“Ang Akong Tambag sa mga Young Adult mahitungod sa Pagpakig-date ug sa Kaminyoon,” Liahona, Hulyo 2025.
Mga Young Adult
Ang Akong Tambag sa Mga Young Adult mahitungod sa Pagpakig-date ug sa Kaminyoon
Ang pagpakig-date usa ka paagi aron mahibaloan kon ang usa ka tawo mao ba ang tukmang tawo nga ikauban sa pagsugod sa usa ka mas taas nga panaw.
Mga paghulagway pinaagi ni Stephen Neilsen
Gusto kong maghunahuna sa pagpakig-date isip usa ka himan.
Ang mga himan makatabang nimo sa pagkab-ot og usa ka piho nga katuyoan. Ang katuyoan sa pagpakig-date mao ang pagpalambo og mga relasyon nga mosangpot sa kaminyoon ug, pinaagi sa pagpadayon niini, mapahinabo ang plano sa Dios alang sa Iyang mga anak.
Ang pagpakig-date usa ka paagi aron mahibaloan kon ang usa ka tawo mao ba ang tukmang tawo nga ikauban sa pagsugod sa usa ka mas taas nga panaw. Sama sa gitudlo ni Presidente Dallin H. Oaks, Unang Magtatambag sa Unang Kapangulohan, “Mga batan-on kong mga higala nga dili pa minyo, motambag kami nga itumong ninyo ang pakig-uban sa lahi nga sekso ngadto sa pakig-date nga may kalagmitang mosangpot sa kaminyoon.”
Kon maghisgot kita mahitungod sa “ngano” sa pagpakig-date, naghisgot kita mahitungod sa pagtukod og mahangtoron nga relasyon. Naghisgot kita mahitungod sa pagkonekta sa atong mga kaugalingon ug sa usag usa ngadto sa Manluluwas. Apan usahay kon dili ta mag-amping, magtutok na lamang kita sa pagpakig-date ug aron makaila og mga tawo nga ang kaminyoon mawala sa atong hunahuna.
Gusto kong motanyag kaninyo og pipila ka tambag kon unsaon nga mapalambo ang inyong kasinatin sa pag-date. Kadaghanan sa akong tambag naggikan sa kaugalingon nakong kasinatian, ug manghinaot ko nga makatabang kini kaninyo.
Himoang Tinuyo ang Pakig-date
Kon pangutan-on ka kon giunsa nimo sa pagpakig-date, hinaot nga ang “pagkamatinguhaon” maoy usa sa imong unang mga tubag. Tugoti kong mosulay sa paghulagway niini gamit ang usa ka sanglitanan.
Kapin sa katunga sa akong panahon ug sa panahon sa akong asawa sa pag-date usa ka long distance. Nahimamat nako si Catherine samtang nag-eskwela mi sa Santiago, Chile. Nagsugod mi sa pag-date, apan mipauli siya sa Antofagasta sa wala pa ko makahuman sa akong kurso. Kay gusto kaming molambo ang among relasyon, kausa o kaduha sa usa ka bulan, mobiyahe ko og 20 ka oras sa bus balik sa Antofagasta sa matag hapon sa Huwebes, mogahin sa kataposan sa semana uban ni Catherince (lakip sa mga serbisyo sa Simbahan) ug mosakay na pod sa bus og laing 20 ka oras ngadto sa Santiago aron makatambong sa akong alas 8:00 sa buntag nga klase sa Lunes.
Sa mga adlaw nga dili kami magkauban, mag-istorya mi sa telepono. Tungod kay wala mi cellphone nianang higayona, mipalit ko og phone plan aron makatawag ko og walay limit nga paggamit sa pangpublikong mga telepono. Mogahin ko og mga oras sulod sa usa ka phone booth, ug kon duna may laing mogamit niini, ibutang ko kini ug manawag na sab ko og balik ni Catherine kon mahuman na sila.
Niining tibuok nga kasinatian, tungod sa daghang babag sa among relasyon, kinahanglan kong magmatinguhaon kon unsaon nako sa pagpakigsulti kang Catherine.
Giawhag ko kamo nga magmainampingon ug magmatinguhaon. Si Presidente Russell M. Nelson mihangyo nga mas tinguhaon nato ang atong pagkadispulo. Makapaningkamot usab kita nga magmahimong matinguhaon sa paagi sa atong pagpakig-date.
Kinahanglang mangutana kita og importanteng mga pangutana:
-
Unsay inyong hunahuna mahitungod sa kinabuhi, pamilya, ug labaw sa tanan, sa Manluluwas?
-
Nasayod ko unsang matang sa mga butang ang inyong buhaton ug dili gustong buhaton, apan unsa diay ang inyong mga pagbati mahitungod sa ebanghelyo?
-
Unsay inyong mga sumbanan ug nga baroganan?
