1 At sa gayon matatapos natin ang langit at ang lupa, at lahat na kinapal niyon.

2 At sinabi ng mga Diyos sa kanilang sarili: Sa ^aikapitong pagkakataon ay tatapusin natin ang ating gawain, na ating pinag-usapan; at tayo ay mamamahinga sa ikapitong pagkakataon mula sa lahat ng ating gawain na ating pinag-usapan.

3 At winakasan ng mga Diyos ang mga gawain sa ikapitong pagkakataon, sapagkat sa ikapitong pagkakataon sila ay ^amamamahinga mula sa lahat ng kanilang gawain na kanilang (ang mga Diyos) napag-usapang maanyuan; at ^bipinangilin ito. At ganito ang kanilang mga naging kapasiyahan nang nag-usap-usap sila tungkol sa paghubog ng kalangitan at ng lupa.

4 At ang mga Diyos ay bumaba at hinubog nga ito, ang kasaysayan ng kalangitan at ng lupa, nang sila ay mahubog sa araw na hubugin ng mga Diyos ang lupa at ang kalangitan,

5 Alinsunod sa lahat ng kanilang sinabi hinggil sa lahat ng halaman ng parang ^abago ito nailagay sa mundo, at bawat pananim sa parang bago ito tumubo; sapagkat hindi pa pinauulanan ng mga Diyos ang lupa nang sila ay mag-usap na gawin ang mga ito, at hindi pa humuhubog ng tao upang magbungkal ng lupa.

6 Ngunit may isang ulap na pumaitaas buhat sa lupa, at dinilig ang ibabaw ng buong lupa.

7 At hinubog ng mga ^aDiyos ang tao mula sa ^balabok ng lupa, at kinuha ang kanyang ^cespiritu (iyon ay, ang espiritu ng tao), at inilagay ito sa kanya; at hiningahan ang kanyang ilong ng hininga ng buhay, at ang tao ay naging ^dkaluluwang may buhay.

8 At ang mga Diyos ay naglagay ng isang halamanan sa dakong silangan ng ^aEden, at doon nila inilagay ang tao, kung aling espiritu ay inilagay nila sa katawan ng kanilang hinubog.

9 At pinatubo ng mga Diyos sa lupa ang lahat ng punungkahoy na nakalulugod sa paningin at mabubuting kainin; gayon din ang ^apunungkahoy ng buhay, sa gitna ng halamanan, at ang punungkahoy ng pagkakilala ng mabuti at masama.

10 May isang ilog na dumadaloy mula sa Eden, na dumidilig sa halamanan, at mula roon ito ay nahati at nag-apat na sanga.

11 At kinuha ng mga Diyos ang lalaki at inilagay siya sa Halamanan ng Eden, upang kanyang alagaan ito at ingatan ito.

12 At inutusan ng mga Diyos ang lalaki, nagsasabing: Sa lahat ng punungkahoy sa halamanan ay malaya kang makakakain,

13 Subalit ang punungkahoy ng pagkakilala ng mabuti at masama, ay huwag kang kakain nito; sapagkat sa oras na kumain ka niyon, walang pagsalang mamamatay ka. Ngayon, ako, si Abraham ay nakitang ito ay ayon sa ^aoras ng Panginoon, na alinsunod sa oras ng ^bKolob; sapagkat sa ngayon ay hindi pa naitakda ng mga Diyos kay Adan ang kanyang pagbilang.

14 At sinabi ng mga Diyos: Gumawa tayo ng makakatuwang ng lalaki, sapagkat hindi mabuti na ang lalaki ay mag-isa, kaya nga, tayo ay huhubog ng makakatuwang niya.

15 At pinapangyari ng mga Diyos na mahimbing na makatulog si ^aAdan; at siya ay natulog, at kinuha nila ang isa sa kanyang mga tadyang, at pinapaghilom ang laman sa dakong yaon;

16 At mula sa tadyang na kinuha ng mga Diyos sa lalaki, ay hinubog nila ang isang ^ababae, at dinala siya sa lalaki.

17 At sinabi ni Adan: Ito ay buto ng aking buto at laman ng aking laman, ngayon, siya ay tatawaging Babae, sapagkat siya ay kinuha sa lalaki ;

18 Kaya nga iiwan ng isang lalaki ang kanyang ama at kanyang ina, at ^amakikipisan sa kanyang asawa, at sila ay magiging ^bisang laman.

19 At sila ay kapwa hubad, ang lalaki at ang kanyang asawa, at sila ay hindi nagkakahiyaan.

20 At hinubog ng mga Diyos mula sa lupa ang lahat ng hayop sa parang, at lahat ng ibon sa himpapawid, at dinala ang mga ito kay Adan upang malaman kung ano ang kanyang itatawag sa mga iyon, at anuman ang itawag ni Adan sa bawat kinapal na may buhay, yaon ang naging pangalan niyon.

21 At pinangalanan ni Adan ang lahat ng hayop, at ang ibon sa himpapawid, at ang bawat ganid sa parang; at para kay Adan, may natagpuang maging katuwang niya.