានបង្រៀនអំពីព្រះអង្គសង្គ្រោះ និងផែនការនៃសេចក្តីសង្គ្រោះនៅទីនោះ ( ពេត្រុស ទី១ ៣:១៨–២០; គោលលទ្ធិ និងសេចក្តីសញ្ញា ១៣៨:១៦–១៩ ) ។រួចហើយពួកគេអាចជ្រើសរើសទទួលយកដំណឹងល្អ ហើយប្រែចិត្ត ។ប៉ុន្តែពួកគេមិនអាចទទួលបុណ្យជ្រមុជទឹកនៅទីនោះបានទេ ដោយសារពួកគេគ្មានរូបកាយ ។ ព្រះវរបិតាសួគ៌ដែលមានព្រះទ័យសណ្ដោសប្រណីបានប្រទានមធ្យោបាយផ្សេងទៀតសម្រាប់ពួកគេដើម្បីទទួលពិធីបុណ្យជ្រមុជទឹក ។
នៅក្នុងព្រះវិហារបរិសុទ្ធ យើងអាចធ្វើពិធីបុណ្យជ្រមុជទឹក និងពិធីបញ្ជាក់ឲ្យអស់អ្នកដែលបានស្លាប់ដោយពុំបានទទួលឱកាសនោះ ។ ម្យ៉ាងទៀត យើងអាចតំណាងឲ្យពួកគេ ហើយធ្វើសកម្មភាពជំនួសពួកគេបាន ។ ពិធីបរិសុទ្ធដែលបានធ្វើសម្រាប់អ្នកដទៃត្រូវបានហៅថា ពិធីបរិសុទ្ធ ជំនួស ( ឬពិធីបរិសុទ្ធ តំណាង ) ។ សាវកប៉ុលបានបង្រៀនពួកកូរិនថូសថា ពិធីបុណ្យជ្រមុជទឹកសម្រាប់មនុស្សស្លាប់ត្រូវបានអនុវត្ត ដោយសារតែមនុស្សទាំងអស់នឹងត្រូវបានរស់ឡើងវិញតាមរយៈដង្វាយធួននៃព្រះយេស៊ូវគ្រីស្ទ ( កូរិនថូស ទី១ ១៥:២៩, ៥៥–៥៧ ) ។
គោលលទ្ធិនៃពិធីបរិសុទ្ធតំណាងតែងតែជាផ្នែកមួយនៃដំណឹងល្អនៃព្រះយេស៊ូវគ្រីស្ទជានិច្ច ។ តាមពិត ដង្វាយធួនរបស់ទ្រង់គឺជាទង្វើដ៏អស្ចារ្យបំផុតក្នុងប្រវត្តិសាស្ត្រពិភពលោក ។ តាមរយៈការពលិកម្មរបស់ទ្រង់ ទ្រង់បានធ្វើពលិកម្មសម្រាប់មនុស្សទាំងអស់ជាអ្វីដែលយើងមិនអាចធ្វើសម្រាប់ខ្លួនយើង ។ ដោយសារទ្រង់ នោះយើងនឹងរស់ឡើងវិញ ។ មនុស្សទាំងអស់គ្នានឹងបានឮដំណឹងល្អ ហើយមនុស្សទាំងអស់គ្នានឹងមានឱកាសត្រឡប់ទៅរកព្រះវរមាតាបិតាសួគ៌របស់យើងវិញ ។
ពិធីបុណ្យជ្រមុជទឹកក្នុងព្រះវិហារបរិសុទ្ធ និងពិធីបញ្ជាក់ ដែលបានធ្វើសម្រាប់អ្នកដែលបានស្លាប់គឺជាអំណោយទានដែលផ្តល់ឲ្យដោយក្ដីស្រឡាញ់ ។ ហើយដោយសារយើងជឿថាជីវិតបន្តបន្ទាប់ពីសេចក្ដីស្លាប់ យើងក៏ជឿថាអ្នកដែលបានស្លាប់គឺបានដឹងអំពីពិធីបរិសុទ្ធផងដែរ ។ បន្ទាប់មកពួកគេអាចជ្រើសរើសថាតើត្រូវទទួលយក ឬមិនទទួលយកពិធីបរិសុទ្ធទាំងនោះ ។
អ្នកអាចបម្រើអ្នកដទៃនៅក្នុងព្រះវិហារបរិសុទ្ធ
