1 E kua akono iora a Adamu i te reo o te Atua, e kua akakite atura i tana au tamariki tamaroa kia tataraara.

2 E kite akaou iora Adamu i tana vaine, e kua anau atura aia e tamaiti, tapa iora i tona ingoa ko Seta: E kua akakakā iora Adamu i te ingoa o te Atua; e kua tuatua akera aia: Kua akono te Atua i tetai uanga noku, ei mono ia Abela, tei tāia e Kaina.

3 E kua eeu maira te Atua iaia uaorai kia Seta, e kare akera aia i taitoito, i na, kua oronga atu aia i tetai atinga arikiia, mei ta tona tuakana ko Abela. E anau akera tana, e tamaroa, e tapa iora i tona ingoa ko Enosa.

4 E akamata iora teia au tangata i te kapiki i te ingoa o te Atu, e kua akameitaki maira te Atu ia ratou;

5 E kua akono iora tetai puka no te akamaaraanga, tei tataia ki te reo o Adamu, e kua orongaia te reira kia ratou ravarai te ka kapiki ki te Atua, kia tata na roto i te vaerua o te akauruanga;

6 E na te reira e apii i ta ratou au tamariki ki te tatau e te tata, e reo oki to ratou tei tika e te iro kore.

7 E teianei ko teia Kautaunga tei vai ana i muatangana, ka vai te reira e tae uatu ki te openga o te ao nei.

8 E teianei ko teia totouanga ta Adamu i tuatua, kia akauruia mai aia e te Vaerua Tapu, e kua akonoia tetai akapapaanga tua no runga i te au tamariki a te Atua. E ko teia oki te puka o te au uki o Adamu, i te na ko anga e: I te au rā i anga ai te Atua i te tangata, ki tona uaorai tu, i angaʼi aia iaia;

9 I te tutu tikai o tona uaorai kopapa, i angaʼi aia ia raua, ko te tane e te vaine, e kua akameitaki atura ia raua, e tapa atura i to raua ingoa ia Adamu, i te rā i angaiaʼi raua e i riro mai ei, ei tangata ora i te enua i runga i te takaianga vaevae o te Atua.

10 E okotai akera anere e toru ngauru to Adamu mataiti i te oraanga, anau akera tana e tamaiti, mei iaia uaorai te tu; e tapa iora i tona ingoa ko Seta.

11 E to Adamu au rā i muri ake i tona anauanga ia Seta ra, e varu ïa anere mataiti, e kua anau mai aia e manganui te au tamariki tamaroa e te au tamariki tamaine;

12 E to Adamu ra au rā katoa i te oraanga, e iva ïa anere e toru ngauru te mataiti, e mate iora aia.

13 E okotai akera anere e rima ara to Seta mataiti i te oraanga, e anau iora tana ko Enosa, e kua totou iora i roto i tona au rā katoa, ma te apii i tana tamaiti ia Enosa i te au mataara o te Atua; e kua totou katoa a Enosa.

14 E noo iora Seta i muri ake i tona anauanga ia Enosa ra, e varu akera anere e itu ara te mataiti, e kua anau mai aia e manganui te au tamariki tamaroa e te au tamariki tamaine.

15 E kua tupu atura te tamariki a te tangata ki te maata rava i runga i te aro o te enua. E i taua au rā kua tutara maata a Satani ki rungaʼo i te au tangata, e te riri o te ngakau; e mei reira atu, kua tupu te tamaki e te akamaringianga toto; e kua iri te rima o te tangata ki rungaʼo i tona taeake tika, i te tamateanga atu, no te mea e angaanga muna oki teia, i te kimianga kia tutara.

16 E to Seta au rā katoa, e iva ïa anere, okotai ngauru e rua ara te mataiti, e mate iora aia.

17 E iva akera ngauru to Enosa mataiti i te oraanga, e anau akera tana ko Kainana. Kua aere maira a Enosa ma te katoaanga o te au tangata o te Atua mei te enua ko Suloni, e noo ki te enua taputou, tana i tapa ki tana uaorai tamaiti, ko Kainana.

