Gikan sa YA Matag Semana
Ang Pag-aghat Nga Nagsugo Kanako sa Pagpuasa alang sa mga Kalbasa
Ang tagsulat nagpuyo sa Western Australia.
Dihang gusto nakong tabangan ang akong pamilya, ang Espiritu Santo misulti kanako kon unsaon.
Sulod sa taas nga panahon, ang akong papa usa ka kaabag sa manedyer sa umahan. Mitrabaho siya og maayo ug kanunayng nangandoy nga ugma damlag makapalit siya og iyang kaugalingon nga umahan.
Ang iyang kakugi sa pagtrabaho nagdasig kanako, ilabi human ko mibiya aron moserbisyo og misyon sa Japan. Makakuha ko og kalig-on ug kadasig kon maghunahuna ko sa iyang ehemplo.
Mao nga sa usa niana ka adlaw, sa adlaw sa pagpangandam sa mga misyonaryo , dihang gisultihan ko sa akong papa nga sa kataposan nakapalit na siya og kaugalingon niyang umahan, nalipay kaayo ko alang kaniya. Namuhonan siya og dako kaayong kantidad sa salapi sa pagpatubo og mga kalbasa ug misulti nako nga managko na kini sulod sa unom ka semana. Nakabaton siya og labihang kalipay dihang sa kataposan nakab-ot niya ang iyang tumong.
Apan ang mga butang wala mahitabo sigon sa giplano.
Ang Pagpuasa alang sa Kalbasa
Pipila ka semana human akong nadungog ang kabahin sa bag-ong umahan sa akong papa, ang COVID19 nga pandemya misugod ug kalit akong gi-release sa akong misyon. Pero, dili ko makapauli tungod sa mga lockdown sa tanang bahin sa Australia. Gikinahanglan nga mag-isolate ko sulod sa duha ka semana sa dili pa mopauli, ug mao kadto ang labing guol nga panahon sa akong kinabuhi.
Panahon sa pag-isolate, gitawagan ko sa akong papa. Diha dayon akong namatngonan nga naguol siya. Upat ka semana nang milabay sukad sa iyang pagtanom sa iyang mga kalbasa, apan mga daot kini ug gagmay—mas gagmay pa kay iyang mga kamot. Nabalaka siyang maalkansi ang kwarta nga iyang gipuhonan sa iyang bag-o nga umahan.
Ang akong papa maayo, matinuoron, ug mapaubsanon nga tawo. Ang makita siya nga nasagmuyo nagpatulo sa akong mga luha pagka gabii niana. Nahugno ang akong kasingkasing kay dili ako makauli sa panimalay aron makahatag sa akong suporta. Dili kadto makiangayon nga ang akong papa mitrabaho sa labihan gayod unya diay ang tanan mapakyas lang.
Nag-ampo ko sa Langitnong Amahan aron masayod unsay akong mahimo. Ug didto nakaangkon ako og klaro nga impresyon:
“Mahimo kang magpuasa alang sa mga kalbasa.”
Sa una ang maong hunahuna ingon og kataw-anan. Magpuasa alang sa mga kalbasa? Nagduda ko kon kadto makahimo ba og kalainan! Apan akong gihunahuna ang mahitungod sa daghang mga panahon sa kinatibuk-an sa akong pagmisyon ug giunsa niini pagdala og daghan kaayong mga milagro. Usahay ingon ra kini ka gamay sa pagkahibalo kon unsa nga pulong ang litokon samtang magtudlo o pagpalambo lang kini sa akong gugma alang sa akong mga gitudloan, apan ang pagpuasa sa gihapon naghimo og kalainan.
Mao nga, sa usa ka sulagma nga adlawng Miyerkoles atol sa akong pagka-isolate, nagpuasa ko—alang sa mga kalbasa.
Apan nagpuasa usab ako alang sa akong pamilya ug kanako aron mobati sa gugma sa Manluluwas atol sa malisod nga panahon.
Paglabay sa pipila ka semana, nakauli na gyod ko sa balay. Dihang ang akong papa midala kanako ngadto sa iyang umahan sa kalbasa, nakakita ako og gatosan ka dagkong mga kalbasa. Dagko kaayo kini! Tinuod gayod nga usa kini ka milagro. Dili ko katuo niini.
Akong gibati nga ang Langitnong Amahan nahibalo bahin sa akong pamilya niana nga higayon.
Pagdapit sa Gugmang Putli ni Kristo diha sa Inyong Pamilya
Kini nga kasinatian dili lamang mahitungod sa milagro sa higanting mga kalbasa (ug oo, ang akong mga bukton nanakit lang gihapon kon maghunahuna ko mahitungod sa pag-ani niini). Alang kanako, ang milagro mao ang pagkaamgo unsa kadako sa gugma nga ikapadala ni Jesukristo sa atong mga panimalay ug sa atong mga pakigrelasyon sa pamilya kon kita molihok inubanan sa pagtuo.
Nasayod ako nga ang Langitnong Amahan nakakita sa tanan nga atong atubangon diha sulod sa atong mga pamilya. Nahibalo Siya sa atong mga kabalaka ug sa mga kalisod, ug motabang Siya kanato nga makapahayag sa gugma kon mangayo kita sa Iyang tabang. Gani nakita Niya nga ang butang nga ingon og dili kaayo mahinungdanon sama sa usa ka luna nga gitamnan og kalbasa nga importante sa akong pamilya ug mitabang kanako sa pagkakita og paagi aron mapadangat ang akong gugma alang kanila pinaagi sa makahuloganon ug milagroso nga paagi.
Si Sister Tamara W. Runia, Unang Magtatambag sa Kinatibuk-ang Kapangulohan sa Young Women, bag-ohay lang nga mipakigbahin niining maalamon nga mga pulong:
“Atong i-adjust o usabon ang atong pagtan-aw sa mga relasyon sa pamilya isip ang gamhanang kahigayonan sa pagtudlo kanato sa mga leksiyon nga kita mianhi dinhi aron mokat-on samtang kita modangop ngadto sa Manluluwas.
“Atong dawaton, diha sa napukan nga kalibotan, walay paagi nga mahimong usa ka hingpit nga kapikas, ginikanan, anak nga lalaki o anak nga babaye, apo, magtutudlo, o higala—apan adunay usa ka milyon nga mga paagi aron mahimong usa ka maayo. … Pinaagi sa pagbayaw sa mga tawo sa atong palibot, kita magdungan nga mabayaw.”
Walay pamilya nga hingpit. Apan kon dapiton nato ang Langitnong Amahan ug si Jesukristo sulod sa atong mga panimalay ug sa mga pakigrelasyon sa atong pamilya, Ilang ikapakita ngari kanato unsaon sa paghigugma sa atong mga pamilya sa mas labawng kahingpit ug motabang kanato nga madapit ang mga milagro sa atong kinabuhi.