នៅខាងក្នុងព្រះវិហារបរិសុទ្ធនីមួយៗមានកន្លែងធ្វើបុណ្យជ្រមុជទឹកដែលមានអាងជ្រមុជទឹកមួយយ៉ាងធំ ។ អាងជ្រមុជទឹកនេះដាក់នៅពីលើខ្នងរូបសំណាកគោដប់ពីរក្បាល ដែលតំណាងឲ្យកុលសម្ព័ន្ធទាំងដប់ពីរនៃអ៊ីស្រាអែល ។ កិច្ចការនេះធ្វើតាមទំនៀមទម្លាប់មួយនាសម័យកាលព្រះវិហារបរិសុទ្ធរបស់សាឡូម៉ូនក្នុងព្រះគម្ពីរសញ្ញាចាស់ ( សូមមើល របាក្សត្រ ទី២ ៤:២–៤ ) ។ គោក៏តំណាងឲ្យកម្លាំង និងព្រះចេស្ដានៃដំណឹងល្អនៃព្រះយេស៊ូវគ្រីស្ទ ផងដែរ ។
សមាជិកសាសនាចក្រដ៏ស្មោះត្រង់អាចនឹងទទួលបានប័ណ្ណចូលព្រះវិហារបរិសុទ្ធដើម្បីធ្វើពិធីបុណ្យជ្រមុជទឹក និងពិធីបញ្ជាក់ចាប់ពីខែមករានៃឆ្នាំដែលពួកគេចូលដល់អាយុ ១២ ឆ្នាំ ។ ដើម្បីទទួលបានប័ណ្ណព្រះវិហារបរិសុទ្ធ សូមដាក់កាលវិភាគទទួល « ការសម្ភាសន៍ទទួលប័ណ្ណចូលព្រះវិហារបរិសុទ្ធ » ជាមួយប៊ីស្សព ឬប្រធានសាខារបស់អ្នក ។ ពេលនោះ អ្នកអាចទៅព្រះវិហារបរិសុទ្ធដើម្បីធ្វើបុណ្យជ្រមុជទឹក ហើយពិធីបញ្ជាក់ឲ្យអ្នកស្លាប់បាន ។
ដូចគ្នានឹងពិធីបុណ្យជ្រមុជទឹកផ្ទាល់ខ្លួនរបស់អ្នកដែរ អ្នកនឹងមានកន្លែងប្តូរសម្លៀកបំពាក់ឯកជន ដែលអ្នកនឹងប្តូរទៅជាសម្លៀកបំពាក់ពណ៌ស ដើម្បីធ្វើពិធីបុណ្យជ្រមុជទឹកសម្រាប់អ្នកស្លាប់ ។ បន្ទាប់ពីពិធីបុណ្យជ្រមុជទឹក អ្នកនឹងត្រឡប់ទៅកន្លែងប្តូរសម្លៀកបំពាក់របស់អ្នកវិញ ហើយផ្លាស់ទៅសម្លៀកបំពាក់ស្ងួត ។ បន្ទាប់មកអ្នកនឹងទៅបន្ទប់ទទួលពិធីបញ្ជាក់ដែលនៅដាច់ដោយឡែកមួយនៅក្នុងកន្លែងធ្វើបុណ្យជ្រមុជទឹកនោះ ។ អ្នកកាន់បព្វជិតភាពនឹងដាក់ដៃលើក្បាលរបស់អ្នក ហើយផ្ដល់អំណោយទាននៃព្រះវិញ្ញាណបរិសុទ្ធសម្រាប់អស់អ្នកដែលបានស្លាប់ ។ នៅពេលដែលពិធីបរិសុទ្ធទាំងនេះត្រូវបានធ្វើរួចរាល់ហើយ នោះពួកគេអាចសម្រេចចិត្តថាតើពួកគេចង់ទទួលយកពិធីទាំងនោះ ឬអត់ ។ ពិធីបុណ្យជ្រមុជទឹក និងពិធីបញ្ជាក់ជំនួសត្រូវបានអនុវត្តតែនៅក្នុងព្រះវិហារបរិសុទ្ធប៉ុណ្ណោះ ។
នៅក្នុងព្រះវិហារបរិសុទ្ធ អ្នកក៏អាចមានឱកាសពិសេសដើម្បីជ្រមុជទឹកសម្រាប់សមាជិកគ្រួសារ ដែលបានស្លាប់របស់អ្នកផ្ទាល់ផងដែរ ។ នៅពេលអ្នកស្រាវជ្រាវពង្សប្រវត្តិរបស់អ្នក នោះអ្នកនឹងរកឃើញបុព្វការីជនជាច្រើន ។ ការទៅព្រះវិហារបរិសុទ្ធ ហើយទទួលបុណ្យជ្រមុជទឹក និងពិធីបញ្ជាក់សម្រាប់ពួកគាត់ អាចជាបទពិសោធន៍ដ៏អស្ចារ្យ និងផ្ទាល់ខ្លួនមួយ ។