18 E noo iora Enosa i muri ake i tona anauanga ia Kainana e varu akera anere, okotai ngauru e rima ara i te mataiti, e kua anau mai aia e manganui te au tamariki tamaroa e te au tamariki tamaine. E to Enosa au rā katoa, e iva ïa anere e rima ara te mataiti, e mate iora aia.

19 E itu akera ngauru to Kainana mataiti i te oraanga, e anau akera tana ko Maalaleela; e noo iora Kainana i muri ake i tona anauanga ia Maalaleela e varu akera anere e ā ngauru mataiti, e anau akera te au tamariki tamaroa e te au tamariki tamaine. E to Kainana au rā katoa, e iva ïa anere, okotai ngauru te mataiti; e mate iora aia.

20 E ono akera ngauru e rima ara to Maalaleela mataiti i te oraanga, e anau akera tana ko Iareda; e noo akera a Maalaleela i muri ake i tona anauanga ia Iareda e varu anere, e toru ngauru ïa mataiti, e anau akera te au tamariki tamaroa e te au tamariki tamaine. E to Maalaleela au rā katoa, e varu ïa anere, e iva ngauru, e rima ara, e mate iora aia.

21 E okotai akera anere, e ono ngauru, e rua ara to Iareda mataiti i te oraanga, e anau akera tana ko Enoka; e noo iora Iareda i muri ake i tona anauanga ia Enoka, e varu akera anere mataiti, e anau akera te au tamariki tamaroa e te au tamariki tamaine. E kua apii iora a Iareda ia Enoka i te au mataara katoatoa o te Atua.

22 E ko teia oki te akapapaanga o te au tamariki tamaroa a Adamu, koia oki te tamaiti a te Atua, e kiaia te Atua uaorai i tuatua mai.

23 E aronga ako ratou i te tuatua-tika, e te apii ra ratou ma te totou; ma te kapiki atu ki te tangata katoatoa, i te au ngai ravarai, kia tataraara; e kua akoia te akarongo ki te tamariki a te tangata.

24 E i na to Iareda au rā katoa, e iva ïa anere, e ono ngauru e rua ara i te mataiti; e mate iora aia.

25 E ono akera ngauru e rua ara to Enoka mataiti i te oraanga, e anau akera tana ko Metusela.

26 E i na kua aaere iora a Enoka i runga i te enua, i rotopu i te tangata; e i tona aaere ua anga, kua eke maira te vaerua o te Atua mei te rangi mai, e noo iora ki rungaʼo iaia.

27 E kua akarongo iora aia i te reo no te rangi mai i te na ko anga mai e: E taku tamaiti e Enoka, ka totou ana ki teia au tangata, e na ko atu koe kia ratou—E tataraara, te tuatua maira te Atu: Kua riri au ki teia au tangata, e toku riri otooto tei runga ïa ia ratou; kua marokiakia oki to ratou ngakau, e kua turi oki to ratou taringa i te akarongoanga, e kare to ratou mata e kite mamao ana;

28 E ko teia au uki e manganui, mei te au rā i anga ai au ia ratou, kua aere ke ana, e kua patoi mai iaku, e kua kimi i to ratou uaorai inangaro i te poiri; e i roto i ta ratou uaorai angaanga viivii, kua okotai akera ratou kia tā, e kare rava ratou i akono i te au akaueanga, tei orongaia atu e au ki to ratou metua, kia Adamu.

29 No reira, kua taputou takere ana ratou, e na roto i ta ratou taputou, kua apai mai ratou ki rungaʼo ia ratou i te mate; e ade tei teateamamaoia e au no ratou, me kare ratou e tataraara;

30 E ko teia oki te akaue, taku i oronga atu i te kapuaanga o te ao nei, mei roto atu i toku vaa, mei te akatangoangaia mai, e na roto atu oki i te vaa o toku au tavini, koia to kotou au metua, i akakite atu ei au i te reira, mei te reira kotou te tonoangaia ki to te ao, kia tae ki te openga.