Ang matinguhaong mga pangutana kinahanglan nga ubanan sa pagbuhat og lainlain nga may tinguha nga mga kalihokan. Paglingaw, apan iseguro nga mag-uban usab kamo sa paghimo sa esprituhanong mga butang. Paghimo og mga kalihokan nga makatabang ninyo sa pagsabot ug pag-ilhanay gayod sa usag usa.
Pagtuo batok sa Kahadlok
Human sa pipila ka panahon ninyo nga pag-date, tingali kulba ang pagdesisyon nga magminyo. Gikulbaan gihapon ko hangtod sa panahon nga ako ug si Catherine nagminyo!
Ang pagpili nga magminyo tingali lisod nga desisyon, apan dili kini desisyon nga kausa ra ninyong buhaton. Ang pagpili nga magminyo nagpasabot sa pagpili nga imong pasaligan og balik ang imong mahangtoron nga kompanyon sa tibuok ninyong kinabuhi ug magtambayayong sa paglig-on niana nga pasalig.
Kon duna kamoy mga pangutana mahitungod sa kaminyoon o sa ebanghelyo, kinahanglan nga inyo kining “tun-an og maayo sa [inyong] hunahuna; dayon kinahanglan nga mangutana [sa Ginoo] kon husto ba kini” (Doktrina ug mga Pakigsaad 9:8) Kinahanglan nga pangutan-on usab ninyo ang inyong kaugalingon, “Andam ba akong mopili nga mahimong kabahin niini sa tibuok nakong kinabuhi?”
Dihang naminyo ko, pipila ka mga tawo nangutana nako kon nakulbaan ba ko nga mosangpot lang nga madiborsiyo sama sa akong mga ginikanan. Ang akong tubag mao kanunay ang wala. Dihang nagminyo ko, mihukom ko nga buhaton nako ang bisan unsa aron magmalamposon ang akong kaminyoon. Nagpasabot kana sa inadlaw-adlaw nga pagpili sa pagsunod sa Manluluwas ug malipayong makigminyo sa akong asawa. Wala nako pilia nga ang kahadlok nga madiborsiyo mopakgang sa akong maayo ug tarong nga desisyon.
Si Presidente Jeffrey R. Holland, Akting nga Presidente sa Korum sa Napulog duha ka Apostoles, miingon: “Kon moabot man ang tinuod nga paglamdag, likaye ang tentasyon nga talikdan ang maayo nga butang. Kon husto man kini sa dihang kamo nag-ampo mahitungod niini ug misalig niini ug nagpuyo alang niini, sakto kini sa karon. … Atubanga ang inyong mga pagduha-duha. Kontrolaha ang inyong mga kahadlok. ‘Ayaw wad-a ang inyong pagsalig.’”
Ayaw Hulata ang Kalipay
Ang tinuod mao nga adunay daghan kaninyo kinsa dunay maayo kaayo ug sinserong mga tinguha nga makakita og usa ka kauban sa kinabuhi. Nasayod kamo nga kini usa ka maayo ug matarong nga tinguha, apan kon naglisod kamo sa pagpangita og tawo nga haom kaninyo, bation ninyo nga nahunong ang inyong paglambo sa dalan sa pakigsaad.
Mahitungod niini, si Sister Kristen M. Oaks miingon: Kon nakita ninyo ang inyong kaugalingon nga nagmarka og panahon sa paghulat og tawo nga kaminyoan, hunonga ang paghulat ug sugdi ang pag-andam. Andama ang inyong kaugalingon alang sa kinabuhi—sa edukasyon, kasinatian, ug pagplano. Ayaw paghulat sa kalipay nga ihukyad diha kaninyo. Pangita og mga oportunidad para makaserbisyo ug makakat-on. Ug labaw sa tanan, salig sa Ginoo sa, “pagtawag sa ngalan sa Ginoo matag adlaw, ug pagbarog nga makanunayon diha sa pagtuo niana nga moabot’ [Mosiah 4:11]. Ug mosaad ko nga kon buhaton ninyo, ang kalipay moabot kaninyo.”
Ang inyong panaw diha sa dalan sa pakigsaad wala mahunong tungod kay wala pa kamo maminyo. Anaa pa gihapon kaninyo ang inyong koneksiyon sa pakigsaad ngadto sa Manluluwas. Kon nagsagubang kamo og pagsalikway, pag-inusara, o kahadlok, dad-a Siya diha sa inyong mga panlimbasog. Moabag Siya kaninyo. Motabang Siya kaninyo.
Alang sa uban, ang pakig-date uban sa tuyo nga makakita og mahangtorong ikauban sa kinabuhi dili diha dayon magbunga. Alang sa uban kini magbunga dayon. Bisan unsa pa man, nasayod ko nga ang Dios motuman sa matag usa nga saad nga Iyang gihimo kanato kon magmatinguhaon kita ug mosalig Kaniya.
Bisan asa man kamo sa kalibotan, o unsa may nanghitabo o wala manghitabo sa inyong kinabuhi, tungod kang Jesukristo, makabaton kamo og kalipay sa tanan nga kahimtang. Siya ug ang Iyang mga pagtulun-an mao kanunay ang tubag.