អ្នកអាចផ្តល់ការបម្រើនេះសម្រាប់ឪពុកម្តាយ ជីដូនជីតា បងប្អូន មីង ពូ បងប្អូនជីដូនមួយ និងអ្នកដទៃទៀត ។ ក្រុមគ្រួសារអាចត្រូវបានពង្រឹងតាមរយៈទង្វើសប្បុរសនេះ ។ អ្នកអាចមានអារម្មណ៍ទំនាក់ទំនងកាន់តែស៊ីជម្រៅជាមួយគ្រួសាររបស់អ្នក ហើយកាន់តែជិតស្និទ្ធជាមួយនឹងព្រះ ។ អារម្មណ៍នៃការមានចំណែកនេះអាចផ្តល់ឲ្យអ្នកនូវកម្លាំង ការណែនាំ និងទំនុកចិត្ត ហើយនឹងផ្ដល់ពរដល់អ្នកតាមវិធីជាច្រើនរាប់មិនអស់ ។ អ្នកអាចស្វែងរកភាពសុខសាន្ត និងការយល់ដឹងសម្រាប់ជីវិតផ្ទាល់ខ្លួនរបស់អ្នក នៅពេលអ្នកស្វែងរក និងបម្រើដល់បុព្វការីជនរបស់អ្នក ។ អ្នកនឹងយល់ ហើយស្គាល់ព្រះអង្គសង្គ្រោះកាន់តែច្បាស់ នៅពេលអ្នកធ្វើឲ្យអ្នកដទៃនូវអ្វីដែលពួកគេមិនអាចធ្វើសម្រាប់ខ្លួនពួកគេបានផងដែរ ។
ការសន្យាពិសេសសម្រាប់អ្នក
អែលឌើរ ដេវីឌ អេ បែដណា បានមានប្រសាសន៍ ៖ « ខ្ញុំសូមលើកទឹកចិត្តអ្នកឲ្យសិក្សា ស្វែងរកជីដូនជីតារបស់អ្នក ហើយរៀបចំខ្លួនអ្នកដើម្បី ធ្វើបុណ្យជ្រមុជទឹកជំនួសនៅក្នុងដំណាក់របស់ព្រះអម្ចាស់សម្រាប់ មរណជន របស់អ្នក ។ នៅពេលអ្នកឆ្លើយតបដោយសេចក្តីជំនឿចំពោះការអញ្ជើញនេះ នោះចិត្តរបស់អ្នកនឹងបានបង្វែរមករកពួកឪពុក ។ សេចក្ដីសន្យាទាំងឡាយដែលបានធ្វើដល់ អ័ប្រាហាំ អ៊ីសាក និងយ៉ាកុប នឹងត្រូវបានបណ្ដុះនៅក្នុងចិត្តរបស់អ្នក ។… សេចក្ដីស្រឡាញ់ និងអំណរគុណរបស់អ្នកសម្រាប់បព្វការីជននឹងកើនឡើង ។ ទីបន្ទាល់ និងការផ្លាស់ប្រែចិត្តជឿរបស់អ្នកទៅលើព្រះអង្គសង្គ្រោះនឹងកាន់តែស៊ីជម្រៅ ហើយកាន់ខ្ជាប់កាន់តែខ្លាំង ។ ហើយខ្ញុំសូមសន្យានឹងអ្នកថា អ្នកនឹងត្រូវបានការពារពីឥទ្ធិពលដ៏ខ្លាំងក្លារបស់ពួកមារសត្រូវ ។ នៅពេលអ្នកចូលរួម និងស្រឡាញ់កិច្ចការដ៏បរិសុទ្ធនេះ នោះអ្នកនឹងត្រូវបានការពារ … ពេញមួយជីវិតរបស់អ្នក » ( « The Hearts of the Children Shall Turn » Ensign ឬ Liahona ខែ វិច្ឆកា ឆ្នាំ ២០១១ ទំព័រ ២៦–២៧ ) ។