31 E kia akarongo akera a Enoka i teia au tuatua, kua tipapa iora aia ki runga i te one, ki mua i te Atu, e kua na ko atura ki te Atu: No te aa koe i manako meitaki mai iaku, e tamaiti iti ua au, e te makitakita maira te tangata iaku; e marie oki au i te tuatua; akapeea ei tavini au noou?

32 E kua tuatua maira te Atua kia Enoka: Ka aere koe e rave i taku i akaue atu ia koe, e kare rava e tangata e tā mai ia koe. E amama i to vaa, e akakīia ïa, e naku e oronga atu i te tuatua, pouroa te kopapa tei roto ïa i toku rima, e ka rave au mei tei tau iaku.

33 E tuatua atu ki teianei au tangata: Ka iki ana kotou i teia rā kia kauraro ki te Atu ra ko te Atua tei anga ia kotou.

34 I na oki tei runga toku vaerua ia koe, no reira pouroa ta kotou tuatua ka akatika au; e ka rere ke te au maunga na mua ia koe, e ka taoki te au kauvai mei to ratou ngai i aere mai ei, e ka noo koe kiaku nei, e au kia koe; no reira ka aaere taua.

35 E kua tuatua akera te Atu kia Enoka, na ko atura: E akatainu i to mata ki te vari, e tamā, ei reira koe e kite ei. Kua rave iora aia.

36 E kite iora aia i te au vaerua ta te Atua i anga; e kite katoa atura aia i te au mea kitea kore ia e te mata kopapa kia akara; e i taua atianga rai, kua tae mai te reo mei runga mai i te enua: E akara i ta te Atua i akatu mai no tona au tangata.

37 E i na kua aere atu a Enoka na runga i te enua, ki rotopu i te au tangata, tu atura aia ki runga i te au tuaivi i te au ngai teitei, ma te kapiki ma te reo maata, i te akapapuanga atu i ta ratou angaanga; e kua riri pouroa te au tangata iaia.

38 E kua aere maira ratou kiaia, kia rongo i tana tuatua, i runga i te au ngai teitei, i te na ko anga ki te au tiaki puakapa: E noo kotou i konei e akara i te au puakapa, ka aere matou ki ko ake, kia kite i te akara, te totou ra aia, e mea umere tei runga i te enua; e tangata taetaevao tei rotopu ia tatou.

39 E i na kia akarongo akera ratou iaia, e mataku maata tei tae mai ki rungaʼo ia ratou, kare ra oki e rima tangata e amiri atu iaia; no te mea kua aaere raua ko te Atua.

40 E kua aere maira tetai tangata kiaia, ko Maita tona ingoa, e kua tuatua maira kiaia: E akakite papu mai koe kia matou koai koe na, e noea mai koe i te aereanga mai?

41 Kua karanga atura aia kia ratou: No te enua mai au o Kainana, te enua o toku au metua, e enua tuatua-tika e tae rava mai ki teia rā. E kua apii mai toku metua iaku i te au mataara katoatoa o te Atua.

42 E i na, i toku aaereanga mai mei te enua o Kainana, na te pae tai i te itinga, kua kite iora au i tetai orama; e i na, ko te rangi taku i akara, e kua tuatua maira te Atua kiaku, e kua oronga mai i te au akaueanga kiaku; no reira, ko teia te tumu tikai, kia akonoia te akaueanga, e karanga atu ei au i teia au tuatua.

43 E kua tamou uatu rai a Enoka i tana tuatua i te na ko anga atu e: Ko te Atu tei tuatua mai kiaku, ko te Atua rai o te rangi, e ko toku ïa Atua, e to kotou rai Atua, e au taeake kotou noku, eaa kotou i koumuumu uaʼi ia kotou uaorai, e te patoi atu i te Atua o te rangi?

