Mahitungod Niini nga Isyu
Tema Karong Bulana: Pagdumala sa mga Relasyon sa Pamilya uban sa tabang sa Manluluwas
Kumusta, mga higala.
Unsay inyong bation kon maghunahuna kamo sa inyong pamilya? Diha dayon mibati ako og kaanindot—maghunahuna ko sa pagkinomedyahay, mainitong pagginaksanay, paghupay, ug paghinigugmaay.
Apan, usahay ang mga handomanan sa akong pamilya adunay pipila ka dili kaayo makalingaw nga mga emosyon, sama sa pagbangotan, nasakitan, pagsupak, o kapungot.
Naggikan ako sa pamilya nga nakasinati og mga adlaw nga puno sa pagbahakhak ug sa kalipay, ug mga gabii nga puno sa mga problema sa pagkadili pagsinabtanay nga miresulta sa pagkaadik.
Apan, gamay lamang nga mga butang dinhi niining kalibotana ang nagtudlo kanako og daghan mahitungod sa Manluluwas ug sa Iyang impluwensiya kaysa diha sa mga relasyon sa akong pamilya. Pinaagi sa tanang kalamposan ug kapakyasan sa kinabuhi sa pamilya, nakakat-on ko og labihan kadaghan gikan sa mga sakop sa akong pamilya, ilabi na kon mosalig ko sa Manluluwas sa pagtabang kanako nga mopasaylo, mosabot, ug mohigugma sama sa Iyang gihimo.
Si Sister Tamara W. Runia, Unang Magtatambag sa Kinatibuk-ang Kapangulohan sa Young Women, miingon, “Samtang ang atong mga pamilya dili hingpit, kita mahimong mohingpit sa atong gugma alang sa uban hangtod nga kini mahimong makanunayon, dili mausab, bisan unsa pa nga matang sa gugma—ang matang sa gugma nga nagsuporta sa kausaban ug nagtugot sa pagtubo ug sa pagbalik.”
Nakakita ako og ingon niini nga matang sa gugma—sa gugma sa Manluluwas—nga miusab sa akong kinabuhi ug sa kinabuhi niadtong akong gihigugma sa hilabihan.
Aniay pipila ka artikulo gikan sa mga young adult ug sa mga lider karong bulana kinsa, sama ninyo, nagdumala sa mga relasyon sa pamilya:
-
Tambag alang sa pakig-date ug sa kaminyoon gikan ni Elder Giménez sa Seventy
-
Nganong ang usa ka misyonaryo gikan sa Australia mibati og pag-aghat nga magpuasa alang sa iyang pamilya—ug sa ilang mga tanom nga kalbasa
-
Unsay nakat-onan sa usa ka young adult nga taga-France human makapasaylo sa usa ka tawo sa iyang ward family
-
Upat ka butang nga hinumdoman kon kamo nagsinati og kamabalak-on sa pakigrelasyon
Kita usab adunay mga sugilanon nga kabahin sa atong padayon nga mga serye:
-
Nagatuo Ako: Usa ka sister mipakigbahin kon giunsa niya paglig-on og balik ang iyang pagtuo human napakyas ang iyang gusto nga kinabuhi.
-
Alang sa mga Inahan sa Gagmayng mga Anak: Usa ka manganakay nga inahan mipakigbahin sa iyang mga hunahuna kon unsaon sa Manluluwas pagtabang kanato sa pagbuntog sa lit-ag sa pagkumpara sa atong mga pagsulay ngadto sa pagsulay sa uban.
-
Gikan sa Nataran sa Misyon: Sa unsang paagi ang usa ka misyonaryo gikan sa Mongolia mihimo hinoon og templo ug family history nga buhat dihang nasakit siya sa iyang pagmisyon
-
Paggamit sa Doktrina ug mga Pakigsaad sa Inyong Kinabuhi: Suporta sa inyong Dali, Sunod Kanako nga pagbasa mahitungod kon sa unsay buhaton kon mahunong kamo diha sa pangutana kabahin sa ebanghelyo nga dili ninyo kapalgan og tubag
Ang Manluluwas hingpit nga nasayod ug nakasabot sa inyong sitwasyon. Siya ug ang Langitnong Amahan makagiya kaninyo samtang dumalaon ninyo ang inyong labing importante nga mga pakigrelasyon.
Malipayong pagbasa!
Chakell Wardleigh Herbert, YA Matag Semana Pangulong Tigsulat