Gikan sa Natad sa Misyon
Dihang Grabe ang Akong Sakit nga Dili Ko Makagawas sa Pag-Missionary Work, Naghimo Ko sa Family History
Dihang naghimo ko sa family history alang sa akong patay na nga mga katigulangan, nakita usab nako ang mga panalangin alang sa mga buhi pa nga akong pamilya.
Akong nahinumdoman ang adlaw dihang ang duha ka lalaki nga nakapolo og puti ug nagkurbata nangadto sa among balay. Mihukom ang akong mama nga pasudlon sila, ug gitudloan nila kami sa ebanghelyo ni Jesukristo. Ang akong tibuok pamilya nakabig sa Simbahan.
Apan ang pagkamiyembro dinhi sa Mongolia lisod tungod kay ang Kristiyanismo ingon og bag-o pa sa akong komunidad. Nag-atubang ako og daghang mga hagit ug mga tentasyon. Salamat na lang, anaa kanunay ang akong pamilya, nag-awhag kanako sa pagsunod sa ebanghelyo.
Nianang panahona, wala ko masayod sa mga kalisod nga sa umaabot akong atubangon—o kon sa unsang paagi ang akong pamilya sa duha ka habig sa tabil sa moabot nga adlaw motabang kanako sa paglabang sa lisod nga mga panahon.
Ang Milagro sa Buhat sa Family History
Samtang nagserbisyo ko og misyon, nagsugod nga nagkaproblema ko og grabe sa panglawas, lakip sa naglungtad nga kasakit. Gipaneguro sa akong presidente sa misyon nga usa ako ka maayong misyonaryo ug gihatagan ko og opsiyon nga makapauli aron magpaayo, apan dili ko gustong mouli. Gitalikdan na nako ang nindot kaayo nga pagka-eskolar sa sport aron makaserbisyo, ug ang akong pamilya nagsakripisyo og dako aron tabangan ako nga makagasto sa akong misyon. Wala ko kahibalo unsay buhaton.
Samtang nakigbisog alang niini nga pagdesisyon, ang kasakit nagkagrabe. Dinha ra ko sa higdaanan sulod sa tulo ka adlaw tungod kay dili ko makabarog. Gusto gyod kong mopadayon sa pagserbisyo, mao nga gigahin nako kadtong mga oras samtang naa sa higdaanan sa paghimo sa buhat sa family history. Nagsugod ko sa pagpadala og bag-ong mga ngalan sa pamilya ngadto sa akong papa ug sa espesyalista sa family history sa amoang lugar.
Usa ka adlaw, nakadawat ko og tawag gikan sa espesyalista sa family history sa akong ward, ug miingon siya kanako nga ang mga ordinansa alang sa akong mga apohan sa akong mga apohan sa tuhod naaprobahan na ug napahigayon na sa templo! Walay mga templo sa Mongolia, mao nga milagro kaayo nga nahimo dayon kini sa ingon ka dali. Ang Espiritu miabot kanako, ug mihukom ko diha dayon nga magpabilin ako sa akong misyon.
Mibarog dayon ko sa akong gihigdaan, mibira sa akong kompanyon, ug miingon, “Dali magtudlo ta!” Nasorprisa siya nga nanakita kanako nga nagbarog. Mga lima ka minutos pa lang ang milabay sama ako og usa ka patay nga tawo—maglisod sa pagbarog aron mokaon o moinom. Apan sa kalit, ang kasakit gamay na kaayo ikompara sa akong tinguha nga motabang sa uban sa pagkaplag sa ilang pagtuo kang Kristo. Nasayod ko nga kinahanglan kaming molakaw og mopakigbahin sa ebanghelyo aron ang uban makakat-on unsaon usab nila sa pagtabang ang ilang mga pamilya.
Si Elder Gerrit W. Gong sa Korum sa Napulog Duha ka Apostoles miingon: Ang pagkonektar ngadto sa atong mga katigulangan makausab sa atong mga kinabuhi sa makasorprisa nga mga paagi. Gikan sa ilang mga pagsulay ug mga kalamposan, kita makabaton og hugot nga pagtuo ug kalig-on.”
Nausab ang akong kinabuhi dihang nakaangkon ko og kalig-on gikan ni Jesukristo pinaagi sa paghimo sa makaluwas nga mga ordinansa sa Iyang ebanghelyo nga magamit sa uban pinaagi sa buhat sa family history. Ang Iyang gahom naghimo kanako nga makalampos sa akong misyon.
Kalig-on diha sa Duha ka Habig sa Tabil
Pipila ka tuig niana, namatay ang akong papa. Dili na siya aktibo sa Simbahan sa panahon sa iyang kinabuhi, mao nga gisugdan nako sa pagkompleto ang iyang mga ordinansa sa templo. Ang akong pagpamatuod sa plano sa kaluwasan ug sa buhat sa family history nagdala ngari kanako og kahupayan tungod kay nasayod ko nga ikakita nako og usab ang akong papa sa moabot nga adlaw. Kon magkita na kami, gusto nako siyang sultihan nga gibuhat nako ang tanan kutob sa akong mahimo aron ang among pamilya magkauban.
Karon duna na koy asawa ug kaugalingong mga anak. Among gilig-on ang among pamilya sa yuta pinaagi sa paglig-on sa among pamilya sa pikas habig sa tabil.
Si Presidente Russell M. Nelson kausa miingon: “Samtang ang buhat sa templo ug sa family history adunay gahom sa pagpanalangin niadtong anaa sa kalibotan sa espiritu, kini adunay sama nga gahom sa pagpanalangin sa mga buhi. Kini adunay makapalunsay nga impluwensya niadtong nagbuhat niini. Sila sa pagkatinuod nagtabang aron mahimaya ang ilang mga pamilya.”
Ang pagtinabangay og himo sa buhat sa family history naghimo sa akong pamilya nga magsentro kang Kristo. Ang akong mga anak lingaw kaayo sa pagpanawag sa mga kaliwat aron magkat-on pa og dugang mahitungod sa ilang kinabuhi, ug dayon ang mga kaliwat nagmahinamon usab! Gibati namo ang pagkahiusa ug pagkakonekta sa among tanan nga kaliwat sa pamilya, mga buhi ug patay na.
Diha sa mga kasulatan, adunay istorya mahitungod sa kabos nga biyuda kinsa nakahatag lamang og duha ka diyot ngadto sa sudlanan sa kwarta samtang ang adunahang mga tawo libot kaniya midonar sa tanang matang sa bahandi. Ang Ginoo mitudlo sa Iyang mga disipulo nga ang donasyon sa biyuda mas dako og bili: “Kay ang gihulog sa uban sobra sa ilang bahandi; Apan [siya| bisan sa kakabos sa biyuda, gihatag niya ang tanan nga iyang kabuhian” (Marcos 12:44).
Ang buhat sa family history nga gihimo sa akong pamilya gamay ra kon inyong hunahunaon ang tanang katawhan kansang buhat kompletohonon pa. Apan nasayod ko nga ang Langitnong Amahan moihap sa among mga paningkamot nga mahimong labihan kabililhon samtang buhaton namo ang tanan sa paglig-on sa among pamilya sa duha ka habig sa tabil.