44 Nana i anga i te au rangi; ko te one oki tona takaianga vaevae; e te tango ra, nona ïa. I na, nana i tuku i te reira, e manganui te au tangata tana i arataki mai ki rungaʼo i te reira.

45 E kua tae mai te mate ki runga i to tatou au metua; kareka ra, kua kite tatou ia ratou, kare e rauka kia patoiia, e ko te mua tikai ta tatou i kite ko Adamu ïa.

46 Kua tata oki tatou i tetai puka akamaaraanga, kia tau ki te akanooanga a te mangamanga rima o te Atua; e i orongaia mai te reira i to tatou uaorai reo.

47 E to Enoka tuatua atu anga i te au tuatuaanga o te Atua, kua ruketekete iora te tangata, e kare rava e rauka i te tangata i te tu ki mua i tona aroaro.

48 E kua tuatua akera aia kia ratou: No te mea oki e kua inga a Adamu, kua riro mai tatou; e na roto i tona ingaanga i rauka mai ei te mate; e kua riro tatou ei aronga maromaroa, e te taitaia.

49 I na kua tae mai a Satani ki rotopu i te tamariki a te tangata, e kua timata ia ratou kia akamori iaia; e riro maira te tangata ei aronga anoano kopapa, ei manako kore, e ei akamori diabolo, e topiriia ratou ki vao mei mua atu i te aroaro o te Atua.

50 I na, kua akapapu meitaki te Atua ki to tatou au metua, e kia tataraara te au tangata ravarai e tikaʼi.

51 E kua tuatua atura aia ki to tatou metua kia Adamu, na roto i tona uaorai reo, i te na ko anga: Ko au te Atua; naku i anga i te ao, e te tangata, i mua ake ka rauka mai ei te kopapa.

52 E kua tuatua katoa atu aia kiaia: Me ariu mai koe kiaku, e ka akarongo mai i toku reo, e ma te irinaki, ma te tataraara i taau au aati ture katoatoa, e kia bapetizoia, ki raro i te vai, na roto i te ingoa o taku Tamaiti Anau Tai, tei kī i te aroa ua e te tuatua-mou, koia a Iesu Mesia, te ingoa okotai tei orongaia mai i raro ake i te rangi e rauka mai ei te akaoraanga ki te tamariki a te tangata nei, ka rauka ia koe te orongaanga o te Vaerua Tapu, i te patianga i te au mea katoa i tona ra ingoa, e noatu e eaa taau ka pati, e orongaia mai te reira kia koe.

53 E kua tuatua atura to tatou metua ko Adamu ki te Atu, na ko atura: No te aa te tangata ka tataraara ai, e bapetizo ki raro i te vai? Kua na ko maira te Atu kia Adamu: I na kua akakore au i taau atianga ture i roto i te Kainga i Edene.

54 No reira kua aere atura te rongo i rotopu i te au tangata, e kua taranga ara te Tamaiti a te Atua no te apa mua, no reira te au ara a te au metua, kare te reira e iri ki runga i te upoko o te au tamariki, no te mea e apakore ratou mei te tango mai o te ao nei.

55 E kua tuatua maira te Atu kia Adamu, i te na ko anga: No te mea kua toia taau au tamariki i roto i te ara, e me tupu ratou ki te maataanga, ka tupu rai te ara ki te maataanga i roto i to ratou ngakau, e ka tongi ratou i te kavangu, ei reira ratou e kite ei e ka inangaroia te mea reka.

56 E kua orongaia kia ratou kia kite i te meitaki mei te kino; no reira kua riro mai ratou ei pu kia ratou uaorai, e kua oronga atu au kia koe i tetai ture ou e te akaueanga.

