1 Iehova ihanamona be namo.Herea Mikamika e, oi ladamu iheatolaina be namo:

2 emu hebogahisi igwauraina daba ai,bona emu heabidadama hanuaboi ai,

3 gitara bona ivilikou reḡedia amo,bona hatai-hatai ḡauna reḡena amo.

4 Badina be, Iehova e, oi ese emu ḡaukara amo vada o hamoalegu;oi imamu ḡaukaradia daidiai ane na abimu mai moalegu ida.

5 Iehova e, emu ḡaukara na babada;emu lalo-hadai na dodobu heherea.

6 Lalo duhu tauna basine diba,kavakava tauna lalona basine parara:

7 ena be kara dika taudia na bae vara rei na heto,ena be kara havara taudia na bae tubu,to bae bua tari hanaihanai.

8 A oi, Iehova e, na atai ai hanaihanai;

9 Iehova e, oi inaimu ba itadia.A itaia, oi inaimu bae mase ore,kara dika taudia iboudiai bae karoho.

10 A oi ese egu doa vada o duduia isi,uda boromakauna maruanena doana na heto;dehoro matamata na latagu ai vada o seia.

11 Lau matagu ese inaigu ihadareredia vada e itaia,bona lau taiagu ese e kara havara henigu taudia ihabua-taridia reḡedia vada e kamonai.

12 Kara maoromaoro taudia na e varamu, pamu auna na heto,e tubumu, Lebanon sidana auna na heto;

13 Iehova ena ruma ai vada e hadodia,eda Dirava ena ikoukou ai e tubumu.

14 Sene audia na huahuadia dounu e havaramu;todedia e arumu, rau matamatadia e hekaramu;

15 unu ese e hahedinaraiamu Iehova na maoromaoro.Ia na egu nadi-gini;ia lalonai na asi kara dikana ta.