57 No reira e apii ki taau au tamariki, pouroa te au tangata ravarai kia tataraara e tikaʼi, me kore ra kare rava ratou e ariki i te basileia o te Atua, no te mea kare oki e tika i te mea viivii kia noo ki reira, me kore ra kia noo ki mua i tona aroaro; i te reo o Adamu, ko te Tangata o te Tapu Nui tona ïa ingoa, e te ingoa rai ïa o tana Tama Anau Tai koia te Tamaiti a te Tangata, koia a Iesu Mesia, te Akava tuatua-tika, te ka tae mai i rotopu tikai i te au tuatau.

58 No reira te oronga atu nei au kia koe i te akaueanga, kia apii ua koe i te reira ki taau au tamariki, i te na ko anga atu e:

59 No roto mai i te aatiangaia o te ture i tae mei ei te ingaanga, na te ingaanga i tae mai ei te mate, i te mea oki e kua anauia koe ki te ao nei e te vai, e te toto, e te vaerua, tei angaia e au, i riro mai ei no roto i te one pueu ei tangata ora, e no reira kia anau akaou ia koe ki roto i te basileia o te ao, na roto i te vai, e te Vaerua, e kia tamāia e te toto, koia te toto o taku Tama Anau Tai; kia akatapuia koe mei te au ara ravarai, e kia mataora i te au tuatua o te ora mutukore i teia ao, e te ora mutukore i te ao te ka tae mai, koia te kakā o te kopapa mate kore;

60 Na te vai e akono ei koe i te akaueanga; na te Vaerua e akatika ia koe, e na te toto e akatapu ia koe;

61 No reira kua orongaia mai teia kia noo kia koe; te puka o te rangi; te Akapumaana; te nooanga au o te au mea kakā o te kopapa mate kore; te tuatuamou o te au mea ravarai; te ka akakeu i te au mea ravarai, te ka akaoraora i te au mea ravarai; ko te kite i te au mea ravarai, e tei mou i te mana katoatoa kia tau ki te pakari, te aroa ua, te tuatua-mou, te tuatua-tika, e te akavaanga.

62 E teianei, i na, te karanga atu nei au kia koe: Ko teia te parani o te akaoraanga no te au tangata katoatoa, na roto i te toto o taku Tama Anau Tai, te ka tae mai i rotopu tikai i te au tuatau.

63 E i na, kua rauka te tu aiteite i te au mea ravarai, e kua oti i te angaia te au mea ravarai kia akakite mai ratou i te tuatua noku, te au mea kopapa nei e te au mea vaerua; te au mea o roto i te rangi i runga, e te au mea o rungaʼo i te enua, e te au mea o roto i te one, e te au mea no raro ake i te enua, to runga e to raro ake: ka akakite pouroa mai te au mea katoatoa i te tuatua noku.

64 E i na, kia oti akera ta te Atua tuatuaanga kia Adamu, to tatou metua, kua kapiki atura Adamu ki te Atu, e kua rave ke ia atu aia e te Vaerua o te Atu, e kua apaiia atu aia ki raro i te vai, e akamoe iora iaia ki raro i te vai, kua apaiia mai aia ki vao i te vai.

65 E i na, kua bapetizoia aia, e kua eke maira te Vaerua o te Atua ki rungaʼo iaia, e i reira kua anauia aia e te Vaerua, e kua akakeuia mai ei tangata oraora i roto iaia.

66 E akarongo akera aia i te reo no te rangi mai, i te na ko anga mai: Kua bapetizoia koe ki te aʼi, e te Vaerua Tapu. Ko te tika teia a te Metua e te Tamaiti mei teianei e tuatau uatu;

67 Ko koe oki tetai tei na roto mai i te akanooanga ona ra, tei kore ona akamataanga rā, me kore ra e openga o te au mataiti, mei te au mutukore ki te au mutukore.

68 I na, ko koe tetai i roto iaku, e tamaiti na te Atua; e me ka rauka pouroa mai kia riro ei au tamariki naku